वरळीत हायप्रोफाईल कॉन्सर्टमध्ये तरुणाचा मृत्यू, पोलिसांकडून आयोजकांची चौकशी; एकनाथ शिंदेंची पहिली प्रतिक्रिया

संबंधित तरुणाने NSCI डोममधील कॉन्सर्टला हजेरी लावली होती. कार्यक्रमादरम्यान अचानक वैद्यकीय आपत्कालीन परिस्थिती निर्माण झाल्याने रुग्णवाहिकेतून त्याला ब्रीच कँडी रुग्णालयात नेण्यात आले.

Eknath Shinde reaction on worli concert

Source : Abp

मुंबई : राजधानी मुंबईत (Mumbai) नेहमीच वेगवेगळ्या कॉन्सर्टचे आयोजन करण्यात येते, त्यामध्ये बडे सेलिब्रिटी, संगीतकार, गायक यांना बोलावून कार्यक्रम घेतले जातात. विशेष म्हणजे या कार्यक्रमास तरुणाई मोठ्या संख्येने सहभागी होते. मात्र, शनिवारी वरळी NSCI डोममध्ये आयोजित करण्यात आलेल्या कॉन्सर्टदरम्यान प्रकृती बिघडल्याने 28 वर्षीय तरुणाचा मृत्यू झाल्याची धक्कादायक घटना समोर आली आहे. याप्रकरणी ताडदेव पोलीस ठाण्यात अपघाती मृत्यूची नोंद (ADR क्रमांक 17/2026) करण्यात आली आहे. पोलिसांकडून (Police) कॉन्सर्ट आयोजक कंपनीतील सदस्यांचीही चौकशी करण्यात येत आहे. 

प्राथमिक चौकशीनुसार, संबंधित तरुणाने NSCI डोममधील कॉन्सर्टला हजेरी लावली होती. कार्यक्रमादरम्यान अचानक वैद्यकीय आपत्कालीन परिस्थिती निर्माण झाल्याने रुग्णवाहिकेतून त्याला ब्रीच कँडी रुग्णालयात नेण्यात आले. मात्र, तेथे दाखल करण्यापूर्वीच डॉक्टरांनी त्याला मृत घोषित केले. दरम्यान, त्याच कार्यक्रमात 31 वर्षीय एका महिलेचीही प्रकृती बिघडल्याची घटना घडली. तिला उपचारासाठी जसलोक रुग्णालयात दाखल करण्यात आले होते. आवश्यक वैद्यकीय उपचारानंतर तिची प्रकृती सध्या स्थिर असल्याचे सांगण्यात आले आहे. चौकशीत महिलेने कार्यक्रमादरम्यान मद्य आणि एनर्जी ड्रिंक्सचे सेवन केल्याचे सांगितले असून, कोणत्याही अंमली पदार्थाच्या सेवनाबाबत माहिती समोर आलेली नाही. युवकाच्या मृत्यूचे नेमके कारण अद्याप स्पष्ट झालेले नसून पोलीस या प्रकरणाचा सखोल तपास करत आहेत. कार्यक्रमस्थळावरील सीसीटीव्ही फुटेज तसेच अन्य इलेक्ट्रॉनिक उपकरणांची तपासणी करण्यात येत असून, मृत्यूमागील कारणांचा शोध घेतला जात आहे.

वरळी कॉन्सर्ट कार्यक्रमादरम्यान मृत्युमुखी पडलेल्या युवकाचे नाव वृषभ गांगुर्डे असून तो वकिलीचे शिक्षण घेत होता. कोलकात्यावरून वृषभने वकिलीचं शिक्षण घेतल्याची प्राथमिक माहिती आहे. तर, प्रज्ञान रे (28 वर्षे) ही तरुणी रुग्णालयात दाखल असून तिची प्रकृती स्थिर असल्याची माहिती आहे. स्पेसबाउंड या कंपनीने वरळी डोममध्ये या कॉन्सर्टचे आयोजन केले होते, त्यामुळे, स्पेसबाउंड कंपनीच्या आयोजकांची पोलिसांकडून चौकशी सुरू आहे. या कॉन्सर्टसाठी प्रत्येक व्यक्तीला 4 हजार रुपये इतके तिकीट आकारण्यात आले होते.

एकनाथ शिंदेंची प्रतिक्रिया, कारवाई होईल

वरळी डोममधील कॉन्सर्टमध्ये मृत्युमुखी पडलेल्या तरुणासंदर्भात पोलिस चौकशी करत आहेत. याप्रकरणी, जे कोणी दोषी असतील त्यांच्यावर कडक कारवाई करतील. गोरेगावमध्ये देखील कडक कारवाई करत पोलिसांनी खोलात पोलीस तपास केल्याचं एकनाथ शिंदेंनी म्हटलं.

हेही वाचा