मोठी बातमी! भाजप नेत्याला धक्का, माजी मंत्री सुरेश वरपूडकरांची घराणेशाही जनतेनं नाकारली; कुटुंबातील 5 पैकी 4 पराभूत
सुरेश वरपूडकर यांची कन्या सोनल देशमुख या झरी जिल्हा परिषद गटातून मशालीच्या चिन्हावर उभ्या होत्या. मात्र, सोनल वरपूडकर यांना पराभव पत्कारावा लागला आहे.
परभणी : राज्यातील जिल्हा परिषद (ZP Results) आणि पंचायत समितीच्या निवडणुकांचे निकाल हाती येत असून अनेक ठिकाणी धक्कादायक आणि आश्चर्यजनक निकाल पाहायला मिळत आहेत. नगरपालिका निवडणुकीत लातूरमध्ये भाजपच्या घराणेशाहीला जनतेनं नाकारलं होतं. आता, परभणीतही (Parbhani) झेडपी आणि पंचायत समितीच्या निकालात ते चित्र पाहायला मिळालं. परभणीचे नेते तथा भाजपचे माजी मंत्री सुरेश वरपुडकर यांच्या कुटुंबातील पाच जण या निवडणुकीमध्ये उभे होते. त्यामध्ये, 5 पैकी 4 जागेव वरपूडकर यांच्या नातेवाईकांना पराभव स्वीकारावा लागला असून केवळ एका जागेवर त्यांचा पुतण्या विजयी झाला आहे. अजित वरपूडकर यांनी काँग्रेसच्या पंजा चिन्हावर निवडणूक लढवत विजय मिळवला.
सुरेश वरपूडकर यांची कन्या सोनल देशमुख या झरी जिल्हा परिषद गटातून मशालीच्या चिन्हावर उभ्या होत्या. मात्र, सोनल वरपूडकर यांना पराभव पत्कारावा लागला आहे, भाजपचे उमेदवार दिलीप देशमुख यांनी त्यांचा पराभव केलाय. दुसरीकडे त्यांचे चिरंजीव समशेर वरपूडकर हे शिंगणापूर जिल्हा परिषद गटातून उभे होते त्या ठिकाणी मशाल या चिन्हावर उभे असलेले पांडुरंग खिल्लारे यांनी समशेर वरपूडकर यांचा पराभव केला. दुसरीकडे त्यांच्या सुनबाई प्रेरणा वरपूडकर या दैठणा जिल्हा परिषद गटातून निवडणुकीसाठी उभ्या होत्या, त्या ठिकाणीही काँग्रेसच्या ज्योत्स्ना गणेश घाडगे यांनी त्यांचा पराभव केलाय. त्यामुळे वरपूडकर यांचे घरातील तीनही उमेदवार पराभूत झाले आहेत.
लोहगाव जिल्हा परिषद गटात सुरेश वरपडूकर यांचे दोन पुतणे निवडणुकीच्या रिंगणात उभे होते. त्यातील, काँग्रेसच्या चिन्हावर उभे असलेले अजित वरपूडकर यांनी भाजपकडून उभे असलेल्या ऐश्वर्य वरपुडकर यांचा पराभव केला. त्यामुळे, जिल्हा परिषदेसाठी 5 पैकी केवळ एका जागेवर सुरेश वरपूडकर यांना विजय मिळवता आला आहे, येथे त्यांचा पुतण्या विजयी झाला आहे. परभणीकरांनी नेत्यांच्या कुटुंबातील मोठ्या उमेदवारांना नाकारत सामान्य उमेदवारांना या ठिकाणी विजय करुन घराणेशाहीला घरचा रस्ता दाखवला आहे.
हेही वाचा
महत्त्वाच्या बातम्या
