Nashik Car Fire: भाजप खासदाराच्या धावत्या कारने अचानक घेतला पेट, 4 कोटींच्या आलिशान रेंज रोव्हरचा अक्षरशः कोळसा; मुंबई-नाशिक महामार्गावरील थरारक घटना
Nashik Car Fire: मुंबई–नाशिक महामार्गावर भाजप खासदारांच्या आलिशान रेंज रोव्हर कारला अचानक भीषण आग लागल्याची घटना घडली.
Nashik Car Fire: मुंबई–नाशिक महामार्गावर (Mumbai Nashik Highway) शुक्रवारी मध्यरात्री एक थरारक आणि खळबळजनक घटना घडली. राजस्थानमधील (Rajasthan) जालोर–सिरोही मतदारसंघाचे भाजप खासदार लुंबा रामजी चौधरी (BJP MP Lumba Ramji Chaudhary) यांच्या आलिशान रेंज रोव्हर कारला (Range Rover car) अचानक भीषण आग लागली. ही आग इतकी तीव्र होती की सुमारे चार कोटी रुपये किमतीची कार पूर्णपणे जळून खाक झाली. घटनास्थळी अक्षरशः गाडीचा सांगाडाच उरला होता.
ही घटना शुक्रवारी रात्री उशिरा घडल्याने तात्काळ मदत मिळण्यास विलंब झाला. दरम्यान, या भीषण घटनेचे व्हिडीओ आणि फोटो सोशल मीडियावर व्हायरल झाले असून, त्यामधून आगीची तीव्रता स्पष्टपणे दिसून येत आहे.
Nashik Car Fire: नेमकं काय घडलं?
याबाबत मिळालेल्या माहितीनुसार, खासदार लुंबा रामजी चौधरी हे वाशिम येथील दौरा आटोपून महाशिवरात्रीनिमित्त त्र्यंबकेश्वर (Trimbakeshwar) येथे दर्शनासाठी जात होते. त्यांच्यासोबत काही सहकारी कारमध्ये उपस्थित होते. कार शहापूर येथील चालक अनिल बबन जाधव (वय 40) चालवत होते. कार नाशिकजवळील गोंदे फाटा परिसरात आली असताना, चालकाला अचानक गाडीतून जळाल्यासारखा उग्र वास येऊ लागला. काही क्षणांतच इंजिनमधून धूर निघत असल्याचे त्यांच्या लक्षात आले. परिस्थितीचे गांभीर्य ओळखत चालक जाधव यांनी क्षणाचाही विलंब न करता कार रस्त्याच्या कडेला उभी केली.
Nashik Car Fire: आगीने केले रौद्र रूप धारण
धूर वाढत असल्याचे पाहताच चालक अनिल जाधव यांनी तातडीने खासदार चौधरी आणि त्यांच्या सहकाऱ्यांना गाडीतून बाहेर उतरण्याचे आवाहन केले. सर्व प्रवासी सुखरूप खाली उतरताच काही मिनिटांतच आगीने रौद्र रूप धारण केले. पाहता पाहता आगीच्या ज्वाळांनी संपूर्ण कारला विळखा घातला. मुंबई–नाशिक महामार्गावर धावत्या कारला आग लागल्याने काही काळ वाहतूकही विस्कळीत झाली होती. स्थानिक नागरिक आणि वाहनचालकांनी सुरक्षित अंतर ठेवत परिस्थितीवर लक्ष ठेवले.
Nashik Car Fire: चालकाच्या प्रसंगावधानामुळे मोठी दुर्घटना टळली
या घटनेत कोणतीही जीवितहानी झाली नाही, ही दिलासादायक बाब असली तरी खासदारांची कोट्यवधींची आलिशान रेंज रोव्हर अक्षरशः कोळसा झाली आहे. आगीची तीव्रता इतकी मोठी होती की, अग्निशमन दल घटनास्थळी दाखल होईपर्यंत गाडीचा केवळ सांगाडा शिल्लक राहिला होता. प्राथमिक माहितीनुसार, शॉर्ट सर्किटमुळे आग लागली असावी, असा अंदाज व्यक्त केला जात आहे. या घटनेची माहिती पोलिसांना देण्यात आली असून, पोलिसांकडून पुढील तपास सुरू आहे. दरम्यान, चालकाच्या प्रसंगावधानामुळे मोठी दुर्घटना टळली असून, या घटनेमुळे महामार्गावरील वाहनांच्या सुरक्षिततेबाबत पुन्हा एकदा प्रश्नचिन्ह उपस्थित झाले आहे.
आणखी वाचा
महत्त्वाच्या बातम्या
