Nashik Unseasonal Rain : नाशिकमध्ये अवकाळी पावसाचा 'स्ट्राईक'! झाडं अन् विजेचे खांब कोसळले, रस्त्यांवर पाणीच पाणी, दोन बळी
Nashik Unseasonal Rain : नाशिक शहरासह जिल्ह्याला सोमवारी अवकाळी पावसाने चांगलेच झोडपून काढले.

Nashik Unseasonal Rain : नाशिक शहरासह जिल्ह्याला सोमवारी (दि. 12) अवकाळी पावसाने (Unseasonal Rain) चांगलेच झोडपून काढले. दिवसभरात नाशिक (Nashik) शहरात 21 मिलिमीटर पावसाची नोंद झाली. दुपारी शहराच्या अनेक रस्त्यांवरून पाणी वाहत होते. त्यानंतर सायंकाळी त्र्यंबकेश्वरच्या (Trimbakeshwar) रस्त्यांनाही नदीचे रूप प्राप्त झाले होते. दरवर्षी पावसाळ्यात त्र्यंबकेश्वरच्या रस्त्यावरून पाणी वाहताना बघायला मिळते. मात्र यंदा मे महिन्यातच रस्त्यांना नदी नाल्याचे रूप आले होते. त्यामुळे नाशिक शहरासह त्र्यंबकेश्वरमधील मान्सून पूर्व नालेसफाईच्या कामाची पोलखोल झाली आहे. त्र्यंबकेश्वरमधील रस्त्यावर पाणी वाहत असल्यानं वाहने देखील अडकून पडली होती.
अवकाळी पावसाचे दोन बळी
तर सातपूर परिसरातील डॉ. बाबासाहेब आंबेडकर क्रीडा संकुलाच्या प्रवेशद्वारजवळ रस्त्याच्या कडेला असलेले जुने गुलमोहराचे झाड मुळासकट उन्मळून पडले. यावेळी येथून दुचाकीवरून जाणारे नाशिकरोड येथील दोघा दुचाकीस्वार युवकांवर हे झाड कोसळून त्यांचा जागीच मृत्यू झाला. ही घटना सोमवारी दुपारी तीन ते साडेतीन वाजेच्या दरम्यान घडली. वादळी वाऱ्यामुळे झाड अचानक जमीन फोडून मुळासकट रस्त्यावर कोसळले. रस्त्यावरून नेहमीप्रमाणे वाहतूक सुरू असताना काही कळायच्या आत गुलमोहरचे हे झाड गौरव भास्कर रिपोर्टे (20) आणि सम्यक भोसले (20) या दोघांवर पडले. हे दोघेही मातोश्री रमाबाई आंबेडकर नगर, गुलाबवाडी, देवळाली गाव येथील रहिवासी आहेत. डोक्याला जबर मार लागल्याने गौरवचा जागीच मृत्यू झाला. तर सम्यकला जिल्हा शासकीय रुग्णालयात उपचारासाठी नेण्यात आले, मात्र डॉक्टरांनी त्यालाही तपासून मृत केले.
झाडं अन् विजेचे खांब कोसळले
वादळामुळे इंदूर-पुणे महामार्गावर बसस्थानकासमोर झाड कोसळले. यात सुदैवाने जीवितहानी झाली नसली तरी इंदूर-पुणे महामार्गावर वाहतूक ठप्प झाली. पावसामुळे महावितरणची मुख्य वायर तुटून पडली व विजेचा खांबही कोसळला. सुदैवाने याचादेखील कोणाला त्रास झाला नाही. स्थानिक नागरिकांनी सतर्कता बाळगून तत्काळ महावितरण कार्यलयात फोन केला. यामुळे त्यांनी विद्युत्तपुरवठा बंद केला. त्यामुळे जीवितहानी झाली नसली तरी या भागातील वीजपुरवठा बंद झाला.
घराचे पत्रे उडाले, शेतीचेही मोठे नुकसान
बागलाण तालुक्यातील मुंजवाड गावासह परिसरात सोमवारी दुपारी दोनच्या सुमारास वादळी वाऱ्यासह जोरदार पाऊस झाल्याने घराचे पत्रे उडून शेतकऱ्याचा संसार उघड्यावर आला, तर आंब्यांसह फळ पिकांचे मोठ्या प्रमाणात नुकसान झाले. इगतपुरी तालुक्यात अवकाळी पावसाने थैमान घातल्याने बागायती पिके टोमॅटो, काकडी कोथिंबीर, फ्लॉवर, कोबी व भाजीपाल्यासह कांदा पिकाचे नुकसान झाले.
आणखी वाचा






















