Solapur News : आगामी स्थानिक स्वराज्य संस्थाच्या निवडणुकांच्या पार्श्वभूमीवर सोलापुरात (Solapur News) भाजपचे मिशन लोटस सुरूच असल्याचे चित्र आहे. सोलापूरचे दिवंगत माजी महापौर महेश कोठे यांचे पुत्र प्रथमेश कोठे यांचा आपल्या समर्थकासह भारतीय जनता पार्टीमध्ये (BJP) प्रवेश केलाय. भाजप प्रदेशाध्यक्ष रवींद्र चव्हाण, पालकमंत्री जयकुमार गोरे, आमदार देवेंद्र दादा कोठे यांच्या प्रमुख उपस्थितीत मुंबई प्रदेश कार्यालयात हा पक्ष प्रवेश सोहळा पार पडलाय. त्यामुळे सोलापुरात भाजपची ताकद वाढली असून आगामी निवडुकांसाठी भाजपकडून जोरदार मोर्चेबांधणी सुरु असल्याचे चित्र आहे.
Solapur Politics : सोलापुरात भाजपची ताकद वाढली
राष्ट्रवादी शरद पवार गटाचे माजी नगरसेवक प्रथमेश कोठे यांच्यासह स्थायी समितीचे माजी सभापती विनायक कोंड्याल, माजी नगरसेविका कुमुद अंकाराम, माजी नगरसेवक विठ्ठल कोटा, माजी नगरसेवक शशिकांत कैंची, जोशी समाज शहर अध्यक्ष युवराज सरवदे, राष्ट्रवादी युवक काँग्रेसचे अध्यक्ष अक्षय वाकसे, राष्ट्रवादी युवकचे शहर उत्तर सरचिटणीस तुषार पवार, संतोष सोमा, आकाश भोसले आदींचा देखील भाजपमध्ये प्रवेश झालाय. तर काही दिवसापूर्वीच सोलापुरातील दोन माजी उपमहापौरसह काही माजी नगरसेवकांचा भाजपत प्रवेश झाला होता. त्यानंतर आज पुन्हा एकदा राष्ट्रवादी शरद पवार गटाच्या माजी नगरसेवकांनी भाजपत प्रवेश केलाय. त्यामुळे सोलापुरात भाजपला अधिक बळ प्राप्त झाल्याचे बोललं जात आहे.
Tuljapur Drug Case: तुळजापूर ड्रग्ज प्रकरणातील जामीनावर बाहेर, कार्यकर्त्यांसह भाजपमध्ये पक्षप्रवेश
असे असताना दुसरीकडे तुळजापूर ड्रग्ज प्रकरणातील जामीनावर बाहेर असणारा आरोपी आणि माजी नगराध्यक्ष संतोष परमेश्वर याने भाजपमध्ये प्रवेश केल्याची माहिती समोर आली आहे. तुळजापूरचे भाजप आमदार राणाजगजितसिंह पाटील यांच्या नेतृत्वात संतोष परमेश्वर याने आपल्या कार्यकर्त्यांसह भाजपमध्ये पक्षप्रवेश केलाय. अखंड राष्ट्रवादी असताना संतोष परमेश्वर यांनी तुळजापूरचं नगराध्यक्षपद भूषवलं होतं.
Tuljapur Politics : पक्षप्रवेशाची राजकीय वर्तुळात चांगलीच चर्चा
विधानसभा निवडणुकीदरम्यान काँग्रेस उमेदवार धीरज पाटील यांना संतोष परमेश्वरची साथ लाभली होती. त्यानंतर आता नगरपरिषद निवडणुकीसाठी आमदार राणाजगजीतसिंह पाटील यांच्या नेतृत्वात त्याने भाजपमध्ये पक्षप्रवेश केला आहे. असे असले तरी तुळजापूर ड्रग्ज प्रकरणात आरोपी असल्याने या पक्षप्रवेशाची राजकीय वर्तुळात चांगलीच चर्चा रंगली आहे. तर तुळजापूर नगरपरिषद निवडणुकीमध्ये ड्रग्जचा मुद्दा केंद्रस्थानी असल्याचीही शक्यता आहे.
हेही वाचा