प्रेमविवाहाचा राग मनात; येवल्यात भर लग्नात नवरदेवाला डिझेल ओतून जाळण्याचा प्रयत्न, तुंबळ हाणामारीत 7 ते 8 जण जखमी

निवृत्तीला फक्त दोनच दिवस बाकी, पण पैशांचा मोह नडला, 80 हजारांची लाच मागितली, मालेगाव महापालिका आयुक्तांवर कारवाई

संदीप जेजुरकर — Thu, 29 Oct 2026 18:56:33 +0530

Nashik Malegaon News : निवृत्तीला अवघे दोन दिवस बाकी असताना मालेगाव महापालिका आयुक्त रवींद्र जाधव ( Malegaon Municipal Commissioner Ravindra Jadhav) यांना पैशांचा हव्यास नडला आहे. आयुक्त रवींद्र जाधव हे लाचलुचपत विभागाच्या जाळ्यात अडकले आहेत. 80 हजार रुपयांची लाच मागितल्या प्रकरणी लाचलुचपत प्रतिबंधक विभागानं ही कारवाई केली आहे. 31 ऑक्टोबरला ते सेवानिवृत्त होणार होते. दरम्यान, मालेगाव महापालिका आयुक्त रवींद्र जाधव यांनी लाच मागितल्याच्या घटनेवरुन कारवाई केल्यानंतर खळबळ उडाली आहे.

Malegaon : मालेगाव महापालिकेचे आयुक्त रवींद्र जाधव हे 31 ऑक्टोबरला शासकीय सेवेतून सेवानिवृत्त होणार होते

मालेगाव महापालिकेचे आयुक्त रवींद्र जाधव हे 31 ऑक्टोबरला शासकीय सेवेतून सेवानिवृत्त होणार असतानाच एका ठेकेदाराचे बिले काढून देण्यासाठी चार टक्क्यांची 80 हजार रुपयांची लाच मागितल्या प्रकरणी लाचलुचपत प्रतिबंधक विभागाच्या जाळ्यात अडकले आहेत. केवळ दोन दिवस सेवानिवृत्तीला असतांना पैशाचा हव्यास नडला आणि कारवाईला सामोरे जावे लागले. यापूर्वी धुळे येथील एक कारवाईचा ससेमीरा पाठीशी असताना दुसऱ्यांदा पुन्हा लाचलुचपत विभागाच्या जाळ्यात अडकल्याने मालेगावच्या प्रशासकीय वर्तुळात खळबळ उडाली आहे. या कारवाईनंतर त्यांच्या निवासस्थानी ACB च्या अधिकाऱ्यांनी झाडाझडती घेतली. आयुक्त रवींद्र जाधव यांचेसह अजून दोघांना एसीबीने ताब्यात घेतले आहे..या तपासातून काय समोर येणार, याकडे लक्ष लागलं आहे.

Ravindra Jadhav : आयुक्त रवींद्र जाधव यांची कारकीर्द -

रवींद्र शेषराव जाधव हे 16 डिसेंबर 2023 पासून मालेगाव महानगरपालिकेचे आयुक्त तथा प्रशासक म्हणून कार्यरत आहेत.

धुळे महापालिकेचे प्रभारी अतिरिक्त आयुक्‍त पद असतांना उपायुक्त रवींद्र जाधव यांना ( 14 जानेवारी 2019 ) त्यांच्या निवासस्थानी उपशिक्षकाकडून पंधरा हजारांची लाच स्वीकारताना लाचलुचपत प्रतिबंधक विभागाने ताब्यात घेतले होते..

रवींद्र जाधव यांची मालेगावी महापालिकेवर नियुक्ती झाल्यानंतर त्यांच्या नियुक्तीला मालेगावकर विधायक संघर्ष समितीने विरोष करत आंदोलन केले. भ्रष्ट अधिकारी महापालिकेवर बसवू नका अशी त्यांची मागणी होती..मालेगावात त्यांच्या नियुक्तीला व कार्यपद्धतीला काही स्थानिक आघाड्यांनी व संघटनांनी विरोध दर्शवला होता.

रवींद्र जाधव हे अवघ्या दोन दिवसानंतर म्हणजेच 31 ऑक्टोबर 2026 ला प्रशासकीय सेवा संपून सेवानिवृत्त होणार होते.

मालेगाव महापालिकेचे आयुक्त रवींद्र जाधव यांच्या प्रशासकीय कार्यकाळात कचरा संकलन निविदा, मोसम नदी प्रदूषण, जन्मदाखले आणि महापालिकेतील आर्थिक व्यवहार अशा विविध मुद्द्यांवरून वाद निर्माण झाले. या प्रकरणांवर राजकीय पक्ष, सामाजिक संघटना आणि नागरिकांनी आक्षेप घेतले आहेत.

Nashik Malegaon Accident: पिकअप वाहनाची दुचाकीला धडक; अपघातात पती, पत्नी आणि 18 वर्षीय मुलीचा मृत्यू, मालेगावमधील घटना

संदीप जेजुरकर — Thu, 29 Oct 2026 12:41:52 +0530

Nashik Malegaon Accident: मालेगाव तालुक्यातील मालेगाव-कुसुंबा रोडवर टिंगरी वणपट फाट्याजवळ पिकअपने दुचाकीला जोरदार धडक (Malegaon Accident News) दिली. या अपघातात दुचाकीवरील पती पत्नी आणि मुलीचा मृत्यू झाला. ही घटना काल रात्री उशिरा घडली. घटनेचे गांभीर्य लक्षात घेता मंत्री दादा भुसे यांनी रुग्णालयात धाव घेतली.

धुळे चिंचगाव येथील राहणारे राजेद्र नाना माने, त्यांची पत्नी बालाबाई व मुलगी भठाबाई यांचा जागीच मृत्यू झाला. मयत तिघांचे मालेगाव सामान्य रुग्णालयात शवविच्छेद करण्यात आले. नांदगाव येथे कार्यक्रमासाठी गेलेले असतांना तिकडून परतत असताना हा अपघात घडला. एकाचवेळी कुटुंबातील पती, पत्नी आणि मुलीचा अपघातात मृत्यू झाल्याने सर्वत्र हळहळ व्यक्त केली जात आहे. (Nashik Malegaon Accident)

परभणीत बस-दुचाकीच्या भीषण अपघातात दोघांचा जागीच मृत्यू- (Parbhani Accident News)

परभणी जिल्ह्यातील पाथरी तालुक्यात बस आणि दुचाकीची समोरासमोर धडक होऊन झालेल्या भीषण अपघातात दोघांचा जागीच मृत्यू झाला आहे.पोहे टाकळी शिवारात राज्य महामार्ग क्रमांक ६१ वर हा अपघात घडला.मध्य प्रदेशातील रहिवासी असलेले दोन तरुण दुचाकीवरून प्रवास करत होते. याचवेळी समोरून येणाऱ्या बसची त्यांच्या दुचाकीला जोरदार धडक बसली. या अपघातात दोघांनाही गंभीर दुखापत झाल्याने त्यांचा घटनास्थळीच मृत्यू झाला.अपघाताची माहिती मिळताच पोलिसांनी घटनास्थळी धाव घेतली.दोन्ही मृतदेह उत्तरीय तपासणीसाठी पाथरी ग्रामीण रुग्णालयात नेण्यात आले आहेत. मृत तरुणांची ओळख आणि अपघाताचे नेमके कारण याबाबत अधिक माहिती मिळवण्याचे काम सुरू आहे.या घटनेमुळे परिसरात हळहळ व्यक्त होत असून,अपघातप्रकरणी पोलीस पुढील तपास करत आहेत.

