मोठी बातमी! राष्ट्रवादीच्या विलिनीकरणानंतर 'हा' नेता होणार होता प्रदेशाध्यक्ष; रोहित पवारांचा गौप्यस्फोट
रोहित पवार यांनी पत्रकार परिषदेत राष्ट्रवादी काँग्रेसच्या विलिनीकरणावर थेट भाष्य केलं. मला विलिनीकरणावर बोलायचं नाही, असे म्हणत त्यांनी दोन राष्ट्रवादी एकत्र येण्याची चर्चा सुरू होते असे म्हटले.
मुंबई : राष्ट्रवादी काँग्रेस शरदचंद्र पवार पक्षाचे आमदार रोहित पवार (Rohit Pawar) यांनी आज पुन्हा एकदा पत्रकार परिषद घेऊन अजित पवारांच्या विमान अपघातावर अनेक प्रश्न उपस्थित केले आहेत. विमान अपघात का घातपात असल्याचा संशय व्यक्त करत रोहित पवार यांनी व्हीएसआर कंपनी आणि कॅप्टन सुमित कपूर यांच्या भूमिकेवर प्रश्न उपस्थित केले. तसेच, पत्रकार परिषदेत राष्ट्रवादी काँग्रेसच्या विलिनीकरणासंदर्भात मोठा गौप्यस्फोटही केला. अजित दादा नसल्याने दोन राष्ट्रवादीच्या (NCP) विलिनीकरणावर बोलणं योग्य नाही, पण संयुक्तिक राष्ट्रवादी काँग्रेसच्या विलिनीकरणानंतर नवा प्रदेशाध्यक्ष ठरविण्यात येणार होता. त्यासाठी, अजित दादांच्या मनात युवा नेत्याचं नाव होतं ते खासदार अमोल कोल्हे (Amol Kolhe) असेही रोहित पवार यांनी सांगितले.
रोहित पवार यांनी पत्रकार परिषदेत राष्ट्रवादी काँग्रेसच्या विलिनीकरणावर थेट भाष्य केलं. मला आज विलिनीकरणावर अधिकचं बोलायचं नाही, असे म्हणत त्यांनी दोन राष्ट्रवादी एकत्र येण्याची चर्चा सुरू होते असे म्हटले. अजित दादा आज नाहीत, त्यामुळे त्यावर चर्चा करणं योग्य नाही. मात्र, दोन राष्ट्रवादी एकत्र आल्यास अजित दादांना राष्ट्रवादी काँग्रेसच्या नेतृत्वात अनके बदल करायचे होते. प्रदेशाध्यक्षपदी कोणीतरी तरुण असावं असं त्यांना वाटत होतं. अमोल कोल्हे यांच्या नावाचा प्रस्ताव दिला होता. त्यामुळेच अमोल कोल्हे अनेक बैठकांमध्ये होते. त्यादृष्टीने चर्चा होत होत्या. पण आज दादा राहिले नाहीत, ज्यांच्यासोबत आम्हाला कंफर्ट होता. त्यांची भावनिक इच्छा होती, राजकीय इच्छा दुय्यम होती. दोन्ही पक्ष कुटुंब एकत्र यावेत असं त्यांना वाटत होते, असा गौप्यस्फोटच रोहित पवारांनी केला.
डॉ. अमोल कोल्हे हे संयुक्तित राष्ट्रवादी काँग्रेसचे महाराष्ट्र प्रदेशाध्यक्ष झाले असते, अशी दादांचीच इच्छा होती. त्यामुळेच, ते प्रामुख्याने बैठकीत पुढाकार घेत होते. ज्यांच्या घरी यासंदर्भात 13 बैठका झाल्या, त्या जयंत पाटील यांच्या घरासमोरील सीसीटीव्हीत तुम्हाला दादा दिसून येतील, असेही रोहित पवार यांनी स्पष्ट केले.
नाव घेता सुनिल तटकरेंवर टीका
विलिनीकरणाचा मुद्दा घेतला की चर्चा दुसरीकडे जाते. दुसऱ्या पक्षातील काही गटाला विलिनीकरणावर चर्चा करायला लय भारी वाटतं. त्यांच्या बऱ्याच पत्रकार परिषदेत ते फक्त विलिनीकरणावरच बोलतात. मात्र, आम्हीच फक्त अजित दादांचा घात की अपघात यावर बोलत आहोत, असे म्हणत रोहित पवारांनी नाव न घेता राष्ट्रवादीचे प्रदेशाध्यक्ष सुनिल तटकरे यांच्यावर टीका केली. दरम्यान, सुनेत्रा पवार यांना राष्ट्रीय अध्यक्ष होण्यासाठी 35 आमदारांनी सह्या केल्या आहेत. इतर आमदारांनी किंवा पदाधिकाऱ्यांनी सह्या का केल्या नाहीत, असा सवालही रोहित पवार यांनी उपस्थित केला.
व्हीएसआर कंपनीची भूमिका संशयास्पद
अजितदादा यांच्या दुर्दैवी विमान अपघाताबाबत काही दिवसांपूर्वी पत्रकार परिषद घेऊन अनेक प्रश्न उपस्थित केले होते, त्यानंतर तपासाला काहीशी गती आली असली तरी अद्यापही अपेक्षित वेगाने तपास होत नाही. विशेष म्हणजे गेल्या काही दिवसांत अपघाताबाबत VSR कंपनीची संशयास्पद भूमिका, कंपनीच्या मालकाचे राजकीय लागेबांधे, विमान कंडीशन, पायलटची मनःस्थिती, ब्लॅक बॉक्समधील डेटाबाबत निर्माण झालेल्या शंका, तपासाला वेगळं वळण देण्यासाठी होणारा मानवी हस्तक्षेप आदी अनेक मुद्दे निदर्शनास आले आहेत, असे आमदार रोहित पवार यांनी म्हटले. तसेच, याबाबत दुसऱ्यांदा सविस्तर प्रेझेंटेशनसह पत्रकार परिषद घेऊन हा तपास निष्पक्ष होण्यासाठी देशाबाहेरील दोन एजन्सीची मदत घेण्याची आणि देशाचे व या तपासावर लक्ष ठेवण्यासाठी राज्याचे आणि देशाचे विरोधी पक्षनेते, कुटुंबातील आणि पक्षातील प्रतिनिधी आणि काही तज्ज्ञांची समिती नेमण्याची मागणी रोहित पवार यांनी केली.
हेही वाचा
महत्त्वाच्या बातम्या
