Ramdas Athawale : राज्यसभेत निवडून जाणार हे माहिती, पण लोकसभा लढण्याची इच्छा; रामदास आठवले यांचे स्पष्ट वक्तव्य
Rajyasabha Election Marathi : राज्यसभेच्या निवडणुकीत भाजपच्या वाट्याला चार जागा येणार असून त्यापैकी एका जागेवर केंद्रीय राज्यमंत्री रामदास आठवले यांची निवड निश्चित आहे.
परभणी : मी राज्यसभेवर जाणार हे मला आधीच माहीत आहे, मात्र लोकसभा निवडणूक लढवण्याची माझी इच्छा आहे, असं स्पष्ट वक्तव्य केंद्रीय राज्यमंत्री रामदास आठवले यांनी व्यक्त केली.भाजपकडून राज्यसभा उमेदवारी निश्चित झाल्यानंतर आठवले यांनी विजयाचा आत्मविश्वास व्यक्त केला. तसेच महाविकास आघाडीत काही बिघाड झाला तर सातवी जागाही आम्ही जिंकू, असा दावा केला. परभणीतील पत्रकार परिषदेत केंद्रीय सामाजिक न्याय राज्यमंत्री रामदास आठवले यांनी राज्यसभा उमेदवारीवर पहिली प्रतिक्रिया दिली.
येत्या 16 मार्च रोजी राज्यसभेच्या सात जागांसाठी महाराष्ट्रात निवडणूक होणार आहे. संख्याबळानुसार, महायुतीचे सहा खासदार सहज निवडून जातील, तर महाविकास आघाडीकडून एक खासदार निवडून जाणार आहे.
भाजपच्या वाट्याला राज्यसभेच्या चार जागा येणार असून त्यामध्ये केंद्रीय राज्यमंत्री रामदास आठवले यांना संधी मिळणार आहे. त्याचसोबत भाजपचे केंद्रीय नेते विनोद तावडे यांचेही नाव राज्यसभेसाठी चर्चित आहे. राज्यसभा निश्चित असली तरी लोकसभेची इच्छा कायम असल्याचं स्पष्ट करत रामदास आठवले यांनी आगामी राजकीय घडामोडींना वेगळं वळण देण्याचे संकेत दिले आहेत.
रिपब्लिकन गटांनी एकत्र यावे (Republican Party Unity)
रिपब्लिकन पार्टीच्या सर्व गटांनी एकत्र येण्याची गरज व्यक्त करत रामदास आठवले म्हणाले की, "या एकत्रीकरणाचे नेतृत्व प्रकाश आंबेडकरांनी (Prakash Ambedkar) यांनी केल्यास समाजाला मोठा फायदा होईल. यामुळे आमच्या समाजाची ताकद वाढेल आणि योग्य प्रतिनिधित्व मिळेल.”
युवकांना उद्योग, गरिबी निर्मूलनावर भर (Social Justice & Employment)
परभणी दौऱ्यावर असताना शासकीय विश्रामगृहात माध्यमांशी संवाद साधताना रामदास आठवले म्हणाले की, समाजातील युवकांना उद्योग उपलब्ध करून देण्यासाठी मंत्रालयामार्फत प्रयत्न सुरू आहेत. त्यांच्या खात्यामार्फत विविध योजना राबवून रोजगारनिर्मितीवर भर दिला जाणार आहे. तसेच पंतप्रधान नरेंद्र मोदी (Narendra Modi) भारतातील गरिबी दूर करण्यासाठी कटिबद्ध असून लवकरच देशातील गरिबी कमी होईल, असा विश्वासही त्यांनी व्यक्त केला.
ही बातमी वाचा:
महत्त्वाच्या बातम्या
