मंत्रालयात शिक्षणमंत्र्यांच्या अधिकाराला कात्री, अवर सचिव स्तरावरच निर्णय; मंत्री दादा भुसेंची पहिली प्रतिक्रिया

प्रांताधिकाऱ्याचा त्रास, मनमानी कारभार; नाशिकमध्ये निलंबनाच्या कारवाईविरुद्ध 800 तलाठी, ग्रामसेवक एकटवले

शुभम बोडके — Tue, 15 Sep 2026 14:11:30 +0530

नाशिक : राज्यात गणेशोत्सवाची धूम आणि उत्साह पाहायला मिळत आहे. मात्र, दुसरीकडे मराठा आरक्षण आणि जात पडताळणी प्रमाणपत्राच्या मुद्द्यावरुन मराठा आंदोलक मनोज जरांगे पाटील यांनी मुंबईकडे कूच केली आहे. गणेशोत्सवामुळे पोलिसांनी मुंबईतील त्यांच्या आंदोलनाला परवानगी नाकारली आहे. तर, दुसरीकडे नाशिक (Nashik) जिल्ह्यात प्रांताधिकाऱ्यांच्या मनमानी कारभाराविरुद्ध तब्बल 800 तलाठी (Talathi) आणि ग्रामविकास अधिकाऱ्यांनी ठिय्या आंदोलन केले आहे. त्यामुळे, जिल्ह्याच्या प्रशासकीय वर्तुळात खळबळ उडाली आहे.

प्रशासनातील काही अधिकाऱ्यांच्या कडक शिस्त आणि कठोर कामकाजाचा अनुभव कर्मचाऱ्यांना अनेकदा येत असतो. मात्र, कायम ग्रामस्थ आणि सर्वसामान्य नागरिकांच्या टीकेचे धनी बनणाऱ्या ग्रामविकास अधिकारी आणि तलाठी यांनाच एका खमक्या अधिकाऱ्याचा सामना करावा लागला आहे. त्यामुळे, तलाठी आणि ग्रामविकास अधिकाऱ्यांनी थेट आंदोलनाचा ठिय्या गाठला आहे. नाशिक जिल्ह्यातील प्रांत अधिकारी पवन दत्ता यांच्या मनमानी कारभाराविरोधात तलाठी महासंघ नाशिकमध्ये आक्रमक झाला आहे. इगतपुरी व त्रंबकेश्वर प्रांताधिकार्‍यांचा मनमानी कारभार थांबवा, अन्यायकारक निलंबन व फेरा फेर कारवाईचा निषेध करत जिल्ह्यातील तलाठी एकवटल्याचं दिसून आलं. तसेच, निलंबित ग्राम महसूल अधिकारी व मंडळ अधिकारी यांचे बेकायदेशीर निलंबन व सक्तीच्या कारवाई मागे घ्याव्यात, यांसह इतर मागण्या मान्य कराव्या अशी मागणीही यावेळी तलाठी महोदयांनी केली.

आपल्या प्रशासकीय सेवेतील या विविध मागण्यांसाठी 15 तालुक्यातील ग्राम महसूल अधिकारी व मंडळ अधिकारी यांनी एकत्र येत आंदोलनात सहभाग नोंदवला. विशेष म्हणजे, प्रांताधिकाऱ्यांविरुद्ध जवळपास 800 तलाठी नाशिकच्या जिल्हाधिकारी कार्यालयाबाहेर धरणे आंदोलनाला बसले आहेत.

हेही वाचा

मनोज जरांगे मुंबईकडे रवाना होताच पत्नीसह मुली संतापल्या; म्हणाल्या, 'वडिलांना काही झाल्यास डोळे पुसायला रुमाल...'

Nashik Collector Ayush Prasad: चक्क नाशिकच्या जिल्हाधिकाऱ्यांच्या नावाने बनावट व्हॉट्सॲप अकाउंट; थायलंडच्या नंबरवरून मेसेज आला अन्..., नेमकं काय घडलं?

मुकुल कुलकर्णी, एबीपी माझा — Tue, 15 Sep 2026 09:18:24 +0530

Nashik Collector Ayush Prasad: नाशिकचे जिल्हाधिकारी आयुष प्रसाद (Nashik Collector Ayush Prasad) यांच्या नावाने बनावट व्हॉट्सॲप अकाउंट (Fake WhatsApp Account) तयार करून नागरिकांशी संपर्क साधण्याचा प्रयत्न केल्याचा धक्कादायक प्रकार समोर आला आहे. जिल्हाधिकाऱ्यांचे नाव, छायाचित्र आणि पदाचा गैरवापर करून परदेशी क्रमांकावरून संदेश पाठवले जात असल्याचे निदर्शनास आले आहे. या प्रकारामुळे प्रशासकीय वर्तुळात खळबळ उडाली असून, नागरिकांनी अशा संशयास्पद संदेशांपासून सावध राहण्याचे आवाहन करण्यात आले आहे.

याबाबत मिळालेल्या माहितीनुसार, थायलंडमधील (Thailand) +66 92 455 6074 या क्रमांकाचा वापर करून हे बनावट व्हॉट्सॲप अकाउंट तयार करण्यात आले आहे. संबंधित अकाउंटवर ‘Business Account’ (व्यावसायिक खाते) असे दर्शविण्यात येत आहे. या अकाउंटवर जिल्हाधिकारी आयुष प्रसाद यांचे नाव आणि छायाचित्र वापरण्यात आले असून, त्यांच्या पदाचा गैरवापर करून नागरिकांशी संपर्क साधण्याचा प्रयत्न केला जात आहे.

या बनावट अकाउंटवरून “Hello… How are you doing… Where are you at the moment?” अशा स्वरूपाचे संदेश पाठवले जात असल्याचे समोर आले आहे. या संदेशांद्वारे संबंधित व्यक्तींशी संवाद सुरू करण्याचा प्रयत्न केला जात आहे. त्यामुळे हा प्रकार सायबर फसवणुकीच्या (Cyber Fraud) उद्देशाने केला जात आहे का, याबाबत नागरिकांमध्ये चिंता निर्माण झाली आहे. मात्र, या अकाउंटमागे नेमका कोणाचा हात आहे आणि संपर्क साधण्यामागील उद्देश काय आहे, हे अद्याप स्पष्ट झालेले नाही.

