Maharashtra Vidhan Parishad Result 2026: भाजप, राष्ट्रवादी, काँग्रेसपासून शिवसेनेपर्यंत...; विधान परिषदेच्या निवडणुकीतील विजयी उमेदवारांची यादी

नागपुरात भीषण अपघात! म्हाडाच्या बांधकामस्थळी क्रेन कोसळून दोन मजुरांचा मृत्यू, दोघे जखमी

abp majha web team — Fri, 30 Oct 2026 13:40:52 +0530

Nagpur: नागपूरमधील गणेशपेठ परिसरात म्हाडाच्या इमारतीच्या बांधकामस्थळी भीषण अपघात झाला आहे. काम सुरू असताना सुमारे 100 फूट उंच क्रेनचा वरचा भाग अचानक तुटून खाली कोसळला. या दुर्घटनेत चार मजूर जखमी झाले होते. त्यापैकी दोघांचा मृत्यू झाल्याच्या वृत्ताला पोलीस अधिकाऱ्यांनी दुजोरा दिला आहे. तर अन्य दोघे जखमी असून त्यांच्यावर खासगी रुग्णालयात उपचार सुरू आहेत.

नेमकं काय घडलं?

नागपूरमधील गणेशपेठ भागातील म्हाडाच्या निर्माणाधिन इमारतीत काम सुरू असताना क्रेन कोसळल्याची घटना घडली आहे. क्रेनचा वरचा भाग कोसळून झालेल्या अपघातात 4 जण जखमी असल्याची प्राथमिक माहिती मिळाली आहे. म्हाडाने काम शिर्के कन्स्ट्रक्शन कंपनीला दिले असून काम सुरू असताना हा अपघात घडलाय. सुमारे 100 फूट उंच असलेल्या क्रेन चा वरचा भाग तुटून कोसळला. क्रेन काम करत असताना कोसळल्याने क्रेनवर काम करणारे मजदूर अपघातावरून खाली पडले. जखमी 4 मजुरांवर खाजगी रुग्णालयात उपचार सुरू आहे. त्यापैकीच दोघेजण गंभीर असल्याची माहिती आहे.

मिळालेल्या माहितीनुसार, म्हाडाने या इमारतीच्या बांधकामाचे कंत्राट शिर्के कन्स्ट्रक्शन कंपनीला दिले आहे. शुक्रवारी बांधकामाचे काम सुरू असताना क्रेनचा वरचा भाग अचानक तुटून कोसळला. यावेळी क्रेनवर काम करणारे मजूर खाली पडल्याने हा अपघात घडला. दुर्घटनेनंतर जखमी मजुरांना तातडीने रुग्णालयात दाखल करण्यात आले. त्यापैकी दोघांची प्रकृती गंभीर असल्याची प्राथमिक माहिती समोर आली होती. मात्र, उपचारादरम्यान दोघांचा मृत्यू झाल्याचे पोलिसांनी स्पष्ट केले आहे. या दुर्घटनेमुळे बांधकामस्थळावरील कामगारांच्या सुरक्षेचा प्रश्न पुन्हा ऐरणीवर आला आहे. क्रेन कोसळण्यामागचे नेमके कारण अद्याप स्पष्ट झालेले नाही. या प्रकरणी पुढील तपास सुरू आहे.

Vijay Wadettiwar: भाजपने ठरवून शिंदेसेनेची जिरवणे सुरू केलंय; विजय वडेट्टीवारांचा घणाघात, म्हणाले, देवेंद्र फडणवीसांनी आपली व्यवस्था बरोबर केलीय, सरकार कोसळणार!

रजत वशिष्ठ, एबीपी माझा — Fri, 30 Oct 2026 12:05:21 +0530

Vijay Wadettiwar नागपूर : भाजप आणि शिंदेंच्या शिवसेनेत (BJP vs Shivsena) तसेच देवेंद्र फडणवीस (Devendra Fadnavis) आणि एकनाथ शिंदे (Eknath Shinde) यांच्यातील संबंध ताणले आहे. त्यात एकमेकांना चेकमेट आहे. पूर्णेकर हत्या प्रकरणात जो काही वाद निर्माण झालेला आहे, त्याला भारतीय जनता पक्षाने हवा दिलेली आहे. निवडणुकीत एकमेकांच्या विरोधात उभे राहिले, एकमेकांशी संवाद संपला आहे. निधीच्या फायली अडवल्या जात आहे. निधी वाटपावरून गोंधळ निर्माण झाला आहे. आता भाजपने ठरवून शिंदे सेनेची जिरवणे सुरू केले आहे. अशी बोचरी टीका काँग्रेस नेते विजय वडेट्टीवार यांनी केली आहे. दोन्ही पक्षांमध्ये प्रचंड धुसफूस आहे. तुम्ही नांदा, भांडा, काहीही करा, पण तुमच्या भांडणाचे परिणाम महाराष्ट्राच्या विकासावर होऊ नयेत. सरकारमध्ये प्रचंड भ्रष्टाचार वाढलेला आहे. दोघांच्या भांडणात सामान्य माणसाचे हाल होत आहेत. खाली कोणाचेही काम होत नाही. नवरा-बायकोसारखे भांडण सुरू असल्याचा टोलाही विजय वडेट्टीवार (Vijay Wadettiwar) यांनी लगावला आहे. ते नागपुरात (Nagpur) बोलत होते.

दरम्यान, सरकारकडे बहुमत आहे. देवेंद्र फडणवीस यांनी आपली व्यवस्था बरोबर करून ठेवली आहे. मित्रपक्षातील नेतेसुद्धा त्यांच्या संपर्कात आहेत. मला असे वाटत नाही की, सरकार कोसळणार आहे. असा दावाही विजय वडेट्टीवार यांनी केला आहे.

Vijay Wadettiwar on Sanjay Gaikwad : शेतकऱ्यांची बदनामी करणाऱ्या व्यक्तीला आमदार म्हणून राहण्याचा काहीही अधिकार नाही

सरकारला आणि मुख्यमंत्र्यांना सांगू इच्छितो की, राज्यातील संकटात सापडलेल्या दुष्काळग्रस्त शेतकऱ्यांचा अवमान करण्याचे काम आमदारांनी (MLA Sanjay Gaikwad) केले आहे. हा शेतकऱ्यांचा एवढा मोठा अपमान आहे. सरकारकडून हा अपमान झाल्याचे आम्हाला वाटते. जर त्यांच्यावर कारवाई झाली नाही, तर सरकार या विधानाशी सहमत आहे का? सरकार सहमत नसेल, तर त्यांच्यावर कारवाई करावी. या दुःखात शेतकऱ्यांच्या डोळ्यांतील अश्रू दिसत असतील, शेतकऱ्यांबद्दल जाणीव असेल, तर त्यांच्यावर कारवाई करावी. सरकारच्या विरोधात असंतोष निर्माण झालेला आहे. त्यामुळे गायकवाड यांच्यावर त्वरित कारवाई करावी.

