Molestation Case In Mumbai: विनयभंगाच्या आरोपातंर्गत (Molestation Case) मुंबईतील कोर्टानं एक महिलेला दोषी ठरवलं आहे. पुरुषांप्रमाणेच महिलेकडूनही दुसऱ्या महिलेवर विनयभंग होऊ शकतो. तो करण्याच्याच हेतूनं बळाचा वापर करून किंवा तिला मारहाण झाली असेल तर आरोपी महिलेलाही विनयभंगाच्या आरोपांतर्गत दोषी ठरवता येऊ शकतं. एखाद्या स्त्रीला या आरोपांतून वगळण्यात यावं, असं कायद्यात कुठेही नमूद करण्यात आलेलं नाही. असं स्पष्ट करत माझगाव कोर्टानं (Mazgaon Magistrate Court ) एका महिलेला वर्षभराच्या कारावासाची शिक्षा आणि 6 हजारांचा दंडही ठोठावला आहे.
शेजारी राहणाऱ्या दोन महिलांमध्ये झालेल्या भांडणात एकीनं दुसरीला मारहाण करून तिचे कपडे फाडल्याप्रकरणात महानगरदंडाधिकारी कोर्टानं नुकताच हा निकाल दिला आहे.
Maharashtra Mumbai News : काय आहे प्रकरण
आरोपी आणि तक्रारदार महिलेच्या कुटुंबियांमध्ये गेल्या अनेक वर्षांपासून वाद आणि भांडणं होती. त्यातच दोन वर्षांपूर्वी झालेल्या भांडण्यादरम्यान आरोपी महिलेनं तक्रारदार महिलेवर आधी एक चप्पल फेकली आणि त्यानंतर दुसऱ्या चप्पलनं तिच्या डोक्यावर मारलं. त्यानंतर आसपासच्या लोकांनी त्यात हस्तक्षेप करण्याचा प्रयत्न केला असता आरोपीनं आपला गळा पकडून शिवीगाळ करण्यास सुरुवात केली आणि आपले कपडे फाडले, अशी तक्रार महिलेनं या भांडणानंतर पोलिसांत दिली. त्यामुळे आरोपी महिलेनं आपल्याला मारहाण करून विनयाचा भंग केला तसेच कपडे फाडून वैयक्तिक जगण्याच्या अधिकाराचाही भंग केला. इतकंच काय, तर भांडणात तिनं आपल्या पतीला माझ्यावर बलात्कार करण्यासही सांगितलं. यावेळी इमारतीतील सर्व पुरुष तेथे उपस्थित होते, असंही तक्रारदार महिलेनं पोलीस तक्रारीत म्हटले होते.
Maharashtra Mumbai News : न्यायालयाचे निरीक्षण
माझागव कोर्टाचे दंडाधिकारी एम. व्ही. चव्हाण यांच्यापुढे याप्रकरणावर सुनावणी झाली. तक्रारदार महिलेचा सर्वांसमोर विनयभंग होईल, अशी वागणूक आरोपीनं दिली असून तिचे कपडे आरोपीनंच फाडल्याचं सगळ्या साक्षीदारांनी दिलेल्या साक्षीपुराव्यांवरून सिद्ध झाले असल्याचे कोर्टाने म्हटले. पुरुषांप्रमाणेच महिलेकडूनही एखाद्या महिलेवर विनयभंग करण्याच्या हेतूने बळाचा वापर करून किंवा तिला मारहाण करण्यात येत असेल तर महिलेलाही विनयभंगाच्या आरोपांतर्गत दोषी ठरवता येऊ शकते. एखाद्या स्त्रीला या आरोपांतून वगळण्यात यावं, असं कायद्यात कुठेही नमूद करण्यात आलेलं नाही, असं स्पष्ट करत न्यायालयानं आरोपीला विनयभंगाच्या आरोपांखाली दोषी ठरवलं. मात्र आरोपी महिला तीन मुलांची आई असल्यामुळे तिला पाच वर्षांच्या शिक्षेऐवजी एक वर्षाची शिक्षा ठोठावत 6 हजार रुपयांचा दंडही सुनावला.