Guillain Barre Syndrome: जीबीएसच्या पार्श्वभूमीवर पुण्यात मोठी कारवाई, दूषित पाणी आढळलेल्या 'त्या' आरओ प्लांटला महापालिकेने ठोकलं टाळं
Guillain Barre Syndrome: महापालिका आयुक्तांनी अशा आरओ प्लांटवर कारवाईचा आदेश सोमवारी दिले आहेत. त्यानंतर मंगळवारी दूषित पाणी आढळलेल्या 19 प्लांटला टाळे ठोकले असल्याची माहिती समोर आली आहे.
पुणे: पुण्यासह राज्यात गुलेन बॅरी सिंड्रोम (Guillain Barre Syndrome)ची रूग्णसंख्या मोठ्या प्रमाणावर वाढताना दिसत आहे. या आजारासाठी कारणीभूत ठरणाऱ्या दुषित पाण्याची चाचपणी देखील केली जात आहे. यावरून महानगर पालिका देखील ॲक्शन मोडवरती आल्याचं दिसून येत आहे. अशातच काही खासगी पाणी शुद्धीकरण प्रकल्पांच्या ठिकाणाहून (आरओ प्लांट) दूषित पाणीपुरवठा करत नागरिकांच्या जिवाशी खेळ करत असल्याचा संतापजनक प्रकार समोर आला आहे. पिण्याच्या शुद्ध पाण्यासाठी पैसे मोजूनही काही खासगी पाणी शुद्धीकरण प्रकल्पांनी (आरओ प्लांट) दूषित पाणीपुरवठा करून नागरिकांच्या जिवाशी खेळत असल्याचा प्रकार आहे. महापालिका आयुक्तांनी अशा आरओ प्लांटवर कारवाईचा आदेश सोमवारी दिले आहेत. त्यानंतर मंगळवारी दूषित पाणी आढळलेल्या 19 प्लांटला टाळे ठोकले असल्याची माहिती समोर आली आहे.
पुणे महापालिकेतील नांदेड, किरकटवाडी, नांदोशी, धायरी, डीएसके विश्व, आंबेगावसह सिंहगड रस्ता परिसरातील गावांमध्ये गुलेन बॅरी सिंड्रोम (Guillain Barre Syndrome)चे (जीबीएस) रुग्ण मोठ्या प्रमाणावर आढळून आले होते. महापालिका प्रशासनाने त्यावर नियंत्रण आणण्यासाठी उपाययोजना सुरू केल्या होत्या. प्रारंभी खासगी टँकर भरणा केंद्र आणि पाण्याची तपासणी केल्यानंतर संबंधित पाण्यात कॉलीफॉर्म जिवाणू असल्याचे निष्पन्न झाले होते. त्यानुसार संबंधितांना महापालिकेने पत्रे पाठवली होती, तसेच पाणी शुद्ध करून पुरवठा करण्याच्या सूचना दिल्या होत्या. दरम्यान, महानगरपालिकेने 28 जानेवारीला 30 आरओ प्लांटमधील पाण्याचे नमुने तपासणीसाठी घेतलेले होते.
त्यासंबंधीच्या अहवालात 19 आरओ प्लांटमधील पाण्यात ई-कोलाय व अन्य जिवाणू आढळून आले होते. या दूषित पाण्याचा पुरवठा संबंधित आरओ प्लांट चालकांकडून केला जात असल्याचा संतापजनक प्रकार समोर आला होता. या प्रकरणाची पुणे महानगर पालिका आयुक्त डॉ. राजेंद्र भोसले यांनी या प्रकाराची गांभीर्याने दखल घेत, सोमवारी संबंधित आरओ प्लांटवर कायदेशीर कारवाई करण्याचा आदेश पाणीपुरवठा विभागाला दिला होता. त्यानंतर मंगळवारी 19 आरओ प्लांटला टाळं ठोकण्यात आलं आहे. मात्र अद्यापही खासगी टँकरसह पाणी भरणा केंद्रावर कारवाईचा बडगा उगारलेला नाही. संबंधितांना पाणी शुद्ध करण्यासाठी ब्लिचिंग पावडरचा वापर करण्याचं आवाहन देखील महानगर पालिकेकडून करण्यात आलं आहे.
कोणत्या प्रकल्पांवर पालिकेची कारवाई?
माउली अॅक्वा, धायरी
युगंधर चाकणकर, धायरी
बालाजी अॅक्वा
रायकरमळा, धायरी
नालंद अॅक्वा
कोमल अॅक्वा
किरण अॅक्वा
सदगुरू अॅक्वा
धायरेश्वर अॅक्वा- 1
धायरेश्वर अॅक्वा - २
शिवालय अॅक्वा
प्रदीप कोरडे, कोरडे बाग
पंकज पायगुडे, जलधारा फ्रेश
नीलेश करंजकर अॅक्वा
किशोर पिंपळकर अॅक्वा
विजय कोल्हे अॅक्वा
सागर कोल्हे अॅक्वा
मोहन कोल्हे अॅक्वा
चव्हाण वस्ती, धायरी
खासगी टँकर व पाणी भरणा केंद्रांनंतर आरओ प्लांटमधील पाण्याचे नमुने महानगरपालिकेने तपासणीसाठी घेतले होते. त्यामध्ये 19 आरओ प्लांटमधील पाणी दूषित आढळले आहे. त्यानुसार संबंधित आरओ प्लांटला टाळे ठोकण्यात आले आहेत, अशी माहिती पुणे महापालिकेचे पाणीपुरवठा विभाग प्रमुखांनी दिली आहे.
Check out below Health Tools-
Calculate Your Body Mass Index ( BMI )
महत्त्वाच्या बातम्या
