Satej Patil: महायुतीच्या भांडणात गोकुळ अडचणीत, दररोज उठून डेऱ्यांना कोर्टात जावं लागत आहे; सतेज पाटलांचा हल्लाबोल, धनंजय महाडिकांना सुद्धा खोचक टोला

महायुतीतील गोकुळ, जिल्हा परिषदेची आणि इचलकरंजी महापालिकेतील भांडण बघता गोकुळचा उत्पादक शहाणा आहे. एकमुखी दूध उत्पादक आमच्या बाजूने राहतील अशी मला खात्री असल्याचे सतेज पाटील म्हणाले. 

Satej Patil

Source : ABP Majha

Satej Patil: महायुतीच्या भांडणामुळे गोकुळ अडचणीत आल आहे, दररोज उठून डेऱ्यांना कोर्टात जावं लागत आहे असल्याचा हल्लाबोल सत्ताधारी आघाडीचे नेते सतेज पाटील यांनी केला. महायुतीतील गोकुळ, जिल्हा परिषदेची आणि इचलकरंजी महापालिकेतील भांडण बघता गोकुळचा उत्पादक शहाणा आहे. एकमुखी दूध उत्पादक आमच्या बाजूने राहतील अशी मला खात्री असल्याचे सतेज पाटील म्हणाले. 

त्यांनी महापालिकेचा सुद्धा निकाल सांगितला होता 

दरम्यान, गोकुळवरून खासदार धनंजय महाडिक यांनी 25-0 विजयाचा दावा केला होता. यावरून सतेज पाटील यांनी खोचक टीका केली. महापालिकेचा निकाल सुद्धा त्यांनी सांगितला होता, चार-पाच नगरसेवक आमचे येतील असेही ते म्हणाले होते, अशा शब्दात सतेज पाटील यांनी तोफ डागली. 

राजेश क्षीरसागर यांना मंत्री व्हायची घाई लागली

आमदार सतेज पाटील यांनी शक्तीपीठ आंदोलनावरून राजेश क्षीरसागर यांच्यावर जोरदार हल्लाबोल केला. त्यांनी सांगितले की, आमदार राजेश क्षीरसागर यांना मंत्री व्हायची घाई लागली आहे, कधी एकदा आबिटकर यांना बाजूला करून मी मंत्री होतोय म्हणून शासनाची बाजू परखडपणे मांडत असल्याचा हल्लाबोल त्यांनी केला. 

ते म्हणाले, क्षीरसागर यांना शक्तिपीठमध्ये पडायची गरज नव्हती, हा ग्रामीण भागाचा प्रश्न आहे तुम्ही तुमच्या आमदारांना म्हणजे आबिटकर, मंत्री हसन मुश्रीफ, चंद्रदीप नरके आणि कोरे यांना तुमच्या बाजूने बोलायला लावा आणि मग तुम्ही शक्तिपीठची बाजू घ्या अशी विनंती असल्याचे ते म्हणाले. राजू शेट्टी हे राज्याचे नेते आहेत, राज्याच्या नेतृत्वावर बोलताना त्याची रिएक्शन येणारच, असे त्यांनी सांगितले. शक्तिपीठ हिताचा कसा वाटतोय आणि राज्याची वाट कशी लागते हे तुम्ही लोकांना सांगा, असे आव्हान त्यांनी दिले. या प्रकल्पातून काय नुकसान होणार आहे हे सांगा म्हणजे लोक निर्णय घेतील, कारण नसताना हा प्रकल्प राबवून शेतकऱ्यांच्या माथी हा मारला जात आहे. एकनाथ शिंदे साहेबांनी शक्तीपीठ रद्दची भूमिका घेतली ती खरी की खोटी, असाही सवाल त्यांनी केला.

12 जिल्ह्यातील शेतकऱ्यांसोबत आम्ही संघर्ष करणार 

निवडणुकीच्या आधी घोषणा केली ती मतं घेण्यासाठी केली, लाडक्या बहिणींची योजना तुम्ही केली, मतं मिळाली आणि आता बहिणींना तुम्ही बाजूला केलं. सरकारमधील प्रत्येकाला मुख्यमंत्र्यांसमोर मी कसा चांगला वाटेल, मुख्यमंत्र्यांना बर वाटेल असं बोलायचं हे सुरू आहे. शक्तीपीठ रद्द करण्यासाठी 12 जिल्ह्यातील शेतकऱ्यांसोबत आम्ही संघर्ष करणार असल्याचे ते म्हणाले. 

इतर महत्वाच्या बातम्या