Shahu Maharaj On Sanjay Gaikwad : संजय गायकवाडांवर शाहू महाराज संतापले

राघव चढ्ढांनी 'आप'ला सोडलं; आण्णा हजारे चिडले, म्हणाले, सत्ता आणि पैशासाठी पक्षांतर, कायदा व्हायला हवा

सुनील भोंगळ — Fri, 24 Apr 2026 20:12:33 +0530

अहिल्यानगर : देशाच्या राजकारणात आज मोठा राजकीय भूकंप झाल्याचं पाहायला मिळालं. आम आदमी पक्षामध्ये (AAP) गेल्या काही दिवसांपासून दूर होताना दिसत असलेले खासदार राघव चढ्ढा हे भाजपच्या जवळ गेले आहेत. राघव चढ्ढा (Raghav chadhdha) यांच्यासह 7 खासदारांनी भाजपात प्रवेश केल्याने अनेकांच्या भुवया उंचावल्या. विशेष म्हणजे, तत्पूर्वी राघव चढ्ढा यांनी पत्रकार परिषद घेत आपण आदमी पक्ष सोडत असून राज्यसभेतील आम आदमी पक्षाचे भाजपात विलिगीकरण करत असल्याचेही त्यांनी म्हटलं. आप पक्षातील या फुटीवर राजकीय वर्तुळातून प्रतिक्रिया येत आहेत. पक्षाचे प्रमुख अरविंद केजरीवाल यांनीही याबाबत आपली प्रतिक्रिया दिली. आता ज्येष्ठ समाजसेवक आण्णा हजारे (Anna Hajare) यांनी देखील या घटनेवर प्रतिक्रिया देताना राजकीय पक्षांतर हे चीड आणणारं असल्याचं म्हटलं.

आम आदमी पक्षाच्या सात खासदारांनी पक्षाला राम राम करत भाजपाची वाट धरली आहे, त्यावर ज्येष्ठ समाजसेवक अण्णा हजारे यांनी प्रतिक्रिया दिली. आप पक्षातील फुटीसंदर्भात अण्णा हजारे यांनी म्हणाले की, पक्ष आणि पार्टी टिकण्यासाठी, एकत्र राहण्यासाठी संसदेत कायदा होणे गरजेचे आहे. आपल्या मर्जीप्रमाणे कोणीही पक्ष बदलणार नाही. सत्ता आणि पैसा यांच्या लालचमध्ये येताच इकडून तिकडे आणि तिकडून इकडे पक्षांतर होते. त्यामुळे, मनमर्जीप्रमाणे सत्ताबदलाचे काम होतात हे बरोबर नाही, असे म्हणत अण्णा हजारे यांनी दिल्लीत आम आदमी पक्षात झालेल्या राजकीय भूकंपावर संतापजनक प्रतिक्रिया दिली.

आंदोलनातून आम आदमी पक्षाचा उदय झाला, पण आता पक्ष फुटत आहे. स्वार्थ आल्यानंतर लोक सोडून जातात, समाज आणि देश डोळ्यासमोर ठेऊन काम केल्यास कुणीही जाणार नाही. आज समाज आणि देशाला विसरुन नेते सत्ता आणि पैशाच्या पाठिमागे लागत आहेत. म्हणून लोकांनी निवडून देताना चारित्र्यशील लोकं निवडून दिले पाहिजे. हे जे चाललं आहे ते स्वार्थसाठी चाललं आहे. सत्तेतून पैसा आणि पैश्यातून सत्ता, आज समाज आणि देश डोळ्यासमोर राहिला नाही, असेही अण्णा हजारेंनी म्हटलं.

दरम्यान, राज्यसभा खासदार राघव चड्ढा यांनी आम आदमी पक्षाचा राजीनामा दिला आहे. चड्ढा यांनी स्वतःच्या नावासह भाजपमध्ये सामील होणाऱ्या इतर सात जणांची नावे सांगितली. विशेष म्हणजे, 15 दिवसांपूर्वी चड्ढा यांना हटवल्यानंतर राज्यसभेचे उपनेते म्हणून नियुक्त झालेले अशोक मित्तल हे देखील आता भाजपमध्ये सामील होत आहेत. त्यांच्यावर 10 दिवसांपूर्वीच ईडीने छापेमारी केली होती.

आपमधून भाजपमध्ये जाणारे खासदार

1. स्वाती मालीवाल
स्वाती मालीवाल जानेवारी 2024 मध्ये राज्यसभा खासदार झाल्या. त्यांनी दिल्ली महिला आयोगाच्या अध्यक्षा म्हणूनही काम केले. त्यांनी आम आदमी पक्षातही महत्त्वाची भूमिका बजावली आहे. मात्र, गेल्या वर्षी तिच्या आणि 'आप'चे प्रमुख अरविंद केजरीवाल यांच्यात मोठा वाद निर्माण झाला होता.

2. अशोक कुमार मित्तल
अशोक कुमार मित्तल हे लवली प्रोफेशनल युनिव्हर्सिटीचे कुलपती आहेत. मार्च 2022 मध्ये आम आदमी पार्टीकडून ते राज्यसभेवर निवडून आले. अलीकडेच, आम आदमी पार्टीने राघव चड्ढा यांना राज्यसभेच्या उपनेतेपदावरून हटवून त्यांच्या जागी अशोक मित्तल यांची नियुक्ती केली होती. मात्र, 10 दिवसांपूर्वी ईडी छापेमारीत त्यांनी भाजपची वाट पकडली आहे.

3. संदीप पाठक
डॉ. संदीप पाठक हे एप्रिल 2022 पासून आम आदमी पार्टीकडून पंजाबमधून राज्यसभेचे खासदार आहेत. त्यांची पक्षाचे राष्ट्रीय सरचिटणीस म्हणूनही नियुक्ती करण्यात आली होती. ते आयआयटी दिल्लीमध्ये सहायक प्राध्यापक होते आणि त्यांनी केंब्रिज विद्यापीठातून पीएचडी मिळवली आहे. आम आदमी पार्टीमध्ये पाठक हे अरविंद केजरीवाल यांच्या जवळचे मानले जातात आणि त्यांनी पंजाबमधील 'आप'च्या विजयात महत्त्वाची भूमिका बजावली.

