Mumbai News Water Cut: मुंबईकरांसाठी महत्त्वाची बातमी, मंगळवारी 'या' भागांमध्ये पाणीपुरवठा बंद राहणार
Mumbai News Water Cut: मुंबईकरांना येत्या मंगळवारी पाणी टंचाईचा सामना करावा लागेल. मुंबईच्या काही भागांमध्ये पाणीपुरवठा पूर्णपणे बंद असेल. पालिकेकडून नागरिकांना अलर्ट
Mumbai News Water Cut: मुंबईत येत्या मंगळवारी काही भागांमध्ये पाणीपुरवठा बंद राहणार असल्याची माहिती समोर आली आहे. या पार्श्वभूमीवर मुंबई महानगरपालिकेने (BMC) नागरिकांना पाणी जपून वापरण्याचे आवाहन केले आहे. मुंबईच्या अनेक भागांमध्ये मंगळवारी एकतर पाणीपुरवठा (Water Supply) पूर्णपणे बंद राहील अथवा पाणी कमी दाबाने येईल. त्यादृष्टीने नागरिकांनी खबरदारी घ्यावी, असे आवाहन पालिका प्रशासनाकडून करण्यात आले आहे. (Mumbai Latest news)
बृहन्मुंबई महानगरपालिकेने वांद्रे पश्चिम येथील 900 मि.मी. व्यासाच्या जलवाहिनीवरील गळती दुरुस्तीचे अत्यावश्यक काम हाती घेतले आहे. त्यामुळे मंगळवार, 10 फेब्रुवारी 2026 रोजी सकाळी 10 ते मध्यरात्री 12 वाजेपर्यंत तब्बल 14 तास पाणीपुरवठा बंद राहणार आहे. काही भागांत पाणीपुरवठा पूर्णतः खंडित राहील, तर काही ठिकाणी कमी दाबाने पाणी मिळणार आहे.
पाली हिल जलाशयाच्या 900 मि.मी. आवक (इनलेट) जलवाहिनीवर गळती आढळून आली. त्यामुळे ती दुरुस्ती करणं आवश्यक असल्याने हे काम वांद्रे पश्चिमेतील कुरेशी नगर झोपडपट्टीजवळील एमएचएडीएच्या मोकळ्या भूखंडातून तसेच पश्चिम द्रुतगती महामार्गालगत जाणाऱ्या जलवाहिनीवर करण्यात येईल. या दुरुस्तीमुळे एच-पश्चिम विभागातील मोठ्या परिसरावर पाणी पुरवठ्याचा परिणाम होणार आहे.
Mumbai news: मुंबईच्या कोणत्या भागातील पाणीपुरवठ्यावर परिणाम होणार?
वांद्रे पश्चिमेकडील हिल रोड, पाली हिल, कार्टर रोड, सेंट अँड्र्यूज मार्ग, पाली गाव, चिंबई, शेर्ली गाव, कांतवाडी तसेच खार दांडा, कोळीवाडा, दांडा पाडा, चुईम गावठाण, खार पश्चिमेतील काही भागात , माउंट मेरी परिसर, के.सी. मार्ग, बाजार रस्ता, पाली माला, कोल डोंगरी, नर्गिस दत्त मार्ग पाणीपुरवठा पूर्णपणे बंद राहणार आहे. हिल रोडच्या टोकापासून ताज लँड्स एन्ड, बी. जे. मार्ग, एच.के. भाभा मार्ग, काणे मार्ग आणि गणेश झोपडपट्टी परिसरात मध्यरात्रीनंतर 1 ते पहाटे 4.30 या वेळेत कमी दाबाने पाणीपुरवठा करण्यात येणार असल्याची माहिती मुंबई महानगरपालिकेकडून देण्यात आली आहे.
Mumbai Fire news: चुनाभट्टीत बर्गरच्या दुकानात सिलेंडरचा स्फोट
मुंबईतील सायन चुनाभट्टी परिसरात असणाऱ्या एका बर्गर जॉईंटच्या दुकानाला शनिवारी मध्यरात्री भीषण आग लागली. हे दुकान सायन-पनवेल महामार्गाला लागून आहे. या दुकानातील गॅस सिलेंडरचा स्फोट होऊन ही आग लागल्याची प्राथमिक माहिती आहे. या आगीत मोठी वित्तहानी झाली आहे, पण सुदैवाने कोणतीही जीवितहानी झालेली नाही. सायन हायवे येथील खाजगी टूर्स आणि ट्रॅव्हल च्या बसचा थांबा असलेल्या ठिकाणी ही घटना घडली. रात्री घटनास्थळी अग्निशामक दल आणि पोलीस प्रशासन पोहोचले होते आणि आग विझविण्यासाठी तब्बल दोन तास लागले.
आणखी वाचा
महत्त्वाच्या बातम्या
