Bal Mane Vidhan Parishad Election 2026 मुंबई: कोकणातील रायगड-रत्नागिरी-सिंधुदुर्ग विधान परिषद मतदारसंघाची (Konkan Vidhan Parishad Election 2026) निवडणूक बिनविरोध झाली. या निवडणुकीत राष्ट्रवादीच्या सुनील तटकरे (Sunil Tatkare) यांचे पुत्र अनिकेत तटकरे विरुद्ध महाविकास आघाडीचे (उद्धव ठाकरे गट) बाळ माने (Bal Mane) अशी लढत रंगणार होती. मात्र बाळ मानेंनी रत्नागिरी जिल्हाधिकारी कार्यालयात जात आपला अर्ज मागे घेतला. यावेळी बाळ मानेंसोबत भाजपचे मंत्री नितेश राणे (Nitesh Rane) उपस्थित होते. त्यामुळे बाळ मानेंच्या या कृतीविरोधात ठाकरेसेनेत कमालीचा रोष पाहायला मिळाला. बाळ मानेंनी अर्ज मागे घेतल्यानं शिवसेना ठाकरे गटाकडून त्यांच्यावर कारवाई करण्यात आली. बाळ मानेंची पक्षातून हकालपट्टी करण्यात आली. खासदार संजय राऊत यांनी ट्विट करत ही माहिती दिली. तर माजी खासदार विनायक राऊतांनी बाळ मानेंचा गद्दार असा उल्लेख केला. या सगळ्यावर आता बाळ माने यांनी एबीपी माझाशी बोलताना विविध मुद्द्यावर भाष्य केलं.
बाळ मानेंचा विनायक राऊत यांच्यावर हल्लाबोल
बाळ माने म्हणाले की, देवेंद्र फडणवीस यांचे मी ऐकलं आणि भविष्यात सुद्धा त्यांचं मी आता ऐकणार आहेत. देवेंद्र फडणवीस सोबत कौटुंबिक संबंध आहेत.. 1990 पासून संबंध आहेत. नितेश राणे आणि संपर्क साधला देवेंद्र फडणवीस यांनी संपर्क साधला आणि त्यांचं म्हणणं होतं 55 मतं घेऊन तू का उभा राहतो? राजकीय करियर तुझं चांगलं राहणार नाही, देवेंद्र फडणवीस यांनी बोलवलं तर स्वागत आहे, असं बाळ माने म्हणाले.
बाळ माने पुढं म्हणाले की नितेश राणे यांच्या बंगल्याच्या समोर आपण आहोत... कोकणाच्या हितासाठी जे असेल तसा निर्णय घेईल सरकार पक्षात राहून लोकांच्या अडचणी सुटतील. मी आरएसएस स्वयंसेवक आहे... शिवसेनेमध्ये उद्धव ठाकरे, रश्मी ठाकरे, आदित्य ठाकरे, मिलिंद नार्वेकर, संजय राऊत या सगळ्यांनी मला प्रेम दिला
काल संजय राऊत यांनी हाकालपट्टी झाल्याचे सांगितलं विनायक राऊत परत का येऊन बोलतात? विनायक राऊत यांना 2024 ला सुद्धा मला उमेदवारी द्यायची नव्हती त्यांना अन्य लोकांसोबत सेटिंग करायची होती. डोमकावळ्यासारखे ते काल आले... तुम्हाला बोलण्याचा काल अधिकार काय होता? असा पलटवार बाळ माने यांनी केला.
कोकणात शिवसेनेची वाट लावण्याचे काम विनायक राऊत यांनी केलं. पदाधिकाऱ्याचे पत्र घेण्यासाठी सुद्धा ते पैसे घेतात. पालघर लोकसभा निवडणुकीच्या वेळेस फर्न हॉटेलच्या इथे मोठी डील झाली... त्यात तुम्ही किती पैसे घेतले हे लोकांना सांगा, असं आव्हान बाळ माने यांनी विनायक राऊत यांना दिलं.
विनायक राऊतांनी शिंदेंच्या सेनेची सुपारी घेतली : बाळ माने
बाळ माने पुढे म्हणाले की, जर मी काही चुकीचे केला असेल तर मला त्यांनी बोलावलं पाहिजे होतं वस्तुस्थिती समजून घ्यायला पाहिजे होती. शिंदे सेनेकडून यांनी सुपारी घेतली की त्यांना बाळ माने नको आहे. शिंदे सेनेचे भाट विनायक राऊत आहेत. शिदेंसेनेला चॅलेंज देणारा नेता त्यांना कोकणात नकोय, असा आरोप देखील बाळ माने यांनी केला.
संजय राऊतांच्या 150 कोटींच्या डीलच्या आरोपानंतर संजय राऊत साहेब तुम्ही जबाबदार आहात कुठे काय बोलावं हा चर्चेचा विषय आहे, असं बाळ माने म्हणाले. मी का अर्ज मागे घेतला?हे मी सांगितलं आहे. महाविकास आघाडीमध्ये एक वाक्यता तर नव्हती आणि आमच्याकडे मतं सुद्धा नव्हती.
उद्धव ठाकरेंची माझं बोलणं झालं नाही पण इतर वरिष्ठ नेत्यांची माझं बोलणं झालं. भास्कर जाधव यांच्याशी बोलणं झालं नाही घोडेबाजार खूप मोठ्या प्रमाणात सुरू झाला होता. फक्त 55 मतं मिळून पराभव होणे. राजकीय करिअरला चांगलं नव्हतं, असं देखील बाळ माने म्हणाले.