जिल्हाधिकारी आयुष प्रसाद यांच्या नावाने तयार करण्यात आलेल्या या बनावट अकाउंटच्या पार्श्वभूमीवर नागरिकांना विशेष खबरदारी घेण्याचे आवाहन करण्यात आले आहे. संबंधित परदेशी क्रमांकावरून येणाऱ्या कोणत्याही संदेशाला, फोनला अथवा अन्य स्वरूपातील संपर्काला प्रतिसाद देऊ नये, असे प्रशासनाकडून स्पष्ट करण्यात आले आहे. तसेच, या क्रमांकावर कोणतीही वैयक्तिक माहिती (Personal Information), महत्त्वाची कागदपत्रे (Documents), ओटीपी (OTP), बँक खात्याची माहिती (Bank Account Details) अथवा आर्थिक व्यवहाराशी संबंधित माहिती (Financial Transaction Details) देऊ नये, असेही सांगण्यात आले आहे.

नागरिकांना एखाद्या संशयास्पद क्रमांकावरून संदेश किंवा फोन आल्यास त्याकडे दुर्लक्ष करून संबंधित यंत्रणेला माहिती देण्याचे आवाहन जिल्हाधिकाऱ्यांकडून करण्यात आले आहे. अशा प्रकारच्या बनावट अकाउंटद्वारे होणारी फसवणूक टाळण्यासाठी नागरिकांनी सतर्क राहणे गरजेचे आहे. दरम्यान, जिल्हाधिकारी आयुष प्रसाद यांच्या नावाने तयार करण्यात आलेल्या या बनावट व्हॉट्सॲप अकाउंटबाबत पुढील तपासात अधिक माहिती समोर येण्याची शक्यता आहे.

आणखी वाचा

Chhatrapati Sambhajinagar Accident: गणपती आगमन मिरवणुकीत भरधाव कंटेनर घुसला अन् अनर्थ घडला; दोन शेतकऱ्यांचा जागीच मृत्यू, 12 जण जखमी, छ. संभाजीनगरमधील घटना

Nashik Crime news: भ्रष्टाचाराचे आरोप झालेल्या शिक्षण संस्थेतील प्राध्यापकाचा संशयास्पद मृत्यू, जिन्यावरुन पाय घसरुन पडले, शिवसैनिकांना वेगळाच संशय, पोलिसांना म्हणाले...

संदीप जेजुरकर — Wed, 9 Sep 2026 09:22:28 +0530

Nashik Crime news: नाशिकच्या मालेगावातील महात्मा गांधी विद्यामंदिर संस्थेच्या म्युनिसिपल शाळेतील कनिष्ठ महाविद्यालयातील प्राध्यापक सोपान बोरसे यांचा मंगळवारी शाळेतील जिन्याच्या पायऱ्या घसरून पडले व त्यानंतर त्यांचा मृत्यू झाला होता. त्यांच्या मृत्यूनंतर शिवसेना पदाधिकाऱ्यांनी अपर पोलीस अधीक्षक यांची भेट घेतली. मयत प्राध्यापक सोपान बोरसे (Sopan Borse) यांच्या मृतदेहाचे शवविच्छेदन वरिष्ठ अधिकाऱ्यांच्या उपस्थितीत ' इन कॅमेरा ' करण्यात यावे अशी मागणी या शिवसेना (Shivsena) पदाधिकाऱ्यांनी अपर पोलीस अधीक्षक सुरज गुंजाळ यांच्याकडे केली. पोलीस शिवसैनिकांची ही मागणी मान्य करणार का, हे आता पाहावे लागेल. तसे झाल्यास सोपान बोरसे यांच्या शवविच्छेदन अहवालातून काही धक्कादायक माहिती समोर येणार का, याबद्दल अनेकांना कुतूहल आहे. मध्यंतरीच्या काळात महात्मा गांधी विद्यामंदिर संस्थेत भ्रष्टाचार झाल्याच्या बातम्या आल्या होत्या. हा भ्रष्टाचार (Corruption) लपवण्यासाठी संस्थाचालकांकडून शिक्षकांवर दबाव होता होता का ? असा संशय देखील शिवसेना पदाधिकाऱ्यांनी व्यक्त केला असून या प्रकरणात सखोल चौकशीची मागणी केली आहे. या सगळ्यामुळे महात्मा गांधी विद्यामंदिर संस्थाही वादाच्या भोवऱ्यात सापडली आहे. त्यांच्यावरही प्रशासनाकडून कोणती कारवाई होणार का, याकडे सगळ्यांच्या नजरा लागल्या आहेत. (Maharashtra Crime news)

सोपान बोरसे यांच्या मृत्यूप्रकरणी शिक्षण उपसंचालक, माध्यमिक शिक्षणाधिकारी, प्रशासक अधिकारी, गटशिक्षणाधिकारी या सगळ्यांवर मालेगाव शहर पोलीस ठाण्यात गुन्हा दाखल करण्यात आला. मयत प्राध्यापकास वेळोवेळी चौकशीस बोलवणे, गुन्हा दाखल करण्याची धमकी देणे व अपमानित करणे आदी कारणामुळे त्यांना हृदयविकाराचा झटका आल्याने त्यांचे मृत्यूस कारणीभूत ठरल्याचे फिर्यादीत म्हटले आहे. मंगळवारी सायंकाळी हे प्रकरण घडल्यानंतर संस्थेच्या शिक्षक व शिक्षकेतर कर्मचाऱ्यांनी प्राध्यापकांच्या मृत्यूस कारणीभूत असलेल्या शिक्षण विभागाचे अधिकारी व संबंधितांनवर मनुष्यवधाचा गुन्हा दाखल करा, अशी मागणी मालेगाव शहर पोलीस ठाण्यात केली होती. मयत प्राध्यापकाच्या भावाने याप्रकरणी पोलिसात फिर्याद दाखल केली होती. त्यामुळे या प्रकरणात आता पोलीस पुढे काय कारवाई करणार, याकडे सर्वांच्या नजरा लागल्या आहेत.

