Manoj Jarange : मंत्री म्हणाले, सगळं मान्य पण उपोषण मागे घ्या; जरांगे म्हणाले, यापुढे उपोषण केलो तर मरून जाईन...

Manoj Jarange Maratha Protest : ज्यांच्या कुणबी नोंदी सापडल्या आहेत त्यांनी 4 सप्टेंबरपासून अर्ज करावा, त्यांना प्रमाणपत्र देण्यात येतील असं आवाहन मंत्र्यांच्या शिष्टमंडळाने केलं. 

Manoj Jarange Maratha Protest

Source : abp majha

जालना : मराठा समाजाच्या मागण्यांसाठी अंतरवाली सराटीमध्ये सुरू असलेले मनोज जरांगे यांचे उपोषण सोडवण्यास मंत्र्यांच्या गटाला सध्यातरी अपयश आल्याचं चित्र आहे. उदय सामंत, राधाकृष्ण विखे पाटील, मकरंद पाटील आणि आमदार प्रसाद लाड यांच्या शिष्टमंडळाने मनोज जरांगे यांच्या सगळ्या मागण्या मान्य असल्याचं सांगितलं. त्यामुळे जरांगे यांनी उपोषण मागे घ्यावे अशी सातत्याने विनंती केली. परंतु, जरांगे मात्र उपोषणावर ठाम राहिले. 11 सप्टेंबरपर्यंत सगळ्या मागण्यांची अंमलबजावणी करा, त्यानंतर उपोषण मागे घेतो असं जरांगे म्हणाले. 

यापुढे मी उपोषण करू शकत नाही, शरीर साथ देत नाही. यापुढे जर उपोषण केलो तर मी मरून जाईन. त्यामुळे जे काही आहे आहे ते आताच आहे, आताच मराठा समाजाच्या सगळ्या मागण्या मान्य करून घेणार, असं जरांगे म्हणाले. मंत्र्यांच्या शब्दाला मान देतो, एकाच्या ठिकाणी दोन सलाईन लावून घेतो, मात्र सगळ्या मागण्या मान्य झाल्याशिवाय उपोषण मागे घेणार नसल्याचं मनोज जरांगे यांनी स्पष्ट केलं.

मराठा समाजाच्या ज्या 58 लाख कुणबी नोंदी सापडल्या आहेत त्यांना प्रमाणपत्र देण्यात यावं यासह इतर मागण्यांसाठी मनोज जरांगे हे अंतरवाली सराटीमध्ये उपोषणासाठी बसले आहेत. जरांगे हे गेल्या सहा दिवसांपासून उपोषणाला बसले असून त्यांनी उपोषण मागे घ्यावं यासाठी राज्याच्या मंत्र्यांचे शिष्टमंडळ अंतरवाली सराटीमध्ये आलं. त्यामध्ये राधाकृष्ण विखे पाटील, उदय सामंत, मकरंद पाटील आणि आमदार प्रसाद लाड यांचा समावेश होता. 

मनोज जरांगे यांनी केलेल्या मागण्या या शिष्टमंडळाने मान्य केल्या असून 4 सप्टेंबरपासून ज्यांच्या नोंदी सापडल्या आहेत त्यांना प्रमाणपत्र देण्याची प्रक्रिया सुरू करण्याची घोषणा विखे पाटील यांनी केली. ज्यांच्या नोंदी सापडल्या आहेत त्यांनी जात प्रमाणपत्रासाठी अर्ज करावेत. ज्यांना अडचणी येतील त्यांनी त्या त्या जिल्हाधिकाऱ्यांशी संपर्क साधावा, असं आवाहन विखे पाटील यांनी केलं. 

मंत्र्यांची विनंती, मात्र जरांगे उपोषणावर ठाम

अंतरवालीत आलेल्या मंत्र्यांनी मनोज जरांगे यांनी उपोषण मागे घ्यावे अशी विनंती केली. जरांगे यांच्या सगळ्या मागण्या मान्य असून त्यावर आम्ही काम करू असं आश्वासन मंत्र्यांनी दिलं. मात्र जरांगे हे उपोषणावर ठाम आहेत. 

हे माझे शेवटचे उपोषण आहे. यापुढे शरीर साथ देणार नाही. पुन्हा आंदोलन केलो तर मरून जाईन, असं जरांगे म्हणाले. त्यामुळे याच वेळी मराठा समाजाच्या सगळ्या मागन्या मान्य करून घेणार, असं मनोज जरांगे म्हणाले. 11 सप्टेंबर पर्यंत तुम्हाला वेळ देतो. तोपर्यंत मी एक नव्हे तर दोन सलाईन लावून घेतो. परंतु, 11 सप्टेंबरपर्यंत जर आमच्या मागण्या अंमलात आणल्या नाही तर 12 सप्टेंबर रोजी मुंबईमध्ये जाऊन आंदोलन करणार असं मनोज जरांगे यांनी स्पष्ट केलं. 

राज्याचे मंत्री आणि मराठा उपसमितीचे अध्यक्ष राधाकृष्ण विखे पाटील म्हणाले की, "न्यायमूर्ती शिंदे समिती कडून 58 लाख नवीन नोंदी शोधल्या आहेत. जरांगे पाटील यांच्या पुढाकाराने हे यश मिळाले. जात प्रमाणपत्रासाठी प्रत्येक जिल्ह्यात नोडल ऑफिसर नेमण्यात येणार आहे. मंत्रालयात  मराठा आरक्षण कक्ष तयार करण्यात येईल. देवेंद्र फडणवीस यांनी ज्या पद्धतीने काम केले या पूर्वी कोणत्याच मुख्यमंत्र्याने काम केले नाही. 1994 साली, मंडल कमिशनच्या वेळी मराठा समाजाला ओबीसीमध्ये न समाविष्ट करता आरक्षणापासून वंचित ठेवण्याचे कोणी पाप केले हे आपल्या सर्वांना माहिती आहे."

ही बातमी वाचा: