Malegaon Factory Election: माळेगाव कारखान्यासाठी आज मतदान: चौरंगी लढतीमुळे सभासदांच्या निर्णयाकडं जिल्ह्याचं लक्ष, अजित पवार निवडणुकीच्या रिंगणात
Malegaon Factory Election: राज्याचे उपमुख्यमंत्री अजित पवार आणि सहकार क्षेत्रातील ज्येष्ठ नेते चंद्रराव तावरे यांच्यातील मुख्य लढतीमुळे माळेगाव सहकारी साखर कारखान्याची पंचवार्षिक निवडणूक यंदा अत्यंत लक्षवेधी ठरत आहे.
बारामती: गेल्या अनेक दिवसांपासून चर्चेत असलेली माळेगाव सहकारी साखर कारखान्यासाठी (Malegaon factory Election) आज मतदान पार पडत आहे. आज सकाळी सात वाजल्यापासून मतदानाला सुरुवात झाली आहे. विशेष म्हणजे राज्याचे उपमुख्यमंत्री अजित पवार हे ब वर्ग संस्था प्रतिनिधी म्हणून या निवडणुकीच्या आखाड्यात आहेत. एकूण चार पॅनल या निवडणुकीच्या आखाड्यात उतरले असून अजित पवारांच्या विरोधात माळेगाव सहकारी साखर कारखान्याचे माजी अध्यक्ष सहकार महर्षी चंद्रराव तावरे आणि माजी केंद्रीय कृषिमंत्री शरद पवार यांच्या नेतृत्वातील पॅनल मैदानात आहेत. 21 जागांसाठी 90 उमेदवार निवडणुकीच्या रिंगणात आहेत. 19 हजार 549 सभासद आपला मतदानाचा हक्क बजावतील.बारामती शहरातील प्रशासकीय भवनातील अभियांत्रिकी कक्षामध्ये मतदान पार पडत आहे. माळेगाव कारखान्याच्या कार्यक्षेत्रामध्ये एकूण 37 गावे येत असून 67 मतदान केंद्रावर मतदान प्रक्रिया पार पाडणार आहे. 24 जूनला मतमोजणी होणार आहे. मतदान प्रक्रियेला सुरूवात झाल्यानंतर काही वेळातच सुप्रिया सुळे आणि अजित पवारांनी मतदान केलं.
निवडणूक यंदा अत्यंत लक्षवेधी
राज्याचे उपमुख्यमंत्री अजित पवार आणि सहकार क्षेत्रातील ज्येष्ठ नेते चंद्रराव तावरे यांच्यातील मुख्य लढतीमुळे माळेगाव सहकारी साखर कारखान्याची पंचवार्षिक निवडणूक यंदा अत्यंत लक्षवेधी ठरत आहे. यंदा एकूण चार पॅनल आणि काही अपक्ष उमेदवार रिंगणात आहेत. उपमुख्यमंत्री अजित पवार यांचा ‘श्री नीलकंठेश्वर पॅनल’, चंद्रराव तावरे आणि रंजनकुमार तावरे यांचा ‘सहकार बचाव शेतकरी पॅनल’, शरद पवार गटाचा ‘बळीराजा शेतकरी सहकार बचाव पॅनल’, आणि ‘कष्टकरी शेतकरी संघर्ष समिती’ हे प्रमुख पॅनल आहेत. शरद पवार गट आणि संघर्ष समितीचा कोणाला फटका बसेल, हे निकालानंतरच स्पष्ट होणार आहे. अजित पवार यांनी स्वतःची उमेदवारी जाहीर करत "मीच चेअरमन होणार" असे स्पष्ट करताच या निवडणुकीकडे संपूर्ण महाराष्ट्राचे लक्ष लागले आहे. त्यांच्या विरोधात चंद्रराव तावरे आणि रंजन तावरे यांनी प्रभावी प्रचार केला असून, अजित पवारांना दहा ते बारा सभा घ्याव्या लागल्या.
निवडणूक व्यवस्थापन आणि मतदान
आज रविवारी 22 जून रोजी सकाळी सात ते सायंकाळी सहा वाजेपर्यंत मतदान पार पडणार आहे. एकूण ९० उमेदवार रिंगणात असून, कारखान्याचे 67 मतदान केंद्रे निश्चित करण्यात आली आहेत:
गट क्रमांक 1 – माळेगाव : 11 केंद्रे
गट क्रमांक 2 – पणदरे : 13 केंद्रे
गट क्रमांक 3 – सांगवी-कांबळेश्वर : 8 केंद्रे
गट क्रमांक 4 – खांडज-शिरवली : 7 केंद्रे
गट क्रमांक 5 – निरावागज : 12 केंद्रे
गट क्रमांक 6 – बारामती : 15 केंद्रे
ब वर्गासाठी : 1 केंद्र
एकूण मतदान केंद्रांची संख्या – 67
या निवडणुकीत कोणत्या पॅनलला यश मिळणार, हे मंगळवारी (24 जून) रोजी होणाऱ्या मतमोजणीत स्पष्ट होणार आहे. सभासद सजग व जागरूक असल्याने निकालावर सर्वांचे लक्ष आहे.
निवडणुकीवर सुप्रिया सुळेंची प्रतिक्रिया
प्रत्येक निवडणूक महत्त्वाची असते. ती लोकशाही पद्धतीने लढवली पाहिजे. संविधानाच्या माध्यमातून पारदर्शक लोकशाही ती टिकीवी यासाठी या निवडणुका असतात. ही सहकाराची निवडणूक आहे. यशवंतराव चव्हाण यांचे मोठे योगदान आहे. त्यांच्या माध्यमातून सहकार चळवळ मोठी झाली. जे जे कोणी या निवडणुकीत लढत आहेत, या सर्वांना शुभेच्छा. पारदर्शकपणे निवडणूक पार पाडावी, कारखाना चांगल्या पद्धतीने चालवावा. कुठलाही कारखाना असेल त्यात पारदर्शक कारभार महत्त्वाची गोष्ट असते.खूप टीका झाली आहे. आज आपण मतदान करू या. बघूया जरा पेशन्स ठेवा, असंही सुप्रिया सुळेंनी म्हटलं आहे.
महत्त्वाच्या बातम्या
