Ganesh Naik : या भस्मासुरांनी 10 वर्षे लुटल्यानेच महाराष्ट्र मागे राहिला, यांची जागा जेलमध्ये; गणेश नाईकांचा शिंदे पिता-पुत्रांवर वार
Ganesh Naik Vs Eknath Shinde : पक्षाने आपल्याला मोकळीक दिली तर शिंदे पिता-पुत्राचं अस्तित्व संपवून टाकू असा इशारा वनमंत्री गणेश नाईक यांनी दिला.
नवी मुंबई : महापालिका निवडणूक संपली असली तरी गणेश नाईक आणि एकनाथ शिंदे यांच्यातील वाद तसाच धुसमसत आहे. माझ्या नादी लागाल तर माजी खासदार करेन असा इशारा भाजपचे मंत्री गणेश नाईकांनी खासदार श्रीकांत शिंदे यांना दिला. या भस्मासुरांनी 10 वर्षे महाराष्ट्राला लुटलं, यांची जागा जेलमध्ये असल्याची घणाघाती टीका गणेश नाईकांनी केली. गणेश नाईकांच्या या टीकेवर खासदार श्रीकांत शिंदे यांनीही प्रत्युत्तर दिलं आहे.
वनमंत्री गणेश नाईक यांनी पुन्हा एकदा श्रीकांत शिंदे आणि एकनाथ शिंदेवर सडकून टिका केली आहे. माझ्या नादाला लागाल तर श्रीकांत शिंदेंना माजी खासदार करून टाकेन असं ते म्हणाले. तर तुमच्यात जास्त खुमखुमी असेल तर ठाणे किंवा कल्याणमधून खासदारकी लढवा असं आव्हान श्रीकांत शिंदे यांनी दिलं.
पक्षाने मोकळीक द्यावी, अस्तित्व संपवतो
गणेश नाईक म्हणाले की, "एकनाथ शिंदे यांच्या हातात ठाणे, पालघरमधील एकही महानगरपालिका जाऊ देणार नाही. पक्षाने मला फक्त मोकळीक दिली पाहिजे, यांचे अस्तित्व संपवून टाकेन. हे भस्मासूर, बकासूर असून यांनी महाराष्ट्र लुटून खाल्ल्याने राज्य 10 वर्ष मागे गेले आहे. यांनी केलेले पाप लक्षात आल्यास यांची जागा जेलमध्ये असेल."
श्रीकांत शिंदेंचा पलटवार
श्रीकांत शिंदे यांनी मंत्री गणेश नाईक यांचा खरपूस भाषेत समाचार घेतला. वयाच्या हिशोबाने आजार होत असतात. यामध्ये विसरभोळेपणा, चिडचिड, दिशाभूल असे आजार होत असतात. हे मी सांगू शकतो कारण मी डॉक्टर आहे असा टोला खासदार शिंदे यांनी मंत्री गणेश नाईक यांना लगावला.
जर जास्त खुमखुमी असेल तर गणेश नाईकांनी ठाणे किंवा कल्याण लोकसभा मतदारसंघातून लढून दाखवावं असं आव्हान श्रीकांत शिंदेंनी दिलं. त्यामुळे आता मंत्री गणेश नाईक विरुद्ध खासदार श्रीकांत शिंदे हा वाद आणखी वाढण्याची शक्यता आहे.
उदय सामंत यांची टीका
मंत्री गणेश नाईक यांना उपमुख्यमंत्री एकनाथ शिंदेंवर बोलल्यानंतर प्रसिद्धी मिळत असावी असा टोला शिवसेनेचे मंत्री उदय सामंत यांनी लगावला. गणेश नाईक यांना आक्षेप मुख्यमंत्री देवेंद्र फडणवीसांबाबत आहे की उपमुख्यमंत्री एकनाथ शिदेंबाबत आहे, त्यांनी एकदा स्पष्ट करावं असंही उदय सामंत यांनी म्हंटलं.
ही बातमी वाचा:
महत्त्वाच्या बातम्या
