मस्साजोगच्या सरपंच पदासाठी संतोष देशमुखांच्या पत्नी उद्या अर्ज भरणार; निवडणूक होणार की बिनविरोध?
मस्साजोग सरपंच पोटनिवडणुकीत सरपंच पदासाठी दिवंगत सरपंच संतोष देशमुख यांच्या पत्नी उद्या आपला उमदेवारी अर्ज दाखल करणार आहेत
बीड: जिल्ह्यातील मस्साजोगचे सरपंच संतोष देशमुख (Santosh deshmukh) यांच्या हत्येला 1 वर्षाचा कालावधी उलटला असून या प्रकरणातील आरोपी तुरुंगात आहेत. दुसरीकडे आता, येथील ग्रामपंचायतीत सरपंच पदासाठी निवडणूक (Election) कार्यक्रम जाहीर झाला असून मस्साजोगचा नवा सरपंच कोण याची उत्सुकता सर्वांनाच आहे. संतोष देशमुख यांचे बंधू धनंजय देशमुख हेच गावचा कारभार हाती घेतील का, अशी चर्चा राजकीय वर्तुळात सुरु होती. मात्र, आता मस्साजोगच्या (Beed) सरपंच पदासाठी दिवंगत संतोष देशमुख यांच्या पत्नी अश्विनी देशमुख उमेदवारी अर्ज दाखल करणार आहेत.
मस्साजोग सरपंच पोटनिवडणुकीत सरपंच पदासाठी दिवंगत सरपंच संतोष देशमुख यांच्या पत्नी उद्या आपला उमदेवारी अर्ज दाखल करणार आहेत. देशमुख कुटुंबीयांनी एकमताने आणि ग्रामस्थांशी विचार विनिमय, चर्चा करुन अश्विनी देशमुख यांचे नाव निश्चित केलं आहे. त्यानुसार, उद्या सकाळी 11.00 वाजता सरपंच पदासाठी त्या आपला उमेदवारी अर्ज साध्या पद्धतीने दाखल करणार आहेत. दिवंगत सरपंच संतोष देशमुख यांच्या हत्येनंतर मस्साजोगचे सरपंच पद रिक्त झाले होते. आता, नव्याने गावचा कारभार हाती घेणाऱ्या नवीन सरपंचांचा कालावधी 18 महिने इतका असणार आहे.
मस्साजोग सरपंच पोटनिवडणुकीच्या निवडणूक प्रक्रियेला सुरुवात झाली असून संतोष देशमुख यांच्या पत्नी अश्विनी देशमुख यांचा अर्ज भरुन त्यांना बिनविरोध सरपंच पद द्यावे अशी गावकऱ्यांची अपेक्षा आहे. संतोष देशमुख यांच्या पत्नीला सरपंच पद देणे हीच खरी संतोष देशमुख यांना श्रद्धांजली असणार आहे, अशी गावतील महिला वर्गाचीही मागणी आहे. तर, त्यांना सरपंचपदाचा अनुभव असल्याचेही सांगितले जाते. दरम्यान, येथील सरपंचपदाची निवडणूक बिनविरोध होणार की मतदान होणार याकडेही सर्वांचे लक्ष लागले आहे.
असा आहे निवडणूक कार्यक्रम
7 ते 13 एप्रिल
अर्जाची छाननी - 15 एप्रिल
अर्ज मागे घेण्याची तारीख - 17 एप्रिल
मतदान - 28 एप्रिल
निकाल - 29 एप्रिल
भावाचा टॅटू मानेवर काढला
दरम्यान, धनंजय देशमुख यांनी काही दिवसांपूर्वीच आपल्या भावाबद्दलचे प्रेम एका वेगळ्याच कृतीतून व्यक्त केले. धनंजय यांनी भाऊ संतोष देशमुखांचा फोटो टॅटूच्या माध्यमातून मानेवर काढला. त्यासोबतच सत्य-विरा-युध्द असे नावं कोरले आहेत. जी त्यांच्या मुलांची नावं आहेत. टॅटू काढलेला व्हिडिओ सोशल मीडियावर मोठ्या प्रमाणात व्हायरल होत असुन सरपंच संतोष देशमुखांना न्याय मिळालाच पाहिजे, अशा प्रतिक्रिया सोशल मीडियावरुन येत आहेत.
हेही वाचा
महत्त्वाच्या बातम्या