शेतकऱ्यांची बदनामी करणाऱ्या व्यक्तीला आमदार म्हणून राहण्याचा काहीही अधिकार नाही. ज्या पक्षात ते काम करत आहेत, त्या पक्षातून त्यांचे निलंबन केले पाहिजे. पुढील कारवाई सरकारने केली पाहिजे. सरकारने डिसेंबरच्या अधिवेशनात प्रस्ताव आणून त्यांना निलंबित केले पाहिजे. ही पहिली वेळ नाही. यापूर्वीही ते अनेकदा खालच्या भाषेत बोलले आहेत. त्यांच्या शब्दांना मर्यादा नाही. अशांची जीभ छाटली पाहिजे. असेही विजय वडेट्टीवार म्हणाले.

मला राजकारणच समजतं! त्यामुळं ठाकरे बंधूंनी मला राजकारणात चांगले काम करु दिले पाहिजे : मुख्यमंत्री देवेंद्र फडणवीस

Kisan Sangh on BJP : भाजपच्या पराभवाला धान उत्पादक शेतकऱ्यांची नाराजी कारणीभूत; संघ प्रणित भारतीय किसान संघाचा दावा, म्हणाले, सत्ताधाऱ्यांना पुढेही सत्तेत राहायचे असेल तर...

रजत वशिष्ठ, एबीपी माझा — Fri, 30 Oct 2026 08:17:34 +0530

Bharatiya Kisan Sangh Reaction on BJP Defeat : विधान परिषदेच्या ज्या नागपूर विभाग पदवीधर मतदारसंघात (Nagpur Graduate Constituency Election Result 2026) भाजपचा (Kisan Sangh On Nagpur MLC Election) पराभव झाला, त्या मतदारसंघातील सहा जिल्ह्यांपैकी पाच जिल्हे धान उत्पादक (Paddy Growing Farmers) असून विधान परिषद निवडणुकीच्या धक्कादायक निकालामागे धान उत्पादक शेतकरी आणि त्यांच्या शिक्षित मुलांची सरकार संदर्भातील नाराजी एक प्रमुख कारण आहे, असं विश्लेषण संघ प्रणित भारतीय किसान संघाने केला आहे. सत्तेत असलेल्या पक्षांनी लक्षात ठेवावं की त्यांचा जनाधार हळूहळू कमी होत आहे. विद्यमान सत्ताधाऱ्यांना पुढेही सत्तेत राहायचे असेल तर त्यांनी वेळीच सावध व्हावे. कारण शेतकऱ्यांच्या अनेक समस्या असताना ही गेल्या काही वर्षात शेतकऱ्यांसाठी फारसं काही झालेलं नसल्याची भावना धान उत्पादक शेतकऱ्यांची आणि त्यांच्या शिक्षित मुलांची झाली आहे. त्यामुळेच भाजप विरोधातील नाराजी परिषदेच्या मतदानातून परिलक्षित झाल्याची सूचक प्रतिक्रिया भारती किसान संघाचे अखिल भारतीय जैविक प्रमुख नाना आखरे यांनी दिली आहे.

Bharatiya Kisan Sangh: धान उत्पादक शेतकऱ्यांची सरकारकडून हेळसांड; नाराजी मतदानातून परिलक्षित

दरम्यान, धान उत्पादक पट्ट्यातील शेतकऱ्यांनी धानाच्या बोनससाठी अनेक वेळेला राज्य सरकारकडे मागणी केली, निवेदन दिले, आंदोलन केले, मोर्चे काढले. मात्र तरीही विद्यमान राज्य सरकारने धानाच्या बोनस बद्दल शब्द ही काढलेला नाही. आज पूर्व विदर्भातील धान उत्पादक पट्ट्यात प्रत्येक शेतकऱ्याच्या घरी ग्रॅज्युएट मुलं असून सरकार आपला विचार करत नाही, अशी त्यांची भावना झाली आहे. या शिक्षित तरुणांना शेती करणाऱ्या आपल्या आई-वडिलांची अडचण लक्षात येते. त्यामुळेच तरुणांची नाराजी निवडणुकीच्या निकालातून दिसून आल्याचे मत नाना आखरे यांनी व्यक्त केले.

Bharatiya Kisan Sangh: सत्ताधाऱ्यांना पुढेही सत्तेत राहायचे असेल तर त्यांनी वेळीच सावध व्हावे

दरम्यान, या शिक्षित तरुणांच्या शेतकरी वडिलांनी ज्या पक्षाला मत दिले, त्याच पक्षाला मुलगा ही मतदान करेल, असे आवश्यक नाही. शेतकरी सरकारच्या प्राधान्यक्रमावर नाही. सध्या विचित्र कारभार सुरू आहे आणि त्यामुळेच धान उत्पादक पट्ट्यातील शेतकरी कुटुंबातील हजारो शिक्षित तरुण सरकारबद्दल नाराज आहेत. विद्यमान सत्ताधाऱ्यांना पुढेही सत्तेत राहायचे असेल तर त्यांनी वेळीच सावध व्हावे असा सूचक इशाराही नाना आखरे यांनी दिला आहे.

बॅलेटवर निवडणूक तरीही काँग्रेस पराभूत, आता केळाच्या पानावर निवडणूक घ्या अशीही मागणी करतील, भाजप आमदार परिणय फुकेंचा हल्लाबोल

तुषार कोहळे — Thu, 29 Oct 2026 16:50:35 +0530

Parinay Phuke : नागपूर विभाग पदवीधर मतदारसंघाच्या (Nagpur Division Graduates Constituency election results ) अत्यंत अटीतटीच्या आणि प्रतिष्ठित ठरलेल्या निवडणुकीचा निकाल लागला आहे. यामध्ये महाविकास आघाडीकडून काँग्रेसचे उमेदवार अभिजीत वंजारी (Abhijit Vanjari) यांनी बाजी मारली आहे. त्यांनी भारतीय जनता पक्षाचे उमेदवार सुधाकर कोहळे (Sudhakar Kohale) यांचा पराभव केला आहे. चुरशीच्या झालेल्या या लढतीत अभिजीत वंजारी यांनी 3 हजार 271 मतांच्या फरकाने विजय मिळवला आहे. यानंतर भाजपचे आमदार परिणय फुके (Parinay Phuke) यांनी प्रतिक्रिया दिली आहे. नागपूर विभाग पदवीधर निवडणुकीत भारतीय जनता पक्षाला शिंदे शिवसेनेची मते मिळाली नाहीत. त्यामुळं थोडाफार फाटक सुधाकर कोहळेंना बसला आहे. पक्षश्रेष्ठींकडे याचा अहवाल पाठवला जाईल असे फुके म्हणाले.