इतर बातम्या

Manipuri Musician Chongtham Vikram Singh Killed: खळबळजनक! संगीतकार कचरा टाकायला गेला अन् सुरू असलेल्या गोंगाटावर आक्षेप नोंदवला, टोळक्यानं तिसऱ्या मजल्यापर्यंत पाठलाग करुन संपवलं

Pune Crime News: रेल्वे ट्रॅकवर गांजा पिणाऱ्या टोळक्याने कोयत्याने पोलीस शिपायाचा गळा चिरला; पुण्यातील थरकाप उडवणारी घटना

जरांगे पाटलांना इतरांनी अभ्यासाची भूमिका मांडलेलं चालत नाही; बैठकीनंतर मराठा क्रांती मोर्चाचे भोर स्पष्टच बोलले

मुकुल कुलकर्णी, एबीपी माझा — Tue, 8 Sep 2026 16:01:40 +0530

नाशिक : राज्यात एकीकडे उपोषणकर्ते मनोज जरांगे पाटील (Manoj Jarange) यांचे उपोषण सुरू असताना दुसरीकडे मराठा क्रांती मोर्चाच्या पदाधिकाऱ्यांनी नाशिकमध्ये बैठक घेतली. यावेळी, जरांगे पाटलांच्या आंदोलनास आपला पाठिंबा आहे. मात्र, आमच्या मागण्या एसईबीसी आरक्षणाच्या संदर्भात असल्याचं पदाधिकाऱ्यांनी म्हटलं. मराठा समाजाला SEBC आरक्षण देणे ही सरकारची जबाबदारी आहे. मात्र, मंत्री राधाकृष्ण विखे पाटील यांनी मराठा समाजाच्या विरोधात काम केले, मराठा (maratha) समाजाच्या बाबतीत सरकार गंभीर नाही. सध्या साडेतीन कोटी मराठे SEBC चा लाभ घेतात, पण सरकार याकडे दुर्लक्ष का करत आहे, असे म्हणत सकल मराठा समाजाच्या पदाधिकाऱ्यांनी आरक्षणाच्या मुद्द्यावर आपली भूमिका मांडली .

बैठकीनंतर माध्यमांशी बोलताना किरण गायकर म्हणाले, मराठा समाजात काम करणाऱ्या अभ्यासकांसोबत सरकारने बैठक घ्यावी, सारथीला किती निधी दिला हे सरकारने जाहीर केले पाहिजे. तसेच, अण्णासाहेब पाटील आर्थिक विकास महामंडळ बाबतीत सरकारकडून व्याज परतावा दिला जात नाही. शिष्यवृत्तीला 200 कोटी रुपये देतोय असे सरकार सांगत आहे, पण देतोय नव्हे दिले असे सांगा, असेही मराठा बांधवांनी म्हटले. हैदराबाद गॅझेट बाबतीत आम्ही मराठवाडाच्या पाठिशी आहोत. पण SEBC च्या मागणी बाबतीत मराठवाड्यातील लोकांनी आमच्या पाठीशी उभे राहावे. जरांगे पाटील आणि आमच्या मागणीत फरक आहे, आम्ही SEBC चा लढा लढतोय, आम्ही समाजाची समिती नेमत आहोत. जरांगे पाटील तिकडून लढत आहेत, आम्ही SEBC साठी लढत आहे. जरांगे पाटील हे SEBC बाबत का बोलत नाहीत हे त्यांना विचारावे, असेही पदाधिकारी किरण गायकर यांनी म्हटले.

दरम्यान, जरांगे पाटील खूप ताणून धरत आहेत का? असा प्रश्न पदाधिकाऱ्यांना विचारण्यात आला होता. त्यावर, हैदराबाद गॅझेटचे प्रश्न सरकार व्यवस्थित हाताळत नाही, त्यासाठी जरांगे पाटील यांच्याकडून लढा दिला जात आहे, अशी प्रतिक्रिया मराठा क्रांती मोर्चाच्या पदाधिकाऱ्यांनी दिली.

जरांगे पाटलांना अभ्यासाची भूमिका चालत नाही - संजीव भोर

जरांगे पाटील यांनाच सर्व समजतं असे नाही, जरांगे पाटील यांची कार्यशैली अशी आहे की कोणालाच विचारायचे नाही. ती कार्यशैली बदलावी असा आमचा आग्रह नाही. पण, जरांगे पाटील यांना इतरांनी कोणी अभ्यासची भूमिका मांडावी हे चालत नाही, म्हणून आम्ही त्याच्याशी डोके लावणार नाही. जरांगे पाटील यांचे आंदोलन आता सुरू झाले, आम्ही त्याआधी 15 वर्षांपासून आंदोलन करतोय, असे मराठा समाज पदाधिकारी संजीव भोर यांनी म्हटले. मात्र, जरांगे यांचे आंदोलन कोणी चिरडून टाकण्याचा प्रयत्न केला तर आम्ही पाटलांसोबत राहू, असेही त्यांनी स्पष्ट केले.

मराठा क्रांती मोर्चाची संस्कृती सर्वांना माहिती आहे, कोणालाही अर्वाच्य भाषेत शिवीगाळ केलेलं आम्हाला मान्य नाही. कोणत्याही नेत्याला, महिला अधिकाऱ्यास शिवाजी महाराजांच्या पुतळ्यासमोर बसून अर्वाच्य भाषेत शिव्या देणे मराठा समाजाला मान्य नाही, असेही भोर यांनी स्पष्ट केले.

