Ajit Pawar : सत्य कोण लपवतंय हे बाहेर आलं तर अनेकजण अडचणीत येतील; अजित पवारांचा घातपात, आणखी एका व्यक्तीचा संशय
Pinky Mali Father Allegations : अजित पवारांसोबत मृत पावलेल्या केबिन क्रू मेंबर पिंकी मालीच्या वडिलांनी विमान अपघाताची चौकशी करावी आणि सत्य समोर आणावं अशी मागणी केली आहे.
मुंबई : उपमुख्यमंत्री अजित पवार यांच्या अपघाती निधनावर (Ajit Pawar Plane Crash) त्यांचे पुतणे रोहित पवारांनी (Rohit Pawar) घातपाताचा संशय व्यक्त केला आणि या प्रकरणाच्या चौकशीची मागणी केली. त्यानंतर आता आणखी एका व्यक्तीने तसा संशय व्यक्त केला. अजित पवारांसोबत विमान अपघातात मृत पावलेल्या पिंकी मालीचे (Pinky Mali) वडील शिवकुमार माली यांनीही या अपघातावर संशय व्यक्त केला. राजकारण कोणत्याही थराला जाऊ शकतं, याप्रकरणाचं सत्य बाहेर आलं तर अनेकजण अडचणीत येतील असं मोठं वक्तव्य शिवकुमार माली यांनी केलं.
उपमुख्यमंत्री अजित पवार यांचा 28 जानेवारी रोजी विमान अपघातात मृत्यू झाला. या घटनेला आता दोन आठवडे उलटून गेल्यानंतर रोहित पवारांनी यामागे घातपात असल्याचा संशय व्यक्त केला. रोहित पवारांनी त्यासंबंधी काही तथ्ये मांडले आणि या प्रकरणाची चौकशी करण्याची मागणी केली.
नेमकं काय म्हणाले शिवकुमार माली?
त्याचवेळी अजित पवारांसोबत केबिन क्रू म्हणून प्रवास करणाऱ्या आणि विमान अपघातात मृत्युमुखी पडलेल्या पिंकी मालीच्या वडिलांनी देखील घातपाताचा संशय उपस्थित केला. राजकारण कोणत्याही थराला जाऊ शकतं असं म्हणत त्यांनी या प्रकरणाच्या सखोल चौकशीची मागणी केली. तसेच या प्रकरणातील सत्य बाहेर आलं तर अनेकजण अडचणीत येतील असा दावाही केला.
पिंकी मालीचे वडील शिवकुमार माली एबीपी माझाशी बोलताना म्हणाले की, "रोहित पवारांनी जी शंका व्यक्त केली ते पाहता हा घातपात असू शकतो असा संशय आम्हाला आहे. रोहित पवार आणि अमोल मिटकरींनी व्यक्त केलेल्या संशयावर तपास झाला पाहिजे. या अपघातात आम्हीही मुलगी गमावली आहे, त्यामुळे या अपघाताचं नेमकं कारण आम्हाला समजलं पाहिजे. जी व्हीएसआर कंपनी आहे, त्याचे अधिकारी आम्हाला याबद्दल काहीही माहिती देत नाहीत."
पिकी माली ही वरळीतील बीडीडी चाळ नं. 29 येथील रहिवाशी शिवकुमार माली यांची कन्या होती. व्हीएसआर कंपनीच्या विमानात ती फ्लाईट अटेंडन्ट म्हणून काम करत होती.
डीजीसीएच्या अधिकाऱ्यांकडून विमानतळाची पाहणी
अजित पवारांच्या अपघातानंतर दोन आठवडे उलटून गेल्यानंतर प्रशासन जागं झालेलं पाहायला मिळालं. DGCA च्या अधिकाऱ्यांनी येऊन बारामती विमानतळाची पाहणी केली. बारामती विमानतळावर विमान चालवण्याचं प्रशिक्षण देणाऱ्या दोन संस्था आहेत. अनेक ट्रेनी पायलट या ठिकाणी आहेत. त्यामुळे विमानतळाची पाहणी करत असल्याचं डीजीसीएकडून सांगण्यात आलं आहे.
अजित पवारांसमवेत विमानातील 5 जण मृत्यूमुखी
- अजित पवार - उपमुख्यमंत्री
- विदीप जाधव - अजित पवारांचे सुरक्षा रक्षक
- पिंकी माळी - क्रू मेंबर
- कॅप्टन सुमित कपूर - पायलट
- कॅप्टन शांभवी पाठक - पायलट
ही बातमी वाचा:
महत्त्वाच्या बातम्या