नांदेडमध्ये अपघातानंतर मदतकार्य करणाऱ्यांना ट्रेलरची धडक- (Nanded Bus Accident)

नांदेडच्या आसना ब्रिजवरील भीषण अपघातानं एका चालकाचा मृत्यू झालाय तर मदत कार्य करणारा पोलीस कर्मचारी गंभीर जखमी झालाय. कार आणि कंटेनरच्या अपघातानंतर मदतकार्य सुरू असतानाच भरधाव ट्रेलरनं कंटेनरला धडक दिली. या भीषण धडकेत कंटेनर चालकाचा जागीच मृत्यू झाला. पोलीस कर्मचारी व्यंकटेश अवुलवारही गंभीर जखमी झालेत. दरम्यान, मृत चालकाचा मृतदेह बाहेर काढण्यासाठी शर्थीचे प्रयत्न सुरू आहेत. गॅस कटर आणि क्रेनच्या मदतीनं बचावकार्य सुरूच आहे.

राज्यासह देश-विदेशातील महत्वाच्या घडामोडी, VIDEO:

मुंबईत 15 लाखांच्या लाचप्रकरणी अधिकारी अटकेत; येवल्यात 1500 रु घेताना तलाठी रंगेहात अडकला

सूरज सावंत — Wed, 28 Oct 2026 21:18:15 +0530

मुंबई : राज्यातील सरकारी कार्यालय आणि अधिकाऱ्यांकडून होणाऱ्या लाचखोरीच्या (Bribe) घटना दिवसेंदिवस उजेडात येत असून आज मुंबईत आणि नाशिकमध्ये दोन लाचखोरांना एसीबीने अटक केली आहे. मुंबईत 15 लाखांची लाच घेताना आयकर निरीक्षकाला सीबीआयकडून (CBI) रंगेहाथ अटक करण्यात आली. तर, नाशिक जिल्ह्याच्या येवला येथे 1500 रुपयांची लाच घेतांना तलाठी (Talathi) लाचलुचपत विभागाच्या जाळ्यात अडकला आहे. दरम्यान, राज्यात एसीबीने कारवाईचा धडका लावला असून गेल्या काही महिन्यांत लाच घेतल्याप्रकरणात अनेक कारवाया करण्यात आल्या आहेत.

मुंबईत 15 लाख रुपयांची लाच घेताना बड्या अधिकाऱ्याला एसीबीने अटक केली असून बेनामी मालमत्तेचे प्रकरण बंद करण्यासाठी संबंधित प्रकरणात 20 लाख रुपयांची लाच मागितली होती. तडजोडीनंतर 15 लाख रुपये स्वीकारताना सीबीआयने सापळा रचून आयकर अधिकाऱ्यावर अटकेची कारवाई केली. दरम्यान, आरोपीच्या घरात घेतलेल्या झाडाझडतीतून 11 लाख रुपयांची रोकड आणि महत्त्वाची कागदपत्रे जप्त करण्यात आली आहेत. संबंधित आरोपी आयकर विभागाच्या स्किंडिया हाऊस येथील तपास विभागात कार्यरत आहे. सीबीआयने आरोपीला न्यायालयात हजर केले असता, मुंबईतील सक्षम न्यायालयाकडून आरोपीला 30 ऑक्टोबरपर्यंत दोन दिवसांची पोलीस कोठडी सुनावण्यात आली आहे. याप्रकरणी, सीबीआयकडून पुढील तपास सुरू आहे.

येवल्यात 1500 रुपये घेताना तलाठी जाळ्यात

नाशिक जिल्ह्याच्या येवला तालुक्यातील चिचोंडी येथील तलाठी राहुल रिंढे यास 1,500 रुपयांची लाच घेतांना लाचलुचपत विभागाने ताब्यात घेतले आहे. सात-बारा उताऱ्यावर नोंदी करण्यासाठी शेतकऱ्याकडे 2000 रुपयांच्या लाचेची मागणी तलाठ्याने केली होती. यासंदर्भात तक्रारदार यांच्याकडे तक्रार केल्यानंतर कारवाईचा सापळा रचण्यात आला. त्यानुसार, तडजोडी अंती 1500 रुपयांची लाच स्वीकारताना लाचलूचपत प्रतिबंधक विभाग, नाशिक यांनी तलाठ्याला कार्यालयातच रंगेहात पकडले. या कारवाईने महसूल विभागात खळबळ उडाली आहे. तर, प्रशासकीय क्षेत्रातही लाचखोर अधिकारी, कर्मचाऱ्यांना धडकी भरल्याचं चित्र आहे.

हेही वाचा

निवडणुकीत राष्ट्रवादीच्या तुतारीने दोन जागा जिंकल्या, जयंत पाटलांचा भाजपला टोला; कराळे मास्तरांच्या निलंबनावरही बोलले

Mahakumbh Mahasamvad 2026: “कुंभमेळ्याचा विपर्यास करण्याचा प्रयत्न आतापासूनच”; महाकुंभ महासंवादात तुषार भोसलेंची प्रतिक्रिया, धर्म, संस्कृती ते प्रशासनापर्यंत विचारमंथन..

एबीपी माझा वेब टीम — Wed, 28 Oct 2026 13:30:59 +0530

Kumbh Mela 2027: आगामी सिंहस्थ कुंभमेळ्याच्या पार्श्वभूमीवर एबीपी माझाच्या वतीने नाशिकमध्ये ‘महाकुंभ महासंवाद’ या विशेष कार्यक्रमाचे आयोजन करण्यात आले आहे. बुधवार, 28 ऑक्टोबर रोजी गेटवे हॉटेल येथे आयोजित या महासंवादात धर्म, संस्कृती, राजकारण, पर्यावरण आणि कुंभमेळ्याच्या नियोजनासह विविध विषयांवर मान्यवर आपले विचार मांडत आहेत. कार्यक्रमाच्या पहिल्या सत्रात काळाराम मंदिराचे पुजारी महंत सुधीरदास पुजारी, भाजप आध्यात्मिक आघाडीचे अध्यक्ष तुषार भोसले आणि अखिल भारतीय हिंदू महासभेचे अनिकेत शास्त्री देशपांडे सहभागी झाले होते. यावेळी तुषार भोसले यांनी कुंभमेळा, राजकीय श्रेय आणि सामाजिक ऐक्य या विषयांवर आपली भूमिका मांडली.

महाराष्ट्रातील कारस्थानी राजकीय मंडळींचे प्रयत्न - तुषार भोसले

कुंभमेळ्याच्या आयोजनावरून होणाऱ्या राजकीय चर्चेचा उल्लेख करताना भोसले म्हणाले की, महाराष्ट्रातला महाकुंभ इतक्या मोठ्या प्रमाणात होत असल्याने, देशातील साधू-संत असतील किंवा भाविक असतील, हे लोक आयोजन करत असलेल्या सत्तेला श्रेय देणारच, पण महाराष्ट्रात असे काही कारस्थानी राजकीय मंडळी देखील आहेत. त्याचे श्रेय संबंधित लोकांना मिळू नये, यासाठी मोठ्या प्रमाणावर प्रयत्न करतात, त्यासाठी आतापासूनच वेगळी व्यवस्था निर्माण करायला घेतली आहे, यासाठी काही राजकीय मंडळी प्रयत्न करत असून कुंभमेळ्याचा विपर्यास करण्याचा प्रयत्न आतापासूनच होत असल्याचं त्यांचं म्हणणं आहे. कुंभमेळ्याच्या आयोजनासाठी होणाऱ्या खर्चावर प्रश्न उपस्थित करणाऱ्यांनाही त्यांनी प्रत्युत्तर दिले. .