4. हरभजन सिंग
माजी भारतीय क्रिकेटपटू हरभजन सिंग मार्च 2022 मध्ये आम आदमी पार्टी (आप) मधून आपल्या राजकीय कारकिर्दीला सुरुवात केली आणि ते पंजाबमधून राज्यसभेचे खासदार झाला.

5. बलबीर सिंग सीचेवाल
बलबीर सिंग सीचेवाल हे पंजाब प्रांतात एक पर्यावरण-बाबा आणि संत म्हणून ओळखले जातात. त्यांनी पर्यावरण आणि नदी संवर्धनाशी संबंधित अनेक मोहिमांचे नेतृत्व केले आहे. त्यांच्या राजकीय कारकिर्दीची सुरुवात 2022 मध्ये आम आदमी पार्टीमधून झाली, ज्याने त्यांना राज्यसभेवर निवडून दिले.

6. विक्रमजीत सिंग साहनी
विक्रमजीत सिंग साहनी हे देखील एक समाजसेवक आहेत. त्यांनी शिक्षण क्षेत्रात महत्त्वपूर्ण योगदान दिले आहे. त्यांना मॉरिशसच्या राष्ट्रपतींच्या हस्ते आंतरराष्ट्रीय शांतता पुरस्काराने सन्मानित करण्यात आले आहे. त्यांनी वर्ल्ड पंजाबी पार्लमेंटरी फोरमची स्थापना केली.

प्रकाशकाला केलेल्या शिवीगाळबद्दल दिलगिरी व्यक्त करतो पण...; संजय गायकवाडांना उपरती, भूमिकेवर ठाम

डॉ. संजय महाजन — Fri, 24 Apr 2026 17:30:33 +0530

बुलढाणा : शिवसेना आमदार संजय गायकवाड (Sanjay gaikwad) यांनी दिवंगत गोविंद पानसरे लिखीत शिवाजी कोण होता या पुस्तकाचे प्रकाशन करणाऱ्या प्रशांत आंबी यांना फोन करुन शिवागाळ केली होती, तसेच धमकी देत शिवाजी महाराजांचा एकेरी उल्लेख का करतो, असे म्हणत धमकीही दिली होती. मात्र, केवळ पुस्तकाचे कव्हर पेज पाहून संतापलेल्या संजय गायकवाड यांनी पुस्तक वाचले नसून त्यांना छत्रपती शिवराय कळालेच नाहीत, असे म्हणत समाज माध्यमांवरुन त्यांच्यावर टीकेची झोड उठली. राजकीय नेत्यांनी (Buldhana) देखील त्यांच्याबद्दल सावध भूमिका घेतल्यानंतर आता त्यांनी संबंधित प्रकाशक आंबी यांना केलेल्या शिवीगाळ प्रकरणाबद्दल दिलगीरी व्यक्त केली, पण छत्रपती शिवाजी महाराज (Shivaji maharaj) असा उल्लेख करण्याच्या मतावर आपण ठाम असल्याचंही त्यांनी म्हटलं.

शिवाजी कोण होता या पुस्तिकेचे प्रकाशक प्रशांत आंबी यांना आमदार संजय गायकवाड यांनी फोनवरुन अश्लील भाषेत शिवीगाळ केली होती. सोशल मीडियावर या घटनेवरुन संजय गायकवाड यांच्या भूमिकेवर अनेक प्रश्न विचारण्यात आले. तर, प्रकाशक प्रशांत आंबी यांनीही पोलिसात जाऊन तक्रार देण्याचा प्रयत्न केला. मात्र, त्यांची तक्रार घेण्यात आली नाही. तसेच, महायुतीमधील राजकीय नेत्यांनी देखील त्यांच्या फोनबद्दल सावध भूमिका घेतली होती. अखेर, शिवीगाळीच्या घडल्या प्रकाबद्दल त्यांनी आता दिलगिरी व्यक्त केलीय. मात्र, छत्रपती शिवाजी महाराजांचा उल्लेख नेहमी सन्मानपूर्वकच व्हावा, ही आपली ठाम भूमिका असल्याचेही संजय गायकवाड यांनी स्पष्ट केले आहे.

शिवीगाळ प्रकाराबद्दल दिलगिरी

शिवाजी कोण होता, या पुस्तकातील एकेरी उल्लेखांवर आक्षेप घेत त्यांनी हा विषय वादाचा नसून संस्कार आणि आदराचा असल्याचे मत व्यक्त केले. अलीकडील वादात आपल्या तोंडून काही अयोग्य शब्द गेले असल्याची जाणीव व्यक्त करत मनापासून दिलगिरीही व्यक्त करतो. तसेच, छत्रपती शिवरायांविषयी निष्ठा आणि सन्मान कायम ठेवत संबंधितांनी योग्य ती दुरुस्ती करावी. ज्यांना बुलढाण्यात येऊन हे पुस्तक वाचायचे आहे, त्यांनी ते वाचावे पण एकेरी उल्लेख न करता छत्रपती शिवाजी महाराज असाच उल्लेख करावा. महाराजांचा अपमान करुन करोडो हिंदूंचा अपमान करू नये अशी अपेक्षा सुद्धा त्यांनी व्यक्त केली.

मी संजय गायकवाड यांच्याशी बोलतो

संजय गायकवाड यांनी त्या पुस्तकासंदर्भात नेमकी कशाबाबत भूमिका मांडली, याबाबत त्यांच्याशी बोलावे लागेल. संजय गायकवाड यांनी ते पुस्तक वाचलं की नाही माहीत नाही. मी माहिती घेऊन त्यांना काय आक्षेपार्ह वाटलं ते विचारेल, मी देखील पुस्तक वाचतो असे उदय सामंत म्हणाले. शिवाजी कोण होता? हे पुस्तक मी देखील वाचलेले नाही, पुस्तक वाचलं की त्यांची भूमिका कशाबद्दल होती याबाबत चर्चा करेल, असे शिवसेना नेते तथा मत्री उदय सामंत यांनी म्हटले.

