Nashik News: पतीला मृत्यूच्या दाढेतून खेचून बाहेर काढलं, पण विजेच्या धक्क्याने पत्नीचा दुर्दैवी अंत; नाशिकमधील हृदयद्रावक घटना
Nashik News: नाशिक जिल्ह्याच्या सिन्नर तालुक्यातील शिंदेवाडी गावात एका महिलेने आपल्या पतीचा जीव वाचवण्यासाठी स्वतःचे आयुष्य पणाला लावल्याची हृदयद्रावक घटना घडली आहे.
Nashik News: नाशिक (Nashik) जिल्ह्यातील सिन्नर (Sinnar) तालुक्यातील शिंदेवाडी गावात एका महिलेने आपल्या पतीचा जीव वाचवण्यासाठी स्वतःचे आयुष्य पणाला लावल्याची हृदयद्रावक घटना घडली आहे. छाया दीपक खाडे (वय 38) यांनी प्रसंगावधान राखत विजेचा धक्का (Electric Shock) बसलेल्या पतीला मृत्यूच्या दाढेतून खेचून बाहेर काढले; मात्र स्वतः विजेच्या प्रवाहात अडकून प्राण गमावले. या घटनेने संपूर्ण परिसरात शोककळा पसरली आहे.
दीपक खाडे (वय 42) हे शुक्रवारी सकाळी सुमारे आठ वाजण्याच्या सुमारास शेतातील विहिरीवर पिकांना पाणी देण्यासाठी गेले होते. वीजपंप सुरू करण्यासाठी त्यांनी विजेच्या पेटीवरील बटण दाबताच अचानक त्यांना तीव्र विजेचा धक्का बसला. ही बाब लक्षात येताच क्षणाचाही विलंब न करता छाया खाडे धावत त्या ठिकाणी पोहोचल्या. त्यांनी पतीला जोरात ढकलून विजेच्या संपर्कातून दूर केले. त्यामुळे दीपक खाडे मोठ्या संकटातून बचावले; मात्र छाया स्वतः विजेच्या प्रवाहाच्या विळख्यात अडकल्या.
Nashik News: रुग्णालयात मृत घोषित
गंभीर अवस्थेत छाया खाडे यांना तातडीने सिन्नर येथील ग्रामीण रुग्णालयात दाखल करण्यात आले. मात्र, वैद्यकीय अधिकाऱ्यांनी तपासून त्यांना मृत घोषित केले. या घटनेची पोलिसांत आकस्मिक मृत्यू म्हणून नोंद करण्यात आली असून, पुढील तपास सुरू आहे. गावकऱ्यांच्या मते, छाया खाडे अत्यंत कुटुंबवत्सल व मनमिळाऊ स्वभावाच्या होत्या. त्यांच्या मृत्यूने संपूर्ण गाव हळहळ व्यक्त करत आहे.
Nashik News: मुलगी बारावीत; कुटुंबावर दुःखाचा डोंगर
छाया खाडे यांच्या पश्चात पती, सासू-सासरे, मुलगी व मुलगा असा परिवार आहे. त्यांची मुलगी बारावीच्या वर्गात शिकत असून, सध्या तिची परीक्षा सुरू आहे. अशा संवेदनशील काळात आईच्या अकाली मृत्यूने कुटुंबावर दुःखाचा डोंगर कोसळला आहे.
Nashik Crime News: निफाडमध्ये मजुराने संपवले जीवन
दरम्यान, निफाड तालुक्यातील खेडलेझुंगे येथे पेठ येथून शेतीकामासाठी आलेल्या 38 वर्षीय मजुराने विषारी औषध प्राशन करून आत्महत्या केली. विलास देवराम दरोडे (रा. खडकी शिंगाळी, ता. पेठ) असे मृत मजुराचे नाव आहे. विलास दरोडे पेठ तालुक्यातून खेडलेझुंगे परिसरात मजुरीसाठी आला होता. शुक्रवारी (दि. 13) पहाटे त्याने वास्तव्यास असलेल्या घरात विषारी औषध सेवन केले. सकाळी तीव्र उलट्या होत असल्याचे पत्नी लक्ष्मीच्या लक्षात आले. तिने तातडीने विलासला उपचारासाठी निफाड उपजिल्हा रुग्णालयात दाखल केले. मात्र, वैद्यकीय अधिकारी डॉ. चेतन काळे यांनी तपासणी करून त्यांना मृत घोषित केले. याबाबत लासलगाव पोलिसांत आकस्मिक मृत्यूची नोंद झाली आहे. सहायक पोलीस निरीक्षक दीपक पाटील यांच्या मार्गदर्शनाखाली हवालदार संदीप शिंदे तपास करीत आहेत.
आणखी वाचा
महत्त्वाच्या बातम्या