बॅलेटवर निवडणूक झाली तरी बहुतांश ठिकाणी काँग्रेस पराभूत

ईव्हीएमला घेऊन काँग्रेस ओरडत असते, आता बॅलेटवर निवडणूक झाली तरी बहुतांश ठिकाणी काँग्रेस पराभूत झाली. आता ते बॅलेट विरोधात आंदोलन करुन केळाच्या पानावर निवडणूक घ्या अशी मागणी करेल. 1 नोव्हेंबरचे आंदोलन त्यासाठी असावे, असेही फुके म्हणाले. नागपूर विभाग पदवीधर मतदारसंघाच्या अत्यंत अटीतटीच्या आणि प्रतिष्ठित ठरलेल्या निवडणुकीचा निकाल लागला आहे. यामध्ये महाविकास आघाडीकडून काँग्रेसचे उमेदवार अभिजीत वंजारी यांनी बाजी मारली आहे. यावरुन देखील परिणय फुके यांनी शिंदेच्या शिवसेनेवर टीका केली. भारतीय जनता पक्षाला शिंदे शिवसेनेची मते मिळाली नाहीत. त्यामुळं थोडाफार फाटक सुधाकर कोहळेंना बसल्याची टीका फुके यांनी केली. दरम्यान, राज्यात पाच जागांवर झालेल्या निवडणुकीत महायुतीला 2 जागा मिळाल्या आहेत. यामध्ये पुणे शिक्षक मतदारसंघ आणि अमरावती शिक्षक मतदारसंघाच्या जागांवर विजय मिळाला आहे. तर महाविकास आघाडीचा 3 जागांवर विजय मिळाला आहे.

नागपूरचा गड पुन्हा काबीज करण्यासाठी भाजपने प्रतिष्ठा पणाला लावली होती; मात्र मतांचे बदलते गणित, पक्षांतर्गत नाराजी आणि अपक्ष नितेश कराळे गुरुजी यांच्या दुसऱ्या पसंतीच्या मतांची वंजारी यांना मिळालेली साथ यामुळे भाजपची रणनीती फसल्याचे दिसले. यामध्ये सुधाकर कोहळेंचा पराभव झाला आहे.

Maharashtra Vidhan Parishad Result 2026: कोणत्या पक्षाने कोणती निवडणूक लढवली?

भाजप लढली 3 जिंकली 1.
शिंदे लढले 2 जिंकले 1.
काँग्रेस लढली 2 जिंकली 1.
राष्ट्रवादी शरद पवार लढली 2 जिंकली 2.

एकूण जागा राज्यात 5.
महायुती 2
विरोधी पक्ष 3.

विधान परिषदेच्या पदवीधर आणि शिक्षक मतदारसंघांच्या निवडणुकांचे निकाल समोर आले असून, यामध्ये महाविकास आघाडी आणि महायुती यांच्यात जोरदार रस्सीखेच पाहायला मिळाली आहे.

Nagpur MLC Election Result 2026: नागपूरमध्ये 2 अंकाचा वापर करुन सुधाकर कोहळेंचा घातपात? जेन झी, जातीच्या फॅक्टरमुळे पदवीधरचा निकाल फिरला

रजत वशिष्ठ, एबीपी माझा — Thu, 29 Oct 2026 13:04:04 +0530

Nagpur MLC Election Result 2026: नागपूर विभाग पदवीधर मतदारसंघाच्या निवडणुकीत सलग दुसऱ्यांदा भाजपचा पराभव झाला आहे. काँग्रेस उमेदवार आणि विद्यमान आमदार अभिजीत वंजारी यांनी सुधाकर कोहळे यांचा 3271 मतांनी पराभव केला असला, तरी कोहळे यांना अवैध ठरल्यामुळे मिळू न शकलेल्या सुमारे सात हजार मतांमागे भाजप आणि कोहळे यांचा "करेक्ट कार्यक्रम" करण्याचे काही नियोजन होते का?? निवडणूक आयोगाकडून या निवडणुकीत नोटाचा पर्याय नसताना मतदारांनी स्वतःहून 2 अंकाचा वापर करून आपला मतदान एका प्रकारे नोटा करून घेतला का??? अशी चर्चा सुरू झाली आहे. (Nagpur graduate constituency Election Result 2026)

Nagpur Vidhan Parishad Election 2026: अवैध मतांचा गुंता काय???

नागपूर विभाग पदवीधर मतदार संघाच्या निवडणुकीत भाजप उमेदवार सुधाकर कोहळे यांच्या नावासमोर 1 ऐवजी 2 हे अंक लिहून सुमारे सहा ते सात हजार मतदारांनी मतदान केल्यामुळे कोहळे यांना मिळू शकणारा हजारो मतदान अवैध ठरला आहे... कोहळे यांच्या नावासमोरील डब्यात 1 अंकाऐवजी 2 दिल्यामुळे ह्या सर्व मतपत्रिका अवैध श्रेणीत गेल्या आणि त्यामुळे अवैध मतांचा आकडा ही 15106 पर्यंत वाढला... जर कोणाच्या नावासमोर 2 अंक लिहून मत अवैध करणारे मतदारांनी 1 लिहिले असते तर सुधाकर कोहळे यांना हजारो मत जास्त मिळू शकले असते.. एवढ्या मोठ्या संख्येने मतदारांनी एकसारखी चूक कशी आणि का केली?? का ठरवून केलेला "करेक्ट कार्यक्रम" आहे का??? हा नेमका अपघात आहे की कोणी ठरवून घात केला आहे??? अशीही चर्चा सध्या सुरू आहे.