हेही वाचा

मनोज जरांगे पाटलांच्या आंदोलनाचा 11 वा दिवस; राधाकृष्ण विखे पाटलानंतर मुख्यमंत्र्यांकडून भूमिका स्पष्ट, म्हणाले...

Nashik News: ‘रस्त्यांच्या कामात चूक दाखवा, मी नाव बदलेन’; नाशिक महापालिका आयुक्तांचे टीकाकारांना ओपन चॅलेंज

मुकुल कुलकर्णी, एबीपी माझा — Mon, 7 Sep 2026 15:49:41 +0530

Nashik News: नाशिक शहरातील (Nashik City) सुरू असलेल्या रस्त्यांच्या (Road Works) कामांच्या दर्जावरून (Quality) गेल्या काही दिवसांपासून प्रश्न उपस्थित केले जात असताना, महापालिका आयुक्त मनीषा खत्री (Manisha Khatri) यांनी आक्षेप घेणाऱ्यांना थेट ओपन चॅलेंज (Open Challenge) दिले आहे. रस्त्यांच्या कामाच्या दर्जाबाबत चूक दाखवून दिल्यास आपण आपले नाव बदलू, अशी सडेतोड भूमिका आयुक्तांनी घेतली आहे.

Nashik News: आयुक्तांकडून त्र्यंबकनाका परिसरातील रस्त्यांच्या कामांची पाहणी

कुंभमेळ्याच्या पार्श्वभूमीवर नाशिक शहरात विविध महत्त्वाच्या रस्त्यांची कामे सुरू आहेत. या कामांच्या दर्जावरून विरोधकांकडून तसेच काही नागरिकांकडून प्रश्न उपस्थित केले जात आहेत. त्यामुळे महापालिका प्रशासनाने रस्त्यांच्या गुणवत्तेची तांत्रिक तपासणी करण्यावर भर दिला आहे. महापालिका आयुक्त मनीषा खत्री यांनी त्र्यंबकनाका (Trimbak Naka) परिसरातील रस्त्यांच्या कामांची प्रत्यक्ष पाहणी केली. यावेळी रस्त्याच्या बांधकामाची पद्धत, वापरण्यात आलेले साहित्य आणि तांत्रिक निकषांची पूर्तता याबाबत संबंधित अधिकाऱ्यांकडून माहिती घेण्यात आली. रस्त्यांच्या दर्जाबाबत कोणतीही तडजोड केली जाणार नसल्याचे आयुक्तांनी स्पष्ट केले.

Nashik News: चार वेगवेगळ्या संस्थांकडून रस्त्यांची गुणवत्ता तपासणी

नाशिक शहरातील रस्त्यांच्या गुणवत्तेबाबत अधिक पारदर्शकता ठेवण्यासाठी चार वेगवेगळ्या संस्थांकडून तपासणी केली जात आहे. विशेष म्हणजे काँक्रिट रस्त्यांची गुणवत्ता तपासण्यासाठी IIT मुंबईच्या तज्ज्ञांकडूनही प्रत्यक्ष पाहणी करण्यात आली. या तपासणीदरम्यान शहरातील तीन प्रमुख काँक्रिट रस्त्यांची पाहणी करण्यात आली. यामध्ये त्र्यंबकरोडवरील खडकाळी सिग्नल ते ITI सिग्नल या रस्त्याचा, ITI सिग्नल ते पिंपळगाव बहुला तसेच गरवारे ते XL-O पॉइंट या रस्त्यांचा समावेश आहे.

Nashik News: कोअर कटद्वारे काँक्रिटची जाडी तपासली

तज्ज्ञांकडून करण्यात आलेल्या तपासणीदरम्यान कोअर कट पद्धतीचा वापर करून काँक्रिट रस्त्याची प्रत्यक्ष जाडी तपासण्यात आली. रस्त्याच्या बांधकामासाठी निश्चित करण्यात आलेल्या तांत्रिक निकषांनुसार काम झाले आहे की नाही, याची पडताळणी करण्यात आली. प्राथमिक तपासणीत रस्त्यांची कामे तांत्रिक निकष आणि निर्धारित मानकांनुसार योग्य असल्याचे निष्पन्न झाल्याची माहिती महापालिका प्रशासनाकडून देण्यात आली आहे. मात्र, अंतिम निष्कर्ष तज्ज्ञांच्या सविस्तर तपासणी अहवालानंतरच स्पष्ट होणार आहे.

Nashik News: IIT मुंबईच्या अंतिम तपासणीनंतरच ठेकेदारांना बिल

रस्त्यांच्या कामांच्या गुणवत्तेबाबत महापालिका प्रशासनाने कठोर भूमिका घेतली आहे. IIT मुंबईच्या अंतिम तपासणीचा अहवाल प्राप्त झाल्यानंतरच संबंधित ठेकेदारांना बिल अदा केले जाणार आहे. यामुळे रस्त्यांच्या कामांच्या दर्जाबाबत प्रशासनाने कोणतीही घाई न करता तांत्रिक तपासणीला प्राधान्य दिल्याचे दिसून येत आहे. कामाचा दर्जा निश्चित मानकांनुसार असल्याची खात्री झाल्यानंतरच देयके देण्याची भूमिका महापालिकेने घेतली आहे.

Nashik News: ‘चूक दाखवा, मी नाव बदलेन’; आयुक्तांचे थेट आव्हान

रस्त्यांच्या कामांच्या दर्जावर सातत्याने प्रश्न उपस्थित होत असल्याच्या पार्श्वभूमीवर आयुक्त मनीषा खत्री यांनी टीकाकारांना थेट आव्हान दिले आहे. रस्त्यांच्या दर्जाबाबतची चूक दाखवा, मी नाव बदलेन, अशी सडेतोड भूमिका त्यांनी मांडली आहे. त्यामुळे नाशिकमधील रस्त्यांच्या कामांच्या गुणवत्तेवरून सुरू असलेल्या चर्चेला आता आयुक्तांच्या या वक्तव्यामुळे आणखी धार आली आहे.

