Prithviraj Chavan : गोकुळमध्ये कायदा बदलणं हे हुकुमशाहीचं लक्षण, लोकांना जेनझीप्रमाणं रस्त्यावर उतरावं लागेल अन्यथा सरकार आंदोलनं दडपून टाकेल : पृथ्वीराज चव्हाण
Prithviraj Chavan : गोकुळचा प्रश्न असेल, ऊस दराचं आंदोलन असेल लोकांना जेनझीप्रमाणं रस्त्यावर येत तीव्र आंदोलन करावं लागेल, असं पृथ्वीराज चव्हाण यांनी म्हटलं.

कोल्हापूर/ सातारा : राज्याचे माजी मुख्यमंत्री आणि काँग्रेसचे ज्येष्ठ नेते पृथ्वीराज चव्हाण यांनी गोकुळमध्ये संचालक वाढीचा निर्णय, ऊस दर आंदोलन यासंदर्भात भाष्य केलं आहे. गोकुळमध्ये कायदा बदलणं हे हुकुमशाहीचं लक्षण असल्याचा हल्लाबोल पृथ्वीराज चव्हाण यांनी केला आहे.
पृथ्वीराज चव्हाण काय म्हणाले?
पृथ्वीराज चव्हाण यांनी गोकुळबाबतचा निर्णय सरळसरळ हुकुमशाहीचा,दादागिरीचा असल्याचं म्हटलं. निवडून आलेल्या लोकांचे अधिकार काढून घेऊन आपल्या विचारांची माणसं तिथं बसवणं, आर्थिकदृष्ट्या उत्कृष्ठपणे चाललेल्या संस्थेवर आपण जबरदस्ती कब्जा करणं हे सगळं चाललेलं आहे.लोक याला सहन करतील का नाही हे माहिती नाही. कोर्ट कचेरी होईल, पण शेवटी सरकार आहे, असं मत पृथ्वीराज चव्हाण यांनी मांडलं.
ही हुकुमशाहीची लक्षणं...
सातारा जिल्हा परिषदेच्या निवडणुकीत काय झालं ते आपण पाहिलं. भाजपच्या लोकांनी युती सरकारच्या मंत्र्यांना मारहाण केली गेली. येनकेन प्रकारे सत्ता हातात ठेवणं, ज्ञानेश कुमारला वापरुन निवडणूक याद्यात 13 कोटी लोकांना वगळणं असेल,ईव्हीएम मशीन असेल, गोकुळमध्ये कायदा बदलण्याची प्रक्रिया असेल ही सगळी हुकुमशाहीची लक्षणं आहेत, असा प्रहार पृथ्वीराज चव्हाण यांनी केला.
जेनझीनं ज्या प्रकारे विरोध केला, सरकारला नमवलं, शिक्षणमंत्र्याला राजीनामा द्यावा लागला. त्याप्रकारे लोकांनी शेवटी रस्त्यावर उतरुन विरोध नाही केला तोपर्यंत गोकुळ सारख्या सहकारी संस्था काय, ऊस उत्पादक शेतकऱ्यांचं आंदोलन काय सरकार त्याला दडपून टाकेल. त्यामुळं लोकांना इथं रस्त्यावर उतरावं लागेल, असं पृथ्वीराज चव्हाण यांनी म्हटलं.
काल आम्ही जो सत्याग्रह केला, मी त्यामध्ये सहभागी झालो. ऊस उत्पादक शेतकऱ्यांनी रास्ता रोको केल्यामुळं त्यांना यश मिळालं. लोकांमध्ये प्रचंड मोठी चीड आहे. दुष्काळी स्थिती आहे, 2018 पासून उसाची एमएसपी वाढवलेली नाही.महागाई वाढत चालली आहे. उत्पादन खर्च फार वाढलेला आहे. परंतु शेतकऱ्यांना उचित मोबदला मिळत नाही त्याविरोधात आंदोलन सुरु होतं. गोकुळ असेल अथवा इतर आंदोलन असेल, लोकांनी आपल्या हक्कांसाठी तीव्र आंदोलन नाही केलं तर सरकार काही कोणाला दाद देणार नाही. हुकुमशाही आणखी कडक होत जाईल आणि आपल्या गळ्याभोवतीचा फास आवळत जाईल, अशी भीती पृथ्वीराज चव्हाण यांनी व्यक्त केली.






















