Maharashtra Live Blog Updates: मुंबई महापालिकेत मानधनासाठी ‘वेंडर रजिस्ट्रेशन’चा अट्टहास; नगरसेवकांचा तीव्र विरोध
Maharashtra Live Blog Updates: राज्यासह देश-विदेशातील महत्वाच्या घडामोडींचे सर्व अपडेट्स...
LIVE
Background
Maharashtra Live Blog Updates: राज्याच्या राजकारणात सध्या आगामी राज्यसभा आणि विधानपरिषद निवडणुकीचे वारे वाहात आहेत. सात जागांसाठी होत असलेल्या या निवडणुकीत महाविकास आघाडीच्या वाट्याला दोन्हीकडे एकेक जागाच संख्याबळानुसार येत आहे. मात्र या एकेक जागेवरून महाविकास आघाडीत ठिणगी पडण्याची चिन्हं दिसत आहेत. मविआत सध्या सर्वाधिक संख्याबळ ठाकरेंच्या शिवसेनेकडे आहे. त्यामुळे दोन्ही जागांवर ठाकरेंच्या शिवसेनेचा दावा असल्याचं समजतंय. मात्र शरद पवारांना महाविकास आघाडीकडून राज्यसभेवर पाठवावं यालाही शिवसेना राजी आहे अशी माहिती आहे.
मुंबई-आग्रा महामार्गावर ट्रकची दुचाकीला जोरदार धडक, दोघांचा मृत्यू
धुळे : शहराजवळील मुंबई-आग्रा महामार्गावर दुपारच्या वेळी ट्रक चालकाने दुचाकीला जोरदार धडक दिल्याने गंभीर जखमी झालेल्या एका इसमाचा आणि एका दोन वर्षीय मुलीचा उपचारादरम्यान मृत्यू झाल्याची घटना घडली आहे. दुचाकीवर एक इसम त्याची पत्नी आपल्या दोन मुलांसमवेत मालेगावकडे जात असताना ही घटना घडल्याची माहिती मिळाली असून या घटनेतील गंभीर जखमी झालेल्या महिलेवर जिल्हा रुग्णालयात उपचार सुरू आहेत.
मुंबई महापालिकेत मानधनासाठी ‘वेंडर रजिस्ट्रेशन’चा अट्टहास; नगरसेवकांचा तीव्र विरोध
मुंबई: बृहन्मुंबई महानगरपालिका मध्ये नगरसेवकांना दिल्या जाणाऱ्या मानधनासाठी ‘वेंडर रजिस्ट्रेशन फॉर्म’ भरण्याचे निर्देश देण्यात आल्याने नवा वाद निर्माण झाला आहे. आतापर्यंत मानधन आणि भत्ते RTGS पद्धतीने जमा केले जात होते. SAP प्रणालीअंतर्गत नगरसेवकांना ‘वेंडर’ म्हणून नोंदणी करण्याची अट घालण्यात आल्याने नगरसेवकांनी आक्षेप घेतला आहे. “आम्ही महापालिकेचे ट्रस्टी आहोत, वेंडर नाही,” असे सांगत ही प्रक्रिया चुकीची असल्याचे त्यांनी स्पष्ट केले. विरोधी पक्षातील नगरसेवकांनी सभागृहनेत्यांशी चर्चा केली असून लवकरच याबाबत बैठक घेण्याचे आश्वासन देण्यात आले आहे. तसेच आयुक्तांना पत्र देऊन ‘वेंडर रजिस्ट्रेशन’ची अट तातडीने रद्द करण्याची मागणी करण्यात आली आहे. आस्थापना विभागाने 24 फेब्रुवारीपर्यंत याबाबत कळवण्याचे निर्देश दिले असून प्रशासन काय निर्णय घेते याकडे लक्ष लागले आहे.
महत्त्वाच्या बातम्या