राज्य आणि देश-विदेशातील महत्त्वाच्या बातम्या; पाहा व्हिडीओ

आणखी वाचा

Nashik News: कुंभ नगरी नाशिकमध्ये नवा वाद, बीफ मार्केट-कत्तलखान्याची 'ती' 5 कोटींची निविदा महापौरांकडून रद्द, म्हणाल्या, 'नाशिकच्या पावित्र्याशी...'

Nashik Accident News: त्र्यंबकेश्वरला दर्शनासाठी जाताना गर्दीत धक्का लागला, खाली कोसळली अन् ST बसचं चाक अंगावरून गेलं; 17 वर्षीय युवतीचा मृत्यू, नाशिकमध्ये काळजाचा ठोका चुकवणारी घटना

मुकुल कुलकर्णी, एबीपी माझा — Mon, 7 Sep 2026 10:34:19 +0530

Nashik Accident News: नाशिकमधील (Nashik) अत्यंत गजबजलेल्या ठक्कर बाजार बसस्थानकात (Thakkar Bazar Bus Stand) एक काळीज पिळवटून टाकणारी अपघाताची (Accident) घटना घडली आहे. त्र्यंबकेश्वर येथे दर्शनासाठी निघालेल्या एका 17 वर्षीय तरुणीचा एसटी बसखाली (ST Bus) चिरडून दुर्दैवी मृत्यू (Tragic Death) झाला. रविवारी रात्री सुमारे नऊ वाजताच्या सुमारास ही भीषण दुर्घटना घडली असून या घटनेमुळे संपूर्ण बसस्थानक परिसरात एकच खळबळ उडाली आहे.

याबाबत मिळालेल्या माहितीनुसार, आकांक्षा रामभाऊ शेलार (वय 17) असे या मृत तरुणीचे नाव आहे. आकांक्षा ही आपल्या कुटुंबासह त्र्यंबकेश्वर (Trimbakeshwar) येथे दर्शनासाठी जाण्यासाठी ठक्कर बाजार बसस्थानकात आली होती. रात्रीच्या वेळी बसस्थानकात प्रवाशांची प्रचंड गर्दी (Crowd) होती. बस पकडण्यासाठी चाललेल्या लोटालोटीत आकांक्षाला जोरात धक्का लागला आणि ती अचानक खाली कोसळली. याच वेळी स्थानकातून पुढे जाणाऱ्या एसटी बसचे मागील चाक तिच्या अंगावरून गेल्याने तिचा जागीच दुर्दैवी अंत झाला.

Nashik Accident News: लेकीचा अपघात पाहून आईलाही आली भोवळ

अपघातानंतर आकांक्षाच्या चुलत भावाने अत्यंत तत्परता दाखवत तिला तातडीने रिक्षामधून नाशिकच्या जिल्हा रुग्णालयात (District Hospital) उपचारासाठी दाखल केले. मात्र, डॉक्टरांनी तपासणी करून तिला दाखल करण्यापूर्वीच मृत घोषित केले. स्वतःच्या डोळ्यांसमोर लेकीचा असा भीषण अपघात आणि मृत्यू पाहिल्याने तिच्या आईला मोठा धक्का बसून त्या जागीच भोवळ येऊन पडल्या.

Nashik Accident News: एसटी महामंडळाचे स्पष्टीकरण

दरम्यान, या प्रकरणी निष्काळजीपणा दाखवणाऱ्या एसटी बसचालकाविरोधात (Bus Driver) गुन्हा दाखल (Case Registered) करण्याची प्रक्रिया नाशिक पोलिसांकडून सुरू आहे. तर दुसरीकडे, प्रवाशांच्या अतिगर्दीमुळे आणि लोटालोटीमुळेच ही दुर्दैवी घटना घडल्याचे स्पष्टीकरण एसटी महामंडळाकडून (MSRTC) देण्यात आले आहे. या घटनेमुळे नाशिककरांमधून आणि प्रवाशांमधून हळहळ व्यक्त केली जात आहे.

Jalgaon Accident News: जळगावजवळील पाळधी-तरसोद बायपासवर भीषण अपघात

दरम्यान, जळगावजवळील पाळधी-तरसोद बायपासवर भीषण अपघाताची घटना घडली आहे. तरसोद गावाजवळ ट्रॉली आणि कंटेनरची समोरासमोर जोरदार धडक झाली. या अपघातात दोन्ही वाहनांचे मोठे नुकसान झाले असून दोन्ही वाहनांचे चालक गंभीर जखमी झाले आहेत. दोन्ही चालकांना उपचारासाठी रुग्णालयात दाखल करण्यात आले आहे. गेल्या महिन्यात झालेल्या अतिवृष्टीमुळे रस्त्याचा भराव खचल्याने हा बायपास दुरुस्तीसाठी बंद करण्यात आला होता. मात्र, याच बंद मार्गावर हा भीषण अपघात झाल्याने रस्त्याच्या सुरक्षेचा प्रश्न पुन्हा ऐरणीवर आला आहे.

राज्य आणि देश-विदेशातील महत्त्वाच्या बातम्या; पाहा व्हिडीओ

आणखी वाचा

Nashik News: कुंभ नगरी नाशिकमध्ये नवा वाद, बीफ मार्केट-कत्तलखान्याची 'ती' 5 कोटींची निविदा महापौरांकडून रद्द, म्हणाल्या, 'नाशिकच्या पावित्र्याशी...'

मुकुल कुलकर्णी, एबीपी माझा — Mon, 7 Sep 2026 09:53:23 +0530

Nashik News: कुंभ नगरी म्हणून ओळखल्या जाणाऱ्या नाशिकमध्ये (Nashik) बीफ मार्केट (Beef Market) आणि कत्तलखाना (Slaughterhouse) उभारण्याच्या मुद्द्यावरून नवा वाद निर्माण झाला आहे. नाशिक महापालिका प्रशासनाकडून (Nashik Municipal Corporation Administration) बीफ मार्केट आणि कत्तलखान्यासाठी परस्पर निविदा (Tender) काढण्यात आल्याचा आरोप महापौर हिमगौरी आडके (Himgauri Adke) यांनी केला आहे. या पार्श्वभूमीवर भद्रकाली (Bhadrakali) परिसरातील कत्तलखान्यासाठी काढण्यात आलेली निविदा महापौरांकडून रद्द करण्यात आली आहे. कत्तलखाना आणि बीफ मार्केट उभारण्यासाठी तब्बल 5 कोटी रुपयांची ई-निविदा काढण्यात आली होती. मात्र, ही निविदा रद्द करण्याचा निर्णय घेण्यात आला आहे.

Nashik News: 5 कोटींची ई-निविदा रद्द

नाशिकच्या भद्रकाली परिसरात कत्तलखाना आणि बीफ मार्केट उभारण्यासाठी महापालिका प्रशासनाकडून निविदा प्रक्रिया राबवण्यात आली होती. या कामासाठी सुमारे 5 कोटी रुपयांचा निधी प्रस्तावित करण्यात आला होता. मात्र, महापौर हिमगौरी आडके यांनी या निविदेला विरोध करत ती रद्द करण्याचा निर्णय घेतला आहे. कत्तलखाना आणि बीफ मार्केट उभारण्याऐवजी हा निधी नागरिकांच्या दैनंदिन गरजांसाठी वापरण्याचे निर्देश देण्यात आले आहेत.

Nashik News: रस्ते, पाणीपुरवठ्यासाठी निधी वळवणार

कत्तलखान्यासाठी प्रस्तावित करण्यात आलेला निधी आता मूलभूत नागरी सुविधांकडे वळवण्यात येणार आहे. यामध्ये रस्ते, पाणीपुरवठा आणि इतर नागरी सुविधा यांचा समावेश आहे. नागरिकांच्या दैनंदिन गरजा पूर्ण करण्यासाठी उपलब्ध निधीचा वापर करण्यात यावा, अशी भूमिका महापौरांनी घेतली आहे.

Nashik News: ‘नाशिकच्या पावित्र्याशी आणि नागरिकांच्या भावनांशी तडजोड नाही’

कत्तलखाना आणि बीफ मार्केटला विरोध करताना महापौर हिमगौरी आडके यांनी नाशिकच्या धार्मिक आणि सांस्कृतिक महत्त्वाचा मुद्दा उपस्थित केला आहे. “नाशिकच्या पावित्र्याशी आणि नागरिकांच्या भावनांशी तडजोड केली जाणार नाही,” अशी भूमिका त्यांनी घेतली आहे. त्यामुळे कत्तलखाना आणि बीफ मार्केटसाठी प्रस्तावित करण्यात आलेल्या प्रकल्पाला विरोध करण्यात आला आहे. कुंभ नगरी नाशिकमध्ये नागरिकांच्या मूलभूत सुविधांना प्राधान्य देत 5 कोटींचा निधी रस्ते, पाणीपुरवठा आणि इतर नागरी कामांसाठी वापरण्याचा निर्णय घेण्यात आल्याने या निर्णयाकडे आता नाशिककरांचे लक्ष लागले आहे.

राज्य आणि देश-विदेशातील महत्त्वाच्या बातम्या; पाहा व्हिडीओ

इतर महत्त्वाच्या बातम्या

Baba Amte Anand Niketan: बाबा आमटेंनी उभारलेल्या ‘आनंद निकेतन’ची जबाबदारी आता दुसऱ्या संस्थेकडे? आमटे परिवाराचा मोठा निर्णय, नेमकं काय घडलं?

Nashik News: 8 वर्षीय चिमुकलीच्या मृत्यूनंतर त्याच आश्रमशाळेतील 24 विद्यार्थी रुग्णालयात दाखल, प्रशासन अलर्ट मोडवर; नाशिकमध्ये नेमकं काय घडलं?

Sudhirdas Pujari on Raj Thackeray: गणपतीत दंगली घडवल्या जातील, राज ठाकरेंच्या 'त्या' वक्तव्यावर महंत सुधीरदास पुजारींचा पलटवार; म्हणाले...

मुकुल कुलकर्णी, एबीपी माझा — Sun, 6 Sep 2026 14:36:05 +0530

Sudhirdas Pujari on Raj Thackeray: "आता 14 तारखेला गणपती येतील. मला सर्वाधिक भीती आहे की, गणपतीच्या दिवसात दंगली घडवल्या जातील. केवळ महाराष्ट्रात नाही म्हणत मी, देशात दंगली घडवल्या जातील, जेणेकरून तुम्ही त्यात अडकले पाहिजे, तुमचं इतर गोष्टीकडं दुर्लक्ष झालं पाहिजे," असा खळबळजनक दावा मनसे प्रमुख राज ठाकरे (Raj Thackeray) यांनी मनसेच्या पदाधिकारी मेळाव्यात केला. तसेच, या देशामध्ये जर बघितलं तर सगळ्या ठिकाणी नुसती एक धर्माची झिंग आलेली आहे. देवावरची श्रद्धा, धर्माबद्दलचा अभिमान, इथपर्यंत आपण समजू शकतो, पण झिंग नाही. आपण धर्मांध असून चालणार नाही. आपल्याला अभिमान असला पाहिजे. पण ज्या प्रकारचे आता देशभरामध्ये वातावरण आहे ते वातावरण मुद्दाम तयार केले जाते आहे. इंस्टाग्राम, फेसबुक आणि इतर सगळ्या गोष्टींना तुमच्यापर्यंत पाठवले जाते आहे. त्यातून तुमच्यात राग निर्माण केला जातोय. जेणेकरून इतर गोष्टींकडे तुमचं दुर्लक्ष व्हावं, असे देखील त्यांनी म्हटले. आता राज ठाकरेंच्या वक्तव्याचा नाशिक येथील महंत सुधीरदास पुजारी (Mahant Sudhirdas Pujari) यांनी खरपूस समाचार घेतलाय.

