Pune Water Cut: वारीनंतर पुन्हा पाणीकपात; १५ जुलैपासून शहरात एक दिवसाआड पाणीपुरवठा, भविष्यात पाण्याची टंचाईच्या पार्श्वभूमीवर प्रशासनाचा मोठा निर्णय

Moshi Building Collapsed : मोशी दुर्घटनेप्रकरणी कुलकर्णी-आल्हाटचे निलंबन, पण आयुक्तांचं गुन्ह्यापासून अभय!

नाजीम मुल्ला, एबीपी माझा, पिंपरी चिंचवड — Wed, 15 Jul 2026 14:58:33 +0530

पिंपरी चिंचवड : पिंपरी चिंचवड येथील मोशी दुर्घटनेबाबत एक मोठी अपडेट समोर आली आहे. मोशी दुर्घटनेप्रकरणी (Moshi Building Collapsed) पर्यावरण विभागाचे प्रमुख संजय कुलकर्णी आणि कार्यकारी अभियंता योगेश आल्हाट यांचे निलंबन करण्यात आलं आहे. या प्रकरणी एबीपी माझाने वारंवार प्रश्न उपस्थित केले होते, त्याप्रकरणी आता मोठी कारवाई करण्यात आली आहे, या दुर्घटनेत काहींचा बळी गेला, तर काही जण जखमी झाले होते, याप्रकरणी आता दोघांवर निलंबनाची कारवाई झाली आहे.(Moshi Building Collapsed)

पर्यावरण विभागाचे प्रमुख संजय कुलकर्णी कार्यकारी अभियंता योगेश अल्हाट यांच निलंबन करण्यात आलेला आहे. एबीपी माझा ही बातमी सातत्याने लावून धरलेली होती, मोठं रेस्क्यू ऑपरेशन देखील या सगळ्यामध्ये सुरू झालेलं होतं आणि हा संपूर्ण गोष्टीचा पाठपुरावा करत असताना काही प्रश्न देखील एबीपी माझा उपस्थित केलेले होते आणि यासंबंधीचे प्रश्न उपस्थित झाल्यानंतर आता एक मोठी कारवाई होताना पाहायला मिळते, पिंपरी चिंचवड मोशी दुर्घटने प्रकरणी पर्यावरण विभागाचे प्रमुख संजय कुलकर्णी आणि
कार्यकारी अभियंता योगेश अल्हाट यांच निलंबन झाल्याच समजत आहे. कचरा डेपोच्या बाजूलाच ही बिल्डिंग होती. तीन मजली ही इमारत कोसळलेली होती. या दुर्घटनेमध्ये जीव गमावलेला आहे आणि अशातच आता एक मोठी कारवाई होताना पाहायला मिळते आहे.(Moshi Building Collapsed)

मोशी दुर्घटना झाली तेव्हापासून पर्यावरण विभागाचं लक्ष त्यांच्यावरती होतं आणि आता महानगरपालिकेचे आयुक्त डॉक्टर विजय सूर्यवंशी यांनी पर्यावरण विभागाचे प्रमुख संजय कुलकर्णी यांनी कार्यकारी अभियंता योगेश आल्हाट यांचं सहा महिन्यांसाठी निलंबन केलेले आहे, जोपर्यंत चौकशी सुरू आहे तोपर्यंत त्यांचा कोणताही हस्तक्षेप या सगळ्या कारवाईमध्ये होऊन नये, त्यासाठी हे मोठं पाऊल उचललेलं आहे. त्यांना नोटीस धाडण्यात आलेली होती आणि या नोटिसीच उत्तर बुधवारी सायंकाळी प्राप्त झालं आणि त्यानंतर पुढची मंगळवारी सायंकाळी प्राप्त झाली आणि त्या पुढची पावले उचलण्यासाठी ही निलंबनाची कारवाई केली आहे दुसरीकडे एंथोनी लारा रिनेबल एनर्जी कंपनी या कंपनीच्या दोघांवरती गुन्हे दाखल करण्यात आलेले आहेत, त्यातील एकाला अटक आहे, दुसरा जो आरोपी आहे, त्याच्यावरती उपचार सुरू आहे, त्याच्यामुळे त्याचे उपचार झाल्यानंतर त्याच्यावरती पुढची कारवाई होऊ शकते परंतु यामध्ये कंपनीने जो खुलासा दिलेला आहे, त्यांनाही कार्यालय दाखवा नोटीस देण्यात आलेली होती, तर जो कचरा पडलेला आहे, तो बायो माइनिंग करणाऱ्या कंपनीचा हा कचरा आहे असं त्यांनी म्हटलेलं आहे, त्यामुळे त्यांच्यावरती सुद्धा आता कारवाई होणार का हे पाहणं महत्त्वाचं ठरणार आहे.

Pune Moshi Building Collapse: कुलकर्णी-आल्हाटचे निलंबन, पण आयुक्तांचं गुन्ह्यापासून अभय!

मोशी इमारत दुर्घटनेप्रकरणी पालिका आयुक्त विजय सुर्यवंशींनी मोठी कारवाई केली. पर्यावरण विभागाचे प्रमुख संजय कुलकर्णी आणि कार्यकारी अभियंता योगेश आल्हाट यांचं निलंबन करण्यात आलंय. मात्र पालिका या दोघांवर सदोष मनुष्यवधाचा गुन्हा दाखल करणार नाही, असं म्हणत आयुक्तांनी कुलकर्णी आणि आल्हाट यांना गुन्ह्यापासून अभय दिलंय. आता दाखल गुन्ह्यात सुरु असलेल्या चौकशीत कुलकर्णी आणि आल्हाट यांचा सहभाग दिसला तर पोलीस सदोष मनुष्यवधाचा गुन्हा दाखल करतील, असं म्हणत आयुक्तांनी बचावाचं धोरण घेतलंय. तर ऍंथोनी लारा रिन्यूयेबल एनर्जी कंपनीच्या डायरेक्टर ना सोडून दोन अधिकाऱ्यांना बळीचा बकरा बनवण्यात आलं का? असं विचारलं असता कंपनीने या दोघांवर प्रकल्पाची जबाबदारी टाकली होती अन कंपनीनेचं या दोघांची नावं पालिकेला कळवली. असं आयुक्त म्हणाले. तर दुसरीकडे कंपनीने अनधिकृत इमारतीवर कोसळलेला कचऱ्याचा डोंगर बायोमायनींग करणाऱ्या कंपनीचा होता, असं नोटिशीला उत्तर देताना ऍंथोनी कंपनीने खुलासा केला. त्यामुळं पालिका आता बायोमायनींग करणाऱ्या कंपनीची चौकशी करणार आहे, असं ही आयुक्तांनी स्पष्ट केलं.

Pune Moshi Building Collapse: नेमकं काय घडलं?

मोशी इमारत दुर्घटनेच्या शोधकार्य (Rescue Operation) अखेर पूर्ण झालं आहे. तब्बल 81 तास लागले. बुधवारी दुपारी 2 वाजता सुरु झालेलं शोधकार्य मध्यरात्री 1 वाजता संपलं. या दुर्घटनेत 9 कामगारांचा मृत्यू झाला आहे. तर सुदैवाने 14 कामगार बचावले आहे.पिंपरी चिंचवड महापालिकेच्या (PCMC) मोशी येथील कचरा डेपोतील 'वेस्ट टू एनर्जी' (Waste-to-Energy) प्रकल्पाच्या प्रशासकीय इमारतीवर कचऱ्याचा डोंगर कोसळल्याची दुर्घटना घडल्यानंतर आता अनेक प्रश्न उपस्थित केले जात आहे. (Pune Moshi Building Collapse) दरम्यान, इमारतीच्या केवळ तळमजल्यालाचं पूर्णत्वाचा दाखला असताना, पहिला आणि दुसरा मजला कसा काय उभारला? तो कोणाच्या परवानगीने वापरात आला? पर्यावरण विभागाचे ते अधिकारी की संबंधित कंत्राटदार, दोष नेमका कोणाचा? कचऱ्याचे ढीग एकावर एक रचत त्याचा डोंगर झाला, त्याकडे पालिकेच्या कोणकोणत्या अधिकाऱ्यांनी दुर्लक्ष केलं? अशा सर्वांवर कारवाई अपेक्षित आहे. पण चौकशी समितीत कोणाला दोषी धरलं जाणार का? की केवळ चौकशीचा फार्स केला जाणार? याकडे सर्वांचं लक्ष लागून आहे.

Railway Ticket Booking IRCTC : रेल्वे प्रवाशांना मोठा दिलासा! तिकीट बुकिंगमधील कॅप्चा कोडची कटकट संपणार; IRCTC संकेतस्थळात महत्त्वाचे बदल

जयदीप मेढे — Wed, 15 Jul 2026 10:34:59 +0530

पुणे: रेल्वे तिकिटाचे ऑनलाईन आरक्षण करताना येणारे अनावश्यक पॉपअप्स, वारंवार भरावा लागणारा कॅप्चा (Captcha) आणि तिकीट बुक होण्यासाठी लागणारा प्रदीर्घ वेळ यामुळे त्रस्त झालेल्या प्रवाशांसाठी एक आनंदाची बातमी आहे. प्रवाशांचा हा त्रास कायमचा दूर करण्यासाठी रेल्वे प्रशासनाने आयआरसीटीसी (IRCTC) च्या तिकीट बुकिंग सुविधेत आमूलाग्र बदल करण्याचा निर्णय घेतला आहे. तिकीट बुकिंगची प्रक्रिया अधिक सोपी, वेगवान आणि सुरक्षित करण्यासाठी आयआरसीटीसीच्या संकेतस्थळाची (Website) एक सुधारित 'बीटा आवृत्ती' (Beta Version) तयार करण्यात आली असून, ती लवकरच प्रवाशांच्या सेवेत येणार असल्याची माहिती रेल्वे प्रशासनाने दिली आहे.

Railway Ticket Booking IRCTC : विद्यार्थ्यांच्या सूचनेनंतर रेल्वे प्रशासनाला जाग

काही दिवसांपूर्वी जयपूर येथील 'मालवीय नॅशनल इन्स्टिट्यूट ऑफ टेक्नॉलॉजी'च्या विद्यार्थ्यांनी आयआरसीटीसीच्या संकेतस्थळावरील अनेक गंभीर त्रुटी रेल्वे प्रशासनाच्या निदर्शनास आणून दिल्या होत्या. यानंतर रेल्वेने तातडीने पावले उचलत १५ जुलैपर्यंत या संकेतस्थळात सुधारणा करण्याचे आश्वासन दिले होते. त्यानुसार, आयआरसीटीसी आणि रेल्वे सूचना प्रणाली केंद्राच्या (CRIS) अधिकाऱ्यांनी जयपूरमध्ये या विद्यार्थ्यांसमोर नवीन संकेतस्थळाची बीटा आवृत्ती सादर केली असून त्यावर विद्यार्थ्यांचे अभिप्राय (Feedback) मागवले आहेत.

Railway Ticket Booking IRCTC :नव्या संकेतस्थळात नेमके काय बदलणार?

प्रवाशांचा बुकिंगचा अनुभव सुलभ करण्यासाठी नवीन आवृत्तीत पुढील महत्त्वाचे बदल करण्यात आले आहेत:

कॅप्चा आणि पॉपअप्स हद्दपार: तिकीट बुक करताना मध्येच येणारे अनावश्यक कॅप्चा, पॉपअप्स आणि जड ग्राफिक्स काढून टाकण्यात आले आहेत.

जागांची उपलब्धता एकाच स्क्रीनवर: प्रवाशांना आता सर्व वर्गांमधील (Classes) उपलब्ध जागांची माहिती वेगवेगळ्या पर्यायांवर न जाता एकाच स्क्रीनवर पाहता येईल.

फास्ट बुकिंग सुविधा: तिकीट बुक करण्यासाठी लागणाऱ्या पायऱ्या (Steps) कमी करण्यात आल्या आहेत, ज्यामुळे अवघ्या काही सेकंदांत तिकीट बुक होईल.

एकदाच माहिती भरावी लागणार: जे प्रवासी वारंवार प्रवास करतात, त्यांना प्रवाशांची माहिती पुन्हा पुन्हा टाईप करावी लागणार नाही. ती माहिती एकदाच सेव्ह राहील.

Railway Ticket Booking IRCTC : आरक्षण यंत्रणेचा कायापालट

आयआरसीटीसीचे हे नवीन संकेतस्थळ रेल्वेच्या जवळपास ४० वर्षे जुन्या 'पॅसेंजर रिझर्व्हेशन इंजिन' (Passenger Reservation Engine) या प्रणालीशी जोडण्याचे काम सध्या अंतिम टप्प्यात आहे. ही जुनी आरक्षण यंत्रणा देखील समांतर पद्धतीने पूर्णपणे अपडेट केली जात आहे. त्यामुळे संपूर्ण क्षमतेने काम करणारे हे नवीन आयआरसीटीसी पोर्टल पुढील काही महिन्यांत अधिकृतपणे लाँच केले जाईल, असे रेल्वे अधिकाऱ्यांनी स्पष्ट केले.

