टिपू सुलतान धर्मांध, त्या उपमहापौरांचं पद रद्द करा; प्रकाश महाजनांची मागणी, हर्षवर्धन सपकाळांवरही जोरदार टीका
हर्षवर्धन सपकाळांचा मी जाहीर निषेध करतो असे म्हणत टिपू सुलतानचा फोटो लावणाऱ्या मालेगावमधील उपमहापौरांना शासनाने नोटीस काढावी, त्यांचे पद रद्द केले पाहिजे.
नाशिक : राज्यात गेल्या दोन दिवसांपासून टिपू सुलतान (Tipu) प्रकरणावरुन राजकीय वातावरण तापलं आहे. मालेगाव महानगरपालिकेमध्ये नवनिर्वाचित महापौर व उपमहापौरांनी पदभार स्वीकारताच राजकीय वातावरण तापले आहे. महापौरपदी ‘इस्लाम’ पक्षाच्या नसीरिन बानो खालीद शेख, तर उपमहापौरपदी समाजवादी पार्टीचे शान-ए-हिंद यांची निवड झाल्यानंतर अवघ्या काही दिवसांतच उपमहापौरांच्या दालनातील टिपू सुलतान यांच्या छायाचित्रामुळे मोठा वाद निर्माण झाला. त्यातच, काँग्रेस प्रदेशाध्यक्ष हर्षवर्धन सपकाळ (Harshwardhan sapkal) यांनी टिपू सुलतानी तुलना शिवजी महाराजांशी करत, ते इंग्रजांविरुद्ध लढल्याची माहिती दिली. त्यावरुन, सत्ताधारी भाजपमधील नेत्यांनी त्यांना लक्ष्य केलं. आता, शिवसेना प्रवक्ते प्रकाश महाजन (Prakash mahajan) यांनीही हर्षवर्धन सपकाळ यांच्यावर टीका केलीय.
हर्षवर्धन सपकाळांचा मी जाहीर निषेध करतो असे म्हणत टिपू सुलतानचा फोटो लावणाऱ्या मालेगावमधील उपमहापौरांना शासनाने नोटीस काढावी, त्यांचे पद रद्द केले पाहिजे, अशी मागणी शिवसेना प्रवक्ते प्रकाश महाजन यांनी केली. तसेच, देशद्रोही टिपू सुलतानचे उदात्तीकरण खपवून घेतले जाणार नाही. राज्य व देशातील काँग्रेसचे दुर्दैव्य की, त्यांना सपकाळ यांच्यासारखे नेते मिळाले. छत्रपती शिवरायांची तुलना धर्मांध 'टिपू' शी नको, अशांची तुलना छत्रपती शिवाजी महाराज यांच्याशी कदापी होऊ शकणार नाही. टिपू सुलतान देशद्रोही होता, असेही प्रकाश महाजन यांनी म्हटले.
पुन्हा फोटो लावणार
मालेगाव महानगरपालिकेतील वादग्रस्त छायाचित्र प्रकरणावर उपमहापौर शान-ए-हिंद निहाल अहमद यांनी पुन्हा एकदा स्पष्ट भूमिका मांडली आहे. दालनाच्या दुरुस्तीचे काम पूर्ण झाल्यानंतर टिपू सुलतान यांचा फोटो पुन्हा लावण्यात येईल, असे वक्तव्य त्यांनी एका स्वागत समारंभात केले. या वक्तव्यामुळे मालेगाव शहरात पुन्हा एकदा राजकीय व सामाजिक वाद पेटण्याची शक्यता निर्माण झाली आहे.
महापालिकेकडून दखल
दरम्यान, टिपू सुलतान फोटो प्रकरणी राजकीय वातावरण तापल्यानंतर मालेगाव मनपा प्रशासनाकडून दखल घेण्यात आली आहे. नगरसचिवांकडून राष्ट्रपुरुषांचे फोटो लावण्याबाबत शासन आदेशासह पत्र जारी करण्यात आलं आहे. मालेगाव महानगरपालिकेतील उपमहापौर शान-ए-हिंद यांच्या दालनात टिपू सुलतान यांचा फोटो लावल्याने वाद झाल्याचे पडसाद राज्य आणि देशभर उमटले. त्यानंतर, मनपा प्रशासनाकडून दखल घेत नगरसचिवांकडून राष्ट्रपुरुषांचे फोटो लावण्याबाबत शासन आदेशासह पत्र, महापौर, उपमहापौर, गटनेते आदींना पत्र वितरित करण्यात आले.
हेही वाचा
महत्त्वाच्या बातम्या