याच विषयावर 'एबीपी माझा'ने संघाचे ज्येष्ठ स्वयंसेवक आणि माजी भाजप कार्यकर्ते रवी वाघमारे यांच्याशी बातचीत केली. त्यांनीही एवढ्या मोठ्या संख्येने मतदारांनी एकसारख्या पद्धतीने त्यांचा मत अवैध करवून घेणे अपघात नसून घातपात असल्याची शंका व्यक्त केली. भाजप श्रेष्ठींनी याकडे लक्ष घालावे, अशी सूचनाही त्यांनी केली. एवढेच नाही तर अपक्ष नितेश कराळे यांना भाजपला अनुकूल असलेल्या वस्त्यांमध्ये एवढ्या मोठ्या प्रमाणावर मतदान का झाले, याचा आत्मपरीक्षणही भाजप नेतृत्वाने करण्याची गरज असल्याची सूचना त्यांनी केली.

Nagpur RSS news: कुणबी समाजाचा उमेदवार, जेन झी फॅक्टर, नागपूर पदवीधर मतदारसंघाच्या निवडणुकीच्या निकालावर कशाचा परिणाम?

* यंदा मात्र सुधाकर कोहळे यांना हजारो मतदारांनी एक क्रमांकाचा मत न देता दोन क्रमांकाचा मत देऊन आपले मत अवैध करून घेतले हा अपघात नसून घातपात आहे.
* नितेश कराळे यांनाही नागपूरच्या अनेक भाजप अनुकूल वस्त्यांमध्ये मोठ्या प्रमाणावर पहिल्या आणि दुसऱ्या पसंतीचे मत मिळाले याचा विचार भाजपच्या शीर्ष नेतृत्वात करण्याची गरज आहे.
* नितेश कराळेकडे कुठलीही यंत्रणा नसताना त्या तरुणाने एवढं मतदान कसं आणि कोणाचा मिळवला हा मुद्दा विचार करण्यासारखा आहे.
* सुधाकर कोहळे यांना 2 हे अंक लिहून केलेले अवैध मतदान हे कोणीतरी ठरवून केलेले आहे.
* मतदान करताना मतपत्रिकेवर क्रमांक 1 लिहिल्याशिवाय मतदान सुरू होत नाही, तो वैध ठरत नाही, हे ज्या सुज्ञ मतदारांना माहीत होते, त्यांनीच हे जाणून बुजून केले आहे.
* या निवडणुकीमध्ये नोटा हा पर्याय नसतो, त्यामुळे अनेक सुज्ञ मतदारांनी क्रमांक एक न लिहिता क्रमांक 2 हे अंक लिहून स्वतःचा मतदान नोटा करवून घेतलं.
* नोटा याचा पर्याय या निवडणूकित नसताना भाजपच्या हजारो सुज्ञ मतदारांनी सुधाकर कोहळे यांच्या नावासमोर 2 क्रमांक लिहून आपले मत अवैध करवून घेत नोटाचा पर्याय का निर्माण करून घेतला याचा विचार भाजप श्रेष्ठींनी करायला हवा.
* "जेन झी" ला दुर्लक्षित ठेवून चालणार नाही हे नितेश कराडे यांना मिळालेल्या मतदानाने दाखवून दिले.
* पदवीधर मतदारसंघाची निवडणूक जातीवर जाणे दुर्दैवी आहे. मात्र, संदीप जोशींच्या वेळेला निवडणूक जातीवर गेली होती. त्या निवडणुकीला लक्षात घेऊन भाजप यंदा निवडणूक जातीवर जाऊ नये म्हणून कुणबी समाजाच्या सुधाकर कोहळेंना उमेदवारी दिली. मात्र, भाजप श्रेष्ठींचे हे गणित पूर्णपणे चुकल्याचे दिसून आले.

आणखी वाचा

Nagpur MLC Election Result 2026: भाजपचे 'ते' दोन अंदाज चुकले, नितेश कराळेंच्या दुसऱ्या पसंतीच्या मतांनी गणित पालटलं, काँग्रेसचं एक अ‍ॅनालिसिस खरं ठरलं, नागपूर पदवीधर मतदारसंघाच्या निवडणुकीत नक्की काय घडलं?

Nagpur Graduates Vidhan Parishad Election Result 2026: उभी फूट, डॅमेज, एक मोठी चूक आणि गेमचेंज; विधान परिषदेच्या निवडणुकीत बालेकिल्ला नागपुरात भाजप का हरली?, 10 कारणं

रजत वशिष्ठ, एबीपी माझा — Thu, 29 Oct 2026 10:59:36 +0530

Nagpur Graduates Vidhan Parishad Election Result 2026: विधान परिषद नागपूर पदवीधर मतदारसंघाच्या निवडणुकीत (Nagpur Graduates Vidhan Parishad Election Result 2026) काँग्रेसचे उमेदवार अभिजीत वंजारी (Abhijit Wanjari) यांनी विजय मिळविला. त्यांना प्रथम व द्वितीय पसंतीक्रमाची एकूण 67 हजार 231 मते मिळाली. तर त्यांचे नजिकचे प्रतिस्पर्धी भारतीय जनता पार्टीचे सुधाकर कोहळे (Sudhakar Kohle) यांना 63 हजार 960 मते मिळाली. निवडणूक निर्णय अधिकारी तथा विभागीय आयुक्त विजयलक्ष्मी बिदरी यांनी अभिजित वंजारी यांना विजयाचे प्रमाणपत्र प्रदान केले. नागपूरच्या मानकापूर येथील विभागीय क्रीडा संकुलात मंगळवार, दि. 27 ऑक्टोबर रोजी सकाळी आठ वाजता 84 टेबलवरून मतमोजणीला सुरुवात झाली. 41 पेक्षा जास्त तासांपासून ही मतमोजणी सुरू होती. यावेळी निवडणूक निरीक्षक डॉ. हर्षदीप कांबळे, निवडणूक निर्णय अधिकारी तथा विभागीय आयुक्त विजयलक्ष्मी बिदरी, विभागातील सर्व जिल्ह्याचे सहायक निवडणूक निर्णय अधिकारी तथा जिल्हाधिकारी, मतमोजणीसाठी नियुक्त अधिकारी व कर्मचारी उपस्थित होते. (Nitesh Karale Nagpur)