दरम्यान, रेल्वेच्या अधिकृत 'RailOne' या ॲपने ४ कोटी डाउनलोड्सचा टप्पा पार केला असून, ते देशातील सर्वात मोठे रेल्वे तिकीट बुकिंग ॲप बनले आहे. या ॲपवर तत्काळ बुकिंगच्या वेळी होणारा 'बॉट्स'चा (Bots) बेकायदेशीर वापर रोखण्यासाठीही रेल्वे विशेष सुरक्षा यंत्रणा राबवत आहे. हे सर्व महत्त्वाचे बदल मालवीय नॅशनल इन्स्टिट्यूटच्या विद्यार्थ्यांच्या अभ्यासपूर्ण सूचनांमुळेच शक्य झाल्याचे रेल्वे अधिकाऱ्यांनी आवर्जून नमूद केले.

प्रवाशांना रेल्वे तिकिटाचे आरक्षण करताना येणाऱ्या अडचणी दूर करण्यासाठी 'इंडियन रेल्वे केटरिंग अँड टुरिझम कॉर्पोरेशन' (IRCTC) आज, १५ जुलै रोजी आपल्या नवीन आणि अत्याधुनिक संकेतस्थळाचे (Website) अनावरण करणार आहे. नव्या वेबसाईटमुळे प्रवाशांना जलद गतीने तिकीट बुक करता येईल, बुकिंगची क्षमता वाढेल आणि विशेषतः 'तत्काळ' बुकिंग दरम्यान होणारा मनस्ताप कायमचा दूर होईल, असा विश्वास सरकारने व्यक्त केला आहे.

Railway Ticket Booking IRCTC : नव्या वेबसाईटची वैशिष्ट्ये: प्रवाशांना काय मिळणार?

वेबसाईटच्या वेगाव्यतिरिक्त सामान्य प्रवाशांचा प्रवास सुकर करण्यासाठी काही महत्त्वाचे बदल करण्यात आले आहेत:

आवडीची जागा निवडण्याची मुभा (Seat Preference): आता प्रवाशांना केवळ संगणकीय पद्धतीने जागा मिळण्याऐवजी, स्वतःच्या आवडीची सीट निवडता येणार आहे.

भाडे कॅलेंडर (Fare Calendar): ज्या प्रवाशांच्या प्रवासाच्या तारखा लवचिक आहेत, त्यांना वेगवेगळ्या दिवसांचे तिकीट दर तपासून स्वस्त तिकीट बुक करणे सोपे जाईल.

सर्व वर्गांची माहिती एकाच स्क्रीनवर: स्लीपर, एसी ३ टायर, एसी २ टायर अशा वेगवेगळ्या वर्गांमधील उपलब्ध जागा पाहण्यासाठी प्रवाशांना आता वारंवार पर्याय बदलण्याची गरज नाही. सर्व वर्गांची माहिती एकाच स्क्रीनवर उपलब्ध असेल.

Railway Ticket Booking IRCTC : प्रादेशिक भाषा आणि दिव्यांगांसाठी विशेष सोय

नवे संकेतस्थळ केवळ इंग्रजी किंवा हिंदीपुरते मर्यादित न राहता विविध भारतीय भाषांमध्ये उपलब्ध असेल, ज्यामुळे ग्रामीण भागातील प्रवाशांनाही तिकीट काढणे सोपे होईल. याशिवाय दिव्यांग व्यक्ती, विद्यार्थी आणि रुग्ण यांच्यासाठी सवलतीच्या तिकिटांची प्रक्रिया आता वेगवेगळ्या पर्यायांमध्ये न जाता एकाच प्लॅटफॉर्मवर उपलब्ध करून देण्यात आली आहे.

Railway Ticket Booking IRCTC : पॉप-अप्स आणि कॅप्चामधून सुटका

तत्काळ बुकिंगच्या वेळी प्रवाशांचा सर्वात जास्त वेळ खाणारे अनावश्यक पॉप-अप्स, जाहिरातींचे बॅनर्स आणि वारंवार विचारला जाणारा 'कॅप्चा' नवीन इंटरफेसमधून काढून टाकण्यात आला आहे. यामुळे 'सर्च' आणि 'कन्फर्म'मधील अंतर कमी होऊन प्रवाशांचे तिकीट हुकण्याची शक्यता फार कमी होईल.

Railway Ticket Booking IRCTC : बुकिंग क्षमतेत तब्बल ५ पटीने वाढ!

सध्याच्या यंत्रणेवर सकाळी तत्काळ बुकिंग सुरू होताच लाखो युजर्स एकाच मिनिटात लॉगिन करतात, ज्यामुळे पेमेंट अडकणे किंवा तिकीट बुक होण्यापूर्वीच जागा संपणे अशा समस्या उद्भवतात. यावर उपाय म्हणून नवी यंत्रणा प्रति मिनिट १.५ लाख (१,५०,०००) पेक्षा जास्त तिकीट बुकिंग हाताळू शकेल, जी सध्याच्या ३२,००० प्रति मिनिट क्षमतेपेक्षा पाच पट जास्त आहे. तसेच, 'पॅसेंजर रिझर्व्हेशन सिस्टम' (PRS) ची चौकशी हाताळण्याची क्षमता प्रति मिनिट ४ लाखांवरून थेट ४० लाख एवढी करण्यात आली आहे.

Railway Ticket Booking IRCTC : रेल्वे क्षेत्रातील इतर मोठ्या सुधारणा

हा बदल केवळ वेबसाईट पुरता मर्यादित नसून, रेल्वे मंत्री अश्विनी वैष्णव यांनी रेल्वेच्या रचनेत एकूण ५२ मोठ्या सुधारणांची घोषणा केली आहे:

कंत्राटदारांसाठी कडक नियम: रेल्वे प्रकल्पांसाठी बोली लावणाऱ्या कंत्राटदारांना आता १० टक्के परफॉर्मन्स सिक्युरिटी आधीच जमा करावी लागेल. ज्या कंपन्यांचे न्यायालयीन खटले त्यांच्या एकूण मालमत्तेच्या (Net Worth) निम्म्याहून अधिक आहेत, त्यांना कंत्राटासाठी बंदी घातली जाईल. यामुळे दर्जेदार कामे होतील आणि केवळ वाद घालणारे कंत्राटदार बाजूला होतील.

मालवाहतूक (Freight) क्षेत्राचा कायापालट: उद्योग आता त्यांच्या गरजेनुसार स्वतःचे मालवाहू वाघिण (Wagons) डिझाइन करू शकतील. देशात दरवर्षी निर्माण होणाऱ्या ३४० दशलक्ष मेट्रिक टन 'फ्लाय ॲश'ची (कोळशाची राख) वाहतूक प्रदूषण रोखण्यासाठी आता खुल्याऐवजी बंद कंटेनरमधून केली जाईल. कंटेनर ट्रेन ऑपरेटरसाठी २५ कोटी रुपयांची एकरकमी फी ठेवून ऑल इंडिया लायसन्स सुलभ केले आहे, ज्याला २० वर्षे नूतनीकरण करावे लागणार नाही.

