Vaishnavi Hagawane death: वैष्णवीचे व्हाट्सअप चॅट तपासा; 'त्या' मुलाचा 18 तारखेला साखरपुडा, म्हणूनच...; आत्महत्येबाबत हगवणेच्या वकिलाचा कोर्टात दावा
Vaishnavi Hagawane death: हगवणे कुटुंबाच्या वकिलांनी वैष्णवीच्या आत्महत्या प्रकरणामध्ये युक्तिवाद करताना वैष्णवीच्या चारित्र्यावरच बोट ठेवलं. वैष्णवीची प्रवृत्तीच आत्महत्या करण्याची होती, असा दावा हगवणे कुटुंबाच्या वकिलांनी केला आहे.
पुणे : वैष्णवी हगवणे आत्महत्या (Vaishnavi Hagawane death) प्रकरणातील आरोपींना काल (बुधवारी) पुण्यातील कोर्टामध्ये हजर करण्यात आलं. सरकारी युक्तीवाद आणि आरोपींच्या वकिलांच्या युक्तीवादानंतर वैष्णवीचा नवरा शशांक हगवणे, नणंद करिश्मा हगवणे आणि सासू लता हगवणे यांना एका दिवसाची कोठडी सुनावली आहे. तर राजेंद्र हगवणे, सुशील हगवणे या बाप लेकांना 31 मे पर्यंत पोलीस कोठडी सुनावली आहे. अमानुषपणे मारहाण करणाऱ्या, छळ करणाऱ्या हगवणे परिवाराच्या बचावासाठी कोर्टात त्यांच्या वकिलांनी वैष्णवीच्या चारित्र्यावर शिंतोडे देखील उडवले. वैष्णवी नको त्या व्यक्तीसोबत चॅट करायची तिचे चॅट पकडले असा संतापजनक दावा हगवणेच्या वकिलांनी केला आहे. हगवणे कुटुंबाच्या वकिलांनी वैष्णवीच्या आत्महत्या प्रकरणामध्ये युक्तिवाद करताना वैष्णवीच्या (Vaishnavi Hagawane death) चारित्र्यावरच बोट ठेवलं. वैष्णवीची प्रवृत्तीच आत्महत्या करण्याची होती, असा दावा हगवणे कुटुंबाच्या वकिलांनी केला आहे.
18 तारखेला त्या मुलाचा साखरपुडा म्हणून.., वकिलांचा युक्तीवाद काय?
वैष्णवीच्या आत्महत्या प्रकरणी हगवणेंचा बचाव करणाऱ्या वकीलांनी कोर्टात युक्तिवाद करताना म्हटलं की, वैष्णवी नको त्या व्यक्तीसोबत चॅट करायची तिचे हे चॅट हगवणेंनी पकडले होते. त्या व्यक्तीने नकार दिल्यानेच वैष्णवीने आत्महत्या केली आहे. 18 तारखेला त्या मुलाचा साखरपुडा झाला, त्यामुळे ती कॉल करत होती. तपास अधिकाऱ्याला त्या व्यक्तीचे नाव दिले आहे, असा दावा देखील वकिलांनी न्यायालयात केला आहे.
वैष्णवीची प्रवृत्ती सुसाईड करण्याचीच होती. ती मुलगी वेगळी होती. तिनं अनेकदा आत्महत्या करण्याचा देखील प्रयत्न केला होता. एकदा रॅट पॉईझन (उंदीर मारण्याचं औषध) खाऊन आणि एकदा गाडीतून उडी मारून तिने जीवन संपवण्याचा प्रयत्न केला होता. ज्या माणसासोबत ती चॅट करत होती त्याने तिला नकार दिला असेल म्हणून ती नैराश्यात असेल म्हणून तिने आत्महत्या केली आहे. नवरा तिला घरी का पाठवत होता, ते शोधा, त्यासाठी तिचे चॅट तपासा, असंही वकिलांनी म्हटलं आहे.
सोने गहाण ठेवण्यास वैष्णवी यांनी विरोध केला नव्हता
व्यवसायासाठी पैशांची आवश्यकता असल्याने हगवणे कुटुंबातील सर्वांचे सोने गहाण ठेवण्यात आले होते. हे सोने गहाण ठेवण्यास वैष्णवी यांनी विरोध केला नव्हता. त्याबाबतचा काही उल्लेख देखील या प्रकरणात दाखल असलेल्या फिर्यादीत नाही. वैष्णवी यांनी एका तरुणाशी केलेले चॅटिंग पती शशांक यांना मिळालं होतं. त्यावरून दोघांत वाद झाला होता. ही बाब हगवणे यांनी वैष्णवी यांच्या कुटुंबीयांच्या लक्षात आणून दिली होती. त्यानंतर कस्पटे कुटुंबीयांनी वैष्णवी यांचा मोबाईल काढून घेतला होता, असा युक्तिवाद अॅड. दुशिंग यांनी न्यायालयात केला आहे.
वैष्णवीवर आरोप
वैष्णवी यांचे ज्या तरुणाशी चॅटिंग सुरू होते, त्या तरुणाने त्यांना नकार दिल्याने त्यांनी आत्महत्येचे पाऊल उचलले आहे का? त्या नकाराचा वैष्णवी यांच्यावर काही परिमाण झाला होता का? तो तरुण कोण आहे? याचा पोलिसांनी तपास करावा. वैष्णवी यांनी आत्महत्या केल्यानंतर दोन दिवसांनी त्या तरुणाचा साखरपुडा झाला आहे. या प्रकरणात पोलिस एकाच दिशेने तपास करत आहेत. हगवणे कुटुंबाचे देखील या प्रकरणात मोठे नुकसान झाले आहे, असे अॅड.. दुशिंग यांनी कोर्टात म्हटलं आहे.
महत्त्वाच्या बातम्या