हेही वाचा

संजय गायकवाड यांना काय आक्षेपार्ह वाटलं ते विचारणार, मी देखील ते पुस्तक वाचलं नाही : उदय सामंत

Raghav Chadha : आपला झटका देत भाजपमध्ये प्रवेश करणाऱ्या खासदार राघव चढ्ढांची संपत्ती किती?

एबीपी माझा वेब टीम — Fri, 24 Apr 2026 17:05:15 +0530

Raghav Chadha Net Worth : देशाच्या राजकारणात मोठा भूकंप झाला आहे. आम आदमी पार्टीचे 10 पैकी 7 खासदार भाजपमध्ये दाखल होणापर आहेत. यामध्ये राघव चड्ढा यांचा देखील समावेश आहे. काही दिवसांपूर्वी राघव चढ्ढा यांना राज्यसभेतील उपनेते पदावरुन हटवलं होतं. आज राघव चढ्ढा यांनी आम आदमी पार्टीपासून दूर जात जनतेकडे जात आहे, असं म्हटलं आहे. राघव चढ्ढा हे राजकारणी असण्यासोबतच बॉलिवूड अभिनेत्री परिणीती चोप्राचे पती देखील आहेत. दरम्यान, तुम्हाला राघव चढ्ढा यांची संपत्ती किती आहे? याबाबत माहिती आहे का? जाणून घेऊयातक सविस्तर माहिती.

राघव चढ्ढा हे राजकारणी असण्यासोबतच बॉलिवूड अभिनेत्री परिणीती चोप्राचे पती देखील आहेत. या जोडप्याचा विवाहसोहळा 24 सप्टेंबर 2023 रोजी राजस्थानमधील उदयपूर येथे पार पडला, ज्यात केवळ कुटुंब आणि जवळचे मित्र उपस्थित होते. चला, त्यांच्या एकूण संपत्तीवर नजर टाकूया.

राघव चढ्ढा यांची एकूण संपत्ती किती?

2022 मध्ये राज्यसभेचे खासदार झाल्यानंतर, राघव चड्ढा यांनी अंदाजे 37 लाख रुपयांची जंगम मालमत्ता जाहीर केली. यात एक मारुती स्विफ्ट डिझायर कार, 30000 रोख रक्कम आणि 6 लाख किमतीचे शेअर्स यांचा समावेश होता. या काळात त्यांनी घर किंवा जमीन यांसारख्या कोणत्याही स्थावर मालमत्तेचा खुलासा केला नाही. 2019 च्या लोकसभा निवडणुकीदरम्यान दाखल केलेल्या त्यांच्या प्रतिज्ञापत्रात, त्यांची एकूण जंगम मालमत्ता केवळ 16 लाख)असल्याचे नमूद केले होते. त्यावेळी त्यांनी आपले वार्षिक उत्पन्न 2.19 लाख असल्याचे जाहीर केले होते.

दरम्यान, काही रिपोर्ट्सनुसार राघव चड्ढाची एकूण संपत्ती 50 लाख रुपये आहे. यामध्ये दिल्लीतील 36 ते 37 लाख रुपयांच्या घराचा समावेश आहे. तसेच, त्याच्या बँक खात्यात 30 हजार ते 40 हजार रुपये असल्याचेही म्हटले जाते. याशिवाय, अहवालानुसार त्याच्याकडे शेअर्स, बॉण्ड्स आणि म्युच्युअल फंडांमध्ये 6 लाखांहून अधिक रुपयांची गुंतवणूक आहे. त्याच्याकडे अंदाजे 90 ग्रॅम सोने देखील आहे, ज्याचे सध्याचे मूल्य अंदाजे 13 लाख रुपये आहे.

परिणीती चोप्राची एकूण संपत्ती किती?

परिणीती चोप्राची एकूण संपत्ती राघव चड्ढापेक्षा लक्षणीयरीत्या जास्त आहे, तिचा मासिक पगार अंदाजे 13 लाख रुपये आहे. मीडिया रिपोर्ट्सनुसार, या अभिनेत्रीची एकूण संपत्ती 74 कोटी रुपये असल्याचा अंदाज आहे. तिच्या मालकीचे वांद्रे येथे अंदाजे 22 कोटी रुपयांचे एक आलिशान घर आहे. याशिवाय, तिच्याकडे कोट्यवधी रुपयांच्या आलिशान गाड्यांचा संग्रह देखील आहे. परिणीती चोप्राकडे 1.30 कोटी रुपयांची रेंज रोव्हर वोग, 43.19 कोटी रुपयांची ऑडी क्यू4 आणि 69.27 लाख रुपयांची ऑडी क्यू7 यांसारख्या महागड्या गाड्या देखील आहेत. परिणीती चोप्रा दरमहा 40 लाख रुपये कमावते. इतकेच नाही, तर ती एका चित्रपटासाठी सुमारे 5 कोटी रुपये मानधन घेते असेही म्हटले जाते.

संजय गायकवाड यांना काय आक्षेपार्ह वाटलं ते विचारणार, मी देखील ते पुस्तक वाचलं नाही : उदय सामंत

स्वप्नील घाग — Fri, 24 Apr 2026 16:46:20 +0530

Uday Samant on Sanjay Gaikwad : शिवसेना शिंदे गटाचे आमदार संजय गायकवाड हे ‘शिवाजी कोण होता’ या गोविंद पानसरेंच्या पुस्तकावरुन वादात सापडले आहेत. दिवगंत कॉम्रेड गोविंद पानसरे यांच्या पुस्तकाचे प्रकाशक प्रशांत आंबी यांना अश्लील शिवीगाळ करुन जीवे मारण्याची धमकी संजय गायकवाड यांनी दिल्याचा आरोप केला जात आहे. यावरुन राजकारण चांगलच तापल्याचं पाहायला मिळत आहे. राजकीय नेते ऐकमेकांवर आरोप प्रत्यारोप करत आहेत. याबाबत मंत्री उदय सामंत यांनी प्रतिक्रिया दिली आहे. संजय गायकवाड यांनी त्या पुस्तकाबाबत नेमकी कशाबाबत भूमिका मांडली, याबाबत त्यांच्याशी बोलावे लागेल. संजय गायकवाड यांनी ते पुस्तक वाचलं की नाही माहीत नाही. मी माहिती घेऊन त्यांना काय आक्षेपार्ह वाटलं ते विचारेल, मी देखील पुस्तक वाचतो असे उदय सामंत म्हणाले.