‘दुष्काळ आणि आपत्तीच्या काळातही कुंभमेळ्याची परंपरा खंडित झाली नाही’

कुंभमेळ्याच्या खर्चावरून उपस्थित होणाऱ्या प्रश्नांबाबत बोलताना तुषार भोसले म्हणाले की, काही जण कुंभमेळ्यासाठी खर्च होणारा निधी दुष्काळग्रस्त भागांकडे वळवण्याची मागणी करतात. मात्र, त्यांच्या मते, कुंभमेळ्याची परंपरा भारतीय सनातन संस्कृतीत अनेक शतकांपासून चालत आली आहे.“या काळात अनेक वेळा दुष्काळ आले, आपत्ती आल्या आणि युद्धाचे प्रसंगही निर्माण झाले. मात्र, आमची परंपरा कधी खंडित झाली नाही,” असे भोसले म्हणाले. कुंभमेळा रद्द करण्याच्या चर्चेचाही त्यांनी उल्लेख केला. भारतातील हिंदू समाज आणि महाराष्ट्रातील भाविक अशा विचारांना विरोध करतील आणि महाराष्ट्राचा कुंभमेळा जागतिक स्तरावर यशस्वी करतील, असा विश्वास त्यांनी व्यक्त केला.

‘कुंभमेळ्यात जातीभेदाला स्थान नाही’

कुंभमेळ्यातील स्नानपरंपरा आणि सामाजिक ऐक्य यांवरही तुषार भोसले यांनी भाष्य केले. त्यांच्या मते, कुंभमेळ्यातील सामूहिक स्नानाची परंपरा सामाजिक एकतेचा संदेश देते आणि येथे जातीभेदाला स्थान नसते.“कुंभमेळ्यात स्नानाच्या परंपरेत जातीभेद दिसणार नाही. एकत्रित स्नानाची परंपरा आणि सामाजिक ऐक्याची परंपरा या कुंभमेळ्याने दिली आहे. सनातन संस्कृतीत वादाला आणि भेदाला स्थान नाही,” असे भोसले म्हणाले. कुंभमेळ्याच्या परंपरेला विविध राजसत्तांनी प्राधान्य दिले आणि ती जोपासली, असेही त्यांनी नमूद केले.

पहिल्या सत्रात सामाजिक, सांस्कृतिक आणि राजकीय दृष्टिकोनातून चर्चा

महाकुंभ महासंवादाच्या पहिल्या सत्राची सुरुवात सकाळी 11:30 वाजता झाली. ‘सामाजिक, सांस्कृतिक आणि राजकीय दृष्टिकोन’ या विषयावरील या सत्रात काळाराम मंदिराचे पुजारी महंत सुधीरदास पुजारी, भाजप आध्यात्मिक आघाडीचे अध्यक्ष तुषार भोसले आणि अखिल भारतीय हिंदू महासभेचे अनिकेत शास्त्री देशपांडे सहभागी झाले होते. आगामी सिंहस्थ कुंभमेळ्याच्या पार्श्वभूमीवर आयोजित या महासंवादात धार्मिक परंपरा, आध्यात्मिक महत्त्व, पर्यावरण संवर्धन आणि प्रशासकीय आव्हाने यांसारख्या विषयांवरही विविध क्षेत्रांतील मान्यवर चर्चा करत आहेत. दरम्यान, कुंभमेळ्याच्या आयोजनावरील खर्च आणि त्याच्या सामाजिक-आर्थिक प्राधान्यांबाबत तुषार भोसले यांनी मांडलेली भूमिका ही त्यांची राजकीय आणि वैचारिक मांडणी आहे. कुंभमेळ्याचे नियोजन, निधीचा वापर आणि भाविकांसाठीच्या सुविधांबाबत प्रशासनाची अधिकृत भूमिका स्वतंत्रपणे महत्त्वाची ठरणार आहे.

हेही वाचा :

Sankashti Chaturthi 2026: 29 कि 30 ऑक्टोबर..यंदा संकष्टी चतुर्थीला विशेष योगायोग! चंद्रोदय वेळ, 5 राशी भाग्यशाली, शुभ मुहूर्त, धार्मिक महत्त्व...

Kumbh Mela 2027: नाशिकमध्ये एबीपी माझाचा ‘महाकुंभ महासंवाद’; धर्म, संस्कृती ते प्रशासनापर्यंत रंगणार विचारमंथन!

ज्योती देवरे — Wed, 28 Oct 2026 12:24:47 +0530

Kumbh Mela 2027: आगामी सिंहस्थ कुंभमेळ्याच्या पार्श्वभूमीवर एबीपी माझाच्या वतीने नाशिकमध्ये ‘महाकुंभ महासंवाद’ या विशेष कार्यक्रमाचे आयोजन करण्यात आले आहे. बुधवार, 28 ऑक्टोबर रोजी गेटवे हॉटेल, नाशिक येथे सकाळी 11:30 वाजल्यापासून हा कार्यक्रम होणार आहे. या महासंवादात धर्म, धार्मिक परंपरा, कुंभमेळ्याचे आध्यात्मिक महत्त्व, पर्यावरण संवर्धन आणि प्रशासकीय आव्हाने अशा विविध विषयांवर मान्यवर आपले विचार मांडणार आहेत. या कार्यक्रमात धार्मिक क्षेत्रातील प्रतिनिधी, राजकीय नेते, आध्यात्मिक मार्गदर्शक, वास्तुविशारद, पर्यावरणविषयक तज्ज्ञ, उद्योजक आणि प्रशासकीय अधिकारी सहभागी होणार आहेत. आगामी सिंहस्थ कुंभमेळ्याच्या दृष्टीने विविध पैलूंवर चर्चा घडवून आणणे हा या कार्यक्रमाचा केंद्रबिंदू आहे.

पहिले सत्र - सामाजिक, सांस्कृतिक आणि राजकीय दृष्टिकोनातून कुंभमेळ्याची चर्चा (Kumbh Mela 2027)

कार्यक्रमाच्या पहिल्या सत्राला सकाळी 11:30 ते दुपारी 12:10 या वेळेत सुरुवात होणार आहे. ‘सामाजिक, सांस्कृतिक आणि राजकीय दृष्टिकोन’ या विषयावर होणाऱ्या या सत्रात काळाराम मंदिराचे पुजारी महंत सुधीरदास पुजारी, भाजप आध्यात्मिक आघाडीचे अध्यक्ष तुषार भोसले आणि अखिल भारतीय हिंदू महासभेचे अनिकेत शास्त्री देशपांडे सहभागी होणार आहेत.

दुसरे सत्र - धर्म आणि परंपरांवर विचारमंथन

दुपारी 12:10 ते 12:50 या वेळेत ‘धर्म आणि धार्मिक परंपरा’ या विषयावर दुसरे सत्र होईल. या सत्रात आनंद आखाड्याचे प्रमुख प्रतिनिधी शंकरानंद सरस्वती आणि दिगंबर आखाड्याचे प्रमुख प्रतिनिधी भक्तिचरणदास सहभागी होणार आहेत. कुंभमेळ्याशी संबंधित धार्मिक परंपरा आणि आखाड्यांचे महत्त्व यावर या चर्चेत प्रकाश टाकला जाण्याची अपेक्षा आहे.

तिसरे सत्र - कुंभमेळ्यातील आध्यात्मिकतेवर चर्चा

दुपारी 12:50 ते 1:30 या वेळेत ‘कुंभमेळ्यातील आध्यात्मिकता’ या विषयावर तिसरे सत्र आयोजित करण्यात आले आहे. या सत्रात ज्योतिषाचार्य आणि वैदिक विद्वान पंडित अतुलशास्त्री भगरे गुरुजी, हिंदू आध्यात्मिक शिक्षक, कीर्तनकार व प्रवचनकार माधवदास राठी महाराज आणि नाशिकमधील गंगा-गोदावरीचे ज्येष्ठ विश्वस्त सतीश शुक्ला सहभागी होणार आहेत. दुपारी 1:30 ते 2:30 या वेळेत भोजनासाठी विश्रांती ठेवण्यात आली आहे.

