Sujay Vikhe Patil on Bacchu Kadu : बच्चू कडू म्हणाले, विखे पाटील मतांचे भिकारी, आता सुजय विखेंचं जोरदार प्रत्युत्तर; म्हणाले, देव त्यांना...
Sujay Vikhe Patil on Bacchu Kadu : विखे पाटील मतांचे भिकारी असल्याची घणाघाती टीका बच्चू कडू यांनी शिर्डीत केली होती. त्यांच्या या टिकेला सुजय विखे पाटलांनी प्रत्युत्तर दिलंय.
Sujay Vikhe Patil on Bacchu Kadu : विखे पाटील मतांचे भिकारी असल्याची घणाघाती टीका प्रहार जनशक्ती पक्षाचे अध्यक्ष बच्चू कडू (Bacchu Kadun) यांनी शिर्डीत केली होती. त्यांच्या या टिकेला भाजपचे माजी खासदार सुजय विखे पाटलांनी (Sujay Vikhe Patil) प्रत्युत्तर दिलंय. शिर्डीत येऊन अनेक लोक विखे पाटलांबद्दल अपशब्द वापरतात हे आम्हाला नवीन नाही. देव बच्चू कडूंना सद्बुद्धी देवो, असं सुजय विखे यांनी म्हटले आहे.
शिर्डीतील भिक्षेकरू मृत्यू प्रकरणानंतर बच्चू कडू यांनी काल पिडित कुटुंबियांची भेट घेऊन सांत्वन केले. माध्यमांशी बोलताना त्यांनी शिर्डीचे आमदार तथा राज्याचे जलसंपदा मंत्री राधाकृष्ण विखे पाटील यांच्या कार्यपद्धतीवर जोरदार टीकास्त्र सोडले. ते तर मतांचे भिकारी आहेत. विधानसभा, जिल्हा परिषद निवडणुका आल्या की भीक मागतात. खरे भिकार.. तर तेच आहेत', अशी खरमरीत टीका मंत्री विखेंवर केली होती. इथले आमदार, खासदार आणि पालकमंत्र्यांचे काही कर्तव्य नाही का? प्रशासनाच्या ताब्यात असलेली माणसं मरत असेल, तर सरकारी कार्यालय हवीच कशाला? पीडित कुटुंबांची भेट घ्या, असा आदेश पालकमंत्र्यांनी तहसीलदारांना द्यायला हवे होते. तसीलदाराला ठोकलं असतं, तर गुन्हा दाखल झाला असता. प्रशासनाच्या कारवाईत लोक मेली, तरीही गुन्हा दाखल होत नाही. वर्षभर सापाला मारायचं आणि नागपंचमीला पूजायचं, राज्यकर्त्यांनी मतदारांची, अशी अवस्था केली असल्याचा हल्लाबोल बच्चू कडू यांनी केला होता.
सुजय विखेंचं बच्चू कडूंना प्रत्युत्तर
बच्चू कडू यांच्या टीकेवर सुजय विखे पाटील म्हणाले की, आम्ही मयताच्या कुटुंबीयांसोबत असून विखे परिवार त्यांना सर्वोतोपरी मतद करेल. भिक्षेकरींसोबत स्वीकार गृहात किंवा जिल्हा रुग्णालयात काही हलगर्जीपणा झाला असेल तर दोषींवर कारवाई होईल. अनेकदा लोक शिर्डीत येऊन विखे पाटलांबद्दल अपशब्द वापरता आणि हे आम्हाला नवीन नाही. इथली जनता आमच्यामागे उभी असून आम्ही जे करतो ते जनतेच्या भलाईसाठीच करतो. बच्चू कडू यांनी केलेल्या टिकेला मी उत्तर देणार नाही. मात्र, विरभद्र महाराज त्यांना सद्बुद्धी देवो, एवढीच प्रार्थना करतो, असे प्रत्युत्तर सुजय विखे यांनी दिले आहे.
इतर महत्त्वाच्या बातम्या
महत्त्वाच्या बातम्या