कौशल्य प्रमाणपत्र आणि जमीन अधिग्रहण: वेल्डिंग, प्लंबिंग आणि कंक्रीट टेस्टिंग करणाऱ्या कामगारांना अधिकृत प्रशिक्षण दिले जाईल, हा प्रकल्प पुढील २४ महिन्यांत पूर्ण केला जाईल. तसेच, जमीन अधिग्रहणाचा वेग वाढवण्यासाठी 'रेल्वे भूमी' (Rail Bhoomi) नावाचे नवीन पोर्टल सुरू करण्यात आले आहे, ज्यामुळे प्रकल्पांचा वेळ ३० ते ४० टक्क्यांनी वाचेल.

Pune Crime Nilesh Ghaywal gang: पुण्यात निलेश घायवळ गँग पुन्हा सक्रिय? कोथरुडमध्ये अमित शिंदेंवर कोयत्याने वार, नेमकं कनेक्शन काय?

मंदार गोंजारी, एबीपी माझा, पुणे — Wed, 15 Jul 2026 10:09:59 +0530

Pune Crime Nilesh Ghaywal gang: पुण्यात निलेश घायवळची टोळी पुन्हा एकदा सक्रिय झालीय का हा प्रश्न उपस्थित होत आहे. कारण मंगळवारी कोथरुडमध्ये ज्या अमित शिंदे याच्यावर कोयत्याने वार (Koyta Attack) करण्यात आला, तो निलेश घायवळच्याविरोधात दाखल करण्यात आलेल्या एका गुन्ह्यातील फिर्यादी आहे. बनावट कागदपत्रांच्या आधारे निलेश घायवळने (Nilesh Ghaywal) अमित शिंदे यांच्या कोथरुडमधील मोबाईल दुकानातून सीमकार्ड घेतले होते. पोलिस तपासात ही बाब लक्षात आल्यानंतर अमित शिंदेच्या विरोधात गुन्हा दाखल करण्यात आला होता. त्याच अमित शिंदेवर (Amit Shinde) काल कोयत्याने हल्ला करण्यात आला. हा हल्ला वैयक्तिक कारणातून झाल्याचं पोलीसांच म्हणणं आहे. मात्र, या हल्ल्याला निलेश घायवळच्या विरोधात दिलेल्या तक्रारीची पार्श्वभूमी आहे. निलेश घायवळ हा सप्टेंबर महिन्यात परदेशात पळून गेला असून परदेशातुन तो टोळी चालवत आहे का, असा प्रश्न उपस्थित केला जात आहे. (Pune Crime news)

निलेश घायवळ याच्यावर मकोका कायद्यातंर्गत कारवाई झाली, त्यावेळी जे गुन्हे दाखल करण्यात आले, त्यामध्ये कोथरुड पोलीस ठाण्यात दाखल असलेला गुन्हा आहे. या प्रकरणात अमित शिंदे यांनी तक्रार दाखल केली होती. अमित शिंदे यांचं कोथरुडमध्ये दुकान आहे. अमित शिंदे यांच्या मोबाईल शॉपमधून बनावट कागदपत्रांच्याआधारे निलेश घायवळने एक सीमकार्ड घेतले होते. या सीमकार्डचा उपयोग तो बऱ्याच गुन्ह्यांसाठी करत होता. तपासात ही गोष्ट समोर आल्यानंतर पोलिसांनी अमित शिंदे यांच्या फिर्यादीवरुन निलेश घायवळवर गुन्हा दाखल करण्यात आला. निलेश घायवळवर मकोका कायद्यातंर्गत कारवाई करण्याच्या प्रक्रियेत हा गुन्हा महत्त्वाचा ठरला होता. याच अमित शिंदे यांच्यावर एका टोळीकडून कोयत्याने हल्ला केला जात असल्याचे सीसीटीव्ही फुटेज समोर आले आहे. हल्लेखोरांना अद्याप अटक झालेली नाही. पोलिसांच्या दाव्यानुसार, हा हल्ला वैयक्तिक वादातून झाला आहे. अमित शिंदे यांच्या नातेवाईकांकडूनच हा हल्ला घडवून आणण्यात आला, असा पोलिसांचा दावा आहे. मात्र, या सगळ्या हल्ल्यापाठी अमित शिंदे यांनी निलेश घायवळविरोधात दाखल केलेला गुन्हा असल्याची शक्यता आहे. अमित शिंदे यांच्यावर नातेवाईकांनी हल्ला केल्याचे सांगितले जात असले तरी हा वाद टोळीने हल्ला करण्याइतपत मोठा होण्याची शक्यता नाही, अशी चर्चा आहे. निलेश घायवळ सप्टेंबर महिन्यात भारतातून पळून गेला होता. त्याच्या प्रत्यापर्णासाठी प्रयत्न सुरु आहेत. दुसरीकडे त्याची टोळी पुण्यात असे हल्ले करत असल्यामुळे निलेश घायवळ गँग अजूनही सक्रिय असल्याचे दिसून येत आहे.

Kothrud Crime news: कोथरुडमध्ये 8 ते 10 जणांकडून तरुणावर जीवघेणा हल्ला

पुण्यातील कोथरूड परिसरात पुन्हा एकदा कोयता गँगचा धक्कादायक प्रकार समोर आला आहे. आठ ते दहा जणांच्या टोळक्याने एका तरुणावर भररस्त्यात कोयत्याने जीवघेणा हल्ला केल्याची घटना घडली. या हल्ल्यात अमित शिंदे हा तरुण गंभीर जखमी झाला असून त्याच्यावर रुग्णालयात उपचार सुरू आहेत. संपूर्ण घटना परिसरातील सीसीटीव्ही कॅमेऱ्यात कैद झाली आहे.

मिळालेल्या माहितीनुसार, अमित शिंदे हा कोथरूडमधील त्याच्या मोबाईल दुकानात काम करत होता. मंगळवारी सायंकाळी सात वाजण्याच्या सुमारास तो दुकानाबाहेर उभा असताना अचानक आठ ते दहा जणांचे टोळके तेथे आले. त्यांनी अमितवर कोयत्याने सपासप वार करण्यास सुरुवात केली.