पर्यावरण संवर्धन आणि शाश्वत विकासावर भर

दुपारी 2:30 ते 3:10 या वेळेत ‘पर्यावरण आणि शाश्वत विकास’ या विषयावर चर्चा होणार आहे. या सत्रात अभिनेते आणि निर्माते संतोष जुवेकर, शिक्षणतज्ज्ञ, वास्तुविशारद आणि पर्यावरणविषयक तज्ज्ञ प्राजक्ता बास्ते तसेच दीपक बिल्डर्स अँड डेव्हलपर्सचे संस्थापक आणि व्यवस्थापकीय संचालक दीपक चांदे सहभागी होणार आहेत. कुंभमेळ्यासारख्या मोठ्या धार्मिक सोहळ्यात पर्यावरणाचे संरक्षण, स्वच्छता, पाणी व्यवस्थापन आणि शाश्वत विकास यांना विशेष महत्त्व असते. त्यामुळे या विषयावरील चर्चा आगामी कुंभमेळ्याच्या नियोजनाच्या दृष्टीने महत्त्वाची ठरणार आहे.

‘द ग्रेट रिस्पॉन्सिबिलिटी’ सत्रात गिरीश महाजन

दुपारी 3:10 ते 3:40 या वेळेत ‘द ग्रेट रिस्पॉन्सिबिलिटी’ या विषयावर स्वतंत्र सत्र होणार आहे. या सत्रात नाशिक जिल्ह्याचे पालकमंत्री गिरीश महाजन सहभागी होणार आहेत. सिंहस्थ कुंभमेळ्याच्या आयोजनाशी संबंधित जबाबदाऱ्या आणि व्यापक नियोजनाच्या मुद्द्यांवर या सत्रात चर्चा होणार आहे.

कुंभमेळ्याच्या प्रशासकीय आव्हानांवर मंथन

दुपारी 3:40 ते 4:20 या वेळेत ‘प्रशासकीय आव्हाने’ या विषयावर शेवटचे नियोजित सत्र होणार आहे. या चर्चेत नाशिक-त्र्यंबकेश्वर कुंभमेळा प्राधिकरणाचे आयुक्त शेखर सिंह, नाशिक महानगरपालिकेच्या आयुक्त मनीषा खत्री आणि नाशिक शहराचे पोलीस आयुक्त संदीप कर्णिक सहभागी होणार आहेत. कुंभमेळ्याच्या काळात भाविकांची गर्दी, वाहतूक व्यवस्थापन, सुरक्षा, स्वच्छता आणि मूलभूत सुविधांचे नियोजन ही प्रशासनासमोरील महत्त्वाची आव्हाने असतात. या पार्श्वभूमीवर प्रशासकीय पातळीवरील चर्चा महत्त्वपूर्ण ठरणार आहे.

मनोरंजन, आध्यात्मिक क्षेत्रातील मान्यवरांची उपस्थिती

एबीपी माझाच्या ‘महाकुंभ महासंवादा’त दुपारी 4:20 ते सायंकाळी 5:00 या वेळेत ‘सेलिब्रिटी’ या विषयावर विशेष सत्र आयोजित करण्यात आले आहे. या सत्रात साध्वी हर्षानंद गिरी, ज्यांना ‘सुंदर साध्वी’ म्हणूनही ओळखले जाते, सहभागी होणार आहेत. त्या सोशल मीडिया इन्फ्लुएन्सर असून, यापूर्वी अँकर आणि मॉडेल म्हणूनही कार्यरत होत्या. याशिवाय, हिंदू संत आणि आध्यात्मिक मार्गदर्शक श्री महामंडलेश्वर कम्प्युटर बाबा तसेच किन्नर आखाड्याचे प्रतिनिधी ऋषिकेश निकम हेही या सत्रात सहभागी होणार असल्याचे कार्यक्रमाच्या उपलब्ध तपशिलात नमूद आहे.या सत्रातून अध्यात्म, साधू-संतांचे जीवन आणि आधुनिक समाजमाध्यमांवरील धार्मिक व्यक्तिमत्त्वांची लोकप्रियता अशा विविध पैलूंवर चर्चा होण्याची शक्यता आहे. सायंकाळी 5 वाजल्यापासून उपस्थित मान्यवर आणि सहभागींसाठी हाय टीचे आयोजन करण्यात आले असून, त्यानंतर कार्यक्रमाची सांगता होईल.

सिंहस्थ कुंभमेळ्याच्या पार्श्वभूमीवर महासंवादाला महत्त्व

नाशिक आणि त्र्यंबकेश्वर येथे होणाऱ्या सिंहस्थ कुंभमेळ्याच्या पार्श्वभूमीवर आयोजित करण्यात आलेला हा महासंवाद धार्मिक परंपरा, सामाजिक-सांस्कृतिक पैलू, पर्यावरण संवर्धन आणि प्रशासनाची तयारी अशा विविध विषयांना एकाच व्यासपीठावर आणणार आहे. विविध क्षेत्रांतील मान्यवरांच्या सहभागामुळे कुंभमेळ्याशी संबंधित महत्त्वाच्या प्रश्नांवर विचारमंथन होणार आहे.

हेही वाचा :

Sankashti Chaturthi 2026: 29 कि 30 ऑक्टोबर..यंदा संकष्टी चतुर्थीला विशेष योगायोग! चंद्रोदय वेळ, 5 राशी भाग्यशाली, शुभ मुहूर्त, धार्मिक महत्त्व...

Kumbh Mela 2027: गोदावरीच्या तीरावर भरणार श्रद्धेचा महासागर! 31 ऑक्टोबरला ध्वजारोहण, 2028 पर्यंत चालणार सिंहस्थ पर्व, अमृतस्नानांचं महत्त्व, वेळापत्रक जाणून घ्या!

एबीपी माझा वेब टीम — Wed, 28 Oct 2026 10:48:25 +0530

Kumbh Mela 2027: नाशिक आणि त्र्यंबकेश्वर येथे होणारा सिंहस्थ कुंभमेळा हा देशातील प्रमुख धार्मिक सोहळ्यांपैकी एक आहे. गोदावरी नदीचे पावित्र्य, साधू-संतांचे आगमन, आखाड्यांची परंपरा आणि पवित्र स्नान यांमुळे या कुंभमेळ्याला विशेष महत्त्व आहे. महाराष्ट्र सरकारने जाहीर केलेल्या कार्यक्रमानुसार, नाशिक–त्र्यंबकेश्वर सिंहस्थ कुंभमेळ्याची सुरुवात 31 ऑक्टोबर 2026 रोजी ध्वजारोहणाने होणार आहे. नाशिकमधील पंचवटी येथील रामकुंड आणि त्र्यंबकेश्वर येथील कुशावर्त तीर्थ येथे प्रारंभिक धार्मिक विधी होणार आहेत. कुंभपर्वाचा मुख्य आकर्षण असलेली 3 अमृतस्नाने ऑगस्ट आणि सप्टेंबर 2027 मध्ये नियोजित आहेत.

