BMC Mayor Ritu Tawade : आशियातील सर्वात मोठ्या महापालिकेच्या महापौरपदी निवड, कोण आहेत मुंबईच्या नव्या महापौर रितू तावडे?
BMC Mayor Ritu Tawade : रितू तावडे या भाजपच्या नगरसेविका आहेत. प्रभाग क्रमांक १३२ मधून भाजपच्या नगरसेविका झाल्या आहेत. मुंबई महापालिकेत दोन टर्म त्या नगरसेविका आहेत.
मुंबई: मुंबईच्या महापौरपदाचा (BMC Mayor) सस्पेन्स आज संपला आहे. भाजपच्या नगरसेविका रितू तावडे (Ritu Tawade) यांच्या नावावर भाजप नेतृत्वाने अधिकृत शिक्कामोर्तब केले आहे. मुंबई भाजप अध्यक्ष अमित साटम यांनी मुंबई महानगरपालिका मुख्यालयातील पक्ष कार्यालयातून या नावाची अधिकृतपणे घोषणा केली आहे. या ऐतिहासिक निवडीमुळे तब्बल २९ वर्षांनंतर मुंबई महानगरपालिकेवर भाजपचा महापौर (BJP) विराजमान होण्याचा मार्ग मोकळा झाला. तर मुंबईच्या महापौरपदी रितू तावडे यांची निवड झाली आहे, तर उपमहापौरपदी शिवसेना शिंदे गटाचे नेते संजय घाडींची वर्णी लागली आहे. घाडी हे सव्वा वर्षांसाठी उपमहापौर असाणार आहेत. गेल्या अनेक दिवसांपासून अनेक नावे चर्चेत होती, मात्र रितू तावडेंच्या नावावरती आज शिक्कामोर्तब झाले आहे.(Ritu Tawade Profile)
Ritu Tawade: मुंबईची सेवक म्हणून काम करणार - रितू तावडे
मुंबईची महापौरपदी निवड झाली असली तरी मुंबईची सेवक म्हणून काम करणार आहे. महापौरपद कोणाला मिळणार याची उत्सुकता सर्वांना होती. मुंबईच्या हितासाठी सर्व नगरसेक निवडून गेले आहेत. सभागृहाची गरिमा ठेवून मुंबईच्या हितासाठी पक्षभेद विसरुन निर्मळ आणि प्रामाणिक काम करावं अशी माझी अपेक्षा आहे, असं मुंबईच्या नव्या महापौर रितू तावडे म्हणाल्या.
Who is Ritu Tawade: कोण आहेत मुंबईच्या नव्या महापौर रितू तावडे?
रितू तावडे या भाजपच्या नगरसेविका आहेत. प्रभाग क्रमांक १३२ मधून भाजपच्या नगरसेविका झाल्या आहेत. मुंबई महापालिकेत दोन टर्म त्या नगरसेविका आहेत. घाटकोपरमधील गुजराती बहुल मतदारांमधील मराठी चेहरा म्हणून त्यांच्याकडे पाहिले जाते. मुंबई महापालिकेत याआधी शिक्षण समितीचे अध्यक्षपद रितू तावडे यांनी भूषवले आहे. सोबतच, स्थापत्य समितीच्या उपाध्यक्षा देखील राहिल्या आहेत. भाजपचा ईशान्य मुंबईतील आक्रमक चेहरा म्हणून त्यांची ओळख आहे. वीज दरवाढीविरोधात आक्रमक आंदोलन त्यांनी केलं आहे.
गाजलेली आंदोलने आणि सामाजिक कार्य
रितु तावडे यांची ओळख केवळ एक लोकप्रतिनिधी म्हणून नाही, तर जनसामान्यांच्या प्रश्नांवर रस्त्यावर उतरणाऱ्या नेत्या म्हणून आहे.
१. जागतिक स्तरावर दखल (BBC लंडन): महिलांच्या अस्मितेशी खेळणाऱ्या विबत्स जाहिराती आणि पुतळ्यांविरोधात त्यांनी पुकारलेल्या लढ्याची दखल खुद्द ‘बीबीसी लंडन’ने घेतली होती. त्यांच्या आंदोलनामुळे अशा जाहिरातींवर बंदी घालण्यात आली.
२. महिला सुरक्षा: पालिका शाळांमधील विद्यार्थिनींच्या सुरक्षिततेसाठी त्यांनी ‘पोक्सो’ कायद्यांतर्गत कठोर कारवाईची मागणी करत प्रशासनाला धारेवर धरले होते.
३. पाणी माफियांविरुद्ध लढा: घाटकोपरमधील पाणी टंचाई दूर करण्यासाठी त्यांनी काढलेला ‘हंडा मोर्चा’ अत्यंत गाजला, ज्यानंतर प्रशासनाने पाणी चोरांवर कडक कारवाई केली.
४. सक्षमीकरण: त्या ‘मराठा प्रतिष्ठा’ संस्थेच्या अध्यक्षा असून, ‘महिला आर्थिक विकास महामंडळाच्या’ (MAVIM) माध्यमातून त्यांनी हजारो महिलांना रोजगाराच्या संधी मिळवून दिल्या आहेत.
BMC: महापालिकेतील पक्षीय बलाबल (२०२६ निवडणूक निकाल)
मुंबईकरांनी महायुतीला स्पष्ट बहुमत मिळाले आहे. सत्तेसाठी आवश्यक असलेली ११८ (मॅजिक फिगर ११४) ही संख्या महायुतीकडे आहे.
भाजप - 89
शिवसेना ठाकरे गट - 65
शिवसेना - 29
काँग्रेस - 24
मनसे - 6
एमआयएम- 8
एनसीपी - 3
एसपी - 2
एनसीपी शप - 1
आज सकाळी महापालिका मुख्यालयात भाजप आणि शिवसेना (शिंदे गट) या दोन्ही पक्षांच्या नेत्यांची एक महत्त्वाची संयुक्त बैठक पार पडली. या बैठकीत सत्तेचे समीकरण आणि पदांच्या वाटपावर सविस्तर चर्चा करण्यात आली. यावेळी भाजपकडून मुंबई अध्यक्ष अमित साटम आणि गटनेते गणेश खणकर उपस्थित आहेत. तर शिवसेना शिंदे गटाकडून राहुल शेवाळे, गटनेते अमेय घोले उपस्थित आहेत.
महत्त्वाच्या बातम्या
