पुणे : आपल्या नृत्यानं अगदी लहानांपासून मोठ्यांपर्यंत सर्वांना भुरळ घालणारी गौतमी पाटील पुण्यातील पुस्तक महोत्सवात सहभागी झाली आहे. या महोत्सवात ती सहभागी झाल्याने उपस्थितांच्या देखील भुवया उंचावल्या, ती महोत्सवात नृत्य करण्यासाठी नाही तर पुस्तक वाचण्यासाठी आमि कार्यक्रमासाठी आली होती. पुण्यात पुस्तक महोत्सव आयोजित करण्यात आला आहे. या महोत्सवाला गौतमी पाटीलने हजेरी लावली. यावेळी तिने संवाद साधला. तसेच ती कोणतं पुस्तक वाचणार याबाबत तिने यावेळी बोलताना सांगितलं आहे.
यावेळी माध्यमांशी बोलताना ती म्हणाली, 'मला इतर ठिकाणी नाचायला बोलवतात पण इकडे पुस्तक वाचायला बोलावलं. पुण्यात एवढा मोठा पुस्तक महोत्सव भरला आहे, मला यापुढे मोकळा वेळ मिळाला तर मी पुस्तक वाचणार आहे. मला प्रवीण तरडे आता पुस्तक निवडून देणार आहेत. त्यांनी मला या ठिकाणी बोलावलं त्याबद्दल आभारी आहे. पुस्तक महोत्सवाला आल्यामुळे मला चालना मिळेल, वळण मिळेल. प्रवीण तरडे आणि त्यांच्या पत्नीने गौतमी पाटीलला यावेळी पुस्तक भेट दिली आहे. मला लहानपणापासून डान्स करत होते,पण आता नक्की पुस्तक वाचेल, सर्वांनी पुस्तक वाचा, मला पुस्तक वाचण्याची संधी मिळाली नाही, पण इथून पुढे नक्की पुस्तक वाचणार आहे. प्रवीण दादा सुचवेल ते वाचणार आहे, मी छत्रपती शिवाजी महाराज यांचे पुस्तक वाचणार आहे, असंही गौतमीने पुढे म्हटलं आहे.
नेमकं काय म्हणाली गौतमी?
मी लहानपणापासून या गोष्टींमध्ये कधी गेलेच नाही. आत्तापर्यंत मी फक्त डान्स केला, पण आज काही वेगळं करायला आले आहे, असं गौतमीने सांगितलं. पुण्यात एवढा मोठा पुस्तक महोत्सव भरला आहे. आजपर्यंत मला पुस्तकं वाचायची संधी तर मिळाली नाही, पण आज इथे येऊन पुस्तकांच्या या दुनियेत मी फेरफटका मारणार आहे. इथून पुढे मी पुस्तकं नक्की वाचणार आहे, तुम्ही सगळ्यांनीही आवर्जून पुस्तकं वाचा असं आवाहन तिने केलं. पुस्तक ही खूप छान गोष्ट आहे , त्यातून तुम्हाला बरंच काही शिकायला मिळतं, मीही आता वाचाणार आहे, तु्म्हीही सर्वांनी नक्की वाचा, असा आग्रह गौतमीने केला आहे.
आज या पुस्तक प्रदर्शनात येताना कोणती पुस्तकं घ्यायची असा काही ठोस विचार मी केलेला नाही, उलट प्रवीण तरडे दादांनाच मी सांगितलं की, तुम्ही मला सुचवा पुस्तकांची नावं, कोणती पुस्तकं घेऊ ते सांगा. पण छत्रपती शिवाजी महाराजाचं पुस्तक मी नक्की घेणार आणि ते आवडीने वाचणार असल्याचं गौतमीने सांगितलं आहे.
गौतमी पाटील कायमच चर्चेत!
गौतमी पाटील नेहमीच चर्चेत असते. एकीकडे तिच्यावर जोरदार टीका होत असली तरी तिला पाठिंबा देणारी मंडळी कमी नाहीत. आपल्या नृत्य सादरीकरणात अश्लील इशारा करत असल्याने तिच्यावर प्रचंड टीका झाली. त्यानंतर गौतमीनेदेखील सर्वांची माफी मागत चूक सुधारणार असल्याचं सांगितलं. गौतमीच्या कार्यक्रमांना पुरुष चाहत्यांप्रमाणे महिलावर्गदेखील मोठ्या संख्येने उपस्थित असतो. गौतमीचा 'घुंगरू' हा मराठी सिनेमा काही दिवसांपूर्वीच प्रेक्षकांच्या भेटीला आला होता. बॉक्स ऑफिसवर जादू दाखवण्यात हा सिनेमा कमी पडला. पण या सिनेमाच्या माध्यमातून गौतमीने अभिनयक्षेत्रात पदार्पण केलं.