Pune Crime news Ayush Komkar: पुण्यातील आयुष कोमकर हत्याप्रकरणात मोठी अपडेट, बंडू आंदेकरसह सहा जणांना अटक, पळण्यापूर्वीच मुसक्या आवळल्या

Bandu Andekar Arrest: सोमवारी मध्यरात्री पुणे पोलिसांनी आंदेकर टोळी विरोधात मोठी कारवाई केली आहे. पोलिसांनी मध्यरात्री उशिरा सहा जणांना अटक केली आहे. यात बंडू आंदेकरची मुलगी आणि दोन नातू ही असल्याची माहिती समोर आली आहे.

Bandu Andekar Arrest

Source : ANI

पुणे: गणपती विसर्जनाच्या पूर्वसंध्येला शुक्रवारी ५ सप्टेंबर रोजी आंदेकर टोळीने राष्ट्रवादी काँग्रेसचे माजी नगरसेवक वनराज आंदेकरच्या खुनाचा बदला घेतला. आंदेकर टोळीने वनराज आंदेकर खून प्रकरणातील आरोपी गणेश कोमकरचा मुलगा आयुष कोमकरवर गोळ्या झाडून त्याचा खून केला. आंदेकर टोळीच्या अमन पठाण आणि यश पाटील यांनी आयुष क्लासवरून पार्किंगमध्ये आल्यानंतर गोळ्या झाडल्या. यामध्ये आयुषचा मृत्यू झाला, या घटनेनंतर पुणे शहरात पुन्हा टोळायुध्द सुरू झाल्याच्या चर्चा आहेत. याप्रकरणी पोलिसांनी कठोर कारवाईला सुरूवात केली आहे. आयुष कोमकर हत्या प्रकरणात आंदेकर टोळीचा म्होरक्या बंडू आंदेकरसह सहा जणांना पुणे पोलिसांच्या गुन्हे शाखेने काल रात्री उशीरा अटक केल्याची माहिती समोर आली आहे. बुलढाणा या ठिकाणी पळून जात असताना गुन्हे शाखेच्या पथकाने त्यांना अटक केली आहे. यात बंडू आंदेकरची मुलगी आणि दोन नातू ही असल्याची माहिती समोर आली आहे.

बंडू आंदेकरची मुलगी आणि दोन नातू ही असल्याची प्राथमिक माहिती

आयुष खून प्रकरणी आंदेकर टोळीचा म्होरक्या बंडू आंदेकर याच्यासह एकूण १३ जणांवर गुन्हा दाखल केल्याची माहिती समोर आली आहे. गुन्हा दाखल झालेल्यांमध्ये माजी नगरसेविका लक्ष्मी आंदेकरसह आणखी एका महिलेचा देखील समावेश आहे. आयुषची हत्या झाल्यानंतर पोलिसांनी तातडीने दोघांना अटक केली होती. यात प्रत्यक्ष हल्ल्यात सहभागी असलेल्या यश पाटील आणि अमित पाटोळे यांचा देखील समावेश होता. आता या प्रकरणात आणखी सहा जणांना अटक केली आहे. पोलिसांनी मध्यरात्री उशिरा कारवाई करत सहा जणांना अटक केल्याची माहिती आहे. अटक केलेल्या आरोपींमध्ये नक्की कोण आहेत? याबाबतचा तपशील किंवा त्यांची नावं समोर आलेली नाहीत. मात्र पहाटे पोलिसांनी सापळा रचून सहा जणांना अटक केल्याचं सांगितलं जात आहे. यात बंडू आंदेकरची मुलगी आणि दोन नातू ही असल्याची प्राथमिक माहिती समोर आली आहे.

आयुष कोमकर हत्या प्रकरणी कोणावर गुन्हे दाखल?

गुन्हा दाखल झालेल्या आरोपींमध्ये आंदेकर टोळीचा म्होरक्या सूर्यकांत उर्फ बंडू आंदेकर (वय ६०), कृष्णा उर्फ कृष्णराज सूर्यकांत आंदेकर (वय ४१), शिवम उर्फ शुभम सूर्यकांत आंदेकर (वय ३१), अभिषेक उदयकांत आंदेकर (वय २१), शिवराज उदयकांत आंदेकर (वय २९), लक्ष्मी उदयकांत आंदेकर (वय ६०), वृंदावनी निलंजय वाडेकर (वय ४०), तुषार निलंजय वाडेकर (वय २६), स्वराज निलंजय वाडेकर (वय २२), अमन युसुफ पठाण उर्फ खान, सुजल राहुल मेरगु (वय २३), यश सिद्धेश्वर पाटील आणि अमित प्रकाश पाटोळे (वय १९) अशा १३ जणांचा समावेश आहे.

नेमकं प्रकरण काय?

दरम्यान मागील वर्षी एक सप्टेंबर रोजी माजी नगरसेवक वनराज आंदेकर याचा गोळ्या झाडून आणि कोयत्याने वार करून खून करण्यात आला होता. या प्रकरणात सोमनाथ गायकवाड, अनिकेत दूधभाते, वनराज आंदेकर याची बहीण संजीवनी कोमकर, पती जयंत कोमकर आणि दीर गणेश कोमकर यांच्यासह १६ आरोपींना अटक करण्यात आली होती. या प्रकरणाचा बदला या खुनाद्वारे घेण्यात आला आहे. पोलिसांनी दिलेल्या माहितीनुसार, आरोपी गणेश कोमकरचा मुलगा आयुष नाना पेठेतील एका सोसायटीत राहायला होता. शुक्रवारी (५ सप्टेंबर) सायंकाळी आठ वाजण्याच्या सुमारास तो क्लासवरून दुचाकीवरून आला त्यावेळी पार्किंगमध्ये त्याच्यावरती गोळ्या झाडण्यात आल्या.