मराठी प्रवाशांसोबत बोलताना टॅक्सी चालकाला मराठी भाषा आली तर सोयिस्कर होईल

शिवाजी कोण होता? हे पुस्तक मी देखील वाचलेले नाही, पुस्तक वाचलं की त्यांची भूमिका कशाबद्दल होती याबाबत चर्चा करेल असे उदय सामंत म्हणाले. परिवहन मंत्री प्रताप सरनाईक यांनी अमराठी माणसाला दुखावण्याचा प्रयत्न केलेला नाही. मराठीबाबत त्यांनी जबरदस्ती केलेली नाही. मराठी प्रवाशांसोबत बोलताना टॅक्सी चालकाला मराठी भाषा आली तर सोयिस्कर होईल असे उदय सामंत म्हणाले. राज्य सरकार शासकीय कर्मचाऱ्यांच्या विरोधात नाही. त्यांना जे आवश्यक आहे ते या आधी करुन दिलं आहे. त्यांच्या ज्या मागण्या आहेत त्या पूर्ण करण्याचा आम्ही प्रयत्न करु असे सामंत म्हणाले.

महाविकास आघाडीत काय होतं ते ठरु द्या, आम्ही सज्ज

विधानपरिषदेच्या निवडुकीसंदर्भात देखील उदय सामंत यांना विचारण्यात आले. यावेळी ते म्हणाले की, महाविकास आघाडीत काय होतं ते ठरु द्या. आम्ही सज्ज आहोत. तापमान वाढीवर कायमस्वरूपी उपाय योजना करण्यासाठी प्रयत्न सुरु असल्याचे सामंत म्हणाले. बारामती अँग्रीकल्चर ट्रस्ट सोबत चर्चा करून काजू आणि आंबा पिकावर बदलत्या हवामानाचा परिणाम होऊ नये यासाठी उपाययोजना करण्याचे प्रयत्न सुरु केल्याचे सामंत म्हणाले.

महासत्ता असलेल्या देशाच्या पंतप्रधानाने 24 तासात ट्विट बदललं हे देशाचे पंतप्रधान नरेंद्र मोदी यांचे यश असल्याचे उदय सामंत म्हणाले. केमिकल मिश्रित पाणी नागरिकांच्या पाण्यात मिसळून जनतेला त्रास होत असेल तर अशा कंपन्या बंद करून त्यांना एक संधी दिली जाईल. मात्र त्यांनी उपाययोजना न केल्यास संबंधित कंपन्या कायमच्या बंद करु असे उदय सामंत म्हणाले.

Video: मोठी बातमी! मुंबईत संजय निरुपम अन् मनसैनिकांत राडा; आधी कारची हवा सोडली, पुन्हा बाटलीही फेकली

वेदांत नेब — Fri, 24 Apr 2026 16:28:29 +0530

मुंबई : शहरातील रिक्षावाल्यांना मराठीची (Marathi) सक्ती करण्याचा निर्णय राज्याच्या परिवहनमंत्री प्रताप सरनाईक यांनी केली आहे. सरनाईक यांच्या या निर्णयाचं शिवसेना, मनसे पक्षाकडून स्वागत होत असून शिवसेना नेते माजी खासदार संजय निरुपम यांनी या सक्तीला आपला विरोध केला आहे. त्याच पार्श्वभूमीवर आज संजय निरुपम (Sanjay Nirupam) हे दहिसरमधील रिक्षा चालकांसोबत संवाद साधण्यासाठी आले होते. त्याचवेळी, मनसैनिकांनी (MNS) दहीसरमध्ये धाव घेत संजय खासदार यांच्याविरोधात घोषणाबाजी केली. विशेष म्हणजे, मनसेच्या कार्यकर्त्यांनी मराठीची घोषणा देत संजय निरुपम यांच्या कारची हवा सोडली, त्यांच्या गाडीवर बाटली फेकून मारल्याने चांगलाच गोंधळ उडाल्याचं दिसून आलं.

संजय निरुपम यांनी मराठी सक्तीच्या मुद्द्यावरुन विरोध करत रिक्षाचालकांसोबत संवाद साधल्याचे कळताच मनसेने सुद्धा मोठ्या संख्येने कार्यकर्त्यांसह दहीसर येथील रिक्षा स्टॉप गाठत संजय निरुपम यांच्याविरोधात घोषणाबाजी सुरू केली. एकीकडून शिंदे शिवसेना पदाधिकारी तर दुसरीकडून मनसे पदाधिकारी असा साधारणपणे अर्धा ते पाऊण तास गोंधळ पाहायला मिळाला. जोपर्यंत संजय निरुपम जात नाही तोपर्यंत आंदोलन आम्ही करत राहणार असा पवित्रा मनसैनिकांनी घेतला होता. सगळ्यांसोबत संवाद साधून संजय निरुपम त्या ठिकाणाहून निघत असताना मनसैनिक आक्रमक झाले, त्यांनी निरुपम यांच्या गाडीवर बाटल्या, दगड फेकण्याचा प्रयत्न केला. त्यानंतर पोलिसांनी गोंधळ करणाऱ्या कार्यकर्त्यांना ताब्यात घेतलं आणि वातावरण शांत केलं. मात्र, या घटनेनं शिवसेना आणि मनसैनिकांमध्ये काही काळ तणावाचे वातावरण पाहायला मिळाले.

पोलिसांकडून मनसैनिकांची धरपकड (Police arrest MNS sanjau nirpum)

पोलिसांनी तात्काळ घटनेचं गांभीर्य लक्षात घेत मनसे कार्यकर्त्यांची धरपकड सुरू केली होती, मनसे कार्यकर्ता आणि पोलिसांमध्ये झडप पाहायला मिळाली. पोलिसांनी काही मनसे कार्यकर्त्यांना ताब्यात घेतलं असून पुढील कारवाई सुरू आहे. दरम्यान, हल्ला करणाऱ्या महाराष्ट्र सैनिकांचा आम्हाला अभिमान आहे, निरुपम हा मराठी द्वेषी आहे. दहिसरमध्ये मराठी भाषेला विरोध करणार तर आम्ही खपून घेणार नाही, अशी प्रतिक्रिया येथील मनसे नेते नयन कदम यांनी घटनेवर दिली.

गुणरत्न सदावर्तेंची अमित ठाकरेंवर टीका

दरम्यान, दुसरीकडे अॅड. गुणरत्न सदावर्ते यांनीही रिक्षा चालकांच्या मराठी सक्तीला विरोध करत थेट मनसेचे युवा नेते अमित ठाकरे यांनाच लक्ष्य केलंय. रिक्षा आणि टॅक्सीचालकांच्या संपावेळी मराठी रिक्षाचालकांना कोणी अडवले तर आम्ही त्यांना मनसे स्टाईलने धडा शिकवू, असा इशारा अमित ठाकरे यांनी दिला होता. आता, त्यावर गुणरत्न सदावर्ते यांनी खिल्ली उडवली आहे. राज ठाकरेंची औलाद काय भाषा बोलते, मारुन काढू… अमित ठाकरे हवालदार झालेत का? त्यांचे बोलणे सुज्ञपणाचे नाही. तुम्ही हवालदार झाला आहात की आरटीओचे शिपाई झाला आहात? अमित ठाकरे यांना मारहाणीचा बॅच मिळालाय का, असा सवाल गुणरत्न सदावर्ते यांनी उपस्थित केला. ते शुक्रवारी मुंबईत प्रसारमाध्यमांशी बोलत होते.

हेही वाचा

राज ठाकरेंची औलाद काय भाषा बोलते, अमित ठाकरे हवालदार झालेत का? गुणरत्न सदावर्तेंचा मनसेवर हल्लाबोल

महाबळेश्वरच्या घाटात 900 फूट दरीत दाम्पत्य कोसळल; पत्नी-पत्नीचा दुर्दैवी अंत, दुसऱ्यादिवशीही चालली शोध मोहिम

Raghav Chadha to join BJP : राघव चड्ढा, अशोक मित्तल, संदीप पाठक भाजपसोबत जाणार

abp majha web team — Fri, 24 Apr 2026 16:04:51 +0530

Raghav Chadha Joins BJP: राघव चड्ढा यांनी 'आप' सोडण्याचा निर्णय जाहीर केला आहे. दिल्लीत आयोजित पत्रकार परिषदेत त्यांनी सांगितले की, ते पक्षाच्या दोन-तृतीयांश खासदारांसह भाजपमध्ये सामील होत आहेत. संदीप पाठक आणि अशोक मित्तल यांच्यासोबत आयोजित पत्रकार परिषदेत 'आप'चे खासदार राघव चड्ढा म्हणाले, "आम्ही, राज्यसभेतील 'आप'चे दोन-तृतीयांश सदस्य, भारतीय संविधानातील तरतुदींचा वापर करून भाजपमध्ये विलीन होण्याचा निर्णय घेतला आहे." ते म्हणाले, "ज्या 'आप'ला मी माझ्या रक्ताने आणि घामाने वाढवले आणि माझ्या तारुण्याची 15 वर्षे समर्पित केली, तो पक्ष आता आपली तत्त्वे, मूल्ये आणि मूळ नैतिकतेपासून भरकटला आहे. हा पक्ष आता देशाच्या हितासाठी नव्हे, तर वैयक्तिक फायद्यासाठी काम करतो. गेल्या काही वर्षांपासून मला जाणवत होते की मी चुकीच्या पक्षात योग्य व्यक्ती आहे. त्यामुळे, आज मी जाहीर करतो की मी 'आप'पासून वेगळे होत आहे आणि जनतेच्या अधिक जवळ जात आहे."

आपने राघव चड्ढा यांना उपनेतेपदावरून हटवले
2 एप्रिल रोजी, आपने राघव चड्ढा यांना पक्षाच्या राज्यसभा खासदारांच्या उपनेतेपदावरून हटवले. यासंदर्भात राज्यसभा सचिवालयाला एक पत्र सादर करण्यात आले, ज्यात म्हटले आहे की त्यांना पक्षाच्या कोट्यातून बोलण्याचा वेळ देऊ नये. आपने फागवाडा येथील लवली प्रोफेशनल युनिव्हर्सिटीचे (LPU) कुलगुरू अशोक मित्तल यांची उपनेतेपदी नियुक्ती केली. राघव हे 2022 पासून पंजाबमधून आपचे राज्यसभा खासदार आहेत. त्यांचा कार्यकाळ 2028 मध्ये संपेल.

दोन तृतीयांश खासदारांचा गट विलीनीकरणासाठी आवश्यक

सध्या आप चे राज्यसभेत खासदार किती ?

पंजाबमधून निवडून आलेले खासदार (७):
१. राघव चड्ढा
२. हरभजन सिंग (माजी क्रिकेटपटू)
३. संदीप पाठक
४. अशोक मित्तल (लवली प्रोफेशनल युनिव्हर्सिटीचे संस्थापक)
५. विक्रमजीत सिंग साहनी
६. संत बलबीर सिंग सीचेवाल
७. राजेंद्र गुप्ता

दिल्लीतून निवडून आलेले खासदार (३):
१. संजय सिंग
२. एन. डी. गुप्ता
३. स्वाती मालीवाल

Aditi Tatkare: ठाणे महिला व बालविकास निधीतून 73 कोटींचा गैरव्यवहार; प्रकरणाची चौकशी होणार, मंत्री आदिती तटकरेंचा इशारा, नेमकं काय म्हणाल्या?

