Raj Thackeray Pune MNS: पुणे महापालिका निवडणुकीत (Pune Election 2026) झालेल्या दारुण पराभवानंतर महाराष्ट्र नवनिर्माण सेनेत (MNS) मोठ्या घडामोडी घडण्याची शक्यता आहे. एकेकाळी पुणे महापालिकेत तब्बल 29 नगरसेवकांचा दबदबा असलेल्या मनसेला यंदाच्या निवडणुकीत एकही नगरसेवक निवडून आणता न आल्याने पक्षात आत्मचिंतन सुरू झाले आहे. या पार्श्वभूमीवर पुण्यातील मनसे शहर कार्यकारणीत मोठे बदल होण्याचे स्पष्ट संकेत पक्षाच्या वरिष्ठ नेत्यांनी दिले आहेत.
मनसेचे सरचिटणीस हेमंत संभूस यांनी प्रतिक्रिया देताना, “निवडणुकांमध्ये जय-पराजय होत असतात. यंदा पुणे महापालिका निवडणुकीत आम्ही पहिल्यांदाच शिवसेनेसोबत युती करून मैदानात उतरलो होतो. निकाल आमच्या अपेक्षेप्रमाणे लागले नाहीत. हा पराभव आम्ही मान्य केला असून लवकरच याबाबत पक्षांतर्गत आत्मचिंतन करण्यात येईल,” असे स्पष्ट केले.
Raj Thackeray Pune MNS: प्रचार रणनीतीत कमी पडलो : हेमंत संभूस
निवडणूक प्रचाराबाबतही पक्षाकडून स्पष्ट कबुली देण्यात आली आहे. “या निवडणुकीत प्रचाराची रणनीती आखताना आम्ही काही ठिकाणी कमी पडलो. ही निवडणूक एकप्रकारे धनशक्ती विरुद्ध संघटनशक्ती अशी होती. मात्र, याचा अर्थ असा नाही की आम्ही जबाबदारी झटकतो,” असे सांगत संभूस यांनी येत्या काळात पुण्यात मनसेच्या कामकाजात बदल दिसतील, असा दावा केला.
Raj Thackeray Pune MNS: राज ठाकरे पुण्यात येणार
महत्त्वाचं म्हणजे, मनसे अध्यक्ष राज ठाकरे लवकरच पुण्यात येऊन पदाधिकारी आणि कार्यकर्त्यांची बैठक घेणार असल्याची माहितीही हेमंत संभूस यांनी दिली. “राज साहेब आणि शर्मिला वहिनी यांच्याशी चर्चा झाल्यानंतर पुणे शहरात स्पष्ट बदल दिसतील. संघटनात्मक पातळीवर निर्णय घेतले जातील,” असे ते म्हणाले.
Raj Thackeray Pune MNS: शहराध्यक्षपदासह अनेक बदलांचे संकेत
पुणे मनसेच्या शहराध्यक्षपदाबाबत विचारले असता, “फक्त शहराध्यक्षपदाबाबत विचारू नका. येत्या काळात पक्षात अनेक बदल झालेले दिसतील,” असे सूचक विधान संभूस यांनी केले. त्यामुळे केवळ शहराध्यक्ष नव्हे, तर संपूर्ण शहर कार्यकारणीमध्ये फेरबदल होण्याची शक्यता वर्तवली जात आहे. त्यामुळे आता राज ठाकरे पुण्यात ‘भाकरी फिरवत’ नव्या चेहऱ्यांना संधी देणार का, जुनी जबाबदारी बदलणार का, याकडे राजकीय वर्तुळाचं लक्ष लागलं आहे.
राज्य आणि देश-विदेशातील महत्त्वाच्या बातम्या; पाहा व्हिडीओ
इतर महत्त्वाच्या बातम्या