Nashik Vidhan Parishad Election 2026: नाशिकमध्ये महायुतीला मोठे यश! भाजप बंडखोर प्रसाद हिरेंचा नरेंद्र दराडेंना जाहीर पाठिंबा; संकटमोचक गिरीश महाजनांची मध्यस्थी यशस्वी

Nashik Vidhan Parishad Election 2026: नाशिकमधील भाजपचे बंडखोर उमेदवार प्रसाद हिरे यांनी विधान परिषद निवडणुकीतून माघार घेत महायुतीचे उमेदवार नरेंद्र दराडे यांना पाठिंबा जाहीर केलाय.

Nashik Vidhan Parishad Election 2026

Source : ABP Majha

Nashik Vidhan Parishad Election 2026: उत्तर महाराष्ट्रातील नाशिक आणि जळगाव स्थानिक स्वराज्य संस्था विधान परिषद निवडणुकीने आता एक अत्यंत मोठे वळण घेतले आहे. अधिकृतपणे उमेदवारी अर्ज मागे घेण्याचा दिवस उलटून गेल्यानंतरही महायुतीमधील बंडखोरी शमवण्यासाठी भाजप आणि शिवसेनेच्या वरिष्ठ नेत्यांकडून युद्धपातळीवर प्रयत्न सुरू होते. या प्रयत्नांना अखेर यश आले असून, नाशिकमधील भाजपचे बंडखोर उमेदवार प्रसाद हिरे यांनी आपली माघार जाहीर केली आहे.

Nashik Vidhan Parishad Election 2026: तीन मंत्र्यांच्या उपस्थितीत महत्त्वाची बैठक

आज सोमवारी नाट्यमय घडामोडी घडत राज्याचे उद्योगमंत्री उदय सामंत आणि मंत्री दादा भुसे हे थेट मंत्री गिरीश महाजन (Girish Mahajan) यांच्या भेटीसाठी दाखल झाले. विशेष म्हणजे, शिवसेनेच्या या दोन्ही मंत्र्यांसोबत भाजपचे बंडखोर उमेदवार प्रसाद हिरे हे देखील उपस्थित होते. या दिग्गज नेत्यांच्या बैठकीत सविस्तर चर्चा झाल्यानंतर प्रसाद हिरे यांनी महायुतीच्या हितासाठी माघार घेत असल्याचे जाहीर केले. यामुळे महायुतीसमोरील एक मोठा अडथळा दूर झाला आहे.

Nashik Vidhan Parishad Election 2026: मंत्री गिरीश महाजन यांची प्रतिक्रिया 

प्रसाद हिरे यांच्या माघारीनंतर प्रसारमाध्यमांशी बोलताना मंत्री गिरीश महाजन म्हणाले की, आमचे दोन्ही उमेदवार मागे घेणार हे सुरुवातीपासून सांगत होतो. प्रसाद हिरे यांनी माघार घेण्याचा निर्णय घेतलेला आहे. उमेदवारी अर्ज मागे घेण्याची मुदत संपल्यामुळे त्यांनी आता महायुतीचे उमेदवार नरेंद्र दराडे यांना जाहीर पाठिंबा दिलेला आहे. नाशिकचा प्रश्न मिटला की जळगावचा प्रश्न सुटेल. गोकुळ गिते यांच्यासोबत फोनवर चर्चा सुरू आहे, सायंकाळी निर्णय होईल. विधान परिषद निवडणुकीच्या 17 पैकी 17 जागा महायुतीचे उमेदवार निवडून येतील, असा विश्वास त्यांनी यावेळी व्यक्त केला.  

Nashik Vidhan Parishad Election 2026: नाशिकनंतर जळगावचा तिढा सुटणार?

दरम्यान, नाशिकमधील बंडखोरीच्या माघारीवरच जळगाव निवडणुकीचा तिढा अवलंबून आहे. जळगावमध्ये संख्याबळाच्या आधारे सहज विजयाचा दावा करणाऱ्या भाजपची चिंता अजूनही कायम आहे. येथे भाजपने नंदकिशोर महाजन यांना उमेदवारी दिली आहे. मात्र, महायुतीतील घटक पक्ष असलेल्या शिंदे गटाशी संबंधित रेश्मा काळे यांनी अपक्ष म्हणून बंडखोरी करत आपली उमेदवारी कायम ठेवली आहे.  काळे यांची समजूत काढण्यासाठी महायुतीमधील वरिष्ठ नेत्यांनी अनेक बैठका घेतल्या, मात्र त्यांनी माघार घेण्यास स्पष्ट नकार दिला आहे. आता नाशिकमध्ये प्रसाद हिरे यांनी माघार घेतल्यामुळे, जळगावातही या अंतर्गत बंडखोरीचा (Rebellion) तिढा लवकरच सुटेल, असा विश्वास महायुतीच्या नेत्यांना आहे. दुसरीकडे, नाशिकमधील दुसरे अपक्ष उमेदवार गोकुळ गिते सध्या पेठ तालुक्यात मतदारांच्या गाठीभेटी घेत असून, त्यांच्यासोबतही फोनवर चर्चा सुरू असल्याचे गिरीश महाजन यांनी स्पष्ट केले आहे. त्यामुळे सायंकाळपर्यंत संपूर्ण चित्र स्पष्ट होणार आहे.

राज्य आणि देश-विदेशातील महत्त्वाच्या बातम्या; पाहा व्हिडीओ

आणखी वाचा