Abhijeet Dipke: श्रीमंतांची कुत्री एसीमध्ये, पण आश्रमशाळेच्या वाॅशरुममध्ये जनावरं सुद्धा जाणार नाहीत; आदिवासींच्या कोट्यवधींच्या निधीचं होतंय काय? अभिजित दिपकेंची विचारणा
आंदोलन आपण मोठं करू, मात्र तुम्ही उपोषण सोडा, आंदोलन सुरू ठेवा असे आवाहन दिपके यांनी उपोषणकर्त्या विद्यार्थ्यांना केले.
Abhijeet Dipke on Adiwasi Student: "श्रीमंतांची पाळीव कुत्री एसीत असतात, पण राज्याच्या आदिवासी आश्रमशाळांमधील शौचालयांची अवस्था अशी झाली आहे की तिथे जनावरंही पाय ठेवणार नाहीत. मग सरकारकडून आदिवासींच्या नावाने मंजूर होणारा कोट्यवधी रुपयांचा निधी नेमका मुरतो कुठे? आदिवासींची निष्पाप मुलं उपाशी झोपत असताना कोणाची पोटं भरली जात आहेत?" असा थेट सवाल काॅकरोच जनता पार्टीचे संस्थापक अभिजित दिपके यांनी उपस्थित केला. आश्रमशाळांच्या भीषण वास्तवावरून दिपके यांनी राज्य सरकार, संबंधित आदिवासी विकास मंत्री आणि मुख्यमंत्र्यांवर जोरदार तोफ डागली. आंदोलन आपण मोठं करू, मात्र तुम्ही उपोषण सोडा, आंदोलन सुरू ठेवा असे आवाहन दिपके यांनी उपोषणकर्त्या विद्यार्थ्यांना केले.
मंत्र्यांचा राजीनामा मुबंईमध्ये जाऊन मागा, तिथून त्यांना आपला आवाज ऐकू जाईल, आपल्याला आपले अधिकार विसरायचे नाहीत. डॉ. आंबेडकर यांनी आपल्याला अधिकार दिले ते आपल्याला वापरायचे आहेत, त्यासाठी लढायचं आहे. तुमच्या प्रत्येक मुद्याला आमचे समर्थन आहे, पण उपोषण मागे घ्या, आंदोलन मोठं करू. मुबंईमध्ये आदिवासी मुलांचा आवाज उठला पाहिजे, मुबंईमध्ये आदिवासी आवाज गाजला पाहिजे, असे आवाहन दिपके यांनी केले. मुख्यमंत्र्यांनी माझ्या सोबत यावं, कोणत्या झेडपी शाळेत रांगा लागल्या दाखवावे. मुख्यमंत्र्यांची लेकरं कोणत्या झेडपी शाळेत शिकले, झेडपी शाळेत का शिकले नाही? अशी विचारणा त्यांनी केली.
तर असेच हसला असता का?
गेल्या 12 दिवसांपासून आश्रमशाळांच्या दुरवस्थेविरोधात आणि मूलभूत सुविधांच्या हक्कासाठी आदिवासी विद्यार्थी उपोषणाला बसले आहेत. मात्र, या उपोषणाला भेट द्यायला आलेले आदिवासी विकास मंत्री हसत हसत निघून गेल्याचा आरोप दिपके यांनी केला. मंत्र्यांच्या या असंवेदनशील वागणुकीवर संताप व्यक्त करत दिपके म्हणाले, "मंत्र्यांच्या हसण्याचे हे कसले प्रकार? आज जर या मंत्र्यांच्या स्वतःच्या मुलाला आश्रमशाळेत सर्पदंश झाला असता, तर ते असेच हसत बसले असते का? गरिबांची, आदिवासींची पोरं तुम्हाला माणसंच वाटत नाहीत का? ही मुलं तुमच्या घरातली नाहीत म्हणून त्यांच्या जीवाशी असा जीवघेणा खेळ चालवला आहे का?" असा संतप्त सवाल त्यांनी केला.
'हे अन्न तुम्ही खाऊन दाखवणार का?'
उपोषणाच्या ठिकाणी अभिजित दिपके यांनी आदिवासी विकास विभागाचे वाभाडे काढले. आश्रमशाळेत ज्या दर्जाचं अन्न दिलं जातं, ते दाखवत "मंत्र्यांनी किंवा त्यांच्या अधिकाऱ्यांनी हे अन्न स्वतःच्या तोंडात घालून दाखवावं, हे जेवण तुम्ही कधी खाल्लं असतं का?" असा थेट सवाल त्यांनी विचारला. या खात्याला मिळणाऱ्या कोट्यवधींच्या बजेटमधून नेमकी कोणाची पोटं भरली जात आहेत? याचं उत्तर आता आदिवासी मंत्र्यांनी द्यावं, नाहीतर थेट मुख्यमंत्र्यांनी उत्तर दिलं पाहिजे," अशी मागणी त्यांनी केली.
'एकदा या आणि वास्तव बघा'
काही दिवसांपूर्वी मुख्यमंत्र्यांनी राज्यातील 75 टक्के सरकारी शाळा चांगल्या असून केवळ 25 टक्के शाळांमध्ये अडचणी असल्याचा दावा केला होता. मुख्यमंत्र्यांच्या या विधानाचा खरपूस समाचार घेत दिपकेंनी त्यांना थेट आव्हान दिलं आहे. "मुख्यमंत्र्यांचा हा दावा जर खरा असेल, तर मी स्वतः त्यांना या आश्रमशाळांमध्ये येण्याचं आमंत्रण देतो, असे ते म्हणाले.
इतर महत्वाच्या बातम्या
Before You Go
Devendra Fadnavis on Nana Patekar Passes Away : भाऊ, मार्गदर्शक, मित्र हरपला; फडणवीस भावुक- मुख्यमंत्री देवेंद्र फडणवीस
महत्त्वाच्या बातम्या
