Sarangkheda Horse Market Nandurbar: सारंगखेडा अश्व बाजारात उसळली खरेदीची लाट; तीन दिवसांत तब्बल 67 लाखांची उलाढाल; यंदा विक्रमी व्यवहार होण्याचा अंदाज
Sarangkheda Horse Market Nandurbar: सारंगखेडा अश्व बाजारात अवघ्या तीन दिवसांत 145 घोड्यांची विक्री होऊन तब्बल 67 लाखांची उलाढाल झाली आहे.
Sarangkheda Horse Market Nandurbar: देशातील 'पुष्कर'नंतरचा सर्वात मोठा अश्व बाजार म्हणून ओळखल्या जाणाऱ्या सारंगखेडा (Sarangkheda Horse Market) यात्रेत यंदा विक्री–खरेदीला मोठी चालना मिळत आहे. अवघ्या तीन दिवसांत 145 घोड्यांची विक्री होऊन तब्बल 67 लाखांची उलाढाल झाल्याची माहिती चेतक फेस्टिव्हलचे आयोजक जयपालसिंग रावल (Jaipal Singh Rawal) यांनी दिली आहे.
या वर्षी आतापर्यंत ३ हजाराहून अधिक घोड्यांचे आगमन झाले असून, पुढील काही दिवसांत हा आकडा साडेतीन हजारांवर जाण्याची शक्यता आहे. पंजाब, काठेवाडी, मारवाडी आदी जातींचे घोडे मोठ्या प्रमाणावर दाखल होत असून, देशभरातील व्यापारी, खरेदीदार आणि घोड्यांचे पालन करणारे या यात्रेला हजेरी लावत आहेत.
Sarangkheda Horse Market Nandurbar: साडेपाच कोटीहून अधिकची उलाढाल होणार?
अश्व बाजारातील उत्साह आणि खरेदीची वाढती मागणी लक्षात घेता यंदाची उलाढाल तब्बल साडेपाच कोटी रुपयांहून अधिक होईल, असा अंदाज आयोजक जयपालसिंग रावल यांनी व्यक्त केला. यात्रेत दररोज मोठ्या प्रमाणात व्यवहार होत असून, अनेक वर्षांतील हा सर्वाधिक विक्रीचा हंगाम ठरणार असल्याचे त्यांनी सांगितले.
Sarangkheda Horse Market Nandurbar: व्यवहारात नवे विक्रम नोंदवले जाणार?
पारंपारिक घोडेविक्रीची परंपरा, देशभरातून दाखल होणाऱ्या उत्कृष्ट जातीचे अश्व आणि या बाजाराची ऐतिहासिक ओळख यामुळे सारंगखेडा यात्रा दरवर्षी व्यापाऱ्यांचे आकर्षण आहे. यंदा यात्रेला अपेक्षेपेक्षा मोठा प्रतिसाद मिळत असल्याने व्यवहारात नवे विक्रम नोंदवले जाण्याची शक्यता व्यक्त केली जात आहे.
Sarangkheda Horse Market Nandurbar: पुण्यातील भाजप आमदाराच्या मुलाचं अश्वप्रेम
दरम्यान, दौंडचे भाजप आमदार राहुल कुल (Rahul Kul) यांचे सुपुत्र आदित्य कुल (Aditya Kul) यांनी सारंगखेडा अश्वबाजारातून तब्बल 11 लाख 11 हजार 111 रुपये देऊन नुकरा जातीची घोडी खरेदी केली आहे. नुकरा ही अत्यंत मौल्यवान आणि मागणी असलेली घोड्यांची जात मानली जाते. उंच, सडपातळ आणि रुबाबदार शरीरयष्टी ही या जातीची खास ओळख. या घोड्यांची किंमत लाखांतून कोट्यवधींपर्यंत जाते. उत्कृष्ट शारीरिक क्षमता आणि स्वभावामुळे ही जात विशेष मानली जाते.
राज्य आणि देश-विदेशातील महत्त्वाच्या बातम्या; पाहा व्हिडीओ
इतर महत्त्वाच्या बातम्या
महत्त्वाच्या बातम्या