31 ऑक्टोबरला ध्वजारोहण; 2028 पर्यंत चालणार सिंहस्थ पर्व (Kumbh Mela 2027)

नाशिक–त्र्यंबकेश्वर सिंहस्थ कुंभमेळ्याची सुरुवात 31 ऑक्टोबर 2026 रोजी ध्वजारोहणाने होणार आहे. लाखो भाविक या पर्वासाठी नाशिक आणि त्र्यंबकेश्वर येथे येतात. कुंभमेळ्यातील शाही स्नानाला आता अनेक ठिकाणी ‘अमृत स्नान’ असेही संबोधले जाते. मात्र, 2027 मधील स्नानांच्या अचूक तारखा, वेळा आणि आखाड्यांच्या मिरवणुकीचे तपशील अधिकृत कार्यक्रमानुसारच निश्चित मानावेत.

नाशिक कुंभमेळ्याचे वेळापत्रक

31 ऑक्टो. 2026 - सिंहस्थ कुंभमेळ्याचे ध्वजारोहण - रामकुंड, पंचवटी आणि कुशावर्त तीर्थ, त्र्यंबकेश्वर येथे कुंभपर्वाच्या प्रारंभाचे विधी. जाहीर कार्यक्रमानुसार ध्वजारोहणाची वेळ दुपारी 12:02 आहे.

24 जुलै 2027 - साधुग्राममध्ये आखाड्यांचे ध्वजारोहण - नाशिकमधील साधुग्राम येथे आखाड्यांशी संबंधित ध्वजारोहणाचा कार्यक्रम नियोजित आहे.

29 जुलै 2027 - नगर प्रदक्षिणा - नाशिकमध्ये साधू-संत आणि आखाड्यांच्या सहभागाने नगर प्रदक्षिणेचा धार्मिक सोहळा होणार आहे.

2 ऑगस्ट 2027 - पहिले अमृतस्नान - नाशिकच्या रामकुंडावर आणि त्र्यंबकेश्वरच्या कुशावर्त तीर्थावर पहिले प्रमुख अमृतस्नान नियोजित आहे. हा दिवस श्रावणापूर्वीच्या आषाढातील सोमवती अमावास्येशी संबंधित आहे.

31 ऑगस्ट 2027 - दुसरे अमृतस्नान - श्रावण अमावास्येच्या दिवशी नाशिक आणि त्र्यंबकेश्वर येथे दुसरे प्रमुख स्नान होणार आहे. या स्नानाला विशेष धार्मिक महत्त्व आहे.

11 सप्टें. 2027 - नाशिकमधील तिसरे अमृतस्नान - नाशिक येथील रामकुंडावर तिसरे प्रमुख अमृतस्नान नियोजित आहे.

12 सप्टें. 2027 - त्र्यंबकेश्वरमधील तिसरे अमृतस्नान - त्र्यंबकेश्वर येथील कुशावर्त तीर्थावर तिसरे प्रमुख स्नान नियोजित आहे. त्यामुळे तिसऱ्या स्नानासाठी दोन्ही ठिकाणांच्या तारखा वेगवेगळ्या आहेत.

24 जुलै 2028 - त्र्यंबकेश्वर येथे सिंहस्थाची सांगता - त्र्यंबकेश्वरमधील समारोप आणि ध्वजावतरणासाठी ही तारीख नियोजित आहे. नाशिकमधील सांगतेचा कार्यक्रम 29 जुलै 2028 रोजी दर्शविण्यात आला आहे.

वेळापत्रकाचे स्रोत: सिंहस्थ कुंभमेळा कार्यक्रमावरील उपलब्ध तपशील आणि प्रसिद्ध वेळापत्रक.

शाही स्नानाचे महत्त्व काय?

कुंभमेळ्यातील शाही स्नान ही आखाड्यांची, साधू-संतांची आणि भाविकांची महत्त्वाची धार्मिक परंपरा आहे. या दिवशी आखाड्यांतील साधू-संत पारंपरिक मिरवणुकीने स्नानस्थळी येतात आणि धार्मिक विधीनुसार पवित्र स्नान करतात. या परंपरेला साधू-संन्याशांच्या धार्मिक स्थानाशी, तपश्चर्येशी आणि सनातन परंपरेशी जोडले जाते. हिंदू धार्मिक श्रद्धेनुसार, कुंभपर्वात पवित्र नदीत स्नान केल्याने पुण्यप्राप्ती होते आणि आध्यात्मिक शुद्धी साधता येते, अशी मान्यता आहे. त्यामुळे देशाच्या विविध भागांतून भाविक या पर्वासाठी येतात. ‘शाही स्नान’ या नावाबरोबरच ‘अमृतस्नान’ हा शब्दही वापरला जातो.

नाशिक आणि त्र्यंबकेश्वरचे धार्मिक महत्त्व

नाशिकमधील पंचवटी परिसरातील रामकुंड हे गोदावरी नदीच्या काठावरील महत्त्वाचे तीर्थस्थान आहे. धार्मिक विधी, पितृतर्पण आणि पवित्र स्नानासाठी येथे भाविक येतात. तर त्र्यंबकेश्वर हे ज्योतिर्लिंग मंदिर आणि कुशावर्त तीर्थ यांमुळे विशेष प्रसिद्ध आहे. सिंहस्थाच्या काळात या दोन्ही ठिकाणी धार्मिक कार्यक्रम, साधू-संतांचे आगमन आणि भाविकांची मोठी गर्दी अपेक्षित आहे.

भाविकांनी कोणती काळजी घ्यावी?

अमृतस्नानाच्या दिवशी मोठी गर्दी होण्याची शक्यता असल्याने प्रवासाचे नियोजन आधी करावे. प्रशासनाकडून जाहीर होणारे वाहतूक बदल, पार्किंग व्यवस्था, घाटांवरील प्रवेशाचे नियम आणि सुरक्षाविषयक सूचना तपासाव्यात. अधिकृत स्नानवेळा आणि आखाड्यांच्या मिरवणुकीचे तपशील जाहीर झाल्यावरच त्यानुसार प्रवास निश्चित करणे योग्य ठरेल. उपलब्ध वेळापत्रकानुसार मुख्य अमृतस्नानांच्या तारखा निश्चितपणे प्रसिद्ध झाल्या असल्या, तरी काही ऑनलाइन वेळापत्रकांमध्ये कार्यक्रमाला अंतरिम किंवा बदलाच्या अधीन असल्याचे नमूद आहे. त्यामुळे प्रवासापूर्वी नाशिक–त्र्यंबकेश्वर सिंहस्थ कुंभमेळा प्राधिकरण किंवा जिल्हा प्रशासनाच्या ताज्या सूचनांची खात्री करावी.

हेही वाचा :

November December 2026 Horoscope: मेष, वृषभ, मिथुन, कर्क, सिंह, कन्या..2026 चे शेवटचे 2 महिने नोव्हेंबर-डिसेंबर नशीब पालटणार! पैसा, नोकरी, प्रेम.. राशीभविष्य

(टीप : वरील सर्व बाबी एबीपी माझा केवळ माहिती म्हणून वाचक-प्रेक्षकांपर्यंत पोहोचवत आहे. यातून एबीपी माझा कोणताही दावा करत नाही.)

युवकाचं लग्न सुरू असतानाचा पहिल्या पत्नीची एन्ट्री, नवरदेवाला चोप; लग्नसोहळ्यात पिच्चरटाईप गोंधळ

मुकुल कुलकर्णी, एबीपी माझा — Mon, 26 Oct 2026 16:53:54 +0530

नाशिक : एखाद्या सिनेमाला साजेशी अशी लग्नसोहळ्याची (marriage) स्टोरी नाशिकमध्ये (Nashik) घडली आहे. लग्न झालेले असतानाच एका मुस्लिम तरुणाने हिंदू मुलीशी दुसरे लग्न केल्याची धक्कादायक घटना नाशिकमध्ये उघडकीस आली आहे. या घटनेची पहिल्या माहिती पत्नीला मिळताच तिने कुटुंबीयासह लग्न समारंभात हजेरी लावत पतीला जाब विचरला. त्यामुळे, लग्नकार्य ठिकाणी चांगलाच गोंधळ उडाला असून थेट पोलीस (Police) ठाण्यापर्यंत हे प्रकरण गेलं आहे. याप्रकरणी इंदीरा नगर पोलीसात गुन्हा दाखल करण्यात आला आहे.

