Operation Tiger UBT Shivsena: पत्रकार परिषदेत संजय राऊतांच्या बाजूला बसलेला खासदारही फुटणार? ऑपरेशन टायगरमध्ये नाट्यमय वळण, नक्की काय घडणार?

Operation Tiger UBT Shivsena: ठाकरे गटाच्या सहा खासदारांनी स्वतंत्र गट स्थापन करुन शिंदे गटात विलीन होण्याची तयारी सुरु केली आहे. लोकसभा अध्यक्षांची स्वतंत्र गटाला मंजुरी

Operation Tiger UBT Shivsena

Source : ABP Live

Operation Tiger UBT Shivsena: गेल्या काही दिवसांपासून राज्यात सुरु असलेले ऑपरेशन टायगरची चर्चा आता प्रत्यक्षात आली आहे. एकनाथ शिंदे (Eknath Shinde) यांनी ठाकरे गटाचे सहा खासदार फोडण्यात यश मिळवले आहे. या सहा खासदारांना घेऊन एकनाथ शिंदे हे बुधवारी सकाळी लोकसभा अध्यक्ष ओमप्रकाश बिर्ला यांच्या दिल्लीतील कार्यालयात गेले होते. याठिकाणी ठाकरे गटाच्या 6 बंडखोर खासदारांनी आपण स्वतंत्र गट स्थापन करत असल्याचे पत्र लोकसभा अध्यक्षांना देत शिंदे गटाला पाठिंबा देत असल्याचे स्पष्ट केले. यानंतर लोकसभा अध्यक्षांनी सहा बंडखोर खासदारांच्या या स्वतंत्र गटाला मंजुरी दिली. पक्षांतरबंदी कायद्यानुसार लागणारे दोन तृतीयांश खासदार फुटल्यामुळे या गटातील खासदारांवर कोणतीही कारवाई होऊ शकत नाही. त्यामुळे आता सहा खासदारांचा हा गट लवकरच शिवसेनेत विलीन होणार असल्याची माहिती सूत्रांनी दिली आहे. मात्र, या गटात आणखी एका खासदाराची भर पडणार असल्याची धक्कादायक माहिती आहे. विशेष म्हणजे हा खासदार संजय राऊत (Sanjay Raut) यांनी बुधवारी घेतलेल्या पत्रकार परिषदेत इतर खासदारांच्या मांडीला मांडी लावून बसला होता. त्यामुळे आता हा सातवा खासदार कोण, याची चर्चा राजकीय वर्तुळात रंगली आहे. (Maharashtra Politics news)

संजय राऊत यांनी सहा खासदार फुटल्याचे स्पष्ट झाल्यानंतर बुधवारी खासदार राजाभाऊ वाजे, अनिल देसाई आणि अरविंद सावंत यांच्यासोबत एक पत्रकार परिषद घेतली. सूत्रांच्या माहितीनुसार, जे चार खासदार या पत्रकार परिषदेस बसले होते त्यापैकी एक खासदार बंडखोर खासदारांसोबत येण्यास तयार होता. तीन महिन्यांपूर्वी झालेल्या बैठकीत तो खासदार शिवसेना शिंदे गटात येण्यास तयार झाला होता. मात्र, ऐनवेळी अडचण असल्याने त्यावेळी ऑपरेशन टायगरची अंमलबजावणी होऊ शकली नव्हती. आता जेव्हा या घडामोडी झाल्या त्यावेळी मात्र त्या खासदाराने शिंदे गटासोबत येण्यास नकार दिला. हा खासदार हा आज संजय राऊत यांच्यासोबतच्या बैठकीला हजरही होता. मात्र, येत्या दोन महिन्यांत हा खासदार उद्धव ठाकरे यांची साथ सोडून बाहेर पडेल, अशी माहिती शिंदे गटातील विश्वसनीय सूत्रांनी दिली आहे. सुरुवातीला हा सातवा खासदार म्हणजे राजाभाऊ वाजे असू शकतात, अशी शक्यता वर्तविली जात होती. मात्र, सूत्रांच्या माहितीनुसार, हा सातवा खासदार राजाभाऊ वाजे नाहीत. त्यामुळे आता अरविंद सावंत आणि अनिल देसाई यांच्यापैकी कोणता खासदार फुटणार, याची चर्चा सुरु झाली आहे. अरविंद सावंत आणि अनिल देसाई यांच्यापैकी कोणताही नेता शिंदे गटात घेतल्यास वैयक्तिक पातळीवर तो उद्धव ठाकरे यांच्यासाठी मोठा धक्का ठरु शकतो.

Shivsena news:  ठाकरेंच्या नऊ खासदारांची नावे

1. अनिल देसाई

2. अरविंद सावंत

3. संजय दिना पाटील

4. राजाभाऊ वाजे

5. संजय जाधव

6. संजय देशमुख

7. नागेश पाटील आष्टीकर

8. ओमराजे निंबाळकर

9. भाऊसाहेब वाकचौरे

Shivsena MPs: कोणते खासदार शिंदे गटात गेले?

1. संजय जाधव

2. संजय देशमुख

3. नागेश पाटील आष्टीकर

4. ओमराजे निंबाळकर

5. भाऊसाहेब वाकचौरे

6. संजय दिना पाटील

आणखी वाचा