Sudhirdas Pujari on Raj Thackeray: महंत सुधीरदास पुजारींची राज ठाकरेंवर टीका

मनसे अध्यक्ष राज ठाकरे यांच्या भाषणावर टीका करताना महंत सुधीरदास पुजारी म्हणाले की, ठाण्यातील कार्यक्रमामध्ये राज ठाकरे बोलले की, हिंदूंना धर्माची झिंग आलेली आहे. हिंदू धर्मामधील प्रवचन करणारे महात्मे, संत हे तुम्हाला आता गणपतीमध्ये दंगली घडवण्यास प्रवृत्त करतील. कार्यकर्त्यांना उद्देशून ते म्हणाले की तुम्ही साप आहात का? धर्माच्या पुंगी वरती तुम्ही डोलत आहात का? कार्यकर्त्यांचा त्यांनी अपमान केला. हिंदू अत्यंत सहिष्णू आहे, त्यादिवशी मुंबईमधील घडलेला प्रसंग देखील गणपती बाप्पाचे आगमन होत असताना काही धर्मांध लोकांनी त्या आगमन मूर्तीवर अंडे फेकले. त्यामुळे मुंबईतील तो प्रसंग घडला होता. त्या ठिकाणी प्रतिकात्मक निषेध नोंदवण्यात आला. हिंदूंचे कुठलेही अशा पद्धतीचे उद्दिष्ट नाहीत, सणवाराच्या काळात दंगल घडवून आणण्याचा प्रयत्न अशा पद्धतीची मांडणी करणे एका ज्येष्ठ नेते राज ठाकरे यांनी करणे चुकीचे आहे. वारंवार हिंदूंना दोषी धरणे हे त्याहून चुकीचे आहे. कार्यकर्त्यांनी राज ठाकरेंमध्ये गुंतून राहू नये आणि तुम्हाला त्यांच्यात गुंतून राहायचे असेल तर तुम्हाला कुठलेही भविष्य नाही, असे त्यांनी म्हटले आहे.

Raj Thackeray: नेमकं काय म्हणाले राज ठाकरे?

राज ठाकरे म्हणाले की, "आता गणपती येतील. 14 तारखेला गणपती येतील. मला सर्वाधिक भीती आहे की, गणपतीच्या दिवसात दंगली घडवल्या जातील. केवळ महाराष्ट्रात नाही म्हणत मी, देशात दंगली घडवल्या जातील, जेणेकरून तुम्ही त्यात अडकले पाहिजे, तुमचं इतर गोष्टीकडं दुर्लक्ष झालं पाहिजे. आताच मुंबईत त्याची झलक पाहिली तुम्ही. एक दोन घटना घडल्या, ही सुरुवात आहे. जो सुजाण हिंदू आहे. जो सुजाण मुस्लिम आहे. दोघांनाही सांगायचंय की सतर्क राहा. आपल्या नावाने, त्यांच्या नावाने यामध्ये कुणीतरी घुसवतील आणि दंगली घडवतील. हकनाक आपली पोरं जातील, त्यांची पोरं जातील. तिकडेच लक्ष जाईल तुमचं. एक दुसऱ्याचा दुस्वास करणे त्यात तुम्हाला गुंतवून ठेवणे, मूळ परिस्थितीकडे दुर्लक्ष करायला लावणे इतकाच कार्यक्रम आता सुरू आहे. आता देशाची परिस्थिती अत्यंत वाईट आहे.” असे त्यांनी म्हटले.

आणखी वाचा

Raj Thackeray on PM Narendra Modi: 7.8 टक्के जीडीपीच्या दाव्यावरून राज ठाकरेंचा पंतप्रधान मोदींवर हल्लाबोल; आकडेवारीसकट सगळं मांडलं, म्हणाले...

Nashik Accident News: जिवलग मित्रांचा तो चित्रपट ठरला शेवटचा; मध्यरात्री घरी परतताना अपघात; भरधाव बुलेट जीपवर आदळली अन्..; एकाचा मृत्यू, एक जखमी, नेमकं काय घडलं?

मुकुल कुलकर्णी, एबीपी माझा — Sun, 6 Sep 2026 10:54:25 +0530

नाशिक : चित्रपट पाहून घरी परतताना भीषण अपघात झाल्याची धक्कादायक घटना समोर आली आहे, यामध्ये तरूणाचा दुर्दैवी मृत्यू झाला आहे. चित्रपट पाहून परतणाऱ्या दोन मित्रांच्या दुचाकीची मालवाहू जीपला जोरदार धडक दिल्याने अपघात झाला. शिवाजीनगर परिसरात मध्यरात्री दोनच्या सुमारास ही अपघाताची घटना (Nashik Accident News) घडली आहे. यामध्ये पियुष विलास मोरे (२१) याचा जागीच मृत्यू झाला. तर मित्र अनुराग दुबे गंभीर जखमी झाले आहेत. अनुराग दुबे हे सैन्यदलात कार्यरत आहेत. अपघाताची थरारक घटना सीसीटीव्हीमध्ये कैद झाली आहे. धडकेनंतर दोन्ही मित्र रस्त्यालगत रक्तबंबाळ अवस्थेत पडले होते. जखमींना मदत न करता जीपचालक वाहनासह पसार झाले. पाठीमागून आलेल्या मित्रांनी (Nashik Accident News) जखमींना तातडीने रुग्णालयात दाखल केले, तर उपचारादरम्यान पियुषचा मृत्यू झाला. पियुष हा पदवीच्या द्वितीय वर्षात शिक्षण घेत होता, जाचकनगर परिसरात तरुणाच्या मृत्यूने हळहळ व्यक्त होत आहे.(Nashik Accident News)

Nashik Accident News: मध्यरात्री दोघे मित्र दुचाकीने जय भवानीरोडवरील जाचकनगरकडे....

मॉलमध्ये चित्रपट बघून शुक्रवारी (दि. ४) मध्यरात्री दोघे मित्र दुचाकीने जय भवानीरोडवरील जाचकनगरकडे परतत होते. यावेळी शिवाजीनगर येथे त्यांची दुचाकी एका मालवाहू जीपवर जाऊन आदळली. या धडकेत दोघे मित्र गंभीर जखमी झाले असून पियुष विलास मोरे (रा.२१, सत्यम पार्क) याचा जागीच मृत्यू झाला. त्याचा मित्र अनुराग दुबे याच्यावर रुग्णालयात उपचार सुरु आहेत. दुबे हे सैन्यदलात नोकरीला आहे.(Nashik Accident News)

Nashik Accident News: चित्रपट संपल्यानंतर रात्री दोन वाजण्याच्या सुमारास...

तर मिळालेल्या माहितीनुसार, जय भवानी रोड जाचक नगर सत्यम पार्कमध्ये राहणारा महाविद्यालयीन शिक्षण घेणारा पियुष व अनुराग हे दोघे आणि त्यांचे अन्य दोन मित्र असे चौघे जण दोन दुचाकींनी चित्रपट बघण्यासाठी (Nashik Accident News) शुक्रवारी रात्री गेले होते. चित्रपट संपल्यानंतर रात्री दोन वाजण्याच्या सुमारास पियुष व अनुराग घरी निघाले. पियुष हा दुचाकी चालवत होता. या अपघातानंतर जीपचालकाने रस्त्यावर (Nashik Accident News) थांबून जखमींना मदत देण्याऐवजी तेथून वाहनासह पळून गेले. काही वेळेतच पाठीमागून त्यांचे दोन मित्र दुचाकीने तेथे आले असता त्यांना हे दोघेही रक्तबंबाळ अवस्थेत रस्त्यालगत पडलेले दिसले. त्यांनी तातडीने नातेवाईक व अन्य मित्रांना मदतीसाठी बोलावून घेत जखमींना उपचारासाठी रुग्णालयात दाखल केले होते. (Nashik Accident News)

मंत्रालयात शिक्षणमंत्र्यांच्या अधिकाराला कात्री, अवर सचिव स्तरावरच निर्णय; मंत्री दादा भुसेंची पहिली प्रतिक्रिया

संदीप जेजुरकर — Sat, 5 Sep 2026 14:57:56 +0530

मुंबई : राज्यात विनाअनुदानित शाळांची (School) संख्या मोठ्या प्रमाणावर होत असून इंग्रजी माध्यमांच्या शाळा वाढत आहेत. वाढते नागरिकीकरण आणि वाढती लोकसंख्या लक्षात घेता, शाळांच्या संख्येतही वाढ होत आहे. त्याच पार्श्वभूमीवर स्वयंअर्थसहायित शाळांसाठीचे अधिकार आता मंत्री महोदयांच्या स्तरावर न ठेवता सचिवांकडे देण्यात आले आहेत. राज्य सरकारच्या प्रशासकीय कारभारात सुधारणा आणि गतिमानता आणण्याकरिता शालेय शिक्षण (Education) खात्याशी संबंधित मंत्र्यांच्या महत्त्वाच्या अधिकारांना कात्री लावण्यात आल्याची बातमी समोर येते आहे. मात्र, कामांची गर्दी होऊ नये, कामात सुटसुटीत पणा यावा म्हणून मी स्वतः हा निर्णय निर्णय घेतला असल्याची प्रतिक्रिया शालेय शिक्षण मंत्री दादा भुसे (Dada Bhuse) यांनी दिली.

शिक्षणमंत्र्यांच्या अधिकाराला कात्री लावण्यात आल्याची माहिती समोर आली असून महत्त्वाचे निर्णय आता अधिकारी स्तरावर देण्यात आले आहेत. मात्र, यासंदर्भात माहिती देताना हा निर्णय माझा स्वतःचा असल्याचे मंत्री दादा भुसेंनी म्हटले. कामांची गर्दी होऊ नये, कामामध्ये सुटसुटीतपणा यावा म्हणूनच हा निर्णय घेतल्याचेही त्यांनी स्पष्ट केले. राज्यातील स्वयंअर्थसहाय्यित शाळांमध्ये अतिरिक्त तुकड्यांना, शाखांना मान्यता देण्याचे, सीबीएसई, आयसीएसई सारख्या विविध मंडळांच्या अभ्यासक्रमांना ना-हरकत प्रमाणपत्र देण्याचे तसेच नव्या तुकड्या व शाखांना मान्यता देण्यासारखे महत्त्वाचे अधिकार विभागाचे सचिव आणि शिक्षण आयुक्तांकडे सोपविण्यात आल्याचा निर्णय मी स्वतः घेतला आहे, असे मंत्री दादा भुसेंनी माध्यमांशी बोलताना सांगितले.

कोल्हापुरात शिक्षकांचा मोर्चा

दरम्यान, आज देशभरात शिक्षक दिन साजरा होत असून शिक्षक दिनीच कोल्हापुरात हजारो शिक्षक रस्त्यावर उतरून एल्गार करत असल्याचं पाहायला मिळालं. जुनी पेन्शन योजना लागू करा या प्रमुख मागणीसाठी जिल्हाधिकारी कार्यालयावर शिक्षकांनी मोर्चा काढलाय. 'दसरा चौका'तून मोर्चाला प्रारंभ झाला असून हा मोर्चा जिल्हाधिकारी कार्यालयावरती धडकला. तोंडाला काळे मास्क घालून आणि हातात लक्षवेधी फलक घेऊन शिक्षकांचा कोल्हापुरात विराट मोर्चा निघाला आहे. मोर्चात शिक्षक संस्थाचालकही हजारोंच्या संख्येने सहभागी आहेत.

हेही वाचा

मनसेच्या दहीहंडीतून पेपरफुटीवर प्रहार, सेलिब्रिटींसह गोविंदांचा उत्साह; पोलिसांनी परवानगी नाकारल्याचा आरोप