या हल्ल्यात अमितच्या डोक्यावर कोयत्याचे दोन गंभीर वार बसल्याने तो रक्ताच्या थारोळ्यात कोसळला. या संपूर्ण घटनेचे दृश्य परिसरातील सीसीटीव्ही कॅमेऱ्यात कैद झाले असून, त्याच्या आधारे पोलिसांनी आरोपींचा शोध सुरू केला आहे. घटनेची माहिती मिळताच कोथरूड पोलीस घटनास्थळी दाखल झाले. पोलिसांनी पंचनामा करून तपास सुरू केला असून, हल्ल्यामागील नेमके कारण काय, हा पूर्ववैमनस्याचा प्रकार आहे की इतर कोणते कारण आहे, याचा तपास केला जात आहे.

आणखी वाचा

ATS Action In Pune: पुण्यातील 60 जणांच्या घरावर ATS चे एकाचवेळी छापे; 51 जणांची चौकशी, धाड टाकताच काय काय सापडलं?

पिवळी पैठणी, हिरवा चुडा अन् केसात मोगऱ्याचा गजरा; सुप्रिया सुळेंच्या लेकीचा शाही रिसेप्शन सोहळा, मराठमोळ्या लूकवर खिळल्या सर्वांच्या नजरा PHOTOs

एबीपी माझा एंटरटेनमेंट डेस्क — Wed, 15 Jul 2026 09:25:52 +0530

पिवळी पैठणी, हिरवा चुडा अन् केसात मोगऱ्याचा गजरा; सुप्रिया सुळेंच्या लेकीचा शाही रिसेप्शन सोहळा, मराठमोळ्या लूकवर खिळल्या सर्वांच्या नजरा PHOTOs

ATS Action In Pune: पुण्यातील 60 जणांच्या घरावर ATS चे एकाचवेळी छापे; 51 जणांची चौकशी, धाड टाकताच काय काय सापडलं?

मिकी घई, एबीपी माझा — Wed, 15 Jul 2026 09:24:48 +0530

ATS Action In Pune: महाराष्ट्र दहशतवाद विरोधी पथकाने (ATS) पुणे शहर, पुणे ग्रामीण आणि पिंपरी-चिंचवड परिसरात मोठी कारवाई करत काल दिवसभरात 51 जणांना ताब्यात (ATS Action In Pune) घेऊन त्यांची कसून चौकशी केली. प्राथमिक चौकशीनंतर या सर्व 51 जणांना सोडून देण्यात आले आहे. मात्र, त्यांच्या मोबाईल फोनसह इतर इलेक्ट्रॉनिक उपकरणे ATS ने पुढील तपासासाठी ताब्यात ठेवली आहेत. या उपकरणांच्या तपासात कोणतीही संशयास्पद माहिती आढळल्यास संबंधितांना पुन्हा चौकशीसाठी बोलावले जाण्याची शक्यता आहे.

ATS च्या प्राथमिक तपासात हे तरुण पाकिस्तानस्थित शहजाद भट्टी याच्याशी संबंधित सोशल मीडिया हँडल्सशी जोडले गेल्याचे समोर आले आहे. संबंधित सोशल मीडिया अकाउंटवरील पोस्ट लाईक करणे, त्यावर प्रतिक्रिया देणे किंवा कमेंट करणे, अशा ऑनलाइन हालचालींमुळे हे सर्वजण ATS च्या रडारवर आले होते. या कारवाईत सर्वाधिक 33 तरुण पुणे शहरातील असल्याची माहिती समोर आली आहे. यामध्ये कोथरूड, येरवडा, पर्वती, विश्रांतवाडी, फरासखाना, कोंढवा तसेच इतर परिसरातील तरुणांचा समावेश आहे. याशिवाय पिंपरी-चिंचवड आणि पुणे ग्रामीण भागातील संशयितांवरही एकाचवेळी कारवाई करण्यात आली.

मोबाईल फोन आणि इतर डिजिटल उपकरणांची तपासणी- (ATS Action In Pune)

ATS ने स्थानिक पोलिसांच्या मदतीने संबंधितांच्या घरांवर धाडी टाकत मोबाईल फोन आणि इतर डिजिटल उपकरणांची तपासणी सुरू केली आहे. सोशल मीडिया अकाउंटची अ‍ॅक्टिव्हिटी, चॅट्स, संपर्कातील व्यक्ती तसेच परदेशी सोशल मीडिया हँडल्सशी असलेल्या संपर्काची बारकाईने पडताळणी केली जात आहे.

संशयास्पद आर्थिक व्यवहारप्रकरणी सोलापुरातील NGO वर ATS ची कारवाई; एका पदाधिकाऱ्याला अटक- (ATS Action In Solapur)

सोलापूरातील एका स्वयंसेवी संस्थेच्या (NGO) संशयास्पद आर्थिक व्यवहारांप्रकरणी मुंबई दहशतवाद विरोधी पथकाने (ATS) मोठी कारवाई केली आहे. धर्मादाय आयुक्त कार्यालयात अधिकृत नोंदणी न करता संस्थेने तब्बल 10 कोटी रुपयांची देणगी गोळा केल्याचा आरोप असून, या प्रकरणी संस्थेच्या तीन पदाधिकाऱ्यांविरोधात गुन्हा दाखल करण्यात आला आहे. तपासात संस्थेने चुकीचे नोंदणी क्रमांक वापरून आयकर विभाग, देणगीदार आणि शासनाची फसवणूक केल्याचे समोर आल्याचे सांगण्यात आले आहे. या तिघांपैकी एका पदाधिकाऱ्याला ATS ने अटक केली असून, त्याच्या मोबाईलमध्ये 50 हून अधिक पाकिस्तानी नागरिकांचे संपर्क क्रमांक आढळल्याची माहिती तपास यंत्रणांनी न्यायालयात दिली आहे. सोलापुरातील ही संस्था सुरू करण्यासाठी एका परदेशी संस्थेकडून 8 लाख रुपयांची देणगी मिळाल्याचेही तपासात समोर आले आहे. संबंधित परदेशी संस्थेचीही ATS मार्फत चौकशी करण्यात आली असून, त्या संस्थेच्या 15 बँक खात्यांतून तब्बल 126 कोटी रुपयांचे आर्थिक व्यवहार झाल्याचे उघड झाले आहे. या पार्श्वभूमीवर सोलापुरातील संस्था आणि संबंधित परदेशी संस्थेकडे जमा झालेला निधी नेमका कशासाठी वापरला गेला, तसेच या पैशाचा वापर देशविघातक कृत्यांसाठी झाला का, या सर्व बाबींचा सखोल तपास मुंबई ATS करत आहे. दरम्यान, या प्रकरणातील अटकेत असलेल्या एका पदाधिकाऱ्याचा नियमित जामीन अर्ज तसेच अन्य दोन पदाधिकाऱ्यांचे अटकपूर्व जामीन अर्ज सोलापूर जिल्हा न्यायालयाने फेटाळून लावले आहेत. ही माहिती सोलापूरचे प्रमुख जिल्हा सरकारी वकील ॲड. प्रदीपसिंग राजपूत यांनी दिली.

