Elphinstone Bridge Close : एल्फिन्स्टन पूल दोन वर्षांसाठी बंद राहणार, हरकती न आल्यास 15 एप्रिलपासून वाहतूक बंद; 'असे' आहेत पर्यायी मार्ग
Elphinstone Bridge Close : एल्फिन्स्टन पुलाच्या पुर्नबांधणीचे काम सुरू होणार असून दोन वर्षे हा पूल वाहतुकीसाठी बंद ठेवण्यात येणार आहे. त्यासाठी 13 एप्रिलपर्यंत हरकती मागवण्यात आल्या आहेत.
मुंबई : होऊ घातलेल्या वरळी-शिवडी कनेक्टरसाठी एल्फिन्स्टन पुलाची पुर्नबांधणी करण्यात येणार असून त्यासाठी हा पूल वाहतुकीसाठी दोन वर्षे बंद ठेवण्यात येणार आहे. जुना ब्रिज तोडून त्या ठिकाणी डबल डेकर ब्रिजची निर्मिती एमएमआरडीएच्या माध्यमातून होणार आहे. एल्फिन्स्टन पूल बंद करण्यापूर्वी वाहतूक पोलिसांनी हरकतीमागवल्या आहेत.
एल्फिन्स्टन पूल हा दोन वर्षांसाठी बंद केला जाणार असून त्यानुसार वाहतुकीत बदलही करण्यात येणार आहेत. या पुनर्बांधणीच्या कामामुळे मोठी वाहतूक कोंडी होणार असल्याने पुलाच्या नियोजित पाडकामासाठी 13 एप्रिलपर्यंत सूचना-हरकती मागवण्यात आल्या आहेत. नागरिकांनी 13 एप्रिलपर्यंत हरकती न घेतल्यास 15 एप्रिलपर्यंत वाहतूक बंद करून पाडकामाला सुरुवात होणार असल्याची माहिती आहे.
वाहतूक पोलिसांनी सूचवलेले वाहतुकीतले बदल
- वाहने मडके बुवा चौक (परळ टर्मिनस जंक्शन) पासून उजवीकडे वळतील आणि डॉ. बाबासाहेब आंबेडकर रोडने जातील. तसेच खोडादाद सर्कल (दादर टीटी जंक्शन) पासून डावीकडे टिळक ब्रिजमार्गे इच्छित स्थळी वाहनांना पोहचता येईल.
- वाहने मडके बुवा चौकापासून (परळ टी.टी. जंक्शन) डॉ. बाबासाहेब आंबेडकर रोडमार्गे थेट कृष्णा नगर जंक्शन, परळ वर्कशॉप, सुपारी बाग जंक्शन आणि भारत माता जंक्शन मार्गे पुढे जातील. तेथून, महादेव पालव रोडवर उजवीकडे वळून, करी रोड रेल्वे ब्रिज ओलांडून, आणि नंतर शिंगटे मास्टर चौकातून उजवीकडे वळून लोअर परळ ब्रिजवर पोहोचतील.
- खोडादाद सर्कल (दादर टीटी जंक्शन) पासून वाहने उजवीकडे वळून डॉ. बाबासाहेब आंबेडकर रोड मार्गे टिळक ब्रिजकडे जातील.
- वाहने संत रोहिदास चौक (एल्फिन्स्टन जंक्शन) येथून सरळ जातील, वडाचा नाका जंक्शनपासून डावीकडे वळून लोअर परेल ब्रिजमार्गे पुढे जातील. शिंगटे मास्टर चौक येथे डावीकडे वळण्याचा पर्याय उपलब्ध असणार आहे. डावीकडे वळून महादेव पालव रोड आणि करी रोड रेल्वे ब्रिज मार्गे गंतव्यस्थानावर पोहोचता येईल.
- वाहने संत रोहिदास चौक (एल्फिन्स्टन जंक्शन) पासून सरळ जातील, वडाचा नाका जंक्शन येथे डावीकडे वळतील. शिंगटे मास्टर चौक येथे पोहोचण्यासाठी याच मार्गाने वाहने लोअर परेल ब्रिजमार्गे पुढे जातील. त्यानंतर, वाहने महादेव पालव रोडवर डावीकडे वळतील आणि करी रोड रेल्वे ब्रिजमार्गे भारतमाता जंक्शनकडे जातील.
- महादेव पालव रोड (करी रोड रेल्वे ब्रिज) हा कॉम्रेड कृष्णा देसाई चौक (भारत माता जंक्शन) पासून शिंगटे मास्टर चौकापर्यंत सकाळी 7 ते दुपारी 3 वाजेपर्यंत आणि विरुद्ध दिशेने दुपारी 3 ते रात्री 8 वाजेपर्यंत एक दिशा वाहतूक खुली राहील. दोन्ही दिशा रात्री 10 ते सकाळी 7 वाजेपर्यंत वाहतुकीसाठी खुल्या राहतील.
महत्त्वाच्या बातम्या
