'नगरसेवक' शब्द देशभरात वापरावा; शिवसेनेची दिल्लीत मागणी; सांगितला बाळासाहेबांचा इतिहास
राज्यातील स्थानिक स्वराज्य संस्थांसह मुंबई महापालिका निवडणुकीवर डोळा ठेवून बाळासाहेबांचा वारसा राष्ट्रीय स्तरावर नेण्याचे प्रयत्न शिवसेनेकडून सुरू आहेत.
नवी दिल्ली: महाराष्ट्रात पुढील काही महिन्यात स्थानिक स्वराज्य संस्थांच्या निवडणुका (Election) जाहीर होणार आहेत. त्या दृष्टीने सर्वच राजकीय पक्ष कामाला लागले असून निवडणुकांसाठी पक्षबांधणी आणि कार्यकर्त्यांना महत्त्वाच्या सूचनाही दिल्या जात आहेत. त्याच पार्श्वभूमीवर आता एकनाथ शिंदेंची शिवसेनाही (Shivsena) रणनीती आखत असून आता दिवंगत शिवसेनाप्रमुख बाळासाहेब ठाकरेंचा ‘नगरसेवक’ हा शब्द देशभरात नेण्याची शिंदेसेनेची रणनीती असल्याचं पाहायला मिळत आहे. कारण, नगरसवेक या शब्दाचा पहिल्यांदा उल्लेख बाळासाहेब ठाकरे (Balasaheb thackeray) यांनी केला होता. सन 1967 मध्ये ठाणे महापालिका निवडणुकीत बाळासाहेबांनी महापालिकेत निवडून जाणाऱ्या सदस्यांना नगरसेवक म्हणण्याचा आदेश दिला, तेव्हापासून नगरपालिका सदस्यांना नगरसेवक म्हटले जात आहे. आता, देशभरात हाच पॅटर्न राबविण्याचा शिवसेनेचा प्रयत्न दिसून येत आहेत.
राज्यातील स्थानिक स्वराज्य संस्थांसह मुंबई महापालिका निवडणुकीवर डोळा ठेवून बाळासाहेबांचा वारसा राष्ट्रीय स्तरावर नेण्याचे प्रयत्न शिवसेनेकडून सुरू आहेत. देशभरातील सर्व शहरी स्थानिक स्वराज्य संस्थांच्या प्रतिनिधींना नगरसेवक म्हटलं पाहिजे, अशी मागणीच शिवसेना खासदार रविंद्र वायकर यांनी केली आहे. शहरी स्थानिक स्वराज्य संस्थांच्या पहिल्या राष्ट्रीय परिषदेत त्यांनी ही मागणी केली. हरियाणातील मानेसर येथे शहरी स्थानिक स्वराज्य संस्थांची पहिली राष्ट्रीय परिषद आयोजित करण्यात आली होती. देशभरातील महानगरपालिकांचे महापौर, आयुक्त या परिषदेला हजर होते. केंद्रीय शहर व गृहनिर्माण मंत्री मनोहरलाल खट्टर , लोकसभा अध्यक्ष ओम बिरला हेही या कार्यक्रमाला उपस्थित होते. या परिषदेत बोलताना रविंद्र वायकर यांनी नगरसेवक शब्दामागची भूमिका सांगत देशभरातील शहरी स्थानिक स्वराज्य संस्थांना नगरसेवक म्हटले जावे, अशी मागणी केली आहे.
नगरसेवक शब्दाचा इतिहास काय?
महाराष्ट्रात, मुंबई, ठाण्यात ब्रिटिशकाळापासून महापालिका, नगरपालिका सदस्याला सिटीफादर म्हणजेच नगरपिता म्हटले जात. मात्र, शिवसेना 1967 साली ठाणे महानगरपालिका निवडणुकीत उतरली. प्रचारादरम्यान बाळासाहेब ठाकरे यांनी म्हटलं की, निवडून येणारा काय तुमचा बाप आहे का, त्याला पिता म्हणता? तुम्ही त्याचे बाप आहात. आमचे सदस्य पिता नाही तुमचे सेवक असतील, नगरसेवक असतील. पुढे हाच शब्द अधिकृत करण्यात आला, असं शिवसैनिक सांगतात. त्यामुळे, नगरसेवक हा शब्द बाळासाहेबांनीच दिल्याचं बोललं जातं. आता, तो शब्द देशभरात घेऊन जाण्याचा शिंदेंच्या शिवसेनेचा प्रयत्न आहे.
हेही वाचा
महत्त्वाच्या बातम्या