नाशिकमधील एका लग्न सोहळ्यात अचाकन गोंधळ सुरू झाला, कारण ज्या मुलाचं लग्न सुरू होतं त्याची पहिली पत्नीच लग्नसोहळ्यात पोहोचली होती. लग्न सोहळ्यातील नवरदेव तौसिफ मनियारचे मुस्लिम धर्मानुसार पहिले लग्न झाले आहे, त्याला आठ ते दहा वर्षांचा मुलगा आहे. पहिल्या पत्नीला अद्याप घटस्फोट दिला नसून प्रकरण न्यायप्रविष्ट असताना देखील त्याने दुसरे लग्न हिंदू परंपरेप्रमाणे केल्याची धक्कादायक घटना उघडकीस आली आहे. या संदर्भात पहिल्या पत्नीला माहिती मिळताच तिने लग्न सोहळ्यात हजेरी लावून दुसऱ्यांदा लग्न करणाऱ्या तौसिफला चांगलाच चोप दिला. अचानक घडलेल्या प्रसंगाने वऱ्हाडी मंडळी चांगलीच बिथरली अन् लग्न समारंभात गोंधळाचे वातावरण निर्माण झालं. याप्रकरणी इंदिरानगर पोलीस ठाण्यामध्ये तक्रार दाखल करण्यात आली आहे.

पोलिसांकडून चौकशी सुरू

पहिलं लग्न झालेला असताना अद्याप घटस्फोट झाला नाही, तरी देखील दुसरे लग्न केल्याची माहिती तौसिफने त्याच्या दुसऱ्या पत्नीपासून लपवून ठेवल्याचा आरोप पहिल्या पत्नीने केला आहे. मात्र, याबाबत दुसऱ्या पत्नीने अद्याप कुठलीही तक्रार केलेली नाही. पोलिसांनी दोघांनाही चौकशीसाठी बोलविले आहे. मात्र, अद्याप मनस्थिती ठीक नसल्याचे कारण सांगत दुसऱ्या पत्नीने चौकशीसाठी पोलीस स्टेशनला हजेरी लावलेली नाही, असे इंदिरानगरचे पोलीस उपनिरीक्षक जनक सिंग गुणावत यांनी सांगितले. दरम्यान, या तपासामध्ये नेमकं काय पुढे येतं हे बघण महत्त्वाचा ठरणार आहे.

हेही वाचा

आदित्य ठाकरेंच्या ताफ्यात युवक शिरला; हातातील बोर्डने लक्ष वेधले, सह्याद्रीचं जंगल वाचवण्याची आर्त हाक

Kumbh Mela 2026: नाशिक-त्र्यंबकेश्वर सिंहस्थ कुंभमेळ्याचं ध्वजारोहण 31 ऑक्टोबरला, ध्वजारोहण म्हणजे काय? अमृतस्नान कधी? जाणून घ्या..

एबीपी माझा वेब टीम — Mon, 26 Oct 2026 10:40:17 +0530

Kumbh Mela 2026: नाशिक-त्र्यंबकेश्वर सिंहस्थ कुंभमेळ्याच्या तयारीला आता वेग येणार असून, 31 ऑक्टोबर 2026 रोजी पारंपरिक ध्वजारोहण सोहळ्याने सिंहस्थ पर्वाचा प्रारंभ होणार आहे. या सोहळ्यामुळे कुंभमेळ्याच्या धार्मिक कार्यक्रमांच्या नियोजनाला महत्त्वपूर्ण सुरुवात होणार आहे. सिंहस्थ कुंभमेळा हा नाशिक आणि त्र्यंबकेश्वर येथील प्रमुख धार्मिक उत्सव आहे. देशभरातून साधू-महंत, आखाड्यांचे प्रतिनिधी आणि लाखो भाविक या पर्वासाठी उपस्थित राहतात. ध्वजारोहण हा धार्मिक परंपरेतील महत्त्वाचा विधी मानला जातो. या सोहळ्याद्वारे सिंहस्थ पर्वाची औपचारिक सुरुवात दर्शवली जाते. काय आहे ध्वजारोहण सोहळा? या सोहळ्याचे महत्त्व काय? अमृतस्नान कधी? जाणून घ्या...

ध्वजारोहण सोहळ्याचे महत्त्व काय? (Kumbh Mela 2026)

कुंभमेळ्याच्या परंपरेत ध्वजारोहण विधी धार्मिक उत्सवाच्या प्रारंभाचे प्रतीक मानला जातो. ध्वजारोहण याचा अर्थ पवित्र ध्वजाचे आरोहण करणे. या सोहळ्यात आखाड्यांचे साधू-महंत सहभागी होतात. पवित्र भगव्या ध्वजाच्या आरोहणातून धार्मिक परंपरा, श्रद्धा आणि सिंहस्थ पर्वाचे महत्त्व अधोरेखित केले जाते.

ध्वजारोहणाचा शुभ मुहूर्त कधी?

मिळालेल्या माहितीनुसार, सिंहस्थ कुंभमेळ्यासाठी 31 ऑक्टोबर 2026 रोजी दुपारी 12:02 वाजता ध्वजारोहण होणार असल्याचे सांगितले जात आहे. हा मुहूर्त अभिजित मुहूर्ताशी संबंधित असल्याचा दावा करण्यात आला आहे. मात्र, मुहूर्त आणि कार्यक्रमाच्या अंतिम वेळेबाबत तसेच नाशिक-त्र्यंबकेश्वर सिंहस्थ कुंभमेळा प्रशासन आणि विकास प्राधिकरणाबद्दल अधिक माहिती हवी असल्यास तुम्ही विभागीय आयुक्त, नाशिक यांच्या अधिकृत संकेतस्थळाला भेट देऊ शकता.

2027 मधील प्रमुख अमृतस्नानाच्या तारखा

सिंहस्थ कुंभमेळ्यात अमृतस्नानाला विशेष धार्मिक महत्त्व आहे. भाविक आणि साधू-महंतांसाठी या पर्वातील स्नानाच्या तारखा महत्त्वाच्या मानल्या जातात. उपलब्ध माहितीनुसार प्रमुख अमृतस्नानाच्या प्रस्तावित तारखा पुढीलप्रमाणे आहेत.

पहिले अमृतस्नान 2 ऑगस्ट 2027 रोजी आषाढ सोमवती अमावस्येला होणार असल्याचे नमूद करण्यात आले आहे.
दुसरे अमृतस्नान 31 ऑगस्ट 2027 रोजी श्रावण अमावस्येला प्रस्तावित आहे.
नाशिक येथे तिसरे अमृतस्नान 11 सप्टेंबर 2027 रोजी भाद्रपद शुद्ध एकादशीला,
तर त्र्यंबकेश्वर येथे 12 सप्टेंबर 2027 रोजी वामन द्वादशीला होणार असल्याची माहिती दिली जात आहे.

नाशिकमध्ये ध्वजारोहण नेमके कोठे होते?

मिळालेल्या माहितीनुसार, मुख्य ध्वजारोहण सोहळा नाशिकमधील पंचवटी परिसरातील रामकुंड येथे आणि त्र्यंबकेश्वर येथे एकाच वेळी पार पडतो.

कुंभमेळा 2026 मध्ये की 2027 मध्ये?