पहिल्या पसंतीच्या दोन फेऱ्यांमध्ये कोणत्याही उमेदवाराला विजयासाठी आवश्यक 75 हजार 438 मतांचा कोटा पूर्ण करता आला नाही. त्यामुळे निवडणूक प्रक्रियेनुसार द्वितीय पसंतीक्रमाची बाद फेरी घेण्यात आली. पहिल्या पसंतीच्या दोन फेऱ्यांमध्ये 1 लाख 65 हजार 906 मतांपैकी 15 हजार 32 मते अवैध ठरली. तर 1 लाख 50 हजार 874 मते वैध ठरली. द्वितीय पसंतीच्या बाद फेऱ्यामध्येही कुठल्याही उमेदवाराला निर्धारित कोटा पूर्ण करता आला नाही. त्यामुळे पहिल्या व द्वितीय पसंतीक्रमाच्या बाद फेरी मिळून सर्वाधिक 67 हजार 231 मते घेणाऱ्या अभिजित वंजारी यांना विजयी घोषित करण्यात आले. भारत निवडणूक आयोगाने नागपूर विभाग विधान परिषद पदवीधर मतदारसंघाच्या निवडणुकीचा कार्यक्रम 22 सप्टेंबर रोजी जाहीर केला होता. त्यानुसार 29 सप्टेंबर रोजी निवडणुकीची अधिसूचना प्रसिद्ध करण्यात आली. 23 ऑक्टोबर रोजी सकाळी 8 ते दुपारी 4 या वेळेत मतदान झाले. या निवडणुकीची मतमोजणी 27 ऑक्टोबर सकाळी 8 वाजता सुरू झाली. 41 तासांनंतर मतमोजणी प्रक्रिया पूर्ण झाली. निवडणूक प्रक्रिया 31 ऑक्टोबरपर्यंत पूर्ण करण्याचे वेळापत्रक आयोगाने निश्चित केले आहे. (Nagpur Vidhan Parishad Election Result 2026)

विधान परिषदेच्या निकालानंतर रविंद्र चव्हाण ॲक्शन मोडवर- (Ravindra Chavan Vidhan Parishad Election Result 2026)

नागपूर विभाग विधान परिषद पदवीधर मतदारसंघाच्या मतमोजणीत सुरुवातीपासूनच ट्विस्टवर ट्विस्ट पाहायला मिळत होते. नागपूर पदवीधरमध्ये शेवटच्या क्षणी काँग्रेसच्या अभिजीत वंजारी यांनी बाजी मारली. दुसऱ्या पसंतीच्या मतांच्या जोरावर अभिजीत वंजारी यांनी भाजपच्या सुधाकर कोहळेंवर 3 हजार 271 मतांनी विजय मिळवला. विधान परिषदेतील मिळालेल्या पराभवानंतर भाजप प्रदेशाध्यक्ष ॲक्शन मोडवर आले आहेत. नागपूर आणि पुण्यातील सर्व जिल्ह्यांचा रविंद्र चव्हाण लेखाजोखा घेणार आहेत. तसेच जिल्हाध्यक्ष, आमदार आणि मंत्र्यांची झाडाझडती घेणार असल्याची माहिती आहे. तसेच रविंद्र चव्हाण केंद्रीय गृहमंत्री अमित शाह यांची 2 नोव्हेंबरला भेट घेणार आहेत. यावेळी महायुतीच्या मित्र पक्षांनी घेतलेल्या भूमिकेबाबत रविंद्र चव्हाण केंद्रीय गृहमंत्री अमित शाह यांना अहवाल देखील देणार आहेत. पराभवाचे संपूर्ण विश्लेषण रविंद्र चव्हाण हे अमित शाहांसमोर मांडणार असल्याची माहिती समोर आली आहे. दरम्यान, बालेकिल्ला म्हणून ओळखल्या जाणाऱ्या नागपुरात भाजपचा पराभव का झाला?, याची दहा कारणं समोर आली आहेत.

नागपुरात भाजप का हरली?, 10 कारणं- (Why did the BJP lose in Nagpur? Lets know 10 reasons)

उमेदवार निश्चितीवेळीच नागपूर भाजपमध्ये उभी फूट
अनिल सोलेंचा गिरीश व्यासांच्या साथीने बंडाचा झेंडा, बंड शमले, पण डॅमेज होऊन गेले
भाजपच्या पारंपरिक मतदारांकडून मतदानात टाळाटाळ किंवा मत अवैध करुन रोष व्यक्त
निवडणूक व्यवस्थापन फसले, पहिल्या पसंतीची 4,291 जादा मिळवली, पण दुसऱ्या पसंतीचा विचार नाही
छोटे पक्ष व त्यांच्या उमेदवारांच्या दुसऱ्या,तिसऱ्या पसंतीची मतांकडे दुर्लक्ष
अभिजीत वंजारींनी अन्य उमेदवारांच्या संपर्कात राहून दुसऱ्या,तिसऱ्या पसंतीची मतं मागितली,तीच निर्णायक ठरली
नितेश कराळेंनी घेतलेली 24,249 मतांनी भाजप, काँग्रेसचं गणित बिघडलं
नितेश कराळेंना मागच्या तुलनेत मिळालेली साडे तीन पट मतं भाजपवरची नाराजी दाखवतात
नितेश कराळेंची दुसऱ्या पसंतीची मतं वंजारींना पडणं अखेर निर्णायक ठरलं
भाजपनं ब्राह्मण उमेदवार न दिल्यानं ब्राह्मण मतदारांत नाराजी दिसली, भाजप आणि संघ वर्तुळातील कुजबूज मतपेटीत

सुधाकर कोहळेंनी पराभवाचं कारण सांगितलं, नेमकं गणित कुठे चुकलं?, VIDEO:

Nagpur MLC Election Result 2026: भाजपचे 'ते' दोन अंदाज चुकले, नितेश कराळेंच्या दुसऱ्या पसंतीच्या मतांनी गणित पालटलं, काँग्रेसचं एक अ‍ॅनालिसिस खरं ठरलं, नागपूर पदवीधर मतदारसंघाच्या निवडणुकीत नक्की काय घडलं?

