Rohit Pawar On Ajit Pawar: 'अजितदादा म्हणायचे शर्टाचं वरचं बटण लावत जा, 40-50 वर्षांनी मी अजितदादांना भेटायला जाईन तेव्हा...'; रोहित पवारांचं डोळे पाणावणारं भाषण
Rohit Pawar On Ajit Pawar: "काकी, तुमच्या राजकीय प्रवासामध्ये या छोट्या कार्यकर्त्याची, तुमच्या पुतण्याची ज्यावेळी गरज लागेल त्यावेळी मी तयार असेन...", असं आश्वासनही रोहित पवारांनी दिलं.
Rohit Pawar On Ajit Pawar: महाराष्ट्राचे लाडके उपमुख्यमंत्री अजित पवार (Ajit Pawar) यांच्या अकाली एग्झिटनं संपूर्ण महाराष्ट्र (Maharashtra Politics) हादरला. राज्याच्या राजकीय वर्तुळातील दिग्गज कुटुंबांपैकी एक असलेल्या बारामतीच्या (Baramati) पवार कुटुंबासाठी हा मोठा धक्काच. फक्त पवार कुटुंबच नाही, तर संपूर्ण महाराष्ट्रासाठीच अजित पवाराचं अपघाती निधन काळजाला चटका लावणारं होतं. अशातच आता राज्याचं अर्थसंकल्पीय अधिवेशन सुरू झालंय. विधिमंडळाच्या अर्थसंकल्पीय अधिवेशनाला (Maharashtra Vidhansabha Adhiveshan 2026) सुरुवात अजित पवारांना श्रद्धांजली अर्पण करुन करण्यात आली. त्यावेळी सभागृहात उपस्थित सर्वच नेत्यांचा कंठ दाटून आला. त्याचवेळी सभागृहात शोकप्रस्तावावेळी दिवंगत नेते अजित पवार यांच्याबाबत बोलताना त्यांचे पुतणे आणि आमदार रोहित पवार भावूक झाल्याचं दिसून आलं.
आपल्या शर्टचं वरचं बटण उघडं असायचं, त्यावर ते बटण लावत जा असं अजित पवार म्हणायचे. पण चाळीस-पन्नास वर्षानंतर कधी दादांची वरती भेट होईल, त्यावेळी आपण त्यांच्यासमोर हे बटण लावू. तोपर्यंत हे बटण तसंच खुलं असेल, त्यामुळे दादांची रोज आठवण येईल असं रोहित पवार म्हणाले.
अजितदादांच्या आठवणी सांगताना रोहित पवार भावूक, काय म्हणाले?
विधिमंडळात बोलताना अजित पवार म्हणाले की, "एकदा अजितदादा मला म्हणाले होते की, रोहित तुझ्या झिपऱ्या वाढल्यात, त्या कमी कर. दादा गेले त्या दिवशी त्यांना आदरांजली म्हणून मी केस कापले. अजितदादा नेहमी मला म्हणायचे की, तुझं शारिरीक वजन वाढलंय. शारिरीक वजन कमी कर आणि राजकीय वजन वाढव. मी त्यावर फक्त हो म्हणायचो. मी अजितदादांना शब्द देतो. माझी हेअरस्टाईल अशीच ठेवेन. शारिरीक वजन कमी करेन, राजकीय वजन वाढवेन..."
"एक गोष्ट खरीय, ते मला म्हणायचे की, वरचं बटण लावत जा... पण एक मात्र मी सांगतो, चाळीस-पन्नास वर्षानंतर मी ज्यावेळी अजितदादांना भेटायला जाईन, तोपर्यंत मी माझं बटण असंच उघडं ठेवणार. कारण हे वरचं बटण तुमची मला रोज आठवण देत राहील...", अंस रोहित पवार म्हणाले.
"एक सांगतो, चाळीस-पन्नास वर्षानंतर ज्यावेळी कधी तुमची भेट होईल, तेव्हा हा माझा लढा सुरू आहे, त्यामुळे त्यांच्यासमोर मी ताठ मानेनं उभा राहीन. त्यावेळी नक्कीच माझे काका माझ्या पाठीवर हात ठेवून म्हणतील, "लढलास बरं का!" या गोष्टी ऐकण्यासाठी मी हा लढा सुरू ठेवलाय. दादांच्या अपघातासाठी जो कुणी जबाबदार असेल, जो कुणी दोषी असेल, मग तो कितीही मोठा असेल त्याला तुरुंगात टाकल्याशिवाय आणि शिक्षा दिल्याशिवाय आम्ही शांत बसणार नाही."
"काकी, तुमच्या राजकीय प्रवासामध्ये या छोट्या कार्यकर्त्याची, तुमच्या पुतण्याची ज्यावेळी गरज लागेल त्यावेळी मी तयार असेन...", असं आश्वासनही रोहित पवारांनी दिलं.
दादांना श्रद्धांजली वाहताना सर्वपक्षीय नेते भावूक
महाराष्ट्राचं अवघं राजकारण काल एका संवेदनशील आणि हळव्या वळणावर येऊन थबकलेलं पाहायला मिळालं. उपमुख्यमंत्री अजित पवारांच्या अपघाती निधनाचा धक्का अवघ्या महाराष्ट्रासाठी पचवणं मोठं मुश्किलीचं होऊन बसलंय. विधिमंडळाच्या अर्थसंकल्पीय अधिवेशनाला सुरुवात अजित पवारांना श्रद्धांजली अर्पण करुन करण्यात आली. दुर्दैव म्हणजे, अजित पवार हयात असते तर यंदाचा अर्थसंकल्प स्वत अजित पवारांनी मांडला असता. दादांना श्रद्धांजली वाहताना सर्वपक्षीय नेते भावूक झाल्याचं पाहायला मिळालं. हसन मुश्रीफ, आदिती तटकरे, रोहित पवार, वळसे-पाटील यांना अश्रू अनावर झाले. वरळीतील डोममध्ये सर्वपक्षीय शोकसभेचं आयोजन करण्यात आलं होतं. यावेळी राजकीय मतभेद बाजूला सारून राज्यासह देशभरातील दिग्गजांनी एकत्र येत अजित दादांच्या आठवणींना उजाळा दिला. दरम्यान, विधानभवन परिसरात अजित पवारांचं स्मृतीस्थान उभारण्याची घोषणा विधानसभा अध्यक्ष राहुल नार्वेकरांनी केलीय.
पाहा व्हिडीओ : Rohit Pawar On Ajit Pawar दादांच्या आठवणीत रोहित पवार म्हणाले, तोपर्यंत शर्टाचे वरचे बटन लावणार नाही
महत्त्वाच्या इतर बातम्या :
महत्त्वाच्या बातम्या