माहितीनुसार, कुंभमेळ्याचा अधिकृत प्रारंभ 31 ऑक्टोबर 2026 रोजी ध्वजारोहणाने होईल आणि त्याची सांगता 24 जुलै 2028 रोजी होईल. मात्र, मुख्य स्नानाच्या तारखा (अमृत स्नान) ऑगस्ट आणि सप्टेंबर 2027 मध्ये आहेत

सिंहस्थ पर्वाची जय्यत तयारी...

नाशिक-त्र्यंबकेश्वर येथील सिंहस्थ कुंभमेळा धार्मिक परंपरा आणि व्यवस्थापनाच्या दृष्टीने महत्त्वाचा मानला जातो. यंदाचा उत्सव सुमारे 22 महिने चालणार असल्याचा दावा करण्यात येत आहे. त्यामुळे भाविकांची संभाव्य गर्दी, वाहतूक व्यवस्था, निवास, स्वच्छता, आरोग्यसेवा आणि सुरक्षा यांचे नियोजन प्रशासनासाठी महत्त्वाचे ठरणार आहे. ध्वजारोहण सोहळ्यापासून सिंहस्थ पर्वाच्या तयारीला धार्मिक आणि प्रशासकीय स्तरावर गती मिळण्याची अपेक्षा आहे. मात्र, ध्वजारोहणाची वेळ, अमृतस्नानाच्या तारखा आणि उत्सवाचा एकूण कालावधी यासंबंधित अधिकृत माहितीसाठी तुम्ही विभागीय आयुक्त नाशिक यांच्या अधिकृत संकेतस्थळाला भेट देऊ शकता.

हेही वाचा :

Shani Dev: 2028, 2030 आणि 2032 पर्यंत संयम ठेवा...शनिच्या साडेसाती कचाट्यात 3 राशी..पैसा, नोकरी, प्रेम? ज्योतिषशास्त्र...

Nashik Simhastha Kumbh Mela: सिंहस्थ कुंभमेळ्यातील वाहतूक अन् गर्दीचे नियोजन नागपुरातून! IIM व्यवस्थापन तज्ञांच्या मदतीने खास नियोजन; AI, ट्रॅफिक सिम्यूलेशनसह अद्ययावत लीडार सर्वेचीही मदत

रजत वशिष्ठ, एबीपी माझा — Mon, 26 Oct 2026 07:49:41 +0530

Nashik Simhastha Kumbh Mela News : नाशिक आणि त्र्यंबकेश्वरमध्ये होऊ घातलेल्या 'सिंहस्थ कुंभमेळा'च्या (Nashik Simhastha Kumbh Mela) शाही स्नानाच्या दिवशी तब्बल सव्वा दोन कोटी भाविक स्नान करतील. तर कुंभमेळ्याच्या इतर दिवशी रोज किमान दहा लाख भाविक (Simhastha Kumbh Mela Crowd Planning) नाशिक आणि त्र्यंबकेश्वरमध्ये असतील, असा अंदाज नागपूर येथील इंडियन इन्स्टिट्यूट ऑफ मॅनेजमेंटने (Indian Institute of Management) व्यक्त केला आहे. नागपूर आयआयएमला सिंहस्थ कुंभमेळ्यासाठी (Simhastha Kumbh Mela) लोकांची गर्दी आणि वाहतुकीच्या व्यवस्थापनासाठी (Simhastha Kumbh Mela Crowd Planning) सल्लागार म्हणून निवडण्यात आले आहे. स्थानिक अधिकाऱ्यांकडून कुंभमेळ्यासाठी 'मोबिलिटी प्लॅन' मिळाल्यानंतर त्याचे प्रमाणिकरण ( Validation) नागपूर आयआयएमला (IIM) करायचे आहे. त्यासाठी नागपूर आयआयएम 'ट्रॅफिक सिम्यूलेशन'सह 'आर्टिफिशियल इंटेलिजन्स'(AI) आणि 'लीडार सर्वे'चा वापर करून गर्दी आणि वाहतुकीच्या व्यवस्थापनाचा अद्ययावत नियोजन करून देणार असल्याची माहिती नागपूर आयआयएमचे डायरेक्टर डॉ. भीमराय मैत्री यांनी एबीपी माझाशी एक्सक्लुझिव्ह बातचीत करताना दिली आहे. (Simhastha Kumbh Mela Marathi News)

Simhastha Kumbh Mela News : मोबिलिटी प्लान आल्यानंतर ट्रॅफिक सिम्यूलेशन आणि लीडार सर्वेची होणार प्रक्रिया

दरम्यान, सिंहस्थ कुंभमेळ्याच्या कालावधीत आणि प्रमुख शाही स्नानाच्या दिवशी होणाऱ्या गर्दीचा अंदाज घेऊन वाहतुकीचे आगाऊ नियोजन केले जाणार असून पादचाऱ्यांसाठी वेगळे तर वाहनांसाठी वेगळे मार्ग असणार आहे. एवढेच नाही तर कोणत्याही ठिकाणी गर्दी अचानक वाढल्यास आपात्कालीन परिस्थितीत कोणत्या मार्गांचा वापर केला जाईल, याचे नियोजनही आधीच केले जाणार असल्याची माहिती डॉ. भीमराय मैत्री यांनी दिली आहे. सध्या ड्रोनने सर्वे सुरू असून स्थानिक अधिकाऱ्यांकडून प्राथमिक मोबिलिटी प्लान आल्यानंतर ट्रॅफिक सिम्यूलेशन आणि लीडार सर्वेची प्रक्रिया सुरू होईल असेही डॉ. मैत्री म्हणाले.

Simhastha Kumbh Mela Crowd Planning: कुंभमेळ्याच्या इतर दिवशीही दररोज किमान दहा लाख भाविकांची हजेरी

कुंभमेळ्याच्या शाही स्नानाच्या वेळेला गर्दीचा उच्चांक असेल. शाही स्नानाच्या दिवशी सव्वा दोन कोटी भाविक नाशिक आणि त्र्यंबकेश्वरला असण्याची शक्यता आहे. कुंभमेळ्याच्या इतर दिवशीही दररोज किमान दहा लाख भाविक दोन्ही शहरात असतील, असाही अंदाज आहे. गर्दीचे अंदाज घेऊनच वाहतूक आणि गर्दीच्या व्यवस्थापनाचे नियोजन सुरू आहे. नाशिक आणि त्र्यंबकेश्वरच्या बाहेर अनेक पार्किंग स्थळ निश्चित केले जाणार आहे. वेगवेगळ्या दिशेने येणाऱ्या वाहनांसाठी वेगवेगळे पार्किंग स्थळ राहतील. तर आर्टिफिशिअल इंटेलिजन्ससह लीडार सर्वेच्या माध्यमातून अडचणीचे ठिकाण आधीच निश्चित केले जाणार असल्याची माहिती आहे. तर अडचणीच्या ठिकाणांसाठी वेगळी आपातकालीन व्यवस्था राहील. त्यात पुढील एक महिन्यात सर्व काही निश्चित होऊन जाईल, असेही डॉ. मैत्री म्हणाले.