राज्यासह देश-विदेशातील महत्वाच्या घडामोडी, VIDEO:

संबंधि बातमी:

ATS Action In Pune And Solapur: पुण्यातील 60 जणांच्या घरावर एकाचवेळी छापे; महाराष्ट्र एटीएसची सगळ्यात मोठी कारवाई, सोलापुरमधून एकाला अटक

Iran America War in strait of hormuz: 41 मिनिटांपूर्वी कुटुंबाशी बोलले अन् थोड्याचवेळात हवाई हल्ल्याने जहाजावर स्फोट; पुण्याच्या हेरंब करमरकर यांचा मृत्यू

मंदार गोंजारी, एबीपी माझा, पुणे — Wed, 15 Jul 2026 09:01:14 +0530

Iran America War in strait of hormuz: गेल्या काही दिवसांपासून संपूर्ण जगाची चिंता वाढवणाऱ्या इराण आणि अमेरिका यांच्यातील आखातातील युद्धाची झळ आता महाराष्ट्राला आणखी तीव्रपणे जाणवू लागली आहे. काही दिवसांपूर्वी या युद्धामुळे भारतात पेट्रोल आणि डिझेलच्या दरात मोठी वाढ झाली. या आर्थिक फटक्यानंतर आता इराण-अमेरिका युद्धात (War) भारतीयांची जीवितहानी होऊ लागली आहे. इराण आणि अमेरिका यांच्यात करार झाल्याची चर्चा असतानाच काही दिवसांपूर्वीच पुन्हा एकदा युद्धाचा भडका उडाला होता. अमेरिका आणि इराण (Iran) यांनी परस्परांच्याविरोधात जोरदार हल्ले सुरु केले होते. इराणकडून अमेरिकेचे मित्र असलेल्या आखातामधील देशांना लक्ष्य केले जात आहे. अशाच एका हल्ल्यात पुण्यातील एका अभियंत्याचा मृत्यू झाल्याची घटना घडली आहे. (Iran America War)

होमुर्झच्या सामुद्रधुनीत एका जहाजावर हल्ल्यात पुण्यातील हेरंब करमरकर (Heramb Karmarkar) या अभियंत्याचा मृत्यू झाला आहे. हेरंब करमरकर हे मर्चंट नेव्हीमध्ये कार्यरत होते. एम व्ही जी एफ एस गॅलेक्सी या नौकेवर काम करत होते. ही नौका ओमानच्या सागरी हद्दीतून जात असताना रविवारी पहाटे साडेतीनच्या सुमारास या नौकेवर हल्ला झाला. हवाई हल्ल्यामुळे जहाजाच्या इंजिन रुमजवळ आग लागली. त्यावेळी हेरंब करमरकर इंजिन रुमजवळ होते. या नौकेवरील 24 पैकी 23 जणांची त्यानंतर सुटका करण्यात आली. मात्र, हेरंब करमरकर यांचा मृत्यू झाला. रविवारी हल्ला होण्यापूर्वी त्यांचे पुण्यातील कुटुंबाशी बोलणे झाले होते. रविवारी रात्री 2 वाजून 50 मिनिटांनी त्यांचं कुटुंबीयांसोबत शेवटचं बोलणं झालं होते. यानंतर मंगळवारी हेरंब यांच्या कंपनीकडून त्यांचे नातेवाईक रविंद्र टंडन यांना फोन करुन हेरंब करमरकर यांचा मृत्यू झाल्याची माहिती दिली. ही बातमी ऐकून त्यांच्या कुटुंबावर दु:खाचा डोंगर कोसळला आहे. या घटनेनंतर पुण्यात हळहळ व्यक्त केली जात आहे.

आखाती देशांच्या परिसरात सध्या इराण आणि अमेरिका यांच्यात युद्धाचा भडका उडाला आहे. अमेरिकेने इराणमधील अनेक प्रमुख ठिकाणांना ड्रोन हल्ले आणि क्षेपणास्त्रांचा मारा करुन लक्ष्य करण्याचा सपाटा लावला आहे. इराणकडून अमेरिकेला थेट लक्ष्य करणे शक्य नसल्याने अमेरिकेचे तळ असलेल्या आणि मैत्रीपूर्ण संबंध असलेल्या देशांना लक्ष्य केले जात आहे. याशिवाय, होमुर्झच्या सामुद्रधुनीतून जाणाऱ्या व्यापारी जहाजांनाही इराणकडून लक्ष्य केले जात आहे. हेरंब करमरकर यांच्या जहाजावर झालेला हल्ला हादेखील इराणकडून करण्यात आला असावा, अशी शक्यता आहे. काही दिवसांपूर्वी अमेरिकेने एका जहाजावर केलेल्या हल्ल्यात काही भारतीयांचा मृत्यू झाला होता.

आणखी वाचा

सावधान! होर्मुझमधून होणारा 90 टक्के एलपीजी पुरवठा धोक्यात, कंपन्याना 700 कोटी रुपयांचा फटका, दरात वाढ होणार का?

आधी बस स्टँड, आता बारामती रेल्वे स्थानकाचं रुपडं पालटलं; 11.4 कोटी खर्चून पुनर्विकास, लवकरच लोकार्पण

महेश गलांडे — Tue, 14 Jul 2026 19:02:45 +0530

आधी बस स्टँड, आता बारामती रेल्वे स्थानकाचं रुपडं पालटलं; 11.4 कोटी खर्चून पुनर्विकास, लवकरच लोकार्पण

पुण्यात दरोडा टाकण्याची तयारी, आंतरराज्यीय दरोडेखोरांचे टोळीला बेड्या; अहिल्यानगरमधून बोलेरो चोरुन ओतुरला आले

मिकी घई, एबीपी माझा — Tue, 14 Jul 2026 15:46:47 +0530

पुणे : जिल्ह्यातील वाढत्या गुन्हेगारीच्या पार्श्वभूमीवर पोलीस (Police) यंत्रणा अलर्ट मोडवर असून पुणे जिल्ह्यातील ओतूर (Pune) हद्दीत दरोडा टाकण्याच्या तयारीत असलेली आंतरराज्यीय दरोडेखोरांच्या टोळीला बेड्या ठोकण्यात पोलिसांना यश आलं आहे. पोलिसांनी 6 आरोपींना बेड्या ठोकल्या असून त्यांच्याकडून एक गावठी पिस्टल, जिवंत काडतूस आणि इतर हत्यारांसह 14 लाख 87 हजार 820 रुपयांचा मुद्देमाल जप्त केला आहे. प्राथमिक तपासात आरोपींवर यापूर्वीही गंभीर गुन्हे दाखल असून गंभीर स्वरूपाचे एकूण 20 गुन्ह्यात त्यांचा सहभाग असल्याचं उघडकीस आलं आहे.