रोहित धामणस्कर — Thu, 29 Oct 2026 09:34:44 +0530

Nagpur MLC Election Result 2026: नागपूर पदवीधर मतदारसंघाच्या चुरशीच्या निवडणुकीत काँग्रेसच्या अभिजीत वंजारी यांनी भाजपच्या सुधाकर कोहळे यांचा पराभव केला. मंगळवारी सकाळी आठ वाजता मतमोजणी सुरु झाली होती. त्यानंतर तब्बल 45 तास मतमोजणी सुरु होती. मतमोजणीच्या पहिल्या टप्प्यात म्हणजे मंगळवारी काँग्रेसचे अभिजीत वंजारी आघाडीवर होते. परंतु, बुधवारी पहाटेपर्यंत मतमोजणीची दुसरी फेरी झाल्यानंतर भाजपच्या सुधाकर कोहळे यांनी तब्बल चार हजार मतांची आघाडी घेतली होती. ते बराच काळ ही आघाडी टिकवून होते. मात्र, बुधवारी संध्याकाळनंतर हे चित्र अचानक पालटले आणि दुसऱ्या पसंतीच्या मतांच्या जोरावर अभिजीत वंजारी यांनी सुधाकर कोहळे यांना मागे टाकले. अखेर रात्री उशीरा अभिजीत वंजारी हे 3271 मतांनी विजयी झाल्याची अधिकृत घोषणा करण्यात आली. अभिजीत वंजारी यांना प्रथम व द्वितीय पसंतीक्रमाची एकूण 67 हजार 231 मते मिळाली. तर त्यांचे प्रतिस्पर्धी भारतीय जनता पार्टीचे (BJP) सुधाकर कोहळे यांना 63 हजार 960 मते मिळाली. तर अपक्ष उमेदवार नितेश कराळे यांना एकूण 25 हजार 909 मतं पडली. (Nagpur VidhanParishad Election Result 2026)

नागपूरमधील हा पराभव भाजपसाठी मोठा धक्का मानला आहे. या निवडणुकीत भाजपचे दोन अंदाज चुकल्याची माहिती समोर आली आहे. त्यापैकी एक अंदाज काहीप्रमाणात खरा ठरला. भाजपच्या प्राथमिक सर्व्हेत अपक्ष उमेदवार असलेले नितेश कराळे हे 15000 च्या आसपास मतं घेतली, असा अंदाज होता. मात्र, नितेश कराळे यांनी त्यापेक्षा सरस कामगिरी केली. त्यांना या निवडणुकीत एकूण 25 हजार 909 मतं मिळाली. नितेश कराळे यांना एवढी मतं मिळणे अनाकलनीय असल्याचे सुधाकर कोहळे यांनी बोलूनही दाखवले. तसेच दुसऱ्या पसंतीच्या मतांच्या आधारे निकाल लावायचा झाल्यास कोणाला फायदा होईल, याचे आकलन कोणत्याच राजकीय पक्षाला नव्हते. हीच गोष्ट निर्णायक ठरली. पहिल्या दोन फेऱ्यांनंतर भाजपचे सुधाकर कोहळे आघाडीवर होते. मात्र, बुधवारी संध्याकाळी अपक्ष उमेदवार नितेश कराळे यांच्या दुसऱ्या पसंतीच्या मतांची मोजणी सुरु झाल्यानंतर संपूर्ण चित्र पालटले. नितेश कराळे यांची दुसऱ्या पसंतीची बहुतांश मते ही काँग्रेसच्या अभिजीत वंजारी यांना मिळाली. परिणामी 4000 मतांनी पिछाडीवर असलेले अभिजीत वंजारी अवघ्या एक-दोन तासांत आघाडीवर आले आणि सरतेशेवटी 3271 मतांनी विजयी झाले.

Nagpur Vidhanparishad Election Result 2026: नागपूर पदवीधर मतदारसंघात काँग्रेसचा अंदाज तंतोतंत खरा ठरला

नागपूर पदवीधर मतदारसंघाच्या निवडणुकीसाठी नागपूरमध्ये 60 टक्के मतदान झाले होते. तर चंद्रपूर, गोंदिया, गडचिरोली भागात या निवडणुकीसाठी 71 टक्क्यांपेक्षा जास्त मतदान झाले होते. या भागात काँग्रेसचे वर्चस्व असल्याने याच मतदानाच्या जोरावर पदवीधरच्या निवडणुकीत आपल्याला विजय मिळू शकतो, असा विश्वास काँग्रेसला वाटत होता. अभिजीत वंजारी यांच्या विजयानंतर काँग्रेसचा हा अंदाज तंतोतंत खरा ठरल्याचे दिसत आहे. अभिजीत वंजारी यांच्या विजयात नितेश कराळे यांच्या दुसऱ्या पसंतीच्या मतांचा मोठा वाटा असला तरी पहिल्या फेरीत अभिजीत वंजारी यांना पहिल्या पसंतीची मते मोठ्याप्रमाणावर होती. या फेरीत अभिजीत वंजारी यांनी आघाडीही घेतली होती.

आणखी वाचा

Nagpur MLC Election Result 2026: नागपूरमधील भाजपच्या पराभवाचं सर्वात मोठं कारण समोर, भाजपच्याच मतदारांनी सुधाकर कोहळेंचा घात केला, पराभवानंतर उद्विग्न होऊन सुनावलं, म्हणाले...

Maharashtra Vidhan Parishad Result 2026: शरद पवारांचा तगडा स्ट्राईक रेट, काँग्रेसही आघाडीवर; भाजप 33 टक्क्यांवर, विधान परिषदेचा निवडणुकीत कुणाचा किती स्ट्राईक रेट?

मुकेश चव्हाण — Thu, 29 Oct 2026 08:53:29 +0530

Maharashtra Vidhan Parishad Result 2026 Winning Strike: विधान परिषदेच्या 5 जागांचं चित्र (Maharashtra Vidhan Parishad Result 2026) जवळपास 45 तासांनी स्पष्ट झालं आहे. पुणे शिक्षक मतदारसंघात भाजपचे कौस्तुभ गावडे विजयी, तर अमरावती शिक्षक निवडणुकीत शिवसेनेच्या किरण सरनाईकांचा विजय झाला आहे. तर नागपूर पदवीधर मतदारसंघात काँग्रेसच्या अभिजीत वंजारी यांनी बाजी मारली. तसेच पुणे पदवीधर मतदारसंघात राष्ट्रवादी काँग्रेस शरद पवार पक्षाच्या हर्षदा देशमुख-जाधव यांनी विजय मिळवला. छत्रपती संभाजीनगर पदवीधर (Chhatrapati Sambhajinagar Graduates Constituency Result 2026) मतदारसंघाच्या निवडणुकीत राष्ट्रवादी शरद पवार गटाचे प्रतापसिंग पाटील यांनी विजय मिळवला आहे. म्हणजेच विधान परिषदेच्या 5 जागांपैकी 3 जागेवर महाविकास आघाडी आणि 2 जागेवर महायुतीने विजय मिळवला.

