Nashik News : पोहता येत नव्हतं तरी पाण्यात उडी घेतली, काही क्षणातच आक्रीत घडलं; तरुण उद्योजकाचा दुर्दैवी अंत
Nashik News: नाशिकमधील एका तरुण उद्योजकाचा नर्मदा नदीत बुडून दुर्दैवी मृत्यू झाला आहे. पाण्याच्या खोलीचा अचूक अंदाज न आल्याने आणि पोहता येत नसल्यामुळे ही दुर्घटना घडल्याची माहिती समोर आली आहे.
Nashik News: नाशिकमधील (Nashik) एका तरुण उद्योजकाचा नर्मदा नदीत (Narmada River) बुडून दुर्दैवी मृत्यू झाला आहे. पाण्याच्या खोलीचा अचूक अंदाज न आल्याने आणि पोहता येत नसल्यामुळे ही दुर्घटना घडल्याची माहिती समोर आली आहे. या घटनेचा थरारक क्षण मोबाईल कॅमेरात कैद झाला असून शहरात हळहळ व्यक्त केली जात आहे. मृत्यू झालेल्या तरुणाचे नाव विजेंद्र घाटगे (वय 38) असे असून ते नवीन नाशिक परिसरातील कामटवाडे येथे वास्तव्यास होते.
Nashik News: नर्मदा परिक्रमे नंतर आश्रमात वास्तव्य
विजेंद्र घाटगे हे आध्यात्मिकतेशी जोडलेले होते. काही दिवसांपूर्वी त्यांनी नर्मदा परिक्रमा पूर्ण केली होती. त्यानंतर ते गुजरातमधील शिनोर (जि. बडोदा) येथील बद्रिक आश्रमात वास्तव्यास होते. शुक्रवारी ते नर्मदा नदीवर अंघोळीसाठी गेले होते. त्यांच्यासोबत काहीजण उपस्थित होते. दरम्यान, त्यांनी नदीपात्रात उडी घेतली; मात्र काही क्षणांतच ते पाण्यात बुडू लागले.
Nashik News: पोहता येत नसल्याने बुडून मृत्यू
पाण्याची खोली जास्त असल्याचा अंदाज न आल्याने आणि पोहता येत नसल्याने विजेंद्र यांचा पाण्यात बुडून करुण अंत झाला. दुर्दैवाची बाब म्हणजे त्यांनी आपल्या सहकाऱ्यांना पोहता येत नसल्याचे सांगितले नव्हते. त्यांच्या सोबत असलेल्या व्यक्तींनाही पोहता येत नसल्यामुळे काही फुटांवरच विजेंद्र बुडत असताना ते मदत करू शकले नाहीत. घटनेचा संपूर्ण प्रकार मोबाईल कॅमेरात कैद झाला आहे.
Nashik News: दोन दिवसांनी मृतदेह सापडला
नदीपात्र खोल असल्यामुळे विजेंद्र यांचा शोध घेण्यासाठी दोन दिवसांचा कालावधी लागला. शुक्रवारी घडलेल्या घटनेनंतर रविवारी त्यांचा मृतदेह नदीत आढळून आला. तरुण उद्योजकाचा अशा प्रकारे मृत्यू झाल्याने कामटवाडे परिसरासह संपूर्ण नाशिक शहरात हळहळ व्यक्त केली जात आहे. विजेंद्र घाटगे यांच्या पश्चात आई-वडील, पत्नी, 8 वर्षांची मुलगी आणि 5 वर्षांचा मुलगा असा परिवार आहे. औद्योगिक क्षेत्रात कार्यरत असलेल्या एका तरुण उद्योजकाच्या अकाली जाण्याने नाशिक शहरासह व्यावसायिक वर्तुळातही शोककळा पसरली आहे.
इतर महत्त्वाच्या बातम्या
महत्त्वाच्या बातम्या