नाजीम मुल्ला, एबीपी माझा, पिंपरी चिंचवड — Fri, 24 Apr 2026 15:48:04 +0530

पुणे : ठाणे जिल्ह्यातील महिला आणि बालविकास विभागांतर्गत जिल्हा नियोजन निधीतून सुमारे ७३ कोटी रुपयांचा कथित गैरव्यवहार झाल्याची धक्कादायक बाब समोर आली आहे. या प्रकरणाची सरकारने गंभीर दखल घेतली असून, दोषींवर कठोर कारवाई केली जाईल, असा इशारा महिला व बालविकास मंत्री आदिती तटकरे (Aditi Tatkare) यांनी दिला आहे. मावळ तालुक्यातील किवळे येथील एका नामांकित महाविद्यालयाच्या एका कार्यक्रमासाठी त्या आल्या असताना माध्यमांशी त्या बोलत होत्या.(Aditi Tatkare)

महिला आणि बालकांच्या कल्याणासाठी राखीव असलेला निधी गैरमार्गाने वापरला जाणे ही अत्यंत गंभीर बाब असल्याचे तटकरे यांनी म्हटले आहे. अशा प्रकारचा भ्रष्टाचार कोणत्याही परिस्थितीत खपवून घेतला जाणार नाही. आम्ही या प्रकरणाची तातडीने दखल घेतली असून, सखोल चौकशीसाठी एक समिती नेमली आहे, अशी माहिती त्यांनी दिली. या समितीचा अहवाल प्राप्त होताच, या गैरव्यवहारात सामील असलेल्या संबंधितांवर लवकरात लवकर कायदेशीर आणि कठोर कारवाई करण्यात येईल, असेही त्यांनी स्पष्ट केले. या भूमिकेमुळे आता या प्रकरणातील दोषींचे धाबे दणाणले आहेत. (Aditi Tatkare)

Aditi Tatkare : नेमकं प्रकरण काय?

ठाण्यातील महिला आणि बालविकास विभागांतर्गत जिल्हा नियोजन निधीतील ७३ कोटींच्या कथित गैरव्यवहाराची बाब समोर आली असून, हे प्रकरण अत्यंत गंभीर आहे. महिला आणि बालकांच्या कल्याणासाठी उपलब्ध असलेला निधी अशा पद्धतीने गैरमार्गाने वापरला जाणे, हे कोणत्याही परिस्थितीत खपवून घेतले जाणार नाही, असे सांगतानाच आम्ही याची तातडीने दखल घेतली असून, यावर लवकरात लवकर कठोर कारवाई केली जाईल, असा इशारा महिला बालकल्याण मंत्री आदिती तटकरे यांनी दिला. जिल्हा नियोजन निधीतील ७३ कोटींच्या कथित गैरव्यवहार प्रकरणातील दोषींवर कठोर कारवाई करण्यासाठी उपायुक्तांच्या अध्यक्षतेखाली एक उच्चस्तरीय चौकशी समिती गठित करण्याचे आदेश मंत्री आदिती तटकरे यांनी दिले आहेत.

Aditi Tatkare : वाहिनींना अधिकच्या महत्त्वपूर्ण खात्यांची जबाबदारी दिली तर....

मंत्रीमंडळ खातेबदल अर्थ खाते बदलाबाबत बोलताना आदिती तटकरेंनी म्हटलं की, याबाबत आज मी पहिल्यांदा ऐकते...अजित दादांच्या पश्चात अर्थ संकल्पलीय अधिवेशन लगेच होतं, त्यामुळे अर्थ खातं मुख्यमंत्री देवंद्र फडणवीस यांनी आमच्या सर्व नेत्यांशी चर्चा करून त्यांच्याकडे ठेवलं..... आता खातेबदलाबाबत उपमुख्यमंत्री सुनेत्रा वाहिनी आणि मुख्यमंत्री देवेंद्र फडणवीस योग्य ते निर्णय घेतील.... महायुतीमध्ये अर्थ खातं अजित पवारांच्याकडे होते, या खात्याचा प्रदीर्घ अनुभव त्यांना होता....आज सुनेत्रा वाहिनी आहेत त्यांच्यावर अधिकच्या महत्त्वपूर्ण खात्यांची जबाबदारी दिली तर आनंद होईल.

Aditi Tatkare : कुटुंबात जबाबदारीच्या वाटपाबाबत बोलताना आदिती तटकरे म्हणाल्या...

राष्ट्रवादी अजित पवार कुटुंबात जबाबदारीच्या वाटपाबाबत बोलताना आदिती तटकरे म्हणाल्या, सुनेत्रा वाहिनी यांनी अजित दादाच्या पश्चात पक्षाची जबाबदारी घेतली, पार्थ आणि जय दादा ही पार्टीचे संघटन त्यांच्या पद्धतीने करत आहेत. त्यांनी ज्या जबाबदाऱ्या घेतल्यात मला खात्री आहे की, ते दादांच्या कामाची पद्धत अवलंबून पक्ष अधिक त्याच्या मार्गदर्शनाखाली मजबूत होईल.

Aditi Tatkare : कार्यकर्ता म्हणून आपल्या नेत्याला सर्वोच पदावर काम करताना...

तर बारामतीच्या निकालाबाबत बोलताना आदिती तटकरे म्हणाल्या, आम्हाला खात्री आहे की, सुनेत्रा वाहिनी सर्वाधिक मतांनी निवडून येतील. सुनेत्रा वाहिनी या निवडणुकीला सामोरे गेल्या, पवार साहेबांनी ही त्याच्या पक्षाचा उमेदवार दिला नाही, काँग्रेसने ही नंतर उमेदवार मागे घेतला. अनेकांनी पाठिंबा दिला. त्या सर्वाधिक मतांनी निवडून येतील. एक कार्यकर्ता म्हणून आपल्या नेत्याला सर्वोच पदावर काम करताना पाहण्याची इच्छा असते. मनातील तळमळ असते. ते मी तिथं मांडली. कुठं ना कुठं तरी वाटतं की दादांचे अपूर्ण राहिलेले स्वप्न ( मुख्यमंत्री) सुनेत्रा पवारांच्या माध्यमातून व्हावं. मी कार्यकर्ता म्हणून भावना मांडल्या याचा विपर्यास करू नये, असंही त्यांनी पुढे म्हटलं आहे.

Girish Mahajan and Zen Sadavarte: महाजनांना गेट आऊट म्हणणाऱ्या महिलेवर झेन सदावर्ते संतापली; म्हणाली, 'मर्सिडीजमधून प्रवास करणाऱ्यांना वाहतूक कोंडीचा त्रास होत असेल तर होऊ दे'

अभिषेक मुठाळ — Fri, 24 Apr 2026 15:26:34 +0530

Girish Mahajan and Zen Sadavarte: मुंबईतील वरळी परिसरात भाजपच्या जनआक्रोश मोर्चादरम्यान एक हायव्होल्टेज ड्रामा पाहायला मिळाला होता. वाहतूक कोंडीमुळे संतप्त झालेल्या एका महिलेने थेट मंत्री गिरीश महाजन (Girish Mahajan) यांना अडवून त्यांना "इथून चालते व्हा" (Get Out) अशा शब्दांत खडेबोल सुनावले होते. या प्रकरणाचा व्हिडिओ व्हायरल झाल्यानंतर आता ॲड. गुणरत्न सदावर्ते यांची कन्या झेन सदावर्ते (Zen Sadavarte) हिने या महिलेविरोधात वरळी पोलीस ठाण्यात तक्रार दाखल केली आहे.

Girish Mahajan : नेमकी घटना काय?

लोकसभेत महिला आरक्षण विधेयक नामंजूर झाल्याच्या निषेधार्थ भाजपने वरळीच्या जांबोरी मैदानापासून एनएससीआय डोमपर्यंत जनआक्रोश मोर्चा काढला होता. या मोर्चामुळे वरळी परिसरात प्रचंड वाहतूक कोंडी झाली. यावेळी एका स्थानिक महिलेने आपला संयम गमावला आणि थेट मंत्री गिरीश महाजन यांना अडवून प्रश्नांचा भडिमार केला. "तुमचं हे काय चाललंय? इथून चालते व्हा! तुमच्या मोर्चामुळे शेकडो लोक अडकले आहेत," अशा शब्दांत महिलेने महाजनांना खडेबोल सुनावले होते. या घटनेचा व्हिडिओ सोशल मीडियावर प्रचंड व्हायरल झाला आहे. यानंतर या महिलेविरोधात ॲड. गुणरत्न सदावर्ते यांची कन्या झेन सदावर्ते हिने वरळी पोलीस स्थानकात धाव घेत तक्रार नोंदवली आहे.

Zen Sadavarte: त्या महिला पोलिसांना शिवीगाळ करत होत्या

या प्रकरणावर बोलताना झेन सदावर्ते म्हणाली की, एक महिला कोण आहे? मर्सिडीज किंवा बसमधून येतायत. त्या महिला पोलिसांना शिवीगाळ करत होत्या, अपशब्द बोलत होत्या. पोलिसांचा अपमान त्यांनी उघडपणे केला आहे. दिवसरात्र पोलीस आपली रक्षा करतात, आणि त्यांना काय तर शिव्या? महिला आरक्षणासंदर्भात मोर्चा होता, डिलिमिटेशन संदर्भात होता. मी तक्रार अशा विरोधात केली आहे. वाहतूक कोंडी झाली होती, अडथळा झाला. मात्र, मोर्चाच्या संघर्षातूनच लोकांना न्याय मिळाला आहे. रस्त्यावर येऊन आवाज उचलला नाही तर न्याय कसा मिळणार? असा सवाल तिने उपस्थित केला.

Zen Sadavarte: मी तक्रार दाखल केलीय

झेन सदावर्ते पुढे म्हणाली की, आधी महिलांना समान वागणूक मिळत नव्हती. सावित्रीबाई फुले यांच्यामुळे सर्व मिळालं आहे. जेव्हा जेव्हा अडचणी येतील, तेव्हा तेव्हा लोकं रस्त्यावर येतील. तुम्हाला मर्सिडीजमधून प्रवास करताना वाहतूक कोंडीचा सामना करावा लागत असेल तर मग होऊ द्या. मी तक्रार दाखल केली आहे. एफआयआर दाखल करण्यासंदर्भात पोलीस मला बोलवतील, अशी प्रतिक्रिया तिने दिले आहे.

आणखी वाचा

Mumbai Women Angry Girish Mahajan Video: पोलिसांना नडली, गिरीश महाजनांना तोंडावर म्हणाली, इथून चालते व्हा...; महिला का चिडली, नेमकं काय घडलेलं?, VIDEO

Gunaratna Sadavarte and Amit Thackeray: राज ठाकरेंची औलाद काय भाषा बोलते, अमित ठाकरे हवालदार झालेत का? गुणरत्न सदावर्तेंचा मनसेवर हल्लाबोल

जयदीप मेढे — Fri, 24 Apr 2026 15:02:35 +0530

Gunaratna Sadavarte and Amit Thackeray: रिक्षा आणि टॅक्सीचालकांच्या संपावेळी मराठी रिक्षाचालकांना कोणी अडवले तर आम्ही त्यांना मनसे स्टाईलने धडा शिकवू, असा इशारा देणाऱ्या अमित ठाकरे यांची गुणरत्न सदावर्ते यांनी खिल्ली उडवली आहे. राज ठाकरेंची औलाद काय भाषा बोलते, मारुन काढू… अमित ठाकरे हवालदार झालेत का? त्यांचे बोलणे सुज्ञपणाचे नाही. तुम्ही हवालदार झाला आहात की आरटीओचे शिपाई झाला आहात? अमित ठाकरे यांना मारहाणीचा बॅच मिळालाय का, असा सवाल गुणरत्न सदावर्ते यांनी उपस्थित केला. ते शुक्रवारी मुंबईत प्रसारमाध्यमांशी बोलत होते. (Maharashtra Politics news)

यावेळी गुणरत्न सदावर्ते यांनी रिक्षा आणि टॅक्सी चालकांना मराठी भाषा अनिवार्य करण्याच्या परिवहन खात्याच्या निर्णयावर टीका केली. रिक्षाचालकांना रिक्षावाला नाही, रिक्षावाले साहेब बोला. कोणी कुठे राहावं आणि कुठे पोट भरावं हे सांगणारे तुम्ही कोण? तुमच्या पोटाच्या भरतीसाठी ईडी यंत्रणा लागतात का? माहिती नाही. मात्र, कष्टकरी मेहनत करतात. प्रताप सरनाईक यांनी कोणतीही गोष्ट गृहीत धरु नये. शिवसेनेतील लोक सरनाईक यांच्या बाजूने नाहीत. संजय निरूपमही परिवहन खात्याच्या निर्णयाविरोधात बोलले आहेत. हिंदी, मराठीवरुन काही लोकं इतरांना त्रस देऊ इच्छितात. मनसेच्या कार्यकर्त्यांवर गुन्हे दाखल झाल्यावर मारहाणीची भाषा करणारे नेते किती जणांच्या घरी जातात? आम्ही कष्टकऱ्यांच्या बाजूने उभे आहोत. त्यांच्यावर कोणीही हात उचलायचा नाही. अन्यथा कोणीही सुटणार नाही, असा इशारा गुणरत्न सदावर्ते यांनी दिला.

एखादी भाषा शिकण्यासाठी गोडवा लागतो. सध्याच्या राजकीय परिस्थितीत तो गोडवा नाही. छडी मारुन माणसाला शिकवता येत नाही. प्रताप सरनाईकांना काय बोलावे, ते परिवहन खात्याचे नव्हे तर शालेय शिक्षण विभागाचे काम करत आहेत. भोजपुरी भाषा ही शेड्यूल 10 मध्ये टाकावी, ही आमची मागणी आहे. मराठी भाषेच्या सौंदर्याबाबत कोणाचंही दुमत नाही, असेही गुणरत्न सदावर्ते यांनी म्हटले.

Marathi compulsory for Auto permit: गुणरत्न सदावर्तें यांना धमकीचे फोन

मनसे पदाधिकाऱ्यांनी गुणरत्न सदावर्ते यांना गुरुवारी रस्त्यावरच घेरून विरोध केल्याची घटना घडली होती. यानंतर गुणरत्न सदावर्ते यांना धमकीचे फोन येत आहेत. मनसेच्या पदाधिकाऱ्यांनी गुणरत्न सदावर्ते यांना मराठी भाषा येत नाही का तुम्हाला? असा सवाल विचारला होता. त्यावर सदावर्ते यांनी, 'तुला जे बोलायचं ते तू बोल… मला जे बोलायचं ते मी बोलेल', असे प्रत्युत्तर दिले होते. या सगळ्या वादानंतर मुंबई पोलिसांनी गुणरत्न सदावर्ते यांच्या सुरक्षेत वाढ केली आहे.

आणखी वाचा

गिरीश महाजनांना खडेबोल सुनावणाऱ्या महिलेविरोधात गुणरत्न सदावर्तेंच्या मुलीची पोलिसांत तक्रार, नक्की काय घडलं?

Shahu Maharaj On Sanjay Gaikwad : संजय गायकवाडांवर शाहू महाराज संतापले

abp majha web team — Fri, 24 Apr 2026 15:01:56 +0530

Shahu Maharaj and Sanjay Gaikwad: आमदार संजय गायकवाडांवर छत्रपती शाहू महाराज संतापले, आमदारकी रद्द करण्याची मागणी

शिवाजी कोण होता? या पुस्तकाच्या शीर्षकावरुन कोल्हापूरमधील प्रकाशक प्रशांत आंबी यांना शिवीगाळ करुन त्यांना जीवे मारण्याची धमकी देणारे आमदार संजय गायकवाड यांच्याविषयी खासदार शाहू महाराज छत्रपती यांनी संताप व्यक्त केला आहे. संजय गायकवाड यांनी केलेलं वक्तव्य जनता सहन करणार नाही. कोणाबद्दल काय बोलायचं हे त्यांना समजायला हवं, असे शाहू महाराज छत्रपती यांनी म्हटले. ते शुक्रवारी कोल्हापूरमध्ये प्रसारमाध्यमांशी बोलत होते. यावेळी शाहू महाराज छत्रपती यांनी संजय गायकवाड यांच्याविरोधात कठोर कारवाईची गरज व्यक्त केली. यासंदर्भात सरकारला जी योग्य वाटले, ती कारवाई लवकर करावी. या सरकारमध्ये काही गोष्टी लगेच होत नाहीत. आमदारकी रद्द करण्यासंदर्भात काय नियम आहेत हे मला माहीत नाही. मात्र, संजय गायकवाड यांनी ज्या तऱ्हेने त्यांनी वक्तव्य केलं ते बिलकुल योग्य नाही. संजय गायकवाड यांच्या वक्तव्याकडे जनताच आता लक्ष देईल, अशी प्रतिक्रिया शाहू महाराज छत्रपती यांनी व्यक्त केली.दरम्यान, 'शिवाजी कोण होता?' पुस्तकाचे प्रकाशक प्रशांत आंबी यांनी याप्रकरणी गुरुवारी कोल्हापूरच्या राजारामपुरी पोलीस ठाण्यात तक्रार दाखल केली होती. मात्र, पोलिसांनी तुर्तास संजय गायकवाड यांच्याविरोधात गुन्हा दाखल करुन घेण्यास नकार दिला. आम्ही आमच्या वकिलांशी बोलून तुम्हाला कळवतो, असे पोलिसांनी प्रशांत आंबी यांना सांगितले.