भाजपचा विजयाचा स्ट्राईक रेट फक्त 33.33 टक्के- (BJP Vidhan Parishad Election Result 2026)

विधान परिषदेच्या 5 जागांपैकी भाजपने एकूण 3 जागांवर उमेदवार दिले. यामध्ये नागपूर पदवीधर, पुणे पदवीधर आणि पुणे शिक्षक मतदारसंघाचा समावेश होता. या 3 जागांपैकी केवळ एकच जागा भाजपला जिंकता आली. पुणे शिक्षक मतदारसंघत भाजपच्या कौस्तुभ गावडे यांचा विजय झाला. तर नागपूर पदवीधरच्या निवडणुकीत भाजपच्या सुधाकर कोहळे यांना पराभवाचा सामना करावा लागला. तसेच पुणे पदवीधर निवडणुकीत देखील भाजपच्या उमेदवार स्मिता जाधव यांचा पराभव झाला. त्यामुळे भाजपचा विजयाचा स्ट्राईक रेट फक्त 33.33 टक्के राहिला.

राष्ट्रवादी काँग्रेस शरदचंद्र पवार पक्षाचा विजयाचा स्ट्राईक रेट 100 टक्के- (NCP SP Vidhan Parishad Election Result 2026)

राष्ट्रवादी काँग्रेस शरदचंद्र पवार पक्षाने एकूण 2 जागा लढवल्या आणि दोन्ही जागा जिंकल्या. त्यामुळे राष्ट्रवादी काँग्रेस शरदचंद्र पवार पक्षाचा विजयाचा स्ट्राईक रेट 100 टक्के राहिला. यामध्ये छत्रपती संभाजीनगर पदवीधर आणि पुणे पदवीधर निवडणुकीचा समावेश होता. यात छत्रपती संभाजीनगर पदवीधर निवडणुकीत राष्ट्रवादी काँग्रेस शरदचंद्र पवार पक्षाचे प्रतापसिंह पाटील आणि पुणे पदवीधर निवडणुकीत हर्षदा देशमुख-जाधव यांचा विजय झाला.

शिंदेंच्या शिवसेनेचा विजयाचा स्ट्राईक रेट 50 टक्के- (Shivsena Shinde Vidhan Parishad Election Result 2026)

शिंदेंच्या शिवसेनेने विधान परिषदेच्या 5 जागांपैकी 2 जागा लढवल्या. यामध्ये पुणे शिक्षक आणि अमरावती शिक्षक मतदारसंघाचा समावेश होता. या दोन जागांपैकी एक जागा शिवसेनेने जिंकली. अमरावती शिक्षक मतदारसंघातून शिवसेनेच्या किरण सरनाईक यांचा विजय झाला. तर पुणे शिक्षक मतदारसंघात शिवसेना पुरस्कृत उमेदवार सचिन सानप यांना पराभवाचा सामना करावा लागला. त्यामुळे शिवसेनेचा विजयाचा स्ट्राईक रेट 50 टक्के आहे.

काँग्रेसचा विजयाचा स्ट्राईक रेट 50 टक्के- (Congress Vidhan Parishad Election Result 2026)

काँग्रेसने विधान परिषदेच्या 5 जागांपैकी 2 जागा लढवल्या. यामध्ये नागपूर पदवीधर आणि अमरावती शिक्षक मतदारसंघाचा समावेश होता. नागपूर पदवीधर मतदारसंघात काँग्रेसच्या अभिजीत वंजारी यांनी विजय मिळवला. तर अमरावती शिक्षक मतदारसंघाच्या निवडणुकीत काँग्रेसच्या अदिती पोहरे यांना पराभवाचा सामना करावा लागल्या. त्यामुळे काँग्रेसचा विजयाचा स्ट्राईक रेट 50 टक्के आहे.

पक्ष	लढलेल्या जागा	जिंकलेल्या जागा	स्ट्राईक रेट
भाजप	3	1	33.33%
शिवसेना (शिंदे गट)	2	1	50%
काँग्रेस	2	1	50%
राष्ट्रवादी काँग्रेस (शरद पवार पक्ष)	2	2	100%

राज्यासह देश-विदेशातील महत्वाच्या घडामोडी, VIDEO:

Devendra Fadnavis and Rohit Pawar: तुम्ही घरोघरी जाऊन बंडखोरांना मनवले, तरीही भाजपचा पराभव झाला, तुम्हाला ट्विटही डिलिट करावे लागले, रोहित पवारांनी देवेंद्र फडणवीसांना डिवचलं

रोहित धामणस्कर — Thu, 29 Oct 2026 08:36:00 +0530

Devendra Fadnavis and Rohit Pawar: नागपूर पदवीधर मतदारसंघाच्या निवडणुकीत भाजपला पराभवाचा धक्का बसला आहे. काँग्रेसच्या अभिजीत वंजारी यांनी भाजपच्या सुधाकर कोहळे यांचा अटीतटीच्या लढतीत 3271 मतांनी पराभव केला. राष्ट्रीय स्वयंसेवक संघाचे मुख्यालय असलेल्या आणि मुख्यमंत्री देवेंद्र फडणवीस (Devendra Fadnavis) यांचे होमग्राऊंड असलेल्या नागपूरमध्ये भाजपचा (BJP) पराभव झाल्यामुळे विरोधकांना स्फुरण चढले आहे. या पराभवानंतर काँग्रेसच्या (Congress) अनेक नेत्यांनी भाजपला डिवचणाऱ्या पोस्ट केल्या. तर राष्ट्रवादी काँग्रेस शरद पवार गटाचे आमदार रोहित पवार यांनीही मुख्यमंत्री देवेंद्र फडणवीस यांना डिवचणारी एक पोस्ट केली आहे. यामध्ये रोहित पवार यांनी देवेंद्र फडणवीस यांच्या डिलिट केलेल्या ट्विटचा उल्लेख केला आहे. (Nagpur Vidhanparishad Election 2026)

