Operation Tiger: नाशिकमध्ये 'ऑपरेशन टायगर'ची चर्चा, 5 कोटींच्या आमिषाचा पर्दाफाश करत ठाकरेंचे नगरसेवक एकत्र जमले; गटनेत्यांचा थेट 'ऑपरेशन तुडवा'चा इशारा, नेमकं काय घडलं?

Operation Tiger: नाशिक महापालिकेतील ठाकरेंच्या शिवसेनेच्या 10 ते 12 नगरसेवकांना शिंदेंच्या शिवसेनेकडून गळाला लावले जात असल्याच्या चर्चेने नाशिकच्या राजकीय वर्तुळात खळबळ उडवून दिली होती.

Operation Tiger

Source : ABP Majha

Operation Tiger: महाराष्ट्राच्या राजकारणात सध्या सुरू असलेल्या 'ऑपरेशन टायगर' (Operation Tiger) च्या चर्चेचे पडसाद आता नाशिकमध्ये उमटू लागले आहेत. नाशिक महापालिकेतील (Nashik Municipal Corporation) ठाकरेंच्या शिवसेनेच्या (Shiv Sena UBT) 10 ते 12 नगरसेवकांना शिंदेंच्या शिवसेनेकडून गळाला लावले जात असल्याच्या चर्चेने नाशिकच्या राजकीय वर्तुळात खळबळ उडवून दिली होती. प्रभागनिहाय 5 कोटी रुपयांच्या विशेष निधीचे आमिष दाखवून अनेक नगरसेवकांच्या वरिष्ठ नेत्यांसोबत गुप्त बैठका झाल्याची माहिती समोर येत होती. या सर्व पार्श्वभूमीवर, ठाकरेंच्या शिवसेनेच्या नगरसेवकांनी आज पक्षाच्या गटनेते कार्यालयात एकत्र जमून आपली एकजूट दाखवून दिली आहे.

Operation Tiger: 'ऑपरेशन तुडवा'चा इशारा

शिंदेंच्या शिवसेनेकडून संघटन विस्तारासाठी हालचाली वेगात असतानाच, ठाकरेंच्या नगरसेवकांनी गटनेते केशव पोरजे यांच्या कार्यालयात पत्रकार परिषद घेऊन सर्व अफवांना पूर्णविराम दिला. गटनेते केशव पोरजे यांनी अत्यंत गंभीर आरोप करत सांगितले, "आमचा कोणताही नगरसेवक फुटणार नाही, आम्ही सर्वजण एकत्र आहोत. नाशिकमध्ये केवळ संशयाचे वातावरण तयार केले जात आहे. उपमहापौर पदाचा सौदा केला जात असून, ज्यांना उपमहापौर बनायचे आहे ते एजंट पाठवून आमच्या नगरसेवकांना 5 कोटींच्या प्रभाग निधीचे आमिष दाखवत आहेत. आतापर्यंत 5 ते 6 नगरसेवकांशी असा संपर्क साधण्यात आला आहे."

पोरजे पुढे म्हणाले की, "एक वकील असलेला एजंट, ज्याला स्वतःला स्वीकृत नगरसेवक व्हायचे आहे आणि जो सध्या पक्ष संघटनेतही नाही, तो आमच्या नगरसेवकांशी संपर्क साधत आहे. आमची विकासकामांसाठी अडवणूक केली जात असून आम्ही मनपा आयुक्तांना निधी देण्यासाठी निवेदन दिले आहे. ज्याप्रमाणे खासदार फुटले तेव्हा 'ऑपरेशन तुडवा' राबवण्यात आले, तसेच आता 'ऑपरेशन तुडवा' राबविणार," असा सज्जड दम त्यांनी दिला.

Operation Tiger: दोन नगरसेवक घरगुती कारणामुळे गैरहजर; पण पाठिंबा कायम

नाशिक महापालिकेत ठाकरेंच्या शिवसेनेचे एकूण 15 नगरसेवक निवडून आले आहेत. यातील 13 नगरसेवक प्रत्यक्ष हजर होते. तर, नगरसेविका मंगला आढाव यांच्या सासूचे निधन आणि मुरलीधर भामरे यांच्या चुलत्यांचे निधन झाल्यामुळे हे दोघे उपस्थित राहू शकले नाहीत. मात्र, मुरलीधर भामरे यांच्या वतीने त्यांचे पुत्र तेजस भामरे पत्रकार परिषदेला उपस्थित होते, ज्यातून सर्व 15 नगरसेवक एकत्र असल्याचा संदेश देण्यात आला.

Shiv Sena UBT: ठाकरे गटाच्या नाशिकमधील 15 नगरसेवकांची यादी 

1 केशव सिताराम पोरजे (गटनेते)

2 प्रथमेश वसंत गिते

3 सीमा विशाल पवार

4 मंगला प्रकाश आढाव 

5 शैलेंद्र आत्माराम ढगे

6 रुचिरा संतोष साळवे

7 योगेश वामन भोर

8 भारती आंबादास ताजनपुरे

9 वैशाली प्रमोद दाणी

10 योगेश लक्ष्मण गाडेकर

11 संजीवनी संजय हांडोरे

12 मुरलीधर (तात्या) सखाराम भामरे

13 माधुरी मदन डेमसे

14 वैशाली विनोद दळवी (पाटील)

15 प्रमिला कैलास मैद

आणखी वाचा