इतर महत्वाच्या बातम्या

Eknath Shinde: 'आरोप-प्रत्यारोप बंद करा, दुष्काळग्रस्त शेतकऱ्यांच्या बांधावर उतरा; अर्जापासून पंचनाम्यापर्यंत मदतीचा हात द्या'; उपमुख्यमंत्री एकनाथ शिंदे यांचे नेते-कार्यकर्त्यांना आदेश

प्रेमविवाहाचा राग मनात; येवल्यात भर लग्नात नवरदेवाला डिझेल ओतून जाळण्याचा प्रयत्न, तुंबळ हाणामारीत 7 ते 8 जण जखमी

abp majha web team — Sun, 25 Oct 2026 17:15:03 +0530

Nashik Crime : प्रेमविवाहाचा राग मनात धरून नवरीच्या नातेवाईकांनी भरलग्नात नवरदेव आणि त्याच्या नातेवाईकांना डिझेल ओतून जिवंत जाळण्याचा प्रयत्न केल्याचा धक्कादायक प्रकार येवला शहरात घडला आहे. लग्नमंडपातच दोन्ही बाजूंच्या नातेवाईकांमध्ये तुंबळ हाणामारी झाली. या घटनेत 7 ते 8 जण जखमी झाल्याची माहिती समोर आली आहे. या प्रकारामुळे परिसरात खळबळ उडाली आहे. (Nashik Crime)

नेमकं काय घडलं? (Nashik News)

नाशिकच्या येवला शहरातील ऋषभ दीपक भगुंडे या तरुणाचे निफाड तालुक्यातील रामपूर नैताळे येथील एका तरुणीसोबत प्रेमसंबंध होते. या दोघांनी सप्टेंबर महिन्यात घरातून निघून प्रेमविवाह केला. लग्नाला दोन महिने झाल्यामुळे मुलाच्या नातेवाईकांनी जवळच्या 100- 200 नातेवाईकांना बोलवून पारंपरिक पद्धतीने दोघांचं लग्न लावायचं ठरवलं. आज येवला शहरातील एका लॉन्समध्ये पारंपरिक पद्धतीने विवाह सोहळ्याचे आयोजन करण्यात आले होते.

विवाह सोहळा सुरू असताना नवरीच्या नातेवाईकांनी प्रेमविवाहाचा राग मनात धरून डिझेलचे कॅन सोबत आणल्याचा आरोप करण्यात आलाय. त्यांनी नवरदेव आणि त्याच्या नातेवाईकांच्या अंगावर डिझेल ओतून त्यांना जिवंत जाळण्याचा प्रयत्न केल्याची माहिती आहे. यासोबतच वऱ्हाडी मंडळींनाही मारहाण करण्यात आली. या प्रकाराला नवरदेवाच्या नातेवाईकांनी रोखल्यानंतर दोन्ही गटांमध्ये जोरदार हाणामारी झाली. या घटनेत 7 ते 8 जण जखमी झाल्याचे सांगण्यात येत आहे.

पोलिसांकडून संशयित ताब्यात

लग्नमंडपात झालेल्या या राड्याचा प्रकार उपस्थित वऱ्हाडी मंडळींनी मोबाईल कॅमेऱ्यात कैद केला. घटनेची माहिती मिळताच येवला शहर पोलिसांनी घटनास्थळी धाव घेतली आणि काही संशयितांना ताब्यात घेतले. दोन्ही बाजूंनी गुन्हा नोंदवण्याची प्रक्रिया सुरू असल्याची माहिती पोलिसांनी दिली आहे. या घटनेची येवला शहरात चर्चा सुरू आहे. पोलिसांच्या तपासानंतर या प्रकरणातील नेमकी वस्तुस्थिती स्पष्ट होणार आहे.

प्रेमविवाहाचा राग मनात; येवल्यात भर लग्नात नवरदेवाला डिझेल ओतून जाळण्याचा प्रयत्न, तुंबळ हाणामारीत 7 ते 8 जण जखमी

निवृत्तीला फक्त दोनच दिवस बाकी, पण पैशांचा मोह नडला, 80 हजारांची लाच मागितली, मालेगाव महापालिका आयुक्तांवर कारवाई

Malegaon : मालेगाव महापालिकेचे आयुक्त रवींद्र जाधव हे 31 ऑक्टोबरला शासकीय सेवेतून सेवानिवृत्त होणार होते

Ravindra Jadhav : आयुक्त रवींद्र जाधव यांची कारकीर्द -

Nashik Malegaon Accident: पिकअप वाहनाची दुचाकीला धडक; अपघातात पती, पत्नी आणि 18 वर्षीय मुलीचा मृत्यू, मालेगावमधील घटना

परभणीत बस-दुचाकीच्या भीषण अपघातात दोघांचा जागीच मृत्यू- (Parbhani Accident News)

नांदेडमध्ये अपघातानंतर मदतकार्य करणाऱ्यांना ट्रेलरची धडक- (Nanded Bus Accident)

राज्यासह देश-विदेशातील महत्वाच्या घडामोडी, VIDEO:

संबंधित बातमी:

मुंबईत 15 लाखांच्या लाचप्रकरणी अधिकारी अटकेत; येवल्यात 1500 रु घेताना तलाठी रंगेहात अडकला

येवल्यात 1500 रुपये घेताना तलाठी जाळ्यात

हेही वाचा

महाराष्ट्रातील कारस्थानी राजकीय मंडळींचे प्रयत्न - तुषार भोसले

‘दुष्काळ आणि आपत्तीच्या काळातही कुंभमेळ्याची परंपरा खंडित झाली नाही’

‘कुंभमेळ्यात जातीभेदाला स्थान नाही’

पहिल्या सत्रात सामाजिक, सांस्कृतिक आणि राजकीय दृष्टिकोनातून चर्चा

Kumbh Mela 2027: नाशिकमध्ये एबीपी माझाचा ‘महाकुंभ महासंवाद’; धर्म, संस्कृती ते प्रशासनापर्यंत रंगणार विचारमंथन!

पहिले सत्र - सामाजिक, सांस्कृतिक आणि राजकीय दृष्टिकोनातून कुंभमेळ्याची चर्चा (Kumbh Mela 2027)

दुसरे सत्र - धर्म आणि परंपरांवर विचारमंथन

तिसरे सत्र - कुंभमेळ्यातील आध्यात्मिकतेवर चर्चा

पर्यावरण संवर्धन आणि शाश्वत विकासावर भर

‘द ग्रेट रिस्पॉन्सिबिलिटी’ सत्रात गिरीश महाजन

कुंभमेळ्याच्या प्रशासकीय आव्हानांवर मंथन

मनोरंजन, आध्यात्मिक क्षेत्रातील मान्यवरांची उपस्थिती

सिंहस्थ कुंभमेळ्याच्या पार्श्वभूमीवर महासंवादाला महत्त्व

31 ऑक्टोबरला ध्वजारोहण; 2028 पर्यंत चालणार सिंहस्थ पर्व (Kumbh Mela 2027)

नाशिक कुंभमेळ्याचे वेळापत्रक

शाही स्नानाचे महत्त्व काय?

नाशिक आणि त्र्यंबकेश्वरचे धार्मिक महत्त्व

भाविकांनी कोणती काळजी घ्यावी?

युवकाचं लग्न सुरू असतानाचा पहिल्या पत्नीची एन्ट्री, नवरदेवाला चोप; लग्नसोहळ्यात पिच्चरटाईप गोंधळ

पोलिसांकडून चौकशी सुरू

हेही वाचा

ध्वजारोहण सोहळ्याचे महत्त्व काय? (Kumbh Mela 2026)

ध्वजारोहणाचा शुभ मुहूर्त कधी?

2027 मधील प्रमुख अमृतस्नानाच्या तारखा

नाशिकमध्ये ध्वजारोहण नेमके कोठे होते?

कुंभमेळा 2026 मध्ये की 2027 मध्ये?

सिंहस्थ पर्वाची जय्यत तयारी...

Shani Dev: 2028, 2030 आणि 2032 पर्यंत संयम ठेवा...शनिच्या साडेसाती कचाट्यात 3 राशी..पैसा, नोकरी, प्रेम? ज्योतिषशास्त्र...

प्रेमविवाहाचा राग मनात; येवल्यात भर लग्नात नवरदेवाला डिझेल ओतून जाळण्याचा प्रयत्न, तुंबळ हाणामारीत 7 ते 8 जण जखमी