मुंबई : राष्ट्रवादी काँग्रेसचे प्रमुख नेते आणि उपमु्ख्यमंत्री अजित पवार (Ajit pawar) यांचा काही दिवसांपूर्वी एक व्हिडिओ चांगलाच व्हायरल झाला होता. त्यामध्ये, एका महिला आयपीएस अधिकाऱ्याला ते फोनवरुन झापताना दिसून आले. गावातील मुरुम उत्खननप्रकरणातील कारवाईदरम्यानचे हे फोनवरील संभाषण व्हायरल झाल्यानंतर राज्यभरातून अजित पवारांवर टीका करण्यात आली. तर, अजित पवारांनी संबंधित घटनेवर खुलासा करत बाजू मांडली होती. आता, आमदार रोहित पवार (Rohit pawar) यांचा एक व्हिडिओ व्हायरल झाला आहे. त्यामध्ये, एका अधिकाऱ्याला ते अरे-तुरेची भाषा करत दरडावून बोलताना दिसून येते. त्यावरुन, सामाजिक कार्यकर्त्या अंजली दमानिया (Anjali damania) यांनी जसे काका तसाच पुतण्या म्हणत काका-पुतण्यावर जोरदार हल्लाबोल केला आहे.
जसे काका तसाच पुतण्या, रोहित पवारांची ही काय भाषा? असे म्हणत अंजली दमानिया यांनी रोहित पवारांच्या व्हायरल व्हिडिओवरुन अजित पवारांनाही लक्ष्य केलं. महाराष्ट्रात सरकारी कामे निकृष्ट असतात यात काहीच शंका नाही. यावर अधिकाऱ्यांना कडक शब्दात जाब विचारला पाहिजे, यातही काही शंका नाही, पण ही भाषा?अधिकाऱ्यांना म्हणणं, “काय गोट्या खेळत होता काय ?” “खिशातून हात काढ “ “मिजासखोर, असे म्हणत अंजली दमानिया यांनी आमदार रोहित पवारांचा आमसभेतील व्हिडिओ शेअर केला आहे. त्यामध्ये, रोहित पवार यांनी एका अधिकाऱ्याची चांगलीच खरडपट्टी केल्याचं पाहायला मिळत आहे.
कर्जत-जामखेड मतदारसंघातील सार्वजनिक समस्या आणि विकासकामांबाबत नागरिकांची थेट माहिती घेण्यासाठी आमदार रोहित पवार यांनी प्रशासनासमवेत बैठक घेतली होती. या बैठकीदरम्यान कार्यकर्त्याने एका कामासंदर्भात प्रश्न उपस्थित केला. पण, संबंधित अधिकाऱ्याने गोलमोल उत्तर दिल्यानं रोहित पवार चांगलेच भडकले. त्यांनी स्पष्ट शब्दांत अधिकाऱ्याला फटकारलं. आता, रोहित पवारांचा हा व्हिडिओ व्हायरल होत असून अधिकाऱ्यांना बोलण्याची अशी भाषा असते का, रोहित पवार स्टंटबाज आहेत, असे म्हणत विरोधकांकडून टीका होत आहे.
दादागिरीची भाषा करू नये
दादागिरीची भाषा रोहित पवार यांनी करु नये, अधिकाऱ्यांचे चुकले असेल तर विधानसभेत तक्रार करण्यात येते. मात्र, स्टंटबाजी करण्याची भाषा सर्वसामान्यांवर तुम्हाला शोभत नाही. जनता तुम्हाला यासंदर्भात धडा शिकवेल, अशी टीका भाजप प्रवक्ते नवनाथ बन यांनी केली आहे.
काय म्हणाले रोहित पवार?
"आतापर्यंत गोट्या खेळत होता का? तक्रार करणारे नागरिक बावळट आहेत का? वेडे आहेत का? तू मिजासखोर होऊ नकोस!" यातच अधिकाऱ्याने खिशात हात घालून उभं राहिल्याचं पाहून रोहित पवारांनी आणखी कडक शब्दांत सुनावलं. "आधी खिशातून हात काढ. तू लय शहाणा झालास वाटतं. लोकं इथे आलेत म्हणजे काहीतरी चुकीचं घडलं आहे. हा तुमच्या बापाचा पैसा नाही, हा लोकांचा पैसा आहे. काम चांगल्या दर्जाचं व्हायला हवं. तुमचे पराक्रम आम्हाला माहिती आहेत. एवढं लक्षात ठेवा, यापुढे गोंधळ चालणार नाही," अशा शब्दांत रोहित पवारांनी अधिकाऱ्यांची कानउघडणी केली.