पुणे : प्रांजल खेवलकर प्रकरणात पुणे पोलिसांनी न्यायालयात तपासाची माहिती सादर केली आहे. या माहितीमधे प्रांजल खेवलकर यांच्या जप्त करण्यात आलेल्या मोबाईलमधे छेडछाड करण्यात आल्याचा दावा पोलिसांनी केला. ही छेडछाड प्रांजल खेवलकर यांच्या पत्नी आणि शरद पवारांच्या राष्ट्रवादी काँग्रेसच्या नेत्या रोहिणी खडसे यांच्या सांगण्यावरुन करण्यात आल्याचा दावा पोलिसांनी केला. त्यामुळे रोहिणी खडसे यांच्यासमोरील अडचणी वाढ होण्याची शक्यता आहे.
नेमकं काय घडलं?
प्रांजल खेवलकर यांना पुणेपोलिसांनी पार्टी प्रकरणात अटक केल्यानंतर त्यांच्याकडून दोन मोबाईल जप्त करण्यात आले. त्यापैकी एका मोबाईलमधील सीम कार्ड हे सोनार नावाच्या व्यक्तीच्या नावावर होते.
प्रांजल खेवलकर अटकेत असताना सोनार नावाच्या व्यक्तीने त्याच्या नावावर असलेले सीम कार्ड हरवल्याचा दावा करत त्याच नंबरचे दुसरे सीम कार्ड खरेदी केले. ते कार्ड नवीन मोबाईलमधे टाकले आणि त्या मोबाईलच्या माध्यमातून त्या नंबरचा सगळा डेटा डीलीट केला.
सोनारने केलेले हे कृत्य पुरावे नष्ट करण्याचा प्रकार असल्याचं पुणे पोलीसांच म्हणणं आहे. सोनार हा जळगाव जिल्ह्यातील असून सोनारने केलेले हे कृत्य त्याने रोहिणी खडसेंच्या सांगण्यावरुन केल्याची माहिती पोलिसांना दिली असा पोलीसांचा दावा आहे. यामुळे रोहिणी खडसे अडचणीत येऊ शकतात.
प्रांजल खेवलकरांच्या मोबाईलमध्ये आक्षेपार्ह व्हिडीओ
प्रांजल खेवलकर यांच्या फोनमध्ये काही आक्षेपार्ह व्हिडीओ आणि चॅट सापडल्याची माहिती पुणे पोलिसांनी न्यायालयात दिली. प्रांजल खेवलकर याने एका मुलीचे व्हिडीओ दुसऱ्या आरोपीला पाठवत 'ऐसा माल चाहिए' असा मेसेज केला आहे. या सर्व प्रकरणाचा तपास करायचा आहे. त्यामुळे आरोपींची पोलीस कोठडी वाढवून द्यावी अशी मागणी सरकारी वकिलांनी केली.
कोण आहेत प्रांजल खेवलकर?
प्रांजल खेवलकर राज्यातील ज्येष्ठ नेते एकनाथ खडसे यांचे जावई आहेत. राष्ट्रवादी महिला प्रदेशाध्यक्षा रोहिणी खडसे यांचे ते दुसरे पती आहेत, पहिल्या पतीसोबत घटस्फोट घेतल्यानंतर रोहिणी खडसे यांनी त्यांचा बालपणीचा मित्र असलेल्या प्रांजल खेवलकर यांच्यासोबत लग्न केलं. सध्या खेवलकर आणि खडसे कुटुंबीयांचं मुक्ताईनगरमध्ये वास्तव्य आहे. प्राजंल खेवलकरांचा जमीन खरेदी विक्रीचा व्यवसाय आहे. पत्नी रोहिणी खडसे राजकारणात सक्रिय आहे, पण पती प्रांजल हे राजकारणापासून लांब आहेत. खेवलकर रिअल इस्टेट, इव्हेंट मॅनेजमेंटचे व्यावसायिक आहे. त्यांच्या नावावर साखर आणि ऊर्जा क्षेत्रातील कंपन्या आहेत. याशिवाय प्रांजल यांच्या नावावर एक ट्रॅव्हल कंपनी असल्याची माहितीही समोर आली आहे.
ही बातमी वाचा: