Aaditya Thackeray Lote MIDC Visit : गणेशोत्सवाच्या पार्श्वभूमीवर ठाकरे शिवसेनेचे आमदार आदित्य ठाकरे सध्या कोकण दौऱ्यावर आहेत. मुंबई-गोवा महामार्गाची पाहणी करत असताना त्यांनी रत्नागिरी जिल्ह्यातील लोटे एमआयडीसीला भेट देऊन स्थानिक रस्ते आणि पायाभूत सुविधांच्या दुरवस्थेची पाहणी केली.
या दौऱ्यादरम्यान एक रंजक घटना घडली. खेड तालुक्यातील लोटे एमआयडीसी परिसरातील आवाशी-गुणदे मध्यवर्ती शाखेसमोरील रस्त्यावर अनेक दिवसांपासून मोठा खड्डा पडला होता. आदित्य ठाकरेंनी या खड्ड्याची पाहणी केली आणि ते पुढील बैठकीसाठी रवाना झाले. विशेष म्हणजे, आदित्य ठाकरे यांची बैठक संपून ते माघारी येण्यापूर्वीच प्रशासकीय यंत्रणेने तातडीने धाव घेऊन तो खड्डा बुजवला आणि रस्त्याची डागडुजी केली.
Aaditya Thackeray On Konkan Infrastructure : लोटे एमआयडीसीतील उद्योग बाहेर जाण्याची वेळ
लोटे एमआयडीसीत जाऊन तेथील उद्योजकांच्या अडचणी जाणून घेतल्यानंतर आदित्य ठाकरेंनी राज्य सरकारवर जोरदार निशाणा साधला. "इथले रस्ते आणि पायाभूत सुविधा अत्यंत वाईट अवस्थेत आहेत. या दुरवस्थेमुळे लोटे एमआयडीसीतील उद्योग बाहेर जाण्याची वेळ आली आहे," अशी घणाघाती टीका त्यांनी केली.
Mumbai Goa Highway Potholes Issue : मुंबई-गोवा महामार्गाची पाहणी
मनसे अध्यक्ष राज ठाकरे यांच्या कोकण दौऱ्यानंतर आदित्य ठाकरेंचा हा दौरा राजकीयदृष्ट्या अत्यंत महत्त्वाचा मानला जात आहे. गणेशोत्सव अवघ्या काही दिवसांवर आला असताना कोकणवासीयांसाठी अत्यंत महत्त्वाच्या असलेल्या मुंबई-गोवा महामार्गाचे रखडलेले काम आणि खड्ड्यांचा प्रश्न पुन्हा एकदा राजकारणाच्या केंद्रस्थानी आला आहे.
Thackeray Sena Konkan Politics : कोकणातील बालेकिल्ला पुन्हा मजबूत करण्याचे आव्हान
शिवसेनेतील फुटीनंतर कोकणात ठाकरे गटाला राजकीयदृष्ट्या मोठा धक्का बसला आहे. मुंबईनंतर कोकण हा शिवसेनेचा पारंपरिक बालेकिल्ला मानला जातो. त्यामुळे गणेशोत्सवाच्या तोंडावर कोकणात पुन्हा संघटना मजबूत करणे, स्थानिक प्रश्नांवर आक्रमक भूमिका घेणे आणि मतदारांशी थेट संवाद वाढवणे या हेतूने आदित्य ठाकरेंचा हा कोकण दौरा आयोजित करण्यात आला आहे.
ही बातमी वाचा;