बारावी परीक्षेत 'फाटाफुटी' सुरुच! रसायनशास्त्र, भौतिकशास्त्रानंतर गुन्हा दाखल झाल्यानंतर गणिताचा पेपर सुद्धा फोडला; मुख्य सूत्रधार अजूनही फरार
12th Std Paper Leak: नागपूर विभागात सेंट उर्सुला शाळेत मिळालेल्या मुलीच्या मोबाईलवरून 16 फेब्रुवारीला रसायनशास्त्र आणि 18 ला भौतिकशास्त्रचा पेपर फुटल्याच समोर आले होते.
12th Std Paper Leak: बारावी पेपरफुटीमध्ये नवनवीन धक्कादायक खुलासे सुरुच आहेत.18 फेब्रुवारी रोजी पेपर फुटीचा पोलीस गुन्हा दाखल झाल्यानंतरही, आरोपींनी 21 फेब्रुवारीला गणिताचा पेपर फोडल्याचे पुढे आले आहे. शिक्षण मंडळाचे अध्यक्ष डॉ शिवलिंग पटवे यांनी याला दुजोरा दिला आहे. शिक्षण मंडळ पोलिसांशी समन्वय साधून असल्याचे डॉ शिवलिंग पटवे यांनी सांगितले. सध्या या प्रकरणात चार आरोपी अटकेत असून मुख्य सूत्रधार अजूनही फरार आहे. नागपूर विभागात सेंट उर्सुला शाळेत मिळालेल्या मुलीच्या मोबाईलवरून 16 फेब्रुवारीला रसायनशास्त्र आणि 18 ला भौतिकशास्त्रचा पेपर फुटल्याच समोर आले होते. या प्रकरणात शिक्षक निशिकांत मून, एक्सेलन्ट अकादमीचे मुस्तफा खान, जुनेद जावेद अटकेत आहे.
आरोपींनी मोबाईल फॉरमॅट केला
दरम्यान, पेपरफुटी प्रकरणात अटकेतील आरोपींनी मोबाईल फॉरमॅट केला होता, पोलिसांनी तो डेटा रिकव्हर केल्यानंतर ही धक्कादायक बाब समोर आली आहे. 18 तारखेला हा प्रकार समोर आल्यानंतर गुन्हा दाखल झाला, काही आरोपीनी मोबाईल डेटा फॉरमॅट केला, तरीही 21 फेब्रुवारीला गणिताचा पेपर फुटल्याचे डिजिटल पुरावे पोलिसांना मिळाले. गणिताचा सुद्धा पेपर फोडल्याचे डिजिटल पुरावे पोलिसांच्या हाती लागले आहेत. दुसरीकडे, पाच सदस्यीय विशेष तपास पथककडून पेपर फुटी संदर्भात डिजिटल पुरावे गोळा करण्याचे काम करत आहे. रसायन, भौतिकसोबत गणिताचाही पेपर फुटल्याने पेपरफुटीचे रॅकेट असल्याची शक्यता वर्तविली जात आहे.
प्रश्नपत्रिका परीक्षेपूर्वीच फुटल्याचा संशय
दुसरीकडे, 18 फेब्रुवारी रोजी झालेल्या बारावीच्या रसायनशास्त्राच्या परीक्षेची प्रश्नपत्रिका परीक्षेपूर्वीच फुटल्याचा संशय आला होता. हा पेपर नागपूरमधील सोशल मीडियावर प्रसारित करण्यात आला होता. हायस्कूलच्या परीक्षा केंद्रावर एका विद्यार्थिनीने वारंवार शौचालयात जाण्याने संशयास्पद गैरव्यवहार उघडकीस आला होता. मोबाईल फोन वापरून फसवणूक करताना पकडण्यात आले, जे नंतर जप्त करण्यात आले. विश्लेषणानंतर, अधिकाऱ्यांना असे आढळून आले की परीक्षा सुरू होण्यापूर्वी प्रश्नपत्रिका एका व्हॉट्सअॅप ग्रुपवर शेअर करण्यात आली होती. त्याच ग्रुपमध्ये संभाव्य उत्तरे देखील देण्यात आली होती.
प्राथमिक तपासात एका खाजगी कोचिंग संस्थेशी संबंधित असलेल्या व्यक्तीने पैशाच्या बदल्यात प्रश्नपत्रिका शेअर केल्याचा आरोप आहे, असे पोलिस अधिकाऱ्यांनी सांगितले. सदर पोलिस ठाण्यात गुन्हा दाखल करण्यात आला आहे आणि पुढील तपास सुरू आहे.बारावीच्या परीक्षा 10 फेब्रुवारी रोजी सुरू झाल्या असून 11 मार्च रोजी संपतील. 3387 केंद्रांवर 13 लाखांहून अधिक विद्यार्थी परीक्षेला बसले आहेत.
इतर महत्वाच्या बातम्या
महत्त्वाच्या बातम्या
