Pratap Sarnaik on Operation Tiger: राज्यात ‘ऑपरेशन टायगर’च्या माध्यमातून शिवसेना ठाकरे गटाच्या (Shiv Sena UBT) खासदारांना फोडण्याच्या हालचाली सुरू असल्याची चर्चा पुन्हा रंगली आहे. उपमुख्यमंत्री एकनाथ शिंदे (Eknath Shinde) पडद्यामागून यासाठी प्रयत्न करत असल्याची माहिती समोर येत आहे. सूत्रांच्या माहितीनुसार, शिंदे हे ठाकरे गटाच्या खासदारांशी गुप्तपणे सातत्याने संपर्कात आहेत. या पार्श्वभूमीवर बुधवारी रात्री ठाण्यात शिंदे आणि ठाकरे गटाच्या काही खासदारांची गुप्त बैठक झाल्याचे वृत्त समोर आले आहे. या बैठकीला ठाकरे गटातील 9 पैकी 8 खासदार उपस्थित असल्याचा दावा केला जात आहे. मात्र, या वृत्ताला ठाकरे गटाच्या खासदारांनी स्पष्ट नकार दिला आहे. आता या प्रकरणावरून राज्याचे परिवहन मंत्री प्रताप सरनाईक यांनी ठाकरे गटात अंतर्गत धुसफूस सुरु असल्याचा दावा केलाय.
प्रताप सरनाईक म्हणाले की, आम्हाला बैठका घ्यायच्या असतील तर आम्ही उघडपणे घेऊ. उबाठामध्ये सर्व आमदार, खासदारांमध्ये खदखद आहे. जिल्हा परिषद, नगर पंचायतीच्या निवडणुकीच्या वेळी आम्ही महाराष्ट्रात फिरत होतो, तेव्हा तिथले स्थानिक आमदार, खासदार, नेते मंडळी आम्हाला सांगायचे की, तुम्ही एकनाथ शिंदेंचे अनुयायी म्हणून महाराष्ट्रात फिरत आहात. परंतु, आम्हाला बघा कसे वाळीत टाकले आहे. आम्हाला निवडणुकीत कुठलेही सहकार्य झाले नाही. त्यामुळे ठाकरे गटात खतखद आहे आणि तो असंतोष वेगळ्या माध्यमातून बाहेर पडत आहे. एकनाथ शिंदे यांच्या नेतृत्वाखाली ठाकरे गटाचे अनेक लोक रोजच आमच्या पक्षात प्रवेश करत आहेत. खासदारांनी स्वतः इच्छा दाखवली आणि एकनाथ शिंदे यांनी त्यांची इच्छा जर मान्य केली तर आम्ही त्यांचे स्वागतच करू. परंतु छुप्या पद्धतीने बैठका घेण्याचे काम एकनाथ शिंदे कधीही करत नाही, असे त्यांनी म्हटले.
Pratap Sarnaik on Operation Tiger: त्यांचे आपापसात काही मतभेद
प्रताप सरनाईक पुढे म्हणाले की, आता सगळ्या निवडणुका झालेल्या आहेत. आता काही निवडणुका नाहीत. त्यामुळे अशा बातम्या पेरून पक्षात वेगळं वातावरण निर्माण करायचं आणि आपली ताकद वाढवायची, यासाठी हा कोणाचातरी प्रयत्न असणार आहे. उबाठामध्ये अंतर्गत युद्ध सुरू आहे. हे युद्ध सुरू नसतं तर आरोप-प्रत्यारोप झाले नसते. आताच मला कोणीतरी सांगितलं की, अरविंद सावंत यांनी पत्रकार परिषद घेतली आणि त्यांनी सांगितलं की, आठ लोकांची नावे येत आहेत. परंतु, अनिल देसाई यांचे नाव येत नाही. याचा अर्थ त्यांचे आपापसात काही मतभेद आहेत, असे त्यांनी यावेळी म्हटले.
Pratap Sarnaik on Operation Tiger: ऑपरेशन टायगर 365 दिवस सुरू
राज्यात ऑपरेशन टायगर सुरु आहे. 365 दिवस सुरू असतं. 24 तास सुरू असतं. परंतु, ऑपरेशन टायगर म्हणजे फक्त खासदार नव्हे तर सर्वसामान्य शिवसैनिक ज्याच्यावर अन्याय झालेला आहे, जो बाळासाहेबांच्या विचारांना मानणारा आहे, जो शिंदे साहेबांच्या विचारांना मानणार आहे, त्याला ऑपरेशन टायगर म्हणतात. आमच्या दृष्टीने खासदार किंवा सर्वसामान्य शिवसैनिक हे एकच आहे, असे देखील प्रताप सरनाईक म्हणाले.
Pratap Sarnaik on Operation Tiger: भाजप आमच्या कामांमध्ये हस्तक्षेप करत नाही
भाजपच्या दिल्लीतील नेत्यांनी ऑपरेशन टायगर थांबवण्यास सांगितले, अशी चर्चा सध्या राजकीय वर्तुळात रंगली आहे. याबाबत विचारले असता प्रताप सरनाईक म्हणाले की, आमचा पक्ष बाळासाहेबांच्या विचारांना, एकनाथ शिंदेंच्या विचारांना मानणारा आहे. भारतीय जनता पक्षाचे नेतृत्व हे आमच्या कुठल्याही कामांमध्ये कधीही हस्तक्षेप करत नाही. पक्षांतर्गत काही निर्णय घ्यायचे असतील तर ते एकनाथ शिंदे हे स्वतः घेतात, असे त्यांनी म्हटले.
आणखी वाचा