आदरणीय देवेंद्र फडणवीस साहेब, आपण स्वतः वैयक्तिक लक्ष घातलेल्या नागपूर पदवीधर मतदारसंघात, ज्या ठिकाणी आपण स्वतः घरोघरी जाऊन बंडखोरांना माघार घेण्यासाठी मनवले, त्याच नागपूर मतदारसंघात, संघाचे मुख्यालय असलेल्या भागात भाजपला पराभव बघावा लागला, याचा अर्थ स्पष्ट आहे. आपल्याला ट्विट डिलीट करावे लागले, याचे दुःख आहेच; पण आपल्या डिलीट झालेल्या ट्विटमध्ये दिसत असलेला सत्तेचा एवढा ईगो बरा नव्हे. असो, समजू शकतो. कदाचित निवडणूक बॅलेटवर झाली होती, याचा आपल्याला विसर पडला असावा, म्हणून आधीच ट्विट झाले असेल. विजयी उमेदवार अभिजित वंजारी यांचे अभिनंदन, मतदानरूपी आशीर्वाद देणाऱ्या पदवीधरांचे आभार, लढणाऱ्या सर्व उमेदवारांनादेखील शुभेच्छा, असे रोहित पवार यांनी ट्विटमध्ये म्हटले आहे. रोहित पवार आणि काँग्रेस नेत्यांच्या टीकेनंतर आता देवेंद्र फडणवीस नागपूर पदवीधरच्या पराभवाबाबत काय बोलणार, याची उत्सुकता सगळ्यांना लागली आहे.

नागपूर पदवीधर मतदारसंघाची जागा जिंकण्यासाठी भाजपने सर्व शक्ती पणाला लावली होती. संपूर्ण संघटनेने एकत्र काम केल्याचे सांगितले होते. देवेंद्र फडणवीस यांनी बंडखोरी केलेल्या अनिल सोले यांच्या घरी जाऊन त्यांची मनधरणी केली होती. प्रचाराच्या शेवटच्या टप्प्यात मुख्यमंत्री देवेंद्र फडणवीस, नितीन गडकरी, चंद्रशेखर बावनकुळे हे बडे नेते मैदानात उरले होते. तरीही भाजपचा पराभव झाल्याने राजकीय वर्तुळात चर्चा रंगली आहे.

आदरणीय देवेंद्र फडणवीस साहेब, आपण स्वतः वैयक्तिक लक्ष घातलेल्या नागपूर पदवीधर मतदारसंघात, ज्या ठिकाणी आपण स्वतः घरोघरी जाऊन बंडखोरांना माघार घेण्यासाठी मनवले, त्याच नागपूर मतदारसंघात, संघाचे मुख्यालय असलेल्या भागात भाजपला पराभव बघावा लागला, याचा अर्थ स्पष्ट आहे…… आपल्याला ट्विट डिलीट करावे लागले, याचे दुःख आहेच; पण आपल्या डिलीट झालेल्या ट्विटमध्ये दिसत असलेला सत्तेचा एवढा ईगो बरा नव्हे. असो, समजू शकतो. कदाचित निवडणूक बॅलेटवर झाली होती, याचा आपल्याला विसर पडला असावा, म्हणून आधीच ट्विट झाले असेल… विजयी उमेदवार अभिजित वंजारी यांचे अभिनंदन, मतदानरूपी आशीर्वाद देणाऱ्या पदवीधरांचे आभार, लढणाऱ्या सर्व उमेदवारांनादेखील शुभेच्छा! @Dev_Fadnavis @INCMaharashtra @wanjarri
— Rohit Pawar (@RRPSpeaks) October 28, 2026

Nagpur graduate constituency Election Result 2026: नागपूर पदवीधर मतदारसंघाचा निकाल काय लागला?

नागपूर पदवीधर मतदारसंघाच्या निवडणुकीत काँग्रेसच्या अभिजीत वंजारी (Abhijeet vanjari) हे विजयी झाले. त्यांनी भाजपच्या सुधाकर कोहळे (Sudhakar Kohale) यांचा पराभव केला. अभिजीत वंजारी यांना प्रथम व द्वितीय पसंतीक्रमाची एकूण 67 हजार 231 मते मिळाली. तर त्यांचे प्रतिस्पर्धी भारतीय जनता पार्टीचे (BJP) सुधाकर कोहळे यांना 63 हजार 960 मते मिळाली. अभिजीत वंजारी यांचा 3271 इतक्या मताधिक्याने विजय झाला. तर अपक्ष उमेदवार नितेश कराळे यांना एकूण 25 हजार 909 मतं पडली.

आणखी वाचा

Nagpur MLC Election Result 2026: नागपूरमध्ये सगळ्यांना वाटलं भाजप जिंकला पण दुसऱ्या पसंतीची मतमोजणी सुरु होताच सगळं चित्र पालटलं, सुधाकर कोहळेंना विश्वासच बसेना, म्हणाले, जोपर्यंत.....

Maharashtra Vidhan Parishad Result 2026: भाजप, राष्ट्रवादी, काँग्रेसपासून शिवसेनेपर्यंत...; विधान परिषदेच्या निवडणुकीतील विजयी उमेदवारांची यादी

मुकेश चव्हाण — Thu, 29 Oct 2026 08:07:17 +0530

नागपुरात भीषण अपघात! म्हाडाच्या बांधकामस्थळी क्रेन कोसळून दोन मजुरांचा मृत्यू, दोघे जखमी

बॅलेटवर निवडणूक झाली तरी बहुतांश ठिकाणी काँग्रेस पराभूत

Maharashtra Vidhan Parishad Result 2026: कोणत्या पक्षाने कोणती निवडणूक लढवली?

विधान परिषदेच्या निकालानंतर रविंद्र चव्हाण ॲक्शन मोडवर- (Ravindra Chavan Vidhan Parishad Election Result 2026)

नागपुरात भाजप का हरली?, 10 कारणं- (Why did the BJP lose in Nagpur? Lets know 10 reasons)

सुधाकर कोहळेंनी पराभवाचं कारण सांगितलं, नेमकं गणित कुठे चुकलं?, VIDEO:

संबंधित बातमी:

भाजपचा विजयाचा स्ट्राईक रेट फक्त 33.33 टक्के- (BJP Vidhan Parishad Election Result 2026)

राष्ट्रवादी काँग्रेस शरदचंद्र पवार पक्षाचा विजयाचा स्ट्राईक रेट 100 टक्के- (NCP SP Vidhan Parishad Election Result 2026)

शिंदेंच्या शिवसेनेचा विजयाचा स्ट्राईक रेट 50 टक्के- (Shivsena Shinde Vidhan Parishad Election Result 2026)

काँग्रेसचा विजयाचा स्ट्राईक रेट 50 टक्के- (Congress Vidhan Parishad Election Result 2026)

राज्यासह देश-विदेशातील महत्वाच्या घडामोडी, VIDEO:

संबंधित बातम्या: