Nashik Rangpanchami 2026: नाशिकमध्ये रंगपंचमी साजरी करताना हुल्लडबाजांचा उन्माद, गोदावरी नदीपात्रात चपला-बूटं फेकली; गोदाप्रेमी आक्रमक, प्रशासनाकडे मोठी मागणी
Nashik Rangpanchami 2026: गोदावरी नदीच्या पात्रात रंगपंचमी खेळताना काही तरुणांनी चप्पल-बूट एकमेकांवर फेकत उत्सवाचे ओंगळवाणे स्वरूप दाखवल्याची धक्कादायक घटना समोर आली आहे.
Nashik Rangpanchami 2026: नाशिकच्या पवित्र गोदावरी नदीच्या (Godavari River) पात्रात रंगपंचमी (Nashik Rangpanchami 2026) खेळताना काही तरुणांनी चप्पल-बूट एकमेकांवर फेकत उत्सवाचे ओंगळवाणे स्वरूप दाखवल्याची धक्कादायक घटना समोर आली आहे. या प्रकारामुळे गोदामाईचा अवमान झाल्याची भावना व्यक्त करत शहरातील गोदाप्रेमींनी संबंधितांवर गुन्हे दाखल करण्याची जोरदार मागणी केली आहे.
याबाबत मिळालेल्या माहितीनुसार, रंगपंचमीच्या निमित्ताने मोठ्या संख्येने तरुण गोदावरी नदीच्या पात्रात उतरले होते. मात्र उत्सव साजरा करताना काही हुल्लडबाज तरुणांनी चप्पल-बूट काढून एकमेकांवर फेकण्यास सुरुवात केली. परिणामी नदीच्या पात्रात मोठ्या प्रमाणावर चपला-बुटांचा खच साचल्याचे दिसून आले. या प्रकारामुळे धार्मिक आणि सांस्कृतिक दृष्ट्या महत्त्व असलेल्या गोदावरी नदीचे पावित्र्य भंग झाल्याचा आरोप करण्यात येत आहे.
Nashik Rangpanchami 2026: "नाशिकच्या वैभवाला कलंक लावणारा प्रकार"
या घटनेनंतर काही गोदाप्रेमी तरुणांनी पुढाकार घेत नदीपात्रातून अक्षरशः चपला-बुटांचा ढीग बाहेर काढला. या प्रकारामुळे शहरात संताप व्यक्त केला जात असून प्रशासनाने तातडीने कारवाई करावी, अशी मागणी होत आहे. या प्रकरणावर प्रतिक्रिया देताना भाजपा (BJP) आध्यात्मिक आघाडीचे प्रमुख तुषार भोसले (Tushar Bhosale) यांनीही संताप व्यक्त केला. “नाशिकच्या वैभवाला कलंक लावणारा आणि अत्यंत किळसवाणा प्रकार काल गोदावरी नदीच्या पात्रात घडला. गोदामाईच्या पावित्र्याचा अपमान करणाऱ्यांवर पोलिसांनी तातडीने गुन्हे दाखल करावेत,” अशी मागणी त्यांनी केली.
Nashik Rangpanchami 2026: पुढील वर्षापासून गोदावरी नदीपात्रात रंगपंचमी खेळण्यास बंदी घालावी
तसेच हा प्रकार पोलिसांच्या (Nashik Police) उपस्थितीत सुरू असतानाही त्याला आळा का घालण्यात आला नाही, असा सवालही गोदाप्रेमींनी उपस्थित केला आहे. महापालिका (Nashik Municipal Corporation) आणि पोलीस प्रशासनाने या प्रकरणाची सुमोटो दखल घेऊन संबंधितांवर गुन्हे दाखल करावेत, अन्यथा न्यायालयात (Court) धाव घेण्याचा इशाराही देण्यात आला आहे. दरम्यान, भविष्यात अशा घटना टाळण्यासाठी पुढील वर्षापासून गोदावरी नदीच्या पात्रात रंगपंचमी खेळण्यास पूर्णतः बंदी घालावी, अशी मागणीही गोदाप्रेमींकडून करण्यात येत आहे.
इतर महत्त्वाच्या बातम्या
महत्त्वाच्या बातम्या
