Shivaji Sawant: उपमुख्यमंत्री एकनाथ शिंदे (Eknath Shinde) यांच्या शिवसेनेचे (Shiv Sena) ज्येष्ठ नेते आणि सोलापूर जिल्ह्याचे माजी संपर्कप्रमुख शिवाजी सावंत (Shivaji Sawant) यांचा भाजपमध्ये होणारा अपेक्षित पक्षप्रवेश अचानक पुढे ढकलण्यात आला आहे. त्यामुळे सोलापूर (Solapur) जिल्ह्यात तसेच राज्याच्या राजकीय वर्तुळात नव्या चर्चांना उधाण आले आहे. शिवाजी सावंत हे राज्याचे माजी मंत्री तानाजी सावंत (Tanaji Sawant) यांचे ज्येष्ठ बंधू असून, दोघांमधील सुरू असलेल्या कौटुंबिक आणि राजकीय मतभेदांच्या पार्श्वभूमीवर हा प्रवेश विशेष महत्त्वाचा मानला जात होता.
Shivaji Sawant: भाजपमध्ये प्रवेशाच्या हालचालींना वेग
मिळालेल्या माहितीनुसार, सोलापूर जिल्ह्यातील शिवाजी सावंत हे शिंदे गटातील प्रभावी आणि वरिष्ठ नेते मानले जातात. संपूर्ण जिल्ह्यात त्यांचा मजबूत संपर्क व प्रभाव लक्षात घेऊन भाजपकडून त्यांना पक्षात सामावून घेण्यासाठी काही काळापासून प्रयत्न सुरू होते. दोन दिवसांपूर्वी पंढरपूर येथे पालकमंत्री जयकुमार गोरे (Jaykumar Gore) यांनी शिवाजी सावंत यांच्याशी सविस्तर चर्चा केली होती. त्यानंतर भाजपमध्ये नुकतेच प्रवेश केलेले माजी आमदार बबनदादा शिंदे यांचे पुत्र रणजीत शिंदे यांच्याशी देखील सावंत यांची बैठक झाली होती. या चर्चेनंतर तिघांची एकत्रित बैठक घेण्यात आली आणि सावंत यांचा भाजप प्रवेश निश्चित झाल्याचे जवळपास ठरले होते.
Tanaji Sawant: तानाजी सावंतांचा हस्तक्षेप?
तथापि, आज गुरुवारी नियोजित असलेला भाजप प्रवेश अचानक पुढे ढकलण्यात आला. या घडामोडीनंतर विविध चर्चा रंगू लागल्या असून, तानाजी सावंत यांचा प्रभाव आणि हस्तक्षेप यामागे कारणीभूत असल्याची चर्चा राजकीय वर्तुळात सुरू झाली आहे. राज्याच्या सत्तांतर प्रक्रियेदरम्यान तानाजी सावंत यांनी शिंदे गटाच्या भूमिकेला बळकटी दिली होती. त्या काळात देवेंद्र फडणवीस यांच्याशी त्यांचे निकटचे संबंध निर्माण झाले. त्यामुळे भाजपने तानाजी सावंत यांच्या भूमिकेचा मान राखत त्यांच्या बंधूंचा प्रवेश सध्या थांबवला, अशी चर्चा सुरु झाली आहे.
Solapur Politics: सोलापूरमध्ये चर्चांना उधाण
शिवाजी सावंत यांचा भाजप प्रवेश रखडल्याने सोलापुरातील राजकीय समीकरणे पुन्हा ढवळून निघण्याची शक्यता व्यक्त केली जात आहे. सावंत हे सोलापूर जिल्ह्यातील शिवसेनेचे अनुभवी नेते असून, त्यांच्या पक्षांतरामुळे स्थानिक स्तरावर शिंदे गटाला मोठा फटका बसू शकतो, असा अंदाज राजकीय विश्लेषकांनी व्यक्त केला आहे. सध्या दोन्ही सावंत बंधूंच्या मतभेदांच्या पार्श्वभूमीवर पुढील काही दिवसांत या घडामोडी कोणत्या वळणावर जातात, याकडे राज्याचे राजकीय लक्ष लागले आहे.
आणखी वाचा