Eknath Shinde : जुन्नरमध्ये शेततळ्यात दोन चिमुकल्यांचा बुडून मृत्यू, एकनाथ शिंदे यांचा कुटुंबाला मदतीचा हात
Junnar News : उपमुख्यमंत्री एकनाथ शिंदे यांनी व्हिडीओ कॉल करून इमानदार कुटुंबीयांचे सांत्वन केलं. तसेच त्यांना पाच लाखांची मदतही देऊ केली.
पुणे : शेततळ्यात बुडून मृत्युमुखी पडलेल्या आफान अफसर इनामदार ( वय 10) आणि रीफत अफसर इनामदार ( वय 7) या चिमुकल्यांच्या कुटुंबीयांना उपमुख्यमंत्री एकनाथ शिंदे यांनी पाच लाख रुपयांची मदत देऊ केली आहे. नगरपालिका निवडणुकीवेळी जुन्नरमध्ये प्रचारासाठी आले असता शिंदेंना या दुर्दैवी घटनेबद्दल कळल्यानंतर त्यांनी इनामदार कुटुंबीयांची सांत्वनपर भेट घेतली होती. त्यानंतर आता त्यांनी त्यांना मदतीचा हात देऊ केला आहे.
जुन्नरमध्ये 22 नोव्हेंबर रोजी घडलेल्या दुर्वेवी घटनेत अफसर इनामदार यांची दोन्ही मुले खेळत असताना शेततळ्यात पडल्याने त्यांचा मृत्यू झाला. या घटनेने पूर्ण जुन्नर तालुका हळहळला, त्याच वेळी 1 डिसेंबर रोजी नगरपालिका निवडणुकीच्या प्रचारासाठी जुन्नर येथे गेले असता स्थानिक शिवसेना नगरसेवक मयुर महाबरे यांनी ही घटना आमदार शरद सोनवणे यांना सांगितली. त्यांनी तत्काळ उपमुख्यमंत्री शिंदे यांच्या कानावर ही बाब घातली. यानंतर उपमुख्यमंत्री शिंदे यांनी प्रचारातून वेळात वेळ काढून ईनामदार कुटुंबीयांची सांत्वनपर भेट घेऊन त्यांना मदतीचे आश्वासन दिले.
त्यानुसार 6 फेब्रुवारी रोजी शिवसेनेच्या वतीने आमदार शरद सोनवणे, शिवसेना सचिव राम रेपाळे आणि युवासेना मराठवाडा निरीक्षक बाजीराव चव्हाण, स्थानिक नगरसेवक मयुर महाबरे आणि स्थानिक शिवसैनिकांनी इनामदार कुटुंबाची भेट घेऊन पाच लाखांची ही मदत त्यांना सुपूर्द केली.
यावेळी उपमुख्यमंत्री एकनाथ शिंदे यांनी स्वतः व्हिडीओ कॉलद्वारे संवाद साधून इनामदार कुटुंबीयांचे सांत्वन केले. झालेली घटना दुर्दैवी असून स्वतःची मुले गमावण्याचे दुःख काय असते ते मला चांगले माहिती आहे, गेलेली व्यक्ती परत आणता येणे शक्य नसले तरीही या दुःखातून सावरण्यासाठी शिवसेना आपल्याला लागेल ती सर्व मदत नक्की करेल असे सांगितले.
आपली झालेली हानी भरून काढता येणे अशक्य असले, तरीही या दुःखातून सावरण्यासाठी आपल्याला मदत पाठवली असून ती आपण मोठ्या मनाने स्वीकारावी अशी विनंती शिंदे यांनी केली. दिल्या हाकेला धावणारी आणि दिलेला शब्द पाळणारी व्यक्ती अशी उपमुख्यमंत्री एकनाथ शिंदे यांची ओळख आहे. धर्माच्या भिंती ओलांडत एका बापाने दुसऱ्या बापाला दिलेला शब्द पाळत उपमुख्यमंत्री एकनाथ शिंदे यांनी आपल्यातील संवेदनशीलपणा पुन्हा एकदा दाखवून दिला आहे.
महत्त्वाच्या बातम्या
