माळी समाजाबद्दल वादग्रस्त वक्तव्य, व्हायरल व्हिडिओवर हाकेंचं स्पष्टीकरण; छगन भुजबळांनीही दिली प्रतिक्रिया
मराठा आरक्षण आंदोलनाच्या गतीमानतेला ब्रेक देण्यासाठी पुढे आलेला ओबीसी चेहरा म्हणून लक्ष्मण हाकेंकडे पाहिलं गेलं.
सोलापूर : ओबीसी नेते लक्ष्मण हाके (Laxman Hake) यांचा सोशल मीडियावर व्हायरल झालेल्या एका व्हिडिओमुळे हाके यांच्या अडचणी वाढल्या असून ओबीसी (OBC) समाजातच फूट पडल्याचे पाहायला मिळत आहे. मात्र, माझा हा व्हिडिओ म्हणजे खोडसाळपणा असल्याचे हाके यांनी म्हटले. सध्या ओबीसी समाजाचे नेतृत्व माळी समाजाकडून धनगर समाजाकडे आले आहे, ही माळी समाजाची पोटदुखी आहे. भुजबळांनी कोणाला मोठे होऊ दिले नाही, अशा पद्धतीचे वक्तव्य करताना लक्ष्मण हाके यांचा एक व्हिडिओ सोशल मीडियात व्हायरल झाला आहे. या व्हिडिओमुळे हाकेंवर आता माळी समाजातून टीका होत असून त्यांच्या अडचणी वाढल्या आहेत. मात्र, हाकेंनी हा व्हिडिओ म्हणजे खोडसाळपणा असल्याचे स्पष्टीकरण दिलं आहे. तसेच, मंत्री छगन भुजबळ (Chhagan bhujbal) यांनीही हाकेंनी दोन-तीन वेळा आपल्याला फोन केल्याचंही सांगितलं.
मराठा आरक्षण आंदोलनाच्या गतीमानतेला ब्रेक देण्यासाठी पुढे आलेला ओबीसी चेहरा म्हणून लक्ष्मण हाकेंकडे पाहिलं गेलं. हाकेंनी सातत्याने मराठा आंदोलक मनोज जरांगे पाटील यांच्यावर टीका करत ओबीसी समाजाची भूमिका मांडली. मात्र, त्यांच्या व्हायरल झालेल्या व्हिडिओमुळे ओबीसी एकजूट चळवळीला ब्रेक लागण्याची शक्यता वर्तवण्यात येत आहे. दरम्यान, या व्हायरल व्हिडिओनंतर हाके यांनी तात्काळ खुलासा करत हा व्हिडिओ म्हणजे खोडसाळपणा असल्याचा दावा केला आहे. माझा व्हायरल झालेला व्हिडिओ म्हणजे ओबीसीमध्ये फुट पाडण्याचा हा प्लॅन आहे, याला कोणत्याही ओबीसी बांधवांनी बळी पडू नये असे आवाहन लक्ष्मण हाके यांनी केले आहे. एआयचा वापर करुन तो व्हिडिओ बनवला गेला असून मी काय आहे हे सर्व ओबीसी समाजाला माहित आहे. भुजबळ साहेबांसोबत माझे सकाळीच बोलणे झाले असून मला मॉरल सपोर्ट मिळाला आहे. मी छगन भुजबळ यांना आदर्श मानतो, माझं आणि भुजबळ साहेबांचं काय नातं आहे, हे भुजबळ साहेबांना माहीत आहे, अशी माहितीही लक्ष्मण हाकेंनी दिली.
असे फेक व्हिडिवो पसरवून ओबीसी दुभंगणार नाहीत, दोन चार विघ्नसंतोषी लोकं आहेत. मी याबाबत डिपार्टमेंटशी बोललो, वेळ पडली तर त्या चार लोकांबाबत प्रेस घेईन, असेही हाकेंनी म्हटलं आहे. मी चूक केली नाही, माफी मागायचा प्रश्न नाही. नवनाथ वाघमारे हे माझे सहकारी आहेत, पण काहीं गैरसमज झाला असेल तर त्यांच्याशी मी बोलेन, असे स्पष्टीकरणही हाकेंनी दिले. तसेच,आमच्यात काही तरी भांडणं लावून ही लढाई कोण थांबू पाहत असेल तर ते सहन केल जाणार नाही, असा इशाराही हाकेंनी दिला आहे.
हाकेंच्या व्हिडिओवर भुजबळांची प्रतिक्रिया
लक्ष्मण हाके यांचे सकाळपासून दोन-तीनवेळा फोन आले होते, काही गैरसमज झाला असं ते म्हणाले आहेत. याबाबत, हाके खुलासा करणार आहेत. त्यामुळे, यावर कोणी प्रतिक्रिया देऊ नये, असे मी इतरांना सांगितल्याचे मंत्री आणि ओबीसी नेते छगन भुजबळ यांनी स्पष्ट केले.
हाकेंच्या व्हायरल व्हिडिओत काय?
सध्या ओबीसी समाजाचे नेतृत्व माळी समाजाकडून धनगर समाजाकडे आले आहे, ही माळी समाजाची पोटदुखी आहे. भुजबळांनी कोणाला मोठे होऊ दिले नाही, अशा पद्धतीचे वक्तव्य करताना लक्ष्मण हाके यांचा एक व्हिडिओ सोशल मीडियात व्हायरल झाला आहे.
हेही वाचा
महत्त्वाच्या बातम्या