अहिल्यानगर जिल्ह्याच्या लोणी प्रवरा येथून चोरीस गेलेली बोलेरो जीप ही ओतूर पोलीस ठाणे हद्दीत दिसून आली. या जीपच्या मालकाचे नातेवाईक विघ्नेश सुभाष घोलप हे या वाहनाचा शोध घेत असताना ओतूरमध्ये त्यांना हे वाहन आढळून आले. त्यावेळी, वाहनासह असलेल्या संशयित इसमांकडे त्यांनी विचारणा केली असता, त्यांच्यामध्ये वाद झाला. त्यामुळे, विघ्नेश घोलप यांनी "चोर-चोर" अशी आरडाओरड केल्याने गावकरी घटनास्थळी जमा झाले. त्यानंतर गावकरी व आरोपी यांच्यात झटापट होऊन दोन आरोपींना गावकऱ्यांनी पकडले. तर इतर चार आरोपी गर्दीचा फायदा घेऊन पळून गेले, घटनेची माहिती पोलिसांना मिळताच ताबडतोब स्थानिक गुन्हे शाखा व ओतूर पोलीस स्टेशनमधील पोलीस पथकांनी स्थानिक नागरिकांच्या मदतीने पळून गेलेल्या आरोपींचा पाठलाग केला गेला. शोधकार्यात सातत्य ठेवून आलमे गावच्या डोंगर दरी परिसरातून पळून गेलेल्या दोन आरोपींना ताब्यात घेण्यात आले.

आरोपी सराईत, 20 गुन्हे उघडकीस

आरोपी हे सराईत गुन्हेगार असून ते हत्यारासह असल्याने काळजीपूर्वक तपास करुन आरोपींना ताब्यात घेणे आवश्यक होते. त्यासाठी आलमे, बल्लाळवाडी, कोळवाडी परिसरातील नागरिक तसेच पोलीस पाटील यांच्या मदतीने पळून गेलेल्या चारही आरोपींना ताब्यात घेण्यात आले. याप्रकरणी, आरोपींकडे सखोल चौकशी केली असता महाराष्ट्र व तेलंगणा राज्यातील दरोडा, दरोड्याचा प्रयत्न, जबरी चोरी, घरफोडी व वाहन चोरी असे एकूण 20 गुन्हे उघडकीस आले आहेत. त्यामध्ये 2 दरोडे, 1 दरोड्याचा प्रयत्न, 2 जबरी चोरी, 13 घरफोडी आणि 2 वाहन चोरीचे गुन्हे समाविष्ट आहेत. दरम्यान, आरोपींवर यापूर्वी महाराष्ट्रासह तेलंगणा व इतर राज्यांमध्ये 50 पेक्षा अधिक गंभीर गुन्हे आहेत. दरोड्याच्या तयारीत असलेल्या सहा आरोर्पीना अटक करण्यात आली असून त्यांना न्यायालयात हजर करण्यात आले आहे.

हेही वाचा

बापाने आईला संपवलं, तीन निरागस चिमुरड्यांना काहीच समजलं नाही, पोलीस स्टेशनमध्ये येताच ब्लँकेटवर अंग टाकून झोपी गेली

Pune ATS Raid: पाकिस्तानी गँगस्टर भट्टीच्या संपर्कातील संशयितांवर ATSची कारवाई; पुणे, पिंपरी-चिंचवडसह ग्रामीण भागात धाडसत्र, 45 जणांना उचललं

मिकी घई, एबीपी माझा, पुणे — Tue, 14 Jul 2026 15:30:35 +0530

पुणे : पाकिस्तानी गँगस्टर शहजाद भट्टी याच्या संपर्कात असल्याचा संशय असलेल्या व्यक्तींविरोधात महाराष्ट्र दहशतवाद विरोधी पथकाने (ATS) मोठी कारवाई सुरू केली आहे. सकाळपासून पुणे शहर, पिंपरी-चिंचवड आणि पुणे ग्रामीण परिसरात स्थानिक पोलिसांच्या मदतीने एकाच वेळी (Pune ATS Raid) धाडसत्र राबवण्यात आले.सूत्रांकडून मिळालेल्या माहितीनुसार, सोशल मीडियाच्या माध्यमातून (Pune ATS Raid) पाकिस्तानी गँगस्टर शहजाद भट्टी याच्याशी संपर्कात असल्याचा संशय असलेल्या एकूण ६६ जणांवर ATS ची नजर होती. त्यापैकी आतापर्यंत ४५ जणांना चौकशीसाठी ताब्यात घेण्यात आल्याची माहिती सूत्रांनी दिली आहे.(Pune ATS Raid)

प्राथमिक माहितीनुसार, संबंधित व्यक्तींनी सोशल मीडिया प्लॅटफॉर्मवरून शहजाद भट्टी किंवा त्याच्याशी संबंधित खात्यांशी चॅटिंग आणि संपर्क साधल्याचा संशय आहे. या संपर्काचे स्वरूप, उद्देश आणि त्यामागील संभाव्य नेटवर्क याची पडताळणी करण्यासाठी ATS कडून ही व्यापक कारवाई करण्यात येत आहे. ताब्यात घेण्यात आलेल्या व्यक्तींची ATS अधिकारी कसून चौकशी करत असून, त्यांचे मोबाईल फोन, सोशल मीडिया अकाउंट्स, डिजिटल उपकरणे आणि इतर इलेक्ट्रॉनिक पुरावे तपासले जात आहेत. चौकशीतून नेमकी कोणती माहिती समोर येते, या व्यक्तींचा संपर्क केवळ सोशल मीडियापुरता मर्यादित होता की त्यापुढेही काही संबंध होते, याचा तपास सुरू आहे.(Pune ATS Raid)

दरम्यान, या प्रकरणात अद्याप कोणतीही अधिकृत माहिती ATS किंवा पोलिसांकडून जाहीर करण्यात आलेली नाही. त्यामुळे ताब्यात घेण्यात आलेल्या व्यक्तींविरुद्ध कोणते गुन्हे नोंदवले जाणार किंवा पुढील कायदेशीर कारवाई काय होणार, याबाबत अधिकृत भूमिकेकडे सर्वांचे लक्ष लागले आहे.

Shahzad Bhatti : पैशाचे आमिष दाखवून नेटवर्कचा विस्तार करण्याचे प्रयत्न

बेरोजगार आणि आर्थिकदृष्ट्या दुर्बळ तरुणांना सहज कमाई आणि अधिक पैशांचे आमिष दाखवून या नेटवर्कमध्ये ओढले जात असल्याचा संशय आहे. सुरक्षा यंत्रणांच्या मते, या व्यक्तींना स्लीपर सेल आणि स्थानिक एजंट म्हणून तयार करण्याची योजना असू शकते. गुप्त माहिती गोळा करणे, अंमली पदार्थांची तस्करी आणि अवैध शस्त्रपुरवठा यांसारख्या गंभीर प्रकरणांचाही तपास सुरू आहे.

Shahzad Bhatti : कोण आहे पाकिस्तानातील गँगस्टर शहजाद भट्टी?

शहजाद भट्टी हा पाकिस्तानातील लाहोरचा रहिवासी असून, दुबईतून डोगर गँग आणि इतर टोळ्यांशी संबंधित नेटवर्क चालवतो. तो सोशल मीडियावर भारतीय तरुणांना सहज ओढून कट्टरतावादी विचारसरणी आणि हेरगिरीकडे नेतो. गेल्या काही महिन्यांत भारतातील दहशतवादी भरती आणि गुप्तहेर प्रकरणांमध्ये त्याचं नाव वारंवार समोर आलं आहे. महाराष्ट्रातही काही तरुण त्याच्याशी संपर्कात असल्याची माहिती मिळाल्यानंतर एटीएसने हे नेटवर्क तोडण्यासाठी मोठी कारवाई केली. शहजाद भट्टीच्या उलटगणती आता सुरू झाली असून, त्याला भारतात पकडण्यासाठी प्रयत्न तीव्र झाले आहेत.

पाकिस्तानस्थित सोशल मीडिया व्यक्तिमत्त्व शहजाद भट्टी हा दहशतवादाशी संबंधित कारवाया आणि कट्टरतावादी नेटवर्कशी कथित संबंधांमुळे भारतीय सुरक्षा यंत्रणांच्या रडारवर आला आहे. एकेकाळी ऑनलाइन कॉन्टेन्ट (content) निर्मितीच्या माध्यमातून सोशल मीडियावर मोठा चाहतावर्ग निर्माण करण्यासाठी ओळखल्या जाणाऱ्या भट्टीवर आता डिजिटल प्लॅटफॉर्म्सच्या माध्यमातून असुरक्षित तरुणांची भरती करण्याचा आणि त्यांना गुन्हेगारी व अतिरेकी नेटवर्कशी जोडण्याचा आरोप आहे.

Pune Water Cut: वारीनंतर पुन्हा पाणीकपात; १५ जुलैपासून शहरात एक दिवसाआड पाणीपुरवठा, भविष्यात पाण्याची टंचाईच्या पार्श्वभूमीवर प्रशासनाचा मोठा निर्णय

जयदीप मेढे — Tue, 14 Jul 2026 15:01:41 +0530

पुणे: पुणेकरांसाठी एक महत्त्वाची आणि काहीशी चिंताजनक बातमी आहे. पुणे शहराला पाणीपुरवठा करणाऱ्या धरणक्षेत्रात पावसाने पुन्हा एकदा ओढ दिल्याने शहरात पाणीसंकट (Pune Water Cut) उभे ठाकले आहे. परिणामी, महापालिका प्रशासनाने येत्या १५ जुलैपासून पुणे शहरात पुन्हा एकदा एक दिवसाआड पाणीपुरवठा करण्याचा निर्णय घेतला आहे. हवामान अंदाज आणि धरणांमधील पाणीसाठ्याचा आढावा घेऊन पुढील दिशा ठरवली जाईल, अशी माहिती महापालिका आयुक्त नवल किशोर राम यांनी दिली.(Pune Water Cut)

Pune Water Cut: वारीच्या पार्श्वभूमीवर नियमित केला होता पुरवठा

यंदा जून महिन्यात पावसाने हुलकावणी दिल्यामुळे खडकवासला धरणसाखळीतील पाणीसाठा झपाट्याने खाली गेला होता. त्यामुळे जलसंपदा विभागाच्या सूचनेनुसार जूनमध्येच महापालिकेने एक दिवसाआड पाणी देण्यास सुरुवात केली होती.

दरम्यान, जुलैच्या सुरुवातीला पावसाने जोरदार हजेरी लावली. ६ जुलै रोजी मुळशी आणि पिंपरी-चिंचवड भागात झालेल्या अतिवृष्टीमुळे आळंदीतील इंद्रायणी नदीला पूर आला होता. याच काळात आषाढी वारीचे पुण्यात आगमन झाले. वारीसाठी आलेल्या लाखो वारकऱ्यांची आणि स्थानिक नागरिकांची पाण्यासाठी गैरसोय होऊ नये, म्हणून प्रशासनाने ७ जुलैपासून कपात मागे घेत पुण्यात नियमित पाणीपुरवठा सुरू केला होता. ही तात्पुरती व्यवस्था १२ जुलै रोजी पालखी सोहळा पुण्यातून मार्गस्थ होईपर्यंत कायम ठेवण्यात आली होती.

Pune Water Cut: पाऊस गायब झाल्याने चिंता वाढली

जुलैच्या पहिल्या आठवड्यात झालेल्या चांगल्या पावसामुळे धरणसाखळीत १६ टीएमसीपेक्षा जास्त पाणी जमा झाले होते. खडकवासला धरण तब्बल ८५ टक्के भरल्यामुळे नदीपात्रात दीड टीएमसी पाणीही सोडण्यात आले होते. यामुळे पुण्यातील पाणीकपात कायमची रद्द होणार अशी शक्यता वर्तवली जात होती. महापौरांनीही यावर पक्षनेत्यांच्या बैठकीत अंतिम निर्णय घेण्याचे संकेत दिले होते. मात्र, गेल्या काही दिवसांपासून पावसाने अचानक दडी मारल्यामुळे धरणे पूर्ण क्षमतेने भरतील का, याबाबत पुन्हा चिंता निर्माण झाली आहे.

Pune Water Cut: खबरदारीचा उपाय म्हणून निर्णय

हवामान खाते आणि जलसंपदा विभागाच्या अंदाजानुसार, पुढील काही दिवस पाऊस लांबण्याची शक्यता आहे. याच पार्श्वभूमीवर भविष्यात पाण्याची टंचाई भासू नये म्हणून खबरदारीचा उपाय म्हणून १५ जुलैपासून पुन्हा एक दिवसाआड पाणी देण्याचा निर्णय घेण्यात आला आहे. आगामी काळात जर पावसाचा जोर वाढला आणि धरणांमध्ये पाण्याची आवक सुधारली, तर परिस्थितीचा पुनर्आढावा घेऊन पाणीपुरवठा पूर्ववत करण्याबाबत विचार केला जाईल, असे आयुक्त नवल किशोर राम यांनी स्पष्ट केले आहे.