आधी म्हणाले, अंबादास काड्या करतो, आता वाद मिटला; उद्धव ठाकरेंच्या भेटीनंतर खैरेंनी पुढचा प्लॅन सांगितला

उद्धव ठाकरे यांची भेट झाली असून कार्यक्रमासंदर्भात चर्चा झाली आहे. काही कार्यक्रम पक्षाकडून आखले जाणार आहेत, त्याबाबत त्यांच्याशी बोलणं झालं, अशी माहिती शिवसेनेतील ते चंद्रकांत खैरे यांनी दिली.

मुंबई : शिवसेना युबीटी पक्षातील छत्रपती संभाजीनगरमधील नेते आणि माजी खासदार चंद्रकांत खैरे (Chandrakant khaire) यांनी आज पक्षप्रमुख उद्धव ठाकरे यांची भेट घेतली. विरोधी पक्षनेते अंबादास दानवे आणि त्यांच्या दोन दिवसांपूर्वी एका कार्यक्रमाच्या निमंत्रणावरुन वाद झाला होता. त्यावेळी, अंबादास मागून आला आणि काड्या करतो, इथं शिवसेना मी वाढवली, असे म्हणत चंद्रकांत खैरे यांनी अंबादास दानवेंवर जोरदार टीका केली होती. तसेच, यासंदर्भात मी पक्षप्रमुखांकडे तक्रार करणार असल्याचंही त्यांनी म्हटलं होतं. त्यानुसार, खैरे यांनी आज उद्धव ठाकरेंसोबत (Uddhav Thackeray) मातोश्रीवर चर्चा केल्यानंतर दानवेंसोबतचा वाद मिटल्याचे जाहीर केले. त्यामुळे, दोन दिवसांपासून सुरू असलेल्या शिवसेना पक्षातील या वादावर आता पडदा पडला आहे. विशेष म्हणजे आता दोघेही एकत्र येऊन कार्यक्रम घेणार आहोत, पक्षाचं काम करणार आहोत, असेही खैरे यांनी स्पष्ट केले. 

उद्धव ठाकरे यांची भेट झाली असून कार्यक्रमासंदर्भात चर्चा झाली आहे. काही कार्यक्रम पक्षाकडून आखले जाणार आहेत, त्याबाबत त्यांच्याशी बोलणं झालं, अशी माहिती शिवसेनेतील ज्येष्ठ नेते चंद्रकांत खैरे यांनी दिली. तसेच, अंबादास दानवे आणि माझा वाद केव्हाच मिटला आहे. यापुढे आम्ही दोघे मिळून एकत्र कार्यक्रम करणार आहोत, तो एकटा किंवा मी एकटा कार्यक्रम करणार नाहीत, सोबत म्हणून कार्यक्रम करणार आहोत, असे स्पष्टीकरणही खैरे यांनी दिले. दरम्यान, आज सुद्धा सेना भवनला बैठक आहे, त्यावेळी मी आणि अंबादास दानवे सोबत बैठकीला असणार आहोत, असेही खैरेंनी सांगितले. त्यामुळे, दोन्ही नेत्यांमधील वादाचा मुद्दा आता संपुष्टात आल्याचे स्पष्ट झालं आहे. 

15 जूनला उद्धव ठाकरे संभाजीनगरला

संभाजीनगरमधील मेळाव्याच्या कार्यक्रमाला मला निमंत्रण नव्हतं. शिवाय त्या मेळाव्याच्या दिवशी माझ्या समाजाचा कार्यक्रम आधीपासून ठरलेला होता, त्यासाठी मी तिकडे गेलो होतो. त्यामुळे मेळाव्याला जाऊ शकलो नाही. उद्धव ठाकरेंना मी सगळ्या गोष्टी सांगितल्या आणि आता वाद मिटलेला आहे, असे म्हणत खैरे यांनी अंबादास दानवे यांच्यासोबतचा वाद संपुष्टात आल्याचे म्हटले. तर, 15 जूनला उद्धव ठाकरे संभाजीनगरला येथे, शिवसेना भवनचे उद्घाटन आहे, याशिवाय शिबिर सुद्धा घेतील. आदित्य ठाकरे सुद्धा 15 मे च्या दरम्यान हंडा मोर्चासाठी संभाजीनगरला येतील, अशी माहिती देखील खैरे यांनी दिली.

